1 Samuele 22 - Ma Jou ai Demo-demo o Totobelohoka

O Pasala 22 ko atailakouahi O Saulu wahohonenge o hidemo ma nyawa

¹ De ahao o Dautu o Gaata ma kotaka de wosobo de woaroli o aruku moiika abe ko ikurutikaua de o Adulama ma kota, de womagogono ma aruku gea ma goronaka. De ko iwitedekanuahi genangoka de to una ai ria-dodoto de ai gogianongoru utuoli onangoo yoboa unangino de yomanoahi unangoka.

² De ipahaino nagali o nyawa utuoli manga ngoe abe yoboaino la yomahidogo to una ai nyawaika. Abe ona utu manga wowango de ma huhaka, de utuoli naga manga nagimi ko apoaua ihingodumu, de nagali abe manga hininga ieteke. Ho ona mata-mata yomahidogo unangika hiadono to una ai nyawa abe wahipareta ona manga ngoe yaratuhu iata.

³ De ipahaino o Dautu wosobokali de woiki o Misipa ma kotaika abe imanoa o Moaba ma tonakoka. De womahiadono genangika de woiki manga koanoika la yomarihimanga de una, de witemo ma koanoika wato, “Naga ahi baba de ngohi meme mimakiniiki ani kotaino naa. Ho ngohi tomagahoko la nahigunoa ona yahinooto yomahidodogumu ngonaka. Abe ngohi ko tohiorikuahi to Ma Jou ai hininga ngohino, ho tomagahoko la ngona nagoanohi ahi dimono gea.”

⁴ De ma koano wosanangi womodeke o Dautu ai demoika, ho to una ai dimono gea yomahidodogumu de o Moaboka manga koano hatoli manga dekana. Abe o Dautu naga ai gogogono ma ngi duru irahai ma tonakoka gea, ho to una ai dimono yomanoa ma koano ai tauoka ka hiadono o Dautu womaturuuru o ngi moiikali.

⁵ De ipaha o wange moiuku naga Ma Jou ai uru ma dodofanga womatengo ai romanga o Gaada, de una woboa o Dautino. Ho una wadofanga o hingahu moi o Dautika wato, “Ko idadiokaua ngona nomanoa nenangoka. Kiani nosobo de nolio o Yehuda ma tonakika.” De gea woihene de ahao o Dautu ka wosobo de woiki o Kerete ma fonganika la womanoa genangokali.

⁶ De o Dautu ko iwitedekanuahi ma fonganoka gea de o Saulu woihene ma abari ma titi una. Abe naga o nyawa yamake o Dautu de ona abe yomakiniiki de una de ahao ona iwihingahu manga koano o Saulika. De ma oraha abe o Saulu woihene ma abari de una naga wogogeruku o gota ma amoko ma timiuku, abe gea imanoa o lokuoka moi o Gibea ma tonakoka. De gea wogogeruku de wasoino ai kuama ai giamoka, de to una ai tentara ma nyawa manga hae-haeke naga yomatoomuino unangoka.

⁷ De ahao o Saulu duru ko wosanangiua ho watemo waamo-amokiye ai nyawaika gea wato, “Ngini o Benyamini ma nyawa naa, abeika nitotoihene ahi demoino! Ho naa tinileha, sarakia, bote o Isai ai ngofaka gea winihibehehongo wato winihidoaka nia utumu nginika nako niwiniikoli unangika, e? Abe marai una wato ahao winihidoaka o redi ngini homoi-homoiika iti niwiduhunu, eko sarakia? Eko marai wato ahao winihidadi ngini mata-mata to una ai tentara ma hae-haeke?

⁸ De bote ena gea ma titi hiadono nihihidee itorou ngohino! Angamoi abeika, nengokadau ma oraha una gea de to ngohi ahi ngofaka yomahiketehibehehongo de ngini ko moiua nihihingahu ngohino! Ho itararono abe nia hininga ko itagiua ngohino. De o Dautu una gea ma dihiraino de wodadi ahi duduhunu, masara ma oraha naa de ahi ngofaka wihigaro o Dautika la ka idadi o Dautu wohihagogono de wohitoma! Masara ngini naa ko moiua nihihingahu ma titi manga hidee gea!”

⁹ De gea ma oraha wataere onangika de naga ai nyawaka o Doege abe o Edomo ma nyawa gea. Ho o Saulu wataere ipahaino de ahao o Doege wihingahu o Saulika wato, “Ma dihiraino abe ma oraha ngohi naga o Nobo ma kapongoka de timake o Isai ai ngofaka gea, de una yomakoketemo de o Ahimeleke abe ma hidemo ma nyawa genangoka.

¹⁰ De ipaha o Ahimeleke wigahoko Ma Jou o Yaweika la wihihira-hira o Dautika. De wigahoko ipaha de ahao wihidoaka unangika o inomo de o Goliata ai humaranga.” Hokogea o Doege wihingahu o Saulika.

¹¹ De ma koano o Saulu woihene ma hingahu gea ipahaino de ahao womataiti wabehehongo o Ahimeleke de ai dutu adaene mata-mataika abe onangoo yodadi o hidemo ma nyawa. De ona gea manga leleani ma ngi o Nobo ma kapongoka.

¹² De ipaha ona mata-mata yoboa ai himangino de una wibanarata o Ahimelekika wato, “Ngona abe o Ahitubu ai ngofaka, kiani ngona duru nototoihene ahi demoino!” De gea una wopaluhu wato, “Iya, ahi koano. Marai naga ani perelu o kia?”

¹³ De ahao o Saulu wotemo wato, “Ho, done sarakia ngona de o Isai ai ngofaka o Dautu? Abe ngini inihinooto nihihidee itorou ngohino! Nengokadauino ngona nihidoaka unangika o roti de o humaranga, de nagali abe nigahoko Ma Jouika la Una wihihira-hira o Dautika. Ho ma bahauku de o Dautu gea wohilawana de hiadono wohihidee wato wohitoma ngohino!”

¹⁴ De witaere ipaha de o Ahimeleke wipaluhu ma koanoika wato, “Koua, ahi koano! Abe nako o Dautu una gea to ngona ma hirete ani toroa, de una wodadi ani gogoana ma nyawa manga hihira. De hongoli to una ai romanga duru ikurutiye ani tauoka. Abe ngaro ani nyawa mata-mataika masara ka unangohi duru wotobagou-goungu ai wowangoino.

¹⁵ De ngona nagoungu abe nengokadau de ngohi tigahoko la Ma Jou wihihira-hira unangika, masara gea ahi biaha angamoi ahi leleani ma gogiriaka de ka ihikaika todiai hokogea. Ho ufa hiadono ma titi gea dika de ngona ahi koano nohitaere nato tahowono. De ngaro ahi dutu adaene masara ufaoo nataere onangika. Angamoi ngohi naa duru tagoungu tonihingahu abe ma hohutuloo de ko tohiorikua ma titi o nyawa manga hidee itorou ngonaika!”

¹⁶ Masara ma koano witemoli unangika wato, “Koua, ngohi naa tonihingahu dika abe ngona de ani tau mata-mata kiani ngini nikokihonengoka!”

¹⁷ De ahao wahuloko ai gogoana ma nyawaika wato, “Ngini kiani niahohonenge ona naa abe o hidemo ma nyawa Ma Jou o Yaweika, angamoi ona yomahikeketoka de o Dautu la ihilawana ngohino! Abe ona iwihioriki o Dautu womahiloara ngohioka de waino masara ko ihihingahua!” Hokogea ma koano ai huhuloko ma demo, masara ai gogoana ma nyawa ka yoluku yahohonenge Ma Jou o Yawe ai hidemo ma nyawa gea.

¹⁸ De ipaha de ma koano wihuloko o Doegikali wato, “Ho, ngona dika nodiai!” De una gea womasikaa wabaata onangika de watoma o hidemo ma nyawa yamoritufange de yamotoa ma wange gea dika. De ma oraha watoma de ona ka yapakeohi manga hidemo ma nyawa manga baju ma rorahai.

¹⁹ De o Doege watoma ipahaino de ahao una woiki to ona manga kapongika. Ho o Nobo ma kapongika womahiadonika de o hidemo ma nyawa manga dutu mata-mataika onangoli watoma. Abe ngaro o nau-nauru de o ngo-ngofeka de ngaro hiadono o ngofa-ngofaka ma gilau masara ona mata-mataika wahohonenge. De to ona manga aewanioo wakokitomaka, abe ma titi manga hapi de manga keledai de manga domba de manga kabingi, ena gea mata-mata wakokitomaka.

²⁰ Masara naga o Ahimeleke ai ngofaka womatengo abe wakunu womahiloara ho ko iwihohonengua. De una gea ai romanga o Abiatara, de una woara o Dautika.

²¹ De o Abiatara womahiadono unangika de wiade-ade o Dautika ma titi hokokia o Saulu wahohonengoka o hidemo ma nyawa Ma Jou o Yaweika gea.

²² Gea woihene ipaha de o Dautu wato, “O Doege gea tanu tihiorikoka ai hininga! Abe nengokadauino ma oraha una naga ani babaka de timake de ngohi tato maraioka una ahao wihingahu o Saulika. Ho ngohi naa duru tamao abe ngohi ma hirete tahowonoka! Abe to ngona ani baba de ani dutu mata-mata manga hohonenge imaketero hoka ihitapaluku ngohiuku!

²³ Ho ngona o Abiatara, ngona ka idadi nomanoa ngohioka dika de ko kia-kiaua idadi ngonaika. Abe ngohi tonihibehehongo ngonaika tato duru tonigoana la ufa ngonaoo nohonenge. Angamoi una gea abe wonihidee ngonaika, unangoo wohihidee itorou ngohino wato wohitoma. Masara ngohi duru ko tihigunoaua, ho ibootohi nimodongo unangika gea.” Hokogea o Dautu wilaru o Abiatarika.