1 Samuele 18 - Ma Jou ai Demo-demo o Totobelohoka

O Saulu witaleana o Dautika

¹ O Goliata gea witomaka de ahao o Dautu de ai koano o Saulu yomakoketemo. De ona yomakoketemo ibooto de ahao o Dautu yomakamake de o Saulu ai ngofaka o Yonatana de o Yonatana duru ai hininga adaene o Dautika hiadono ona yomaketedodiawo duru irahai abe manga gogao ihititi o dora ma gou-goungino.

² De ma wangeoka gea de o Saulu womaputuhu wato o Dautu ko wihigunoakaua wolio ai babaika ma kiani wogogere unangoka duru o koano ai tauoka dika.

³ De o Yonatana widora o Dautika imaketero hoka to una ma hirete ai roehe wodora ho una woigo la ona yahinooto yomahiketehibehehongo abe duru ko iwa moi abe o nyawa yakunu ihirusaka manga gogao ma rorahai gea.

⁴ Ho gea yomahiketehibehehongo ibooto de ahao o Yonatana ai baju ma guru-gurutu wahuputoka de ena gea wihidoaka o Dautika de naga utuohi o Yonatana ai hidoaka unangika abe ai badanga ma dadatoko ma baju abe wapake o parangioka, de ai humaranga o dopo-dopoino abe ma doto arihononga, de ai toimi, de ai ban abe wapake womahidubuluino o parangioka. Ho to una ai kiahonanga ma rorahai gea mata-mata ka ma moi o Yonatana wihidoaka ai dodiawo o Dautika la wohitunguu manga behehongo de ai dora unangika.

⁵ Ho o Dautu duru wileleani ai koano itiai de o kia dika o Saulu wihikarajaanga o Dautika de ai karajaangino gea wamake ma hasili duru irahai. Ho o Saulu o Dautu wigoraka la wihidadi ai tentara ma hidimono moi. De o Isiraele ma nyawa mata-mata de manga tentara ma dimo-dimono ona duru yosanangi ma titi o Dautu unangoo wodadioka manga tentara ma hidimono.

⁶ Masara ahao naga ma oraha o Saulu ai daleana imulaenge ipuda o Dautika de hokonaa ma titi. O Dautu o Goliata witomaka de o Filistina manga tentara yahikalaka ho ahao o Isiraele manga tentara yolio. De manga tentara yotagi o ngeko-ngekomika ho yoboa manga kota-kotaino de o Isiraele ma nyawa abe yogogere genangoka ihirame-rame manga lolaku. De hokogea idadi o kota mata-mataika abe yatilakuru abe naga o ngo-ngofeka ko manga ngoe yohupu o ngekomo ma datekino de duru yorame-rame de manga garago de iwihigiriiri manga koano o Saulu. De yoselo-selo de manga gogereenge ihiboha-boha de nagali ma rupa hoka o dodai o tabaagaino abe ihikokaboha de yonyanyi. De manga higiriiri abe o ngo-ngofeka gea ihinyanyi hokonaa ma demo, ona ato,

⁷ “O Saulu wahohonenge nanga musu yasana, Masara o Dautu wahohonenge nanga musu yasana ngimoi yofoloi.” Hokogea o Saulu ka ihikaika woihene manga ngekomoka ma oraha yolio.

⁸ De o Saulu ko wosanangiua manga higiriiri ma nyanyiangika gea ka hiadono duru wongamo, wato, “Adodoa hokogea yonyanyi ato ngohi yosana dika abe tahohonenge masara o Dautu wahohonenge nanga musu utuohi yofoloi manga sana? Done ahao yoigo una iwigorakiyeoli hiadono iwihidadi manga koano!” Hokogea o Saulu ai hininga ma oraha gea.

⁹ Ho o Saulu ai daleanoo imulaenge ipuda o Dautika de ahao ka ihikaika o Dautu wigoana de wolingiri ai howono.

¹⁰ De duru ma dawangeino dika de o tokata ma dorou Ma Jouino gea iwidutukoli o Saulika de duru iwihikangela hiadono wohidogohanga wopoa-poaka. De hoka ma dihiraino nako ai koano wokangela hokogea de o Dautu waleino ai totabua de waragoho la wihilaru hiadono ai hiningaka wohiriidi. Masara kangano ka de o Saulu womulaenge wohidogohanga wopoa-poaka de wasoino o kuama o hokiiki.

¹¹ De itodokanino de o Saulu wituduku o Dautika abe ai hiningaka womatemo wato wihidobututukika ma dadaduhika. Masara o Dautu ma kuama gea woditoko ho o Saulu ka wingofu. De ipaha ahao naga ma oraha utuoli abe o Saulu wihigalioli de ai hokiiki gea wituduku o Dautika ho hiadono idadiokali duru imaketero abe hoka idadi ma dodihiraka.

¹² De hokogea ka idadi itodokanino o Saulu ai dohata itagi o Dautika angamoi wimodongo unangika. De angamoi ihititi ai daleanoka de aino abe ma oraha naa Ma Jou o Yawe ko winiikokaua o Saulika mangale o Dautikali winiiki.

¹³ Ho ma bahaika o Saulu womaputuhu abe ko idadiokaua una de o Dautu yomahingi moi ho o Dautu wihitagongo la waparangi manga musuika de wihidoaka ai tentara yasana moi abe o Dautu ka ihikaika wahihira-hira. De gea duru ai tagongo wao itiai abe ona ihigali-gali yoiki manga musu yaparangi.

¹⁴ De o Dautu ngaro o kia dika wodiai masara ka ihikaika mata-mata de ma hasili ma rorahai wamake angamoi Ma Jou o Yawe naga unangoka.

¹⁵ De ai karajaanga ma hasili gea o Sauloo wamake ho hiadono ai hawana ka ihikaika idogo ilamoko abe ihititi o Dautoka.

¹⁶ Masara o Isiraele ma nyawa mata-mataika hiadono ona o Yehuda ma tonakokaoo duru manga hininga ma dora adaene o Dautika angamoi una de ai tentara wahihira-hira ka ihikaika ona yolaku ma oraha manga musu yaparangi.

O Saulu ngoi ora o ngo Mikala modadi to Dautu ngoi fekata

¹⁷ De ahao o wange moiuku o Saulu wihingahu o Dautika wato, “Ahao naa de ahi hininga tomahidiaioka ngohi ora o riaka o ngo Meraba tonihidoaka ngonaika la modadi ngoni fekata. Masara kiani hohitihira Ma Jou ai parangi nanga musuika ho ngohi ko tinihigogilakuahi de kiani ngona nomahitaanohi abe ngona o tentara ma gou-goungu Ma Jou o Yawe ai parangi ma hidogoronaka naa.” Hokogea o Saulu wihuloko angamoi doka ai hiningaka womafikiri, wato, “Ahao ngohi tihidingoto o Filistina manga tentaraika abe duru de manga buturungoka la ona dika o Dautu iwitoma la ngaro ufa ngohi ma hirete titoma.” Hokogea o Saulu wihidee o Dautika.

¹⁸ Masara o Dautu womahilooa unangika, wato, “Ngohi naa onaguna la hiadono ihigoraka la todadi o koano ai toroa? De abeika ngomi ahi baba ai tauoka! Nako naga imihidotelega de o Isiraele ma nyawa utu de ngomi ko kia-kiaua.” Hokogea o Dautu ai hilooa ma demo o koanoika.

¹⁹ Ho ma oraha adonoka abe o koano wato ngoi ora womihigogilaka de kiani muna womihidoaka o nauru womatengoikali ai romanga o Adiriele abe una o Mehola ma kota ma nyawa.

²⁰ De ma oraha gea o Saulu ngoi ora o dodoto o ngo Mikala ami hininga itagi o Dautika hiadono ami hininga duru adaene unangika. De o Saulu duru wosanangi ma oraha woihene ma hingahu gea.

²¹ Angamoi una doka ai hiningaka ipuda ai hidee moiikali o Dautika, wato, “Marai muna tomihidoaka dika unangika la modadi o modoi o Dautika la naga ma oraha moioli tamake abe ka idadi tohiaturu la o Filistina ma nyawa iwitoma.” Hokogea o Saulu ai hininga ho de ai budi ma demo wihingahu o Dautika, wato, “Marai ngohi tamakeoka ani ngekomo la ka idadiohi ngohi todadi to ngona ani toroa.” Hokogea wihingahu o Dautika.

²² Masara onangika abe duru ka ihikaika naga ai datekoka wahingahu onangika, wato, “Ngohi toigo la ngini niwihingahu o Dautika la ka una dika woihene, niato, ‘Nanga koano duru woniigo de ngomioo mia hininga ka moi de una, ho kiani ngona nodafongo ma ngekomo abe woigo wonihidoaka la ngona nodadi ai toroa. Nako hokogea duru noutumu e?’” Hokogea o Saulu ai hidee itorou wohidagioli.

²³ Masara ma oraha o Saulu ai demo gea ai nyawa yadofanga o Dautika de una wopaluhu, wato, “Abeika, ngohi duru ko tokayaua abe to ngohi ahi dutu, ona yohuha. De o koano ngoi ora kiani duru ami ija ma hali ho to ngohi ahi tau ko yapoaua ihiduhunu ngohi de o tiwi hokogea ma amoko.” Hokogea o Dautu wahingahu.

²⁴ De o Dautu ai demo gea yatotaka manga koanoika.

²⁵ De ma koano wahingahu wato, “Nako hokogea to una ai demo de ngini niwitutumoli de niwihingahu abe to muna ami ija duru igapanga abe gea o Filistina ma nau-nauru yaratuhu moi natoma la manga honengino manga mamaleke ma kai naluiti de ena gea mata-mata nohihidoaka ngohino la idadi ami bobangu. Abe ngohi tomagahoko o hibalaha ahi musuika dika.” Hokogea o Saulu ai demo masara abe duru womahinganono la gea o Dautu ma oraha wohingounu ai behehongika gea de waparangi o Filistina ma nyawaika ka onangohi yoputurungu hiadono o Dautu iwihohonenge.

²⁶ De o Dautu duru wosanangi waniiki o Saulu ai behehongo gea la wodadi ai toroa. De o Saulu ai behehongo gea naga de ma oraha wogelengaka. Ho ma oraha ko adonuahi de o Saulu ai behehongo o Dautu wohifoloiika.

²⁷ Abe una de ai tentara yoiki de yatoma manga musu o nau-nauru ko yaratuhu moiua dika masara yaratuhu hinooto abe yakokitomaka. De manga mamaleke ma kai abe o Saulu womagahoko ka idadi o Dautu wihidoaka ma koanoika. Ho o Saulu kiani ai behehongo waniiki ho ngoi ora o ngo Mikala o Dautika wihidoaka la womihidadi ngoi fekata.

²⁸ De abe ma oraha o koano wamake hokokia ma ngoe Ma Jou o Yawe widuhunu o Dautika de ai hininga ma huha ka idogo dika. De wamakeoli abe ngoi ora o ngo Mikala duru midora ami rokatika de ma titi enangoo hiadono ma koano ai hininga ma huha ka idogo.

²⁹ Ho o Saulu utuohi idogo ai hawana abe o Dautika. De duru o Saulu wodadioka o Dautu ai musu ka hiadono ai wowango ma bahaika.

³⁰ De ngaro o Filistina ma nyawa manga tentara ihigali-gali yangino o Isiraele ma nyawaino yaparangi masara ka ihikaika o Dautu de ai tentara duru yahikala hiadono nako una de o Isiraele ma tentara manga hihira utu ka o Dautohi wotobalaku. Ho o Dautu o Isiraele ma tonaka ma amokika o nyawa iwifetongo ai romanga duru de manga horomatioka.