1 Samuele 20 - Ma Jou ai Demo-demo o Totobelohoka

O Yonatana widuhunu o Dautika la ufa ai baba witoma

¹ De o Dautu woaroli ho o Naioto wanoaikali de woiki o Yonatanika de wileha ai dodiawoika, wato, “Ngohi o kia todiai ani babaika hiadono ai hininga kuranga ngohino ma amokoholi? O kia ahi howono? Una naa ai hininga ka moi dika de gea wato kiani wohitoma.”

² De o Yonatana wato, “Duru hokogenangua! Ngona ko nohonengua! Marai ahi baba ai hidee hokogea ko iwa angamoi ngaro ai hidee o kia dika naga de ko wodiaiuahi de wohihingahuoka ngohino. Ho nako naga ai hidee hokogea de duru ngohi tihioriki abe una ko wagogonua la ufa tohioriki. Ho ko igoungua!” Hokogea o Yonatana widemo ai baba.

³ Ho o Dautu wopaluhu wato, “Ahi geri, tomahilooa, masara ani baba una wonahioriki abe ngona de ngohi duru homaketedodiawo de marai ko woigoua ngonaika wonihihuha de ai hidee ngohino gea, ho marai gea ma titi hiadono ko wonihingahua. Masara ngohi naa tonihibehehongo de o koboto, abe ahi behehongo ma demo duru igoungu angamoi tapake Ma Jou o Yawe ai romanga, ho duru imaketero hoka Ma Jou igoungu wowango, de ngonaoo igoungu nowango, to ngohi ahi behehongo ma demo nenanga enangoo duru ma gou-goungu. Abe ngohi naa ahi aguru moiokahi dika de ahi honenge ma boditoika tadonoka!” Hokogea o Dautu wihingahu o Yonatanika.

⁴ De o Yonatana wato, “Ahi dodiawo, nohihingahu dika abe noigo todiai! Ngohi ahi hininga moi de gea la toniduhunu.”

⁵ De o Dautu wihingahu, wato, “Itebini naga o Mede ma Hungi ma rame-rame ma ngolo-ngolomo de ma dihirainohi ngohi kiani naga nginioka ani baba ai mejaka. Masara itebini ngohi ko ihiwa abe tomagogono dika ma hoanoka abe ma ngi gea nohiorikoka de ka hiadono ahi futu hangeino genangoka.

⁶ De nako ani baba wonileha ma titi ngohi ko ihiwa ai mejaka de nihingahu dika abe tomahilooa abe ko taniikuahi angamoi adonoka ma oraha ahi baba ai tauoka mia huhuba o Beteleheemoka abe o tao-taongiye kiani ma moi ngomi midiai de ngohi toigo la mia huhuba gea taniiki. Hokogea ningahu la ani baba ai babaluhino womahitunguu ai hininga ngohino.

⁷ Abe nako ani baba wotemo, wato, ‘Ka idadi waniiki dika, adodoaua.’ Nako hokogea ai demo de gea hihioriki ai hininga ma hohailoa dika. Masara nako wongamo hiadono ai hininga ko wohiorikokaua de gea womahitunguu ai hidee ma dorou naga ngohino.

⁸ Ahi dodiawo nako hokogea ai hininga wohimatoko, ngohi togahoko la ani dora ma hiokoo ngohino itagi angamoi hokogea ngona de ngohi Ma Jou o Yawe ai himangoka homahiketehibehehongoka. Abe gea ngone hato ko moiua hohigunoa ihirusaka nanga gogao ka hiadono hohonenge. Ho nako igoungu tahowonoka ani babaika ngohi toigo la ngona dika nohihohonenge. Iti ufa ngona nohifukunu ani baba ai hidee ma dorouika.” Hokogea o Dautu womagahoko ai gerika.

⁹ De o Yonatana wato, “Duru ko ma iwa ma oraha abe ko toniduhunua! Olo, ngona nohihioriki ngohi, abe ngaro duru ma hohutulu dika tamake ahi baba ai hidee wonitoma de ngohi duru tomataiti tonihingahu ngonaika!”

¹⁰ De ahao o Dautu wileha wato, “Ho hokokia ani ngekomo la ka idadi nohihingahu ngohino ani baba ai hininga abe nako wopaluhu de ai ngamo eko koua?”

¹¹ De o Yonatana wopaluhu wato, “Abeika, olo, hoiki o kota ma hoanika gea.” Ho yosobo yomakiniiki genangika.

¹² Ho ona genangoka de o Yonatana ai hininga ma hidee wihingahu ai geri o Dautika, wato, “Ngohi naa tonihibehehongo ma gou-goungu abe de Ma Jou o Yawe ai romanga tapake abe Una to ngone o Isiraele ma nyawa nanga Jou. Marai itebini adonoka o wange hokonaa de ngohi de ahi baba ka idadi mimakoketemo. Masara nako ma oraha ko tamakeuahi de ahao hinootoka mimakoketemo la tolingiri ma titi ahi baba ai hininga ngonaika. De ngaro itebini eko hinootoka ma ka de ai hininga tihioriki de tomataiti tohidingoto ahi hingahu ngonaika. De duru tonganono ahao ka idadi tonihingahu abe o baba ai hininga ma hohailoa dika ngonaika.

¹³ Masara nako una ahao duru wongamo de ahao tihioriki woigo wohiaturu ma ngekomo la wapake o nyawa utuino la ona inihohonenge. De nako hokogea ai hininga ngohi duru tagou-goungu ahao tonihitiari la ka idadi noara la ufa nohonenge. De ahi behehongo ma demo naa ka idadi ngona nangaku angamoi ngohi naa tomahikoboto abe tomagahoko la Ma Jou o Yawe wohihohonenge ngohi nako ko toniduhunua tonihitiari. De naa tonigahoko la Ma Jou o Yawe ka ihikaika woniniiki ngona imaketero hoka ma dihira Una winiiki ahi baba.

¹⁴ De olo, tomagahoko ngonaika la nohiao de Ma Jou o Yawe ai dora ka hiadono to ngohi ahi wowango ma bobaha o duniaka. Abe Ma Jou o Yawe ai dora duru ko itoa-toakua. Masara nako idadi ngohino hiadono tohonenge de hokonaa ahi gogahoko.

¹⁵ Ho togahoko la ngona ka ihikaika naduhunu ona abe naga ahi tauoka, la ani dora duru ko itoa-toakua ka hiado-adonika. De ahao ma oraha adonoka to ngona ani musu Ma Jou o Yawe wakokihohonengoka de ona ahi tauoka kiani naduhunohi.

¹⁶ De tonganono nanga behehongo mata-mata abe homahiketehibehehongoka ko iwa ma oraha abe ahao ngona ko naniikokaua. Ho kiani nogoana la ufa ngohi ani dodiawo o Yonatana ahi romanga ko yafetongokaua ani tauoka. Abe tomagahoko ngonaika la ka ihikaika ahi ngofa-ngofakuku de ahi dano-danonguku ngona de ona ani tauoka yao itiai.” Hokogea o Yonatana womagahoko o Dautika.

¹⁷ De ahao o Yonatana womagahokoli o Dautika wato, “Olo, done ngone ko homakamakeokauali ho naa togahoko la ngona nohihibehehongoli de ani dora ngohino la ani behehongo ma demo imaketero hoka ma dodihiraka ngone homahiketehibehehongoka.” Hokogea o Yonatana angamoi widora o Dautika imaketero to una ma hirete ai roehe wodora.

¹⁸ Ho ipaha manga behehongo ibooto de ahao o Yonatana wihingahu ai hidee abe hokokia ma ngekomo la ka idadi ai baba ai hininga wihingahu o Dautika, wato, “Ho itebini ma oraha ngomi o baba ai tauoka mimatoomuino o Mede ma Hungi ma rame-rame ma ngolo-ngolomo ma mejaka, de ani ngi igoungu ma homoa, de ngomi utu minihininga.

¹⁹ De ahao hinootoka duru o bobimaowaka de kiani ngona naga o gogogono ma ngioka abe ma dihiraino nomagogono genangoka. Abe ngona kiani naga o hakaru ma doomu ma datekoka abe ma dihira o nyawa o hakaru ma ngoe yaumo genangika.

²⁰ De ngohi o bobimaowaka gea toboa genangino hoka toigo tolati totoimi ho ahao ahi hihiipi ma gahumu hange tao de tohitoimi o hakaru ma doomu ma datekika imaketero hoka naga o hilati ma dodunguu genangoka.

²¹ De naga o ngofaka moi wohidodiawo la wohile-le ahi hihiipi abe tohitoimika. De nako tihuloko ma ngofakika gea tato, ‘Ma hihiipi gea ko iniadonikaua de genangika itubuku, ho ngona kiani nomahitigino ma hutulu ngohino.’ Nako ahi ilingi ma boaka unangika hokogea noihene, de ma titi ngonaika abe ani kangela ahi babaino ko iwa de ngona nohioriki ka idadi noboa ngohino. Abe imaketero hoka igoungu Ma Jou o Yawe wowango ka hiado-adonika de hokogenangoli ka idadi nohioriki igoungu ani bodito ahi babaino ko iwa.

²² Masara nako o ngofaka gea tihuloko tato, ‘Kiani utuohi ma gurutika nolingiri ahi hihiipi angamoi ma hutuikahi ani himangika itubuku.’ Naa, ahi dodiawo, ka de noihene ahi ilingi ma boaka gea de nohiorikoka kiani nomataiti nosobo angamoi Ma Jou o Yawe wonihidingoto o ngi moiikali.

²³ De ngohi tongaku abe Ma Jou o Yawe ka ihikaika Una wonagoana ngone homoi-homoiika de Una wonaduhunu la ka idadi haboriniiki nanga behehongo ma demo abe homahiketehibehehongoka to Una ai himangoka.” Hokogea o Yonatana ai hiaturu ma hingahu.

²⁴ Ho ahao o Dautu womagogono ai gogogono ma ngioka ma hoanoka gea. De doka o koano ai tauoka ka de adonoka o Mede ma Hungi ma rame-rame imulaenge de ona yomatoomuino ai mejaka la yolomo yomakutuono.

²⁵ De o koano wogogeruku ai ngioka woporetika ma dadaduhika, de o Yonatana naga ai ngioka abe duru yomarihimanga una de ai baba. De ai pepe o Abanera wogogeruku o Yonatana ai datekoka masara o Dautu ai ngioka ko moiua yogogere.

²⁶ De o Saulu wamake o Dautu ai ngi ma homoa de womatemo doka ai hiningaka wato marai naga moi idadi o Dautoka hiadono womahipeseke Ma Jou ai himangoka. De o Saulu wato bote gea ma titi hiadono o Dautu ko iwiwa ma mejaka, ho o wange gea o Saulu ko kia-kiaua wotemo ma titi o Dautu ko woboauahi manga ngolo-ngolomino.

²⁷ Masara ma dawangeino ka de o Saulu wamake abe o Dautu ko woboaua ai ngiino de wileha o Yonatanika wato, “Adodoa ho o Isai ai ngofaka, o Dautu, ko iwiwa nanga ngolo-ngolomoka abe ngaro ma wange naa de ngaro kanugono ma una ko woboaua.” Hokogea o koano wileha o Yonatanika.

²⁸ De o Yonatana wihilooa wato, “Baba, o Dautu duru womahilooa ngohino de womagahoko la ka idadi o Beteleheemika woiki.

²⁹ De woiki mangale ma titi waniiki ona o tau moi manga huhuba yodiai. De angamoi ai riaka wihuloko unangika abe kiani unangoo naga ho ngohi tihingahu o Dautika abe ka idadi woiki waniiki. De hokogea ma titi hiadono una ko iwiwa nenangoka.” Hokogea o Yonatana ai demo.

³⁰ Ka de hokogea wihingahu ai babaika de o Saulu ai ngamo duru ifae kohaamoko hiadono widoana ai ngofakika, wato, “Ngona naa tonietongo o ngofeka abe momafuku-fukunu ami badanga ami ngofaka hiadono ani bodo hokonaa! Ngona nofikiri ko tonihiorikua abe to ngona ani mau la o Dautu wonituruuru hiadono una wodadi o koano! Ho done ngona ko namakeua o koano ma kuaha de ko nopusingua? Ngona tonihiorikoka! Ngona naa duru nomahimaleke ngaro ngona, de ngaro ngoni memeikaoo, ma, nomihimaleke munangoo!

³¹ Nako o Isai ai ngofaka gea ka wowangohi de ahao ngona ko idadiokaua nahikoano o Isiraele ma nyawa manga tonakoka naa. Ngona naa tonihuloko la ngona noiki nile de niao nenangino angamoi adonoka ma oraha abe kiani una gea wohonengoka!” Hokogea o Saulu ai daleana ma dohata o Dautika.

³² Masara o Yonatana duru wileha ai babaika, wato, “To una ai howono o kia? Duru ko iwa! Ho de ma titi o kia hiadono ngona nato kiani nihohonenge?”

³³ Ka de hokogea o Yonatana o Dautu widemo, de o Saulu itodokanino de ai kuama o hokiiki ai datekoka wagoraka de wituduku o Yonatanika angamoi womahiboi abe doka ai hiningaka womatemo wato, “Ngaro ahi ngofaka idodutu ma ka titoma dika.” Ho ngaro o Saulu ka wingofu dika masara naa o Yonatana duru ai baba wihioriki abe igoungu womaputuhoka ahao o Dautu witoma.

³⁴ De duru o Yonatana de ai ngamo ilamokoholi ho woikoka, manga ngolo-ngolomo wanoaika de duru woluku wolomo o wange gea angamoi ai hininga duru ihuhaholi ma titi ai baba ai datoro hokogea duru iwihimaleke. De utuohi wohuha ai baba ai dohata ihititi o Dautika.

³⁵ De ma dawangeino o Yonatana woiki o kota ma hoanika de wodiai imaketero hoka wihibehehongoka o Dautika. De naga o ngofaka o Yonatana winiiki la ka idadi wile-le ai hihiipi abe wohitoimika.

³⁶ Ho wohitoimuahi ai hihiipi de o Yonatana wihuloko o ngofakika wato, “Ngona nomapopaata dika dokenangika la ka de tohitoimika de ka idadi nagoraka.” Ho o ngofaka womapopaatika de o Yonatana ai hihiipi wohitoimi la wihidilakuriha.

³⁷ De ka de o ngofaka ngade-ngade womahiadono ai hihiipika de o Yonatana wiboaka unangika wato, “Ma hihiipi gea utuohi ani himangika.”

³⁸ De wiboakoli wato, “Nomatai-taiti dika abe ngaro ufa nohidamaa hiadono toboaika.” Ho ma ngofaka gea duru womataiti wakokigoraka ai hihiipi mata-mata de womapopaata wohigilio ai baluhika.

³⁹ O ngofaka gea ko womangaratiiua abe o Yonatana ai demo ma titi angamoi o Yonatana de o Dautu dika ihioriki ai demo ma titi.

⁴⁰ De ahao o Yonatana ai toimi de ai hihiipi mata-mata wihidoaka ma ngofakika de wihuloko la wohigilio ai tauika o kota ma goronaka.

⁴¹ Ho ka de o ngofaka gea woiki ai gurutikaka de o Dautu wohupu ai gogogono ma ngiino abe duru imakadateke de o hakaru ma doomu gea. De o Yonatana ai himangoka ma hange o Dautu womaponuku hiadono ai himanga itiki ma tonakuku. De ona yahinooto duru manga dora itagi hiadono manga koongo itifa angamoi kiani yomakitingaka ho yomakokooino yoari-ari de yomahiketehilooa. Ma nako o Yonatana ai huha de o Dautu ai huha ma ka o Dautohi ai hininga duru ihuha.

⁴² De ma bahaika o Yonatana wihingahu o Dautika wato, “Ngaro naa noiki ma tonigahoko la ani hininga Ma Jou o Yawe wonihiriidi. De ngohi hokogea tonigahoko ma owa angamoi ngone ma dodihiraino homaketedodiawo homahiketehibehehongoka de Ma Jou o Yawe ai romanga. Abe nanga behehongo ma demo naga la nanga ngofa-ngofaka de nanga dano-danonguku ka imahikauku yaniiki nanga behehongo gea.” Hokogea manga dodiawo ma behehongo ihigalioli de ahao o Dautu wosobo woara de o Yonatana wolio ai tauika o kotaka.