1 Samuele 23 - Ma Jou ai Demo-demo o Totobelohoka

O Pasala 23 ko atailakouahi O Dautu waduhunu o Kehila ma nyawa

¹ De ipahaino o wange moiuku de o Dautu woihene ma abari ma titi o Filistina ma nyawa manga datoro. Abe o nyawa ato bari ona gea yoboa o Kehila ma kotaino de yahikangela onangika hiadono manga pine abe ahao yomagutuku, gea o Filistina ma nyawa yomagora onangino.

² Hokogea woihenino ho o Dautu wileha Ma Jou o Yaweika wato, “Sarakia, irahai la ngohi toiki de talawana o Filistina ma nyawaika gea?” De Una wipaluhu o Dautika wato, “Nagoungu, koaho ngona noikohi la ka idadi naduhunu o Kehila ma nyawa to ona gea manga giamoka de aino.”

³ Masara ipahaino de o Dautu ai nyawa ko yosanangiua de ma hidee gea ho ona ato, “Abeika, ma oraha naa ngaro ngone ka nagahi to ngone nanga tonakoka abe o Yehuda ma tonakoka naa masara hohawanoka! Ho hongoli nako hoiki o Kehila ma kotaika gea la homakalawana de o Filistina ma tentara. Gea de ahao duru hohawanaholi hiadono inatomomonoka!”

⁴ O Dautu woihene manga demo gea ho wilehali Ma Jouika ma titi ma hidee gea. Masara Ma Jou o Yawe ai hininga ko watururua ho wato, “Nomasikaa la noikohi o Kehila ma kotaika, angamoi Ngohi naa ka idadi tahidoaka o Filistina ma nyawa gea to ngona ani giama ma hoatika.”

⁵ Ho o Dautu de ai nyawa ona yosobo de yoiki o Kehila ma kotaika la yomakalawana de o Filistina ma nyawa. De duru igoungu abe ona duru yahikala onangika de nagali abe o Filistina manga hapi mata-mata yomahitoona. De hokogea o Dautu ka idadi waduhunu o Kehila ma nyawa abe manga musu manga giamoka de aino.

O Saulu winii-niiki wihidoduru o Dautika

⁶ De ma dihiraino abe manga hidemo ma nyawa o Abiatara woara o Sauloka de waika la womahidogo o Dautika, ma oraha gea de womagao o efodo abe gea o hidemo ma nyawa manga baju ma rorahai. De ma efodo gea ka nagahi o Abiataroka ma oraha naa abe ona o Kehila ma kotaka.

⁷ De ipahaino de o Saulu woihene ma titi o Dautu abe o nyawa iwihingahu ato, “O Dautu ma oraha naa una naga o Kehila ma kotaka.” De o Saulu woihene ma abari gea de womatemo wato, “Naa maraioka Ma Jou wihidoaka o Dautu to ngohi ahi giamino, angamoi naa imaketero hoka o Dautu womahidukusioka o kota gea ma goronaka, abe ma kota naga ihigilolitino de o dadaduhu ma amoko de nagali ma kota ma ngorana abe yodiai o behino.”

⁸ Womatemo hokogea de ahao o Saulu de ai tentara ma nyawa mata-mata yomataiti yosobo yoikohi o Kehila ma kotaika la ka idadi o Dautu de ai nyawa yahioluino.

⁹ Masara ipahaino de o Dautu woihene abe o Saulu naga iwihidee unangika, ho wiahoko o Abiatara unangino de wihuloko wato, “Kiani naoino o efodo gea la ka idadi hohioriki Ma Jou ai hininga!” De o Abiatara waoino ma baju ma rorahai gea o Dautino.

¹⁰ De ahao o Dautu womagahoko wato, “Mia Jou o Yawe, abe Ngona to ngomi o Isiraele ma nyawa mia Jou, ngohi naa duru tomagahoko o duduhunu Ngonaika. Abe ngohi toihenoka ma titi o Saulu ai hidee la woboa o Kehila ma kotaino naa de duru wahibinaaha enangika ma titi ngohi naga naangoka.

¹¹ Ho naa tonileha, gea igoungu abe una woboaino? De nako hoka woboaino, sarakia, o Kehila manga hihira ahao ihifukunu o Saulu ai giamika eko ihidatoko? Ho duru tomagahoko la Ngona Ma Jou o Yawe, to ngomi mia Jou, nohipaluhu la ka idadi tohioriki hokokia ahao idadi.” De ahao Ma Jou o Yawe wipaluhu wato, “Igoungu, una gea woboa.”

¹² Ho o Dautu wileha ma moioli wato, “De abe ma titi o Kehila manga hihira, sarakia, ahao ona ihifukunu la ngohi de ahi nyawa imihidoaka dika o Saulu ai giamika?” De Ma Jou o Yawe wipaluhu wato, “Nagoungu, ahao ona inifukunu.”

¹³ Ho gea o Dautu woihene de ahao una de ai nauru yaratuhu butaanga gea yomataiti yosobo o Kehila ma kotaka gea de yoiki ma homoaika de yotagi-tagi yaika yaino genangoka. De gea ipaha de naga abe iwihingahu o Saulika ato o Dautu wanoaikaka o Kehila ma kota gea. Ho ma bahauku de o Saulu ko wogila-gilaua o Kehila ma kotaika masara ka womaleloro dika ai poretino de wolio ai tauika.

O Dautu womagogono o tonaka ma kakaahaka

¹⁴ De ma oraha gea o Dautu de ai nyawa yomanoa-noa o loku-lokuoka abe naga o Sifi ma tonaka ma kakaahaka. De ngaro o Saulu ka ihikaika wilingiri ma tonakoka gea masara Ma Jou widuhunu o Dautika ho ko idadiua widaene.

¹⁵ De ipaha ma moiuku o Dautu naga o Horesoka abe o Sifi ma tonaka ma kakaahaka. De naga abe iwihingahu ato o Saulu naga woboainoli de wihidee la wihohonenge unangika.

¹⁶ De ahao nagali o Saulu ai ngofaka o Yonatana una woiki la ka idadi witutumu o Dautu o Horesoka gea. De wiadono de o Yonatana wihigaro o Dautika de wihiputurungu ai ngongaku Ma Jouika.

¹⁷ Abe una wihigaro wato, “Ufa ngona nimodongo ahi babaika, angamoi una ko idadiua wonitoma ngonaika. De hongoli ngona ahao inigoraka la nomihikoano ngomi o Isiraele ma nyawa, de ma oraha gea ahao ngohi naga ani datekoka abe todadi ani hehebanga. De ma titi gea ahi baba unangoo tanu wohiorikoka.”

¹⁸ De gea wotemo ipaha de ahao ona yahinooto yomahiketehibehehongokali Ma Jou o Yawe ai himangoka la yomakao irahai dika. De ipaha ahao o Yonatana una wolio ai tauika masara o Dautu ka womanoahi o Horesoka gea.

¹⁹ De ipahainoli de naga o Sifi ma nyawa yamuruono naga yoiki o Saulika abe o Gibea ma kotaka. De ona yomahiadono manga koanoika de iwihingahu ato, “Ngomi wiwimake o Dautu to ngomi mia tonakoka, abe una womagogono o Hakila ma lokuoka. O Hakila gea imanoa o Horese ma digi-digino de o Yehuda ma tonaka ma kakaahaka ma honongaka abe dakuiye idateke.

²⁰ Ho naa, mia koano, ngomi miato ngona ka idadi noboa dika to ngomi mia tonakino de gea ngomi naa misanangi wiwihidoaka una to ngona ani giama ma hoatika.”

²¹ De manga demo gea woihene de o Saulu wato, “Ngaro ngini naa niamake ma owa Ma Jou o Yaweoka de aino ma titi nia hininga ma dora gea ngohino.

²² Ho abeika ngini nihiraika de duru niatailako to una gea ai dogogono ma ngi, de nialingiri ma nyawa onagona dika abe iwimakeoka de to ona manga lako hinooto la ahao duru hohioriki ai ngi. Angamoi o nyawa ihihingahuoka abe una gea duru wososawaro, de ma muruono ibooto wohidokaowara ho ko tidaenuahi.

²³ Ho ngini kiani niatotailako ai dogogono ma ngi mata-mataika de ahao nilio ngohino la nia demo duru itaana ma titi una gea. De gea ahao ka idadi hosobo homakiniiki unangika. De ngaro una wato womagogono o kia-kiaka dika o Yehuda ma tonaka ma amokika masara ka idadi ngohi timake de titaokino.”

²⁴ Hokogea yomahiketehibehehongo ibooto de ona yosobo yohiraika o Sifi ma tonakika. De ma oraha gea o Dautu de ai nyawa ona naga o Maono ma tonaka ma kakaahaka abe imanoa o Yehuda ma tonaka ma dolaka de idateke dakuiye.

²⁵ De naga o Sifi ma nyawaino gea abe iwimake o Dautu genangoka de iwihingahu o Saulika, ho o Saulu de ai nyawa ona yosobo la iwilingiri o Dautu. Masara o Dautu una woihene ma titi manga boa ho una wosobokali woiki o lokuhakaru moiika abe imanoa o Maono ma tonaka ma kakaahaka. De ipahaino o Saulu unangoli woihene ma titi o Dautu ai dodagi gea, ho wihidoduruika o Dautika hiadono o Maono ma tonakika gea.

²⁶ Ho ma lokuhakaru gea naga manga hidogoronaka, abe o Saulu de ai nyawa de o Dautu de ai nyawa ona ka yomaketehonongaino. De ipahaino ahao o Dautu wato womataiti woara, masara o Saulu de ai nyawa iwimake de ngade-ngade yahigilolitino o Dautu de ai nyawaino la ka idadi iwitaoko.

²⁷ Masara duru ma oraha gea de naga womatengo o hidingoto ma nyawa woboa o Saulino de naga waoino ma abari. De una wihingahu o Saulika wato, “Ahi koano, bari ngona kiani nomataiti noboa nomiduhunu ani nyawa abe mia tonakoka, angamoi o Filistina ma nyawa yoboaka de imibaataika ho duru mikangela ma titi mimakalawana de ona!

²⁸ Ho o Saulu ka widogunoaika dika de ko witaokinouali o Dautu la ka idadi una de ai tentara ma nyawa yolio manga tonakika de yomakalawana de o Filistina ma nyawa. Ho mangale ma titi gea hiadono o nyawa ihiromanga ma lokuhakaru gea ato “O Lokuhakaru abe Yahikatingaka o Nyawa.”

²⁹ De gea ipaha de o Dautu wosobokali la una de ai nyawa yoiki o Ene-gedi ma loku-lokuika. (24:1 in Indo / Hebrew)