1 Samuele 24 - Ma Jou ai Demo-demo o Totobelohoka

O Dautu woluku witoma ai koano o Saulu

¹ De ma moiuku o Saulu woparangi o Filistina ma nyawaika ibooto de ahao wolio. De ahao naga o nyawa iwihingahu abe o Dautu de ai nyawa ona yamake o Ene-gedi ma tonaka ma kakaahaka.

² De naa o Saulu duru o Dautu wilingiri ho wohidodiai womangiriki o tentara o Isiraele ma tonaka mata-mataino abe ka onangohi wato duru ka idadi iwiduhunu la o Dautu iwitaoko. De ai tentara gea yasana hange abe wairikino de ona iwiniiki la o Dautu de ai nyawa yalingiri o tonaka ma kakaahaka. Abe naga genangoka o hakaru ma loku-loku abe ihiromanga o Fuhuku ma Kabingi ma Ngi.

³ De o Saulu de ai tentara yoboa o tonakino gea de yatilakuru o domba ma kurunga muruono naga. De genangoka naga o aruku ma amoko. Ho naa o Saulu de ai tentara yoboaino de o Saulu kiani womahupu ho una wowohama o arukika gea la ka idadi womahupu doka ma goronaka. Masara ko wohiorikua o Dautu de ai nyawa ona nagau ma hohutulu manga gurutika duru o aruku ma goronaka gea.

⁴ De o Dautu ai dodiawo ona duru iwitemo iwihihudu-hudu, ato, “Adonoka ma oraha abe ma dihira Ma Jou o Yawe wonihingahu wato, ‘Ngohi ani musu ahao tonihidoaka to ngona ani kuahaika la ka idadi nodiai unangika o kia dika noigo nodiai.’ Hokogea Ma Jou wonihingahuokau de igoungu, idadioka naa duru imaketero hoka Ma Jou wotemoka.” Hokogea iwihingahu de ahao o Dautu duru wohidodiai wigogataheke de o Saulu ai baju ma guru-gurutuku ma barene woluiti ho waoka.

⁵ Ma ka de hokogea wodiai de o Dautu ai hininga ihuha abe ai hiningaka womafikiri wato ko itiaiua abe naa wodiai o koanoika abe ai baju ma guru-gurutuku waluitoka.

⁶ De watemo ai dodiawoika, wato, “Ma Jou o Yawe wohimake todiai hokogea de Unangoo wohioriki ko itiaiua hokogea todiai. De angamoi duru ko idadiua hodiai o kia-kia dika ihowono o nyawaika abe Ma Jou o Yawe wahitunguu abe wairikoka la iwileleani.”

⁷ Hokogea o Dautu wahitiari o nau-naurika abe iwidodiawo de ahao duru wataere wato ona ko idadiua o Saulu iwitoma. De ahao o Saulu o aruku gea wohupuoka de wogila-gila.

⁸ De o Saulu ko wokurutikauahi de o Dautu unangoo wohupu o arukino de o Saulu wiboaka, wato, “Ahi baluhu, nanga koano!” Ka de ai demo o Saulu woihene de womadogilioro wolega o aruku ma bionika de wimake o Dautu womaponuku o Saulika hiadono ai pea ngade-ngade itiki o tonakuku.

⁹ De o Dautu ahao womaokoinoli de wiboakoli ai toroa o Saulika, wato, “Ahi baluhu, adodoa ho o nyawa nagihene manga demoino, ona abe ato ngohi toigo tonihikangela?

¹⁰ Duru o wange naa ngona ka idadi namake de ani lako hinooto abe ona ko yagoungua. Abeika abe Ma Jou o Yawe wodiai naa! Una woniao o aruku ma goronaika ka hiadono ngona naga duru ahi datekoka. De ahi dodiawo ihihigaro la tonitoma masara ngohi ko tonitomaua. De ngohi tahingahu tato, ‘Duru ko iwa ma oraha ngohi tihikangela una abe Ma Jou o Yawe wihitunguuoka abe wiirikoka la una gea wodadi nanga koano.’

¹¹ Ahi baba, nomalega ngohino, naa o kia tasoino ahi giamoka? Nenanga ani baju ma guru-gurutu ma dobiki moi abe ahao kangano taluitino masara ko tonitomaua. Naa ma dodunguu abe ihihitaana abe ngohi ko iwa ahi hidee la tonihikangela. Abe ngohi duru ko tahowonua ngonaika ngaro ngona ka ihikaika nohilingiri la nato nohitoma ngohi.

¹² Ho ngaro Ma Jou o Yawe wonaboritailako ngona de ngohi, o nauru inahinooto naa, de ahao Una womaputuhu onaguna inahinootoino naa abe una gea wahohowono. Marai Ma Jou o Yawe ahao wonihohowono ngonaika ma titi ani hidee ngohino itorou masara duru ko iwa ma oraha la ngohi tonihikangela ani badangika ngaro ma dihira de ngaro ma oraha nanga himangoka ma ngohi duru toluku tonihikangela.

¹³ Abe imaketero hoka o demo ma dulu ngoneoka itemo, ato, ‘Nako o nyawa yodiai itorou gea mangale doka manga hiningaka naga o dorou imanoa.’ De nanga demo ma dulu gea ngohi tapake la tomahitunguu abe ngona ka idadi nohihioriki ngohi ko todiaiua ngonaika ma dorou.” Hokogea o Dautu womahingahu.

¹⁴ De wotemohi o Saulika de wapake o hiketero, wato, “De naa tapake o hiketero abe ka idadi tonihitararono abe ma titi ngohi nenanga. Ho ihira tonileha, onaguna abe ngona o Isiraele ma nyawa manga koano ka ihikaika duru nilingiri la ka idadi nitaoko? Una gea ko iwaka ai ija abe imaketero hoka o kaho ma honenge dika, eko hoka o gani moi dika ai ija. De ngona ani karajaanga duru ma ngoe ho adodoa ho napake ani oraha ma ngoe la nilingiri una gea abe una hoka o kaho ma honenge dika?

¹⁵ Ho ngaro Ma Jou o Yawe wonaboritailako ngona de ngohi la waputuhu onaguna wahowono de hiadono kiani wihohowono abe itaana. De Una abe wohidemo ngohi, gea Ma Jou abe Una ahao wohihihupu ani kuaha ma buturungino!” Hokogea o Dautu wihingahu ai hininga o Saulika.

¹⁶ De o Saulu wipaluhu de ai ilingi ma amokiye wileha wato, “Igoungu, ngona ahi ngofaka o Dautu?” Hokogea o Saulu wiboaka o Dautika de womulaenge woari.

¹⁷ De witemoli wato, “Dautu, nako ngona de ngohi ka ngonahi ani datoro itiai angamoi ngaro ngohi ahi hidee ma dorou ngonaika masara ngona nomahibalaha de ma owa dika ngohino.

¹⁸ Igoungu, o wange naa de to ngona ani dora ma hiokoo duru itagi ngohino, abe ma oraha Ma Jou o Yawe wohiao o ngi moi duru ani datekoka, abe igapanga ngona nohitoma genangoka masara ngona ko nohitomaua.

¹⁹ Marai ko iwa o nauru utu abe nako to ona manga musu naga manga kuaha ma goronaka de yahigunoa la ka yowangohi. Masara duru hokogea ngona ka nohihigunoahi la ka idadi ngohi towangohi. Duru tonganono la Ma Jou o Yawe wonihiowa ma amoko ma titi ani dora ma hiokoo abe itagi ngohino o wange naa.

²⁰ De naa ngohi tohioriki maraioka ngona ahao nodadi o koano abe nohituruuru! De ma oraha ngonali nodadi o Isiraele ma nyawa manga koano de marai ona mata-mataika yamake ma owa ma titi nahikoano itiai.

²¹ Ho naa moi ahi gogahoko ngonaika la ufa ahi tauoka ma nyawa nahibinaaha hiadono ahi romanga ihihanga. Ho tomagahoko la nohihibehehongo ngohino de Ma Jou o Yawe ai romanga napake la nohitunguu ani behehongo ma gou-goungu abe ahi ngofa-ngofaka, de ahi dano-danonguku, de ahi totoforauku ko yobinaahaua masara ka yowangohi.” Hokogea o Saulu wotemo de ai toduba.

²² Hokogea o Saulu womagahoko de duru hokogea o Dautu wihibehehongo de womahikoboto unangika. De ahao o Saulu de ai tentara gea yolio dika masara o Dautu de to una ai dodiawo yolio to ona manga dodogumu ma ngiika.