1 Samuele 25 - Ma Jou ai Demo-demo o Totobelohoka

O Pasala 25:1b – 44 ko atailakouahi O Samuele wohonenge

¹ De ipaha ahao o Samuele wohonenge de o Isiraele ma nyawa mata-mataika yomatoomuino iwihininga una ai dekana wahihira. De iwigari abe ihitunguu manga huha de manga horomati unangika de ahao iwilungunu o ngi moioka abe duru itigioka de ai tau abe o Rama ma kotaka. De o Samuele wopahaka de ahao o Dautu wosobo la womanoali o Parana ma tonaka ma kakaahaka.

O Nabala de ngoi fekata o ngo Abi

^2-3 De ipahaino naga womatengo ai romanga o Nabala abe o Kalebe ai totoforaukuino. De to una ai romanga gea ma titi o bodo ma nyawa. De o Nabala una gea womanoa o Maono ma kotaka, de una duru ai kiahonanga iwoe. Abe naga ai kabingi o gahumu o sana moi de ai domba o gahumu o sana hange. De to una ai datoro ko itiaiua de ka ihikaika o nyawa wao itorou onangika. Masara nako ngoi fekata o ngo Abi, muna gea duru morahai de mososawaro. De gea adonoka ma oraha abe o Nabala ai nyawa yaguti ai domba mata-mataika la to ena ma gogo yomamake. De manga karajaanga gea yodiai o Karamele ma ngioka.

⁴ De o Dautu woihenino abe o Nabala ai domba yaguti,

⁵ ho wairiki ai nyawa yangimoi de wahidingoto o Karamelika la genangoka ka idadi iwidofanga ai hingahu ma demo moi o Nabalika.

⁶ De hokonaa o Dautu ai demo unangika, wato, “O Nabala, ngohi tonganono la ngona de ani tau mata-mataika niamake o hininga ma miriidi de ma rorahai dika nginika!

⁷ Naa ngohi toihene abe adonoka ma oraha la to ngona ani domba ma duduono ngini niaguti. Ho toigo tonihihohininga ma titi ma dihiraino gea, abe ma oraha to ngona ani domba ma gogoana yomanoa ngomioka o Karamele ma ngioka gea. De ma oraha gea ngomi duru ko miahikangelaua ani nyawaika, de hongoli miagoana irahai la ko kia-kiaua o nyawa yomatohiki onangino, ho ko moiua ihihanga manga kiahonangino.

⁸ De ma titi gea ngona ma hirete ka idadi naleha ani nyawaika la duru nohioriki abe ahi demo ka igou-goungu dika. Ho mangale ma titi ngomi ma dihiraino de miniao irahai nginika ho ngohi o Dautu ka idadi tomagahoko o duduhunu ngonaika. Abe ma oraha naa de niaguti nia domba ma gogo de gea ipaha de ngini nihirame-rame abe nia karajaanga gea niabootoka. Ho naa ngomi mimahitipokouku to ngona ani himangoka de mimagahoko la o inomo ma hohutulu nomihidoaka, iti o kia dika nosanangi nomihikodoku ngomino.” De hokogea ma demo abe o Dautu ai nyawa yototaka o Nabalika.

⁹ De ahao o Dautu ai nyawa yomahiadono o Nabalika de yaniiki itiai ai demo ma oraha yadofanga unangika. De ma demo gea iwitemo ibooto de ahao iwidamaa dika la una wopaluhu sarakia.

¹⁰ Masara gea o Nabala ai demo itorou onangika abe una wato, “Nako o Dautu abe o Isai ai ngofaka, una gea tanu onaguna? Angamoi igoungu ma oraha naa naga o huhuloko ma nyawa manga ngoe abe ona ka yoara dika manga dutuoka de yaika de ko yahingounokaua. De bote hokogea dika to Dautu ai hininga ma dorou hiadono wiporete ai koano o Saulika de woara unangoka de waika.

¹¹ De abe ma titi to ngohi ahi roti de ahi akere de ma roehe abe naga ngohioka, gea mata-mata tatingakoka la tahidoaka ona yotobakarajaangika ngohioka. Masara ngini naa o homoa ma nyawa, de tanu duru ko tinihiorikua ngini o kiaka de niaino niboa!” Hokogea o Nabala ai bobaluhu ma demo onangika.

¹² De ai demo gea yoihene ipahaino de ka yosobo iwigilio o Dautika. De yomahiadono de yoade-ade unangika mata-mata abe idadi ma oraha yomarihimanga de o Nabala.

¹³ De ahao o Dautu wahuloko ai nyawaika wato, “Ngini nimataiti nimahidiai la ngone hoiki haparangi onangika gea! Ho ngini homoi-homoi niagoraka nia humaranga de gea nimahidubuluino nia badangoka.” Ho ona de o Dautu ona mata-mata yomahidubuluino de manga humaranga, abe naga ngade-ngade yaratuhu iata yomakiniiki de o Dautu ma oraha yosobo. De nagali ai nyawa yaratuhu hinooto ko yoikua angamoi yomagoo-gogere dika la ka idadi manga kiahonanga yogoa-goana.

¹⁴ Ho ona yosoboka de manga dumutu o Nabalika. De ona yotagi-tagi manga gogiriakahi de doka o Karameloka o Nabala ai huhuloko womatengo woiki ai dutu ngoi fekata o ngo Abika de woade-ade abe hokokia idadioka. Abe una womihingahu wato, “O Dautu wahidingoto ai nyawa yamuruono naga la yoboa naangino de yomakoketemo de ani rokata, de manga demo irahai dika unangika. Masara marai to una ai bobaluhu itorou, abe una ka wahitipokouku de wabobanarata onangika.

¹⁵ De masara ma dihiraino abe ma oraha miagoa-goana mia domba ma duduono de to Dautu ai nyawa yomanoa ngomioka de ona imiao irahai dika. Abe ona ko imihitipokoua de mia domba moioo de ko iwa abe ihihanga.

¹⁶ Abe ona duru imiduhunu angamoi o futu de o wange ona hoka o dadaduhu moi imihigilolitino la ko kia-kiaua ma dorou idadi ngomino.

¹⁷ Masara naa ahi dutu una wahibalaha to ona manga rorahai de ma dorou dika angamoi duru ko wotobagihenua o nyawa manga demo. De ma titi ai hininga ma dorou gea hiadono tohawanoka tato bote o Dautu de ai nyawa yoboaino de iwitoma, de marai ngoneoo mata-mata inahidotadaene de ma bodito gea. Ho naa ma titi gea ngohi toniade-ade ngonaika la marai ngona ka idadi nahiriidi o Dautu de ai nyawa la ufa ngone hobodito.”

¹⁸ De ma huhuloko gea ai demo moihene de ahao o ngo Abi momataiti matoomuino o inomo de o ngokere ma amoko la ahao mahidoaka o Dautu de ai nyawaika. Abe matoomuino ma roti o ratuhu hinooto de o ngi hinooto abe aomanga de o angguru ma gohaka ma teongo de o domba ma gahumu motoa abe ma tomara yaluitoka. De nagali maleino o gandumu abe aharongoka o kilo ngimoi de tumidi, de o angguru ma hofoko ma doolenge o hahaku o ratuhu moi, de o gogilioro ma hofoko o okutu o ratuhu hinooto. Ho gea mata-mata matoomuinoka de ahao ihibarenuku o keledai muruono ma pore-poretuku.

¹⁹ De gea ibooto de muna mahibehehongo ami huhuloko ma nyawaika mato, “Ngini nihira dika, de ngohi bootino de ahao tinihidoduruika.” Masara ami hidee gea ko momahingahua ami rokata o Nabalika.

^20-22 De mangale ma titi o Dautu ai hidingoto ma nyawa gea yoade-ade unangika ma titi o Nabala ai demo, ho o Dautu womatemo ai hiningaka wato, “Ma dihiraino to ngone nanga datoro irahai gea o Nabalika marai ka parahaja dika. Abe ma tonakoka gea de hagoa-goana ai domba ma duduono ho duru ko moiua ihihanga eko yatohiki o nyawa. Masara ma bahauku de una gea wohihibalaha ahi datoro ma rorahai gea de ma dorou dika. Ho naa ngohi tomaputuhoka tato irahai la o wange naa dika ngone hahibinaaha una de ai tauika hiadono duru hamataka. De ngohi tato nako itebini o ngorumino de nagahi utu to una ai tauoka abe ka yowangohi, gea duru ngohi toluku. Ho nako itebini ko hamatauahi, gea irahai la Ma Jou una ma hirete wohihohowono ngohi de ai dodotoko duru ma dubuho!” Hokogea o Dautu ai hininga ma huha. De o Dautu ka wongano-nganonohi ai hininga ma huha gea de ka itodokanino una womimake o ngo Abi gea moboaino abe ami keledai ma poretoka mofarenuku. Ho muna mouti o loku ma geleforuku de onangoo youti ami himangoka ho yomahikitigino hiadono yomakamake ma dolaka.

²³ Ka de o ngo Abi mimake o Dautu de momataiti mouti ami keledaioka de mauku ma tonakuku. De ahao muna duru momaponuku ai himangoka.

²⁴ Ho muna to Dautu ai louoka de momahingahu unangika mato, “Ahi baluhu, abe ma titi ma ribuutu naa, marai gea ma howono mata-mata duru ka ngohioka dika. Ho duru togahoko la ngona ahi baluhu nohihigihene ahi demoino.

²⁵ Nako ahi rokata o Nabala, gea tomangaku dika abe una o nyawa ma dorou, ho koaho to una ai demo ngonaika ngona naofi dika ani hiningaino de ko nolegaikaua. Angamoi bote nohioriki to una ai romanga o Nabala gea ma titi o bodo ma nyawa, de hiokoo abe ai romanga duru imakataana de ai hininga. Ho duru tonganono la ngona ka idadi naofi dika to una ai demo gea. De nako ngohi ma hirete, ngohi ko ihiwa ma oraha ani hidingoto ma nyawa yangimoi yoboaino, ho duru ko tamakeua de ahi lako. Ona yomakoketemo de ahi rokata dika.

²⁶ De naa ngohi tamake duru itararono abe ani Jou o Yawe Una duru wonidatoko la ufa hiadono ngona natoma o nyawa, de ufa hiadono ngona ma hirete nomahibalaha onangika. De ngohi naa duru toigo de tonganono la ani musu mata-mata abe inihidee itorou ngonaika ahao manga hohowono duru itubuho yadaene onanguku. De gea kiani o Nabala unangoo iwidaene de ai hohowono duru itubuho gea.

²⁷ De naa ngohi taoino ti ngini nia inomo de nia ngokere, de ngohi togahoko la ngini niodafongo dika.

²⁸ De tomagahokoo la ngona ka idadi naofi ahi howono o kia dika abe namake ngohioka. Abe nako hoka ani hininga ieteke ma titi ahi demo eko ahi datoro, ngohi duru tomahilooa ma titi ena gea. De ngohi duru tonganono la Ma Jou o Yawe wonihibalaha de ma rorahai ngonaika ma titi ngini naa ka ihikaika nimakalawana de to Una ai musu. De tohioriki abe ani hininga ma datoro ka ma rorahai dika ani wowangoka. Ho Una ahao kiani wonihibalaha de ma rorahai ngonaika la hiadono duru ma dekana ngona de ani ngofa-ngofakukuoli niahikoano to Una ai nyawaika.

²⁹ De ngaro ahao naga o nyawa abe inihidee itorou ngonaika hiadono ato initoma, ngohi duru tonganono abe ani Jou o Yawe winigoana de winidatoko la ufa nobodito. Abe gea Ma Jou winigoana imaketero hoka o nyawa duru yogoa-goana manga kiahonanga ma hohailoa. Masara nako ani musu gea ona ahao wahikokikabarihoka imaketero hoka o hakaru muruono naga abe o nyawa yakelenga manga kawaioka de yaloliti hiadono yapidili de ma hakaru gea duru itagi ma gogurutika.

³⁰ De Una o Yawe ahao duru watobagou-goungu ai behehongo ma demoika ma titi ngona naa, ho Una wonigoraka ngona la ka idadi nahikoano o Isiraele ma nyawaika.

³¹ Ho ufa hiadono ani hidee naa inihirehene hiadono nahowono. Abe nako ahi rokata ai nyawa ona ko iwa manga howono, de nako nahohonenge ahao gea imaketero hoka nomahihowono Ma Jouika de ani hiningaka duru nomatoduba. Masara mangale ma titi ani hidee gea ko idadiuali ho ngaro ufa dika ani hininga ihuha hokogea de ka idadi ani hininga iuwini dika. De naa tomagahoko moi ngonaika. Abe ahao ma oraha Ma Jou o Yawe wonihiowa hiadono ani kuaha ilamoko, tomagahoko la gea ko nohiwohangua ngohi naa masara nohinganono de ani hininga ma owa.”

³² De muna motemo ibooto de ahao o Dautu womipaluhu wato, “Ngohi duru tihigiriiri o Isiraele ma nyawa nanga Jou o Yawe ma titi o wange naa Una wonihidingoto ngona la ka idadi homakamake naangoka!

³³ Abe to Una ai romanga tagorakiye ma titi to ngona ani hininga ma sosawaro, angamoi mangale ma titi ngona naa ani demo hiadono ngohi ko todiaiuali o doma. De ahi hidee la tomahibalaha onangika, gea ko idadiuali.

³⁴ Abe gea Ma Jou o Yawe wohiduhunu la ufa tonihikangela ngonaika. De nako hoka ngona ko nomasikaaua de ko noboaua ahi himangino, gea tagou-goungu tonihingahu abe ngohi togila-gila dika o Nabala ai nyawaika de tahikokibinaaha. Abe itebini o ngorumino adonoka de ona gea duru ko moiokaua. Masara ngona natukoro ahi hidee la ko idadiuali.”

³⁵ De wotemo ipaha de o Dautu wosanangi wodafongo to muna ami hidoaka gea de womihingahu wato, “Ngona nolio dika de ani hininga ma goguwini. Angamoi ngohi tonihigihene ani demoino de tomodeke, ho ko tahohonenguali ani rokata de ai nyawaika.”

³⁶ Ho yomakoketemo ipahaino de muna molio ami tauika. De momahiadono de mamake abe ami rokata wodiai o rame-rame ma amoko manga tauoka, de gea duru wohirame-rame imaketero hoka una o koano ma nyawa. De una duru wososanangi de duru iwidalukoka. Ho ma futu gea de ngoi fekata ko kia-kiaua moade-ade unangika.

³⁷ De ma dawangeino de ai hininga ilioli abe hoka ma dihirainoli, ho muna moade-ade unangika abe hokokia muna de o Dautu yomakamake de yomakoketemo. De o Nabala ka de una woihene ami demoino gea de ka itodokanino ai badanga yolugukuoka ho duru iwitomomonoka.

³⁸ De gea iwidaenuku de ahao ai futu ngimoiokahi dika de Ma Jou o Yawe wihipoha unangika hiadono wohonenge.

O Dautu de o ngo Abi yoilaka

³⁹ De ipahaino abe ma oraha o Dautu woihene ma titi o Nabala wohonengoka de una wotemo wato, “Ngohi duru tihigiriiri Ma Jou o Yawe ai romanga ma titi Una wohihibalaha ngohi ma titi o Nabala gea ai hohedu ma demo ngohino. De hongoli tihigiriiri ma titi Una wohitatoko la ufa ngohi taniiki to ngohi ma hirete ahi hininga de tomahibalaha. De igoungu o Nabala ai datoro ma dorouino gea de wamakeoka ai hohowono abe duru imakataana de ai datoro.” Hokogea to Dautu ai higiriiri ma demo. De ipahaino de o Dautu wahidingoto ai nyawa yamuruono naga o ngo Abika la ai demo yadofanga munangika. Abe una woigo la una de o ngo Abi yoilaka.

⁴⁰ De to una ai nyawa yomahiadono o Karamelika de imidofanga ai demo munangika yato, “Mia baluhu o Dautu womihidingoto ngonaika angamoi wonganono la ngona nominiiki de homakutuono holio unangika. Abe una woigo la ngona de una niilaka.”

⁴¹ De manga demo o ngo Abi moihene de ahao muna momaponuku ma tonakuku de mapaluhu mato, “Ngohi naa hoka ti ngini nia duduhunu dika, ho ngohi ka tosanangi tininiiki la homakiniiki o Dautika. De genangoka marai ka idadi tileleani unangika abe to una ai duduhunu manga lou tatobaihoro.”

⁴² De motemo ibooto de ahao momataiti momahidiai la ka idadi maniiki. De gea mahokino ami duduhunu o ngo-ngofeka yamotoa la onangoo yomakiniiki de muna ami dodagioka. Ho momahidiaioka de muna mobarene ma keledai ma poretuku de ona mata-mata yosobo. De ipahaino de ona yomahiadonoka o Dautu ai tauika de ahao muna de o Dautu yoilaka ho yodadi o giabereki moi.

⁴³ De ma dihiraino abe ko woilakuahi de o ngo Abi de o Dautu woilakokau de o ngo Ahinoama abe o Yisereeloka ma nyawa. Ho naa ona yahinooto yodadioka to Dautu ngoi feka-fekata.

⁴⁴ De abe ma titi to Dautu ngoi fekata mohira-hira o ngo Mikala, abe to Saulu ngoi ora, muna ami baba womitingakoka o Dautino de womihidoaka o nauru womatengoikali. Abe o Saulu womidunia de o Galimi ma nyawa womatengo abe una o Laisi ai ngofaka, ho o ngo Mikala ami rokata ma hungi ai romanga o Palati.