1 Samuele 2 - Ma Jou ai Demo-demo o Totobelohoka

O ngo Hana ami niniata ma demoka o higiriiri Ma Jou o Yaweika

¹ De ahao o ngo Hana momaniata mato, “Ma Jou o Yawe wohihigogarago ahi hininga ma goronaka, To ngohi ahi buturungu idogo ma titi abe wodiaioka naa. De ona abe ihimusu ngohino ka idadi ngohi tagiete dika. Ngona Ma Jou nohiduhunoka de duru ngohi tosanangioka.

² Duru ko iwa utu yotebi-tebini hoka Ngona Ma Jou o Yawe, Ko iwa Ma Jou utu, duga-duga Ngona ka Nomatengo dika, Ko iwa utu de ma buturungoka abe hoka nanga Jouoli ai buturungu, Ka Ngonaka dika mimahitatoko de ko moiua la ka imidaene.

³ Ho ibooto o nyawa yomagorakiye abe yomahimatoko de manga sade. De ibootohi de manga sade yotemo-temo, Ma Jou o Yawe Una Ma Jou abe wonahioriki mata-mata abe hodiai, De Una ahao wotailako de ai kuaha ona abe ahao wahohowono.

⁴ O nau-nauru abe o nyawa yaparangi duru de manga buturungoka, Masara ma oraha naa manga toimi ma deli yatoakoka! De ona abe duru yaboleoka hiadono ko idadiua yomaduhunu, Ma oraha naa Una wahiputurungokali.

⁵ De ona abe ma dihira ka ihikaika yapunuhu de manga inomo, Ma oraha naa kiani yomalingiri o karajaanga la ma hewaino o inomo yamake. De ona abe ma dihira ka ihikaika yohafini, Ma oraha naa manga pokoro yapunuhoka. De o ngofeka abe ko iwa to muna ami ngofaka, Ma oraha naa ami ngofaka yatumidi mamake. De o ngofeka abe ma dihira ami ngofaka yowoeoka, Ma oraha naa ko yaiwaka de muna ami hininga ihuha.

⁶ Ma Jou o Yawe ka idadi o nyawa wahohonenge, De Una dika ka idadioo o nyawa wahiwango. Ka idadi o nyawa wahidingoto ona yohone-honenge ma ngiika, De ka idadioo ona wahigilioli o wowango ma ngiino.

⁷ Ma Jou o Yawe wohiaturu la o nyawa utu yohuha o kiahonanga, De o nyawa utu wodiai la yokaya de o kiahonanga. Naga o nyawa abe Una wahitipokouku, Naga o nyawa utu abe wagorakiye.

⁸ De ona yomanoa o huha ma ngioka wagorakino la waduhunu, De ona yomanoa o hohedu ma ngioka wahihupu genangino, De wahigogere o kokoano manga ngofa-ngofaka manga hidogoronaka, De hiadono yamake o kadera abe de ma horomatioka. Hokogea igoungu Ma Jou o Yawe ai kuaha mata-mataika, Abe o duniaoo igogere Ma Jou o Yawe ai kuahaka.

⁹ Ma Jou duru wagoana to Una ai nyawa abe wahitebinoka, Wagoana manga ngekomika la ufa yopeleke. Masara ona abe manga datoro itorou ahao wahibinaaha, De ona gea wahigogere o fufutu ma goronaka. Abe ko ma titiua o nyawa de to ona manga buturungino dika yowango, De ko yamakeua o lolaku de to ona manga buturungino.

¹⁰ Ona abe iwilawana Ma Jou o Yawe Wokokurutiye ahao wahibinaaha, De Una ahao walawana onangika de o kokuruuhu ma amokiye. De o dunia ma nyawa mata-mataika ahao Ma Jou o Yawe watailako, De Una de ai kuaha ahao wahohowono ona abe iwilawana. Naga womatengo abe ahao duru womadingaka Unangika, De Ma Jou wihidadi ai koano de ai dodunguu abe womadingakoka, De ai koano gea ai buturungu Ma Jou wahimatoko o nyawa mata-mataika, Hiadono ona iwihikurutiye de o lolaku ma higiriiri.” Hokogea o ngo Hana ami niniata ma demo abe idadi ami higiriiri Ma Jou o Yaweiye.

¹¹ Ho gea o ngo Hana ami tarimakase ibooto Ma Jouika de ahao muna de o Ekana yolio manga tauika o Rama ma kotaka. De manga ngofaka o Samuele iwinoaika o Elioka la wileleani Ma Jou o Yaweika abe una wodadi o Eli ai duduhunu to una ai leleani ma goronaka.

O Eli ai ngofa-ngofaka o Hofini de o Pinehasa yatobahowono Ma Jouika

¹² O Eli ai ngofaka yahinooto, o Hofini de o Pinehasa, to ona manga karajaanga yahidemo o Isiraele ma nyawa Ma Jou o Yaweika. Masara ona gea o nau-nauru abe manga datoro itorou dika de ko iwa manga horomati Ma Jou o Yaweika.

¹³ De ona o hidemo Ma Jou o Yaweika naga manga karajaanga moi abe, kiani manga gogianongoru yaduhunu ma oraha yoboa de manga huhuba la ka idadi yomahihuba Ma Jouika. Masara o Eli ai ngofa-ngofaka yahinooto ona ko yatutumua ona abe yomahuba-huba masara manga duduhunu ma nyawa dika yahuloko yoiki o huhuba ma ngiika la o huhuba ma aewani ma roehe yale. Abe ma oraha o nyawa manga huhuba ma roehe naga o borongko ma amoko ma goronaka yodufa-dufara de o Hofini de o Pinehasa manga duduhunu womatengo woboa de wasoino o gogoraka ma otini abe ena gea de ma gare hangeoka.

¹⁴ De una wogila-gila dika ma borongkoika wasoino ai roehe ma gogoraka gea de watopoko o borongkouku de ka ma moi wohidogoraka ma roehe. De waleino dika ma roehe abe watopoko de ai gogoraka gea de wagao o Eli ai ngofaka yahinootoika la gea yaolomo. Hokogea o Eli ai ngofa-ngofaka yodiai itorou o Isiraele ma nyawa mata-mataika abe yoboa o Silo ma kotaino la yomahuba Ma Jou o Yaweiye.

¹⁵ De utuohi yahikangela ona abe yoboa la yomahuba-huba, abe manga huhuba ma aewani ma haki ko yotufukuahi o huhuba iharo-harongo ma ngioka la yaniiki Ma Jou ai behehongo ma hiaturu onangika. Abe Ma Jou ai hiaturu la manga huhuba ma haki kiani yotufukokahi de ahao ka idadi ma roehe yomahihuba. Masara o Eli ai ngofa-ngofaka ko yopusingua ma hiaturika gea ho ngaro o nyawa manga huhuba ma haki ko yatufukuahi de ona yoigo ma roehe gea yale dika. Abe o Eli ai ngofa-ngofaka gea manga duduhunu womatengo iwihulokika la wale o huhuba ma roehe ka ma goohi. Abe una wotemo o nyawaika abe womahihuba ai huhuba, wato, “Nohihidoaka ngohino o roehe ma goo genanga la nanga baluhu o hidemo Ma Jouika ka idadi ma roehe gea yomaharongo dika angamoi ka yoluku o roehe ihakaioka. Ho kiani nahidoaka onangika o roehe ma goo dika.” Hokogea manga hidimono gea wagahoko.

¹⁶ De nako una abe womahihuba gea wotemo wato, “Ma kiani nahigunoa ona inaduhunu de o huhuba la ma haki yotufukokahi de ahao ka idadi ahi aewani ma roehino o kia dika noigo ka idadi nomale dika.” Hokogea o nyawa yahitiari o Hofini de o Pinehasa manga duduhunika. Masara manga duduhunu gea ahao ai biaha wopaluhu, wato, “Koua, kiani ma oraha naa dika de nohihidoakoka, de nako ngona noluku, ngohi de o ribuutuino dika tomale!” Hokogea manga lawana Ma Jou o Yawe ai behehongo ma hiaturika.

¹⁷ Ona ka o goohi, o Eli ai ngofa-ngofaka o Hofini de o Pinehasa gea, de manga howono duru itubuhoholi Ma Jou o Yawe ai himangoka de angamoi duru ko iwa manga horomati o huhubaika abe yomadingaka Ma Jou o Yaweika.

O Samuele una wihisanangi Ma Jouika masara o Eli ai ngofa-ngofaka Ma Jou ko iwihisanangiua

¹⁸ De ma oraha gea o Samuele, ngaro una ka o ngofakohi masara ka ihikaika wileleani Ma Jou o Yawe ai Tauoka. De una wapake o baju yodiai o lawe ma alu-aluhino abe enangoo yomadingakoka Ma Jouika. De o baju gea ma romanga o efodo abe ma rupa imaketero hoka ona o hidemo Ma Jouika yapake.

¹⁹ De o tao-taongiye o Samuele ngoi meme midiai ami ngofaka ai baju ma eteteke de mihidoaka o Samuelika ma oraha muna de ai baba yoboa la manga huhuba yomahihuba genangoka.

²⁰ De ma oraha adonoka o Ekana de ngoi fekata o ngo Hana yolio ma ko yosobouahi de o Eli wahiowa de ai hiowa ma demo hokonaa, wato, “Ngaro Ma Jou o Yawe winihidoaka o ngofa-ngofaka utuohi yowoe la yodadi nia ngofaka ai duruuru abe una niwihidoakokau Ma Jou o Yaweika.”

²¹ De Ma Jou o Yawe wigihene, abe o Eli ai hiowa ma gogahoko gea, de womihidoaka o ngo Hanaika ami ngofaka o nauru yahangeoli de ami ngofaka o ngofeka yahinooto. De ami ngofaka o Samuele ka ihikaika wofero de wolamoko Ma Jou o Yawe ai himangoka.

²² Naa adonoka o Eli duru iwiperekioka de una ma dihiraino ka ihikaika woihene o nyawaino o ade-ade ma titi ai ngofa-ngofaka manga wowango ma datoro ihowono o Isiraele ma nyawaika. De manga howono ma ade-ade moi abe o Hofini de o Pinehasa manga biaha yomaidu de o ngo-ngofeka abe iwileleani Ma Jou ai Tau o Ngoerino ma ngoranoka.

²³ Ho o Eli gea ai ngofaka wataere onangika wato, “Adodoa ho ngini nidiai hokogea itorou? Naga o nyawa ka ihikaika yoboa ngohino angamoi gea abe ngini nitobadiai duru itotorou. Ho ona yamake de ahao yoboa yoade-ade ngohino.

²⁴ Ahi ngofa-ngofaka ibootohi nidiai abe itotorou gea! Abe naga o kalaki ma demo itagi aika aino abe Ma Jou o Yawe ai nyawa inihiade-ade ma titi nia howono.

²⁵ Abeika, nako o nyawa womatengo wahowono o nyawa utuika de ka idadiohi Ma Jou widuhunu. Masara nako una gea Ma Jou o Yaweika wahowono ko moiua naga abe ka idadi iwiduhunu. Marai ngini duru nihioriki gea igoungu e?” Hokogea o Eli ai dodaere ma demo masara o Hofini de o Pinehasa manga baba duru ko iwihigihenua. De ona ko iwihigihenua angamoi Ma Jou o Yawe womaputuhoka wato ona yahinooto gea wahohonenge.

²⁶ Masara imakawalimi de o ngofaka o Samuele angamoi ma oraha wobaluhiye de ka ihikaika Ma Jou o Yawe wisanangi unangika de o nyawaoo manga sanangi unangika enangoo ka idogo-dogo.

Ma Jou ai hohowono ma hingahu o Elika

²⁷ Ka de uku de naga womatengo Ma Jou o Yawe ai uru ma dodofanga woboa witutumu o Eli de Ma Jou ai hingahu wadofanga unangika wato, “Eli, ngona nohioriki abe ma dihira Ngohi, Ma Jou o Yawe tomahimatoko to ngona ani totoforaika ma oraha o Isiraele ma nyawa mata-mata yodadioka o Mesiiri ma koano ai huhuloko o Mesiiri ma tonakoka.

²⁸ De ani totoforaino Ngohi tiiriki o Harunu la una gea wodadi o Isiraele ma nyawa manga hidemo Ngohino abe nihiromanga o hidemo abe ai leleani winihidemo Ngohiye. Ho ai karajaanga waleleani ahi nyawa abe manga huhuba Ngohino wahihuba o huhuba iharo-harongo ma ngioka de wotobatufu-tufuku o manyanyi Ngohiye. De to una ai pakeanga gea abe tomadingakoka la ena dika wapake ma oraha wohileleani abe winihidemo Ngohino. De naga tahitagongo o hidemo ma nyawa mata-mata abe ihileleani hoka o Harunoli. De to ona manga inomo Ngohi tahidailako ona mata-mataika. Manga inomo gea o Isiraele ma nyawa manga huhuba o aewani ma roehe abe tahigunoa yomale ma oraha o huhuba gea yatufuku ahi huhuba iharo-harongo ma ngioka. Hokogea ngini o Isiraele ma nyawa manga hidemo Ngohino ka ihikaika tinihidailako nia inomo.

²⁹ Masara ngini naa de nia horoodo dika nimalega o huhubaika de o behehongo ma huhubaika abe kiani Ngohi tamake ahi nyawaino. Adodoa ho de nia horoodo dika nimalega enangika hiadono nia horomati ko iwaka Ngohino? De naa moioli Eli tonileha, adodoa ho ani horomati Ngohino ihutulu de ani horomati ani ngofa-ngofakika ka enangohi duru ilamoko? De hokogea itararono angamoi ka ihikaika ani ngofaka yahinooto gea nahigunoa la yomahikutufuru dika manga badanga. De hokogea idadi angamoi o huhuba ma roehe abe ka enangohi ma rorahai ena gea yale ahi nyawa manga huhubaino.”

³⁰ “Ngohi Ma Jou o Yawe, o Isiraele ma nyawa manga Jou de ma dihiraino tahibehehongo ani doomu ma famika, abe o Lewi ma dutuino, tato ahao ngini ka idadi nihileleani Ngohi ka hiado-adonika. Masara ko idadiokaua hokogea angamoi ahi behehongo gea ngini inihange naa niaolukoka! Ngohi de ahi horomati tomalega onangika abe manga horomati naga Ngohino. Masara ona abe ihiemono Ngohino, kiani Ngohioo taoluku ona gea.

³¹ Ho to ngona ani tau ahao tahohowono onangika hiadono manga buturungu ko iwaka. De to ngona ani dano-danonguku o nau-nauru ka imahikauku ma oraha ona ka o goohi de tahohonengoka ho ko moiokaua yowango hiadono manga ngumuru yapereki.

³² Ngona ahao de ani daleana namake o Isiraele ma nyawa utu abe Ngohi tagopoa ma hiowa ma ngoe onanguku masara hokogenangua todiai to ngona ani famika de angamoi ka imahikauku ko moiokaua onangoka abe yamake manga wowango ma dekana o duniaka.

³³ De ona ani famoka abe ka yowangohi ka ihikaika manga wowangoka yohuha hiadono duru manga hininga de ma huhaka. De to ona manga ngofa-ngofakoo ahao yohonenge o boditoino.”

³⁴ “De hokonaa ma dodunguu todiai la ngona duru nohioriki idadi ani totoforauku ahao o kokangela adaene. Eli, Ngohi tagoungu, ahao ani ngofaka yahinooto o Hofini de o Pinehasa ahao yokokihonenge duru o wange moi dika de gea ma dodunguu!

³⁵ De ma oraha ona yohonengoka de ahao Ngohi tigoraka womatengo abe wodadi o Isiraele ma nyawa manga hidemo abe una duru ko worehe-rehenua o totiaiino. Mata-mata abe tihibehehongo la wodiai gea una ahao wodiai de Ngohi ahao tihiowa hiadono to una ai totoforaukuoo ka hiado-adonika yodadi o hidemo Ngohino. Ho ahao ihileleani Ngohi de o kokoano mata-mataika abe Ngohi ahao tadingakoka Ngohino onangoo yaleleani.

³⁶ De naga ma oraha abe to ngona ani totoforauku ona yomaponuku to una ai himangoka abe tihidadi o hidemo ma gou-goungu. Ona ani totoforauku yomaponuku hokogea de ahao yomagahoko o tiwi de o inomo abe ka de manga huhaka de aino yotemo, ato, ‘Duru mimagahoko ngonaika mia hidemo Ma Jouika la nomihigunoa la ngomioo mikarajaanga miniduhunu o hidemo ma karajaanga ma goronaka. Hokogea mimagahoko la ngomioo ahao miamake o inomo ma hidoku ma hohutulu nia leleanino.’” Hokogea Ma Jou o Yawe ai hingahu o Elika abe una de ona ai tauoka ka imahikauku wahohowono ma titi una de ai ngofaka yahinooto manga horoodo o inomika hiadono ko yomalegaikakaua Ma Jouika.