1 Samuele 17 - Ma Jou ai Demo-demo o Totobelohoka

O Goliata wadodanauru o Isiraele ma tentaraika

¹ De ahao ma moiukuoli o Filistina ma nyawa ato yaparangi o Isiraele ma nyawaika ho manga tentara yoiki o Yehuda ma tonakika de manga dodogumu ma ngi yodiai o Efese-Damimioka abe naga o Soko ma kota de o Aseka ma kota ma hidogoronaka.

² De o Saulu o Isiraele ma nyawa manga tentara watoomuino o lokuoka abe idateke o Ela ma dola de genangoka manga dodogumu ma ngi de yomahidiai la yaparangi o Filistina manga tentara.

³ Ho o Filistina manga tentara yomatatorika daku o loku moioka de o Isiraele manga tentara onangoo yomatatorika doka o loku moiokali de naga manga hidogoronaka o Ela ma dola ma amoko.

⁴ De naga o Filistina manga tentara womatengo o Gaata ma kotaino, abe duru wojago de ona yomahinganono unangika, ai romanga o Goliata. De una wohupu manga tentara ma doomuino la womatengo dika wahimanga o Isiraele manga tentaraika de wadodanauru onangika de ai ilingi ma amokiye la o Isiraele manga tentara womatengo woboa la yomadengo yomaketeparangi. De o Goliata gea ai gurutiye ngade-ngade ai metere hangeiye.

⁵ De to una ai badanga ma dadatoko ma baju yodiai o tabaagaino abe ihikasapuroka de o hori la utuohi itogowini de ena dika ma dubuho adono ngade-ngade o kilo moritoa de tumidi. De ai parangi ma sapeo enangoo yodiai o tabaagaino gea.

⁶ De ai lou enangoo naga ma dadatoko o tabaagaino de naga ai hokiiki enangoo o tabaagaino, de ai hokiiki gea de ma talioka abe ai biaha womahilaketuku ai belekauku.

⁷ De nagali ai kuama abe ma otini duru ma amoko de ma doto enangoo ma amoko abe ena dika adono o kilo tumidi ma dubuho. De naga manga tentara womatengoli wotagi-tagi o Goliata ai himangoka ai dadatoko wigao abe ai baluhu womahitaku-takunu ma oraha yomaketeparangi.

⁸ De o Goliata womaokoino de duru wabobanarata o Isiraele manga tentaraika wato, “Ngini genangoka nidoo-dodoa nimatatorika la nimiparangi? Ko nihimoroinua e? Ngohi naa o Filistina ma nauru abe duru tojago masara ngini o Saulu ai huhuloko dika! Abe nako naga nginioka o nauru womatengo wojago niwiirikoka dika la niwihidingoto ngohino la imihinooto mimahidengo mimaketeparangi.

⁹ De nako una ahao wohihikala ngohi de ahao ngomi o Filistina ma tentara mimahidoaka nginika la midadi ti ngini nia huhuloko dika. Masara nako ngohi tihikala de ahao ngini mata-mataika nidadi to ngomi mia huhuloko.

¹⁰ Ho ngohi naa tinidodanauru ngini o Isiraele ma tentaraika! Ngini ko o tentaraua nako ko moiua naga nginioka abe ka idadi niwiiriki la una woparangi ngohino.” Hokogea o Goliata ai hohedu ma demo o Isiraele manga tentaraika.

¹¹ De o Saulu de ai tentara yokokihawana o Goliata ai demoika abe ka de yoihene de manga hawana gea yakokilufungoka.

¹² De o Dautu abe o Isai ai ngofaka, abe o Efaraata ma doomuino, una o Beteleheeme ma nyawa abe o Yehuda ma dutuino. De o Isai gea ai ngofaka o nau-nauru yatufange de ma oraha o Saulu wodadi o Isiraele ma nyawa manga koano de o Isai duru iwiperekioka.

¹³ De to una ai ngofaka o riaka o Eliaba, de ai dodoto widatekuku o Abinadaba, de iwidatekukuoli o Siama, ona yahange gea yaniiki o Isiraele ma tentara ho onangoo naga o Saulu ai doomuoka abe ma oraha yahimanga o Filistina ma nyawa manga tentara.

¹⁴ De ma oraha gea o Dautu ai ria-riaka yahange gea iwiniiki o Saulu o parangika gea, masara o Dautu una ko waniikua.

¹⁵ Abe ngaro una iwihikarajaanga o koano ai tauoka ma, ai biaha ma moi ma moi wolio o Beteleheemika la ka idadi ai baba ai domba wogoa-goana.

¹⁶ De naa adonoka o wange moruata ma dekana o Isiraele ma tentara de o Filistina ma tentara yomakutumunguku de o Goliata o wange-wangeiye o ngorumino de ahao o bobimaowali una wohupu o Filistina manga tentara manga doomuino de wohigalioli ai hohedu ma boaka o Isiraele ma tentaraika.

^17-19 De o wange moiuku o Isai wihuloko ai ngofaka o Dautika, wato, “Ngofaka, kiani ani ria-riaka natutumohi o parangi ma ngiika o Ela ma dolaka abe genangoka nanga koano o Saulu de ngone o Isiraeloka nanga tentara mata-mata yahimanga o Filistina manga tentaraika. De hahininga ani ria-riaka abe onangoo yotentara genangoka ho ngohi toigo la ngona itaiti noiki natutumu onangika. De manga inomo nadotaka o gandumu abe ko yatutukuahi masara yaharongoka o kilo ngimoi ena gea nao, de naooli o roti ma harongo ngimoi abe naga nenangoka. De nagali o keju abe o domba ma huhu ma teongo ma hakino, enangoo naga o dobiki ngimoi abe ka idadi nao. De ma keju gea nihidoaka o tentara ma dimonika abe wahiaturu to ona manga tentara ma doomu. De kiani naleha-leha hokokia ani ria-riaka de togahoko la ma oraha nolio naangino de naga abe ka idadi nohihimatoko o dodunguu moi ngohino abe inihitaana ngona nomahiadonoka onangika de ani ria-riaka genangoka de manga buturungokahi.”

²⁰ Ho ma dawangeino o Dautu ka de womomiki de ka wongorumu wosobo de ma inomo wao abe una o futuinohi womahidiaiokau. De to una ai duruuru wohiaturokau la unangoli ka idadi manga domba wogoana. De woiki waniiki ai baba ai behehongo mata-mata. De ka de womahiadono o Isiraele ma tentara manga doomuika de wadaene ma oraha yomahidiai yosobo manga loku ma geleforino yomatatorika. De o parangi ma hagaaga yaamo-amokiye la yomahitunguu manga dohata manga musuika.

²¹ Hokogea o wange-wangeiye manga biaha ma oraha o Filistina manga tentara de o Isiraele manga tentara yomarihimanga abe yomatobataa-tatoro genangoka.

²² Ho o Dautu ma inomo wadotakino gea wihidoaka unangika abe wohiaturu ma tentara manga kiahonanga, de ahao womapopaata o Isiraele manga tentara ma datorika. De genangoka wamake ai ria-riaka de waleha, “Sarakia, ngini nisosanangi dika?”

²³ De gea yomakoketemohi de doka o Ela ma dola ma honongaka o Goliata wohupuinoli o Filistina manga tentara ma datorino de duru wabobanarata o Isiraele manga tentaraika de ai hohedu ma demo hoka ai biaha o wange-wangeiye wotemo. De o Dautoo woihene o Goliata ai demo gea.

²⁴ De ka de hokogea o Goliata wotemoli de o Isiraele manga tentara iwimodongoholi hiadono ko manga ngoe yoara yomadohuku manga poretoko.

²⁵ De mangale ma titi manga hawana ho ona ato, “Abeika to una ai lamoko! De nitoihene ai demoika gea! Gea ho hiadono nanga koano o Saulu wonahibehehongo ngoneino abe nako womatengo naga abe wimoroini hiadono o Goliata gea witoma de duru ai hadia ilamoko unangika. Abe ahao o Saulu ngoi ora womihigogilaka unangika de to unangoo ai baba ai tauino manga utumu angamoi ona mata-mata ai tauoka nanga koano wato ahao ka ihikaika ngaro ufa o pajaka ma tiwi yofangu unangika. Hokogea ai hininga o koano angamoi wato kiani o Goliata gea wohonenge.”

²⁶ De ahao o Dautu waleha o tentara yamuruonika abe naga ai datekoka wato, “De nako naga o nauru ngoneoka abe ka idadi wimoroini witoma o Filistina ma nyawa gea, ahao o kia una wamake? De ko enangua dika masara una wolamo-amoko gea duru wonahimaleke ngone o Isiraele ma nyawa! Abeika una o Filistina ma nyawa abe ona gea duru ko iwihiorikua Ma Jouika! Ho done sarakia de hihigunoa la Ma Jou Wowango-wango ai tentara wahitipokouku hokonaa! Ho kiani naga womatengo witoma una gea la ibootohi wonahimaleke ngone o Isiraele ma nyawa!”

²⁷ De ona o tentara gea ihigalioli manga hingahu o Dautika abe ma hadia o koanoino o nauru womatengo ahao wamake nako o Goliata gea witomaka.

²⁸ Masara o Dautu ai riaka o Eliaba woihene yomakoketemo de wingamo o Dautika ma titi ai demo onangika gea, wato, “Ngona nododoa nenangoka? Adodoa nanoaika o domba ma duduono ma eteteke gea abe ngona inihitagongoka la nogoa-goana? Ngona tonihiorikokau de igoungu, abeika to ngona ani sade ma demo de ngona ko nagou-goungua notemo. Marai noboaino noigo dika nomiwuni-wuningi o parangi ma goronaka.” Hokogea o Dautu ai riaka wihitipokouku.

²⁹ De o Dautu wipaluhu wato, “Ahi howono o kia? Abe ngohi bowahu toleha dika.”

³⁰ De ka wosobo o tentara ma doomu moiikali wadodiawo de ahao waleha onangikali de onangoo manga demo imakadaene hoka o tentara kangano iwihingahuoka.

³¹ De ahao o Dautu ai demo o nyawa yadofanga manga koanoika ho o Saulu wibehehongo la o Dautu woboa la yomarihimanga.

O Dautu wihimanga manga musu o Goliatika de witoma

³² De o Dautu woboa witutumu o Saulu de witemo unangika wato, “Ahi koano, ngaro ufa nanga tentara iwimodongo o Filistina ma naurika naa! Ngohi ka idadi timoroini mimaketeparangi una de ngohi.” Hokogea o Dautu ai demo ai koano o Saulika.

³³ De o Saulu wopaluhu, wato, “Ko idadiua! Angamoi ngona ka o goduuruohi dika. De una abe nato niparangi unangika wotobaparangi dika ai wowangoka!” Hokogea o Saulu wiheranga o Dautika.

³⁴ Masara o Dautu ko wohingounua ai demoika, wato, “Ahi koano, ngohi ahi baba ai domba ma duduono totobagoana de nako o boki o singa ma amoko iboa, eko ngaro o beruanga de yagoli o domba ma ngofaka de yaoka, de ngohi ko tomodongua enangika.

³⁵ Ngohi todoara dika ka hiadono tadaene de tongika hiadono ahi domba ma ngofaka taora o aewani ma uruino gea! De ngaro o beruanga, eko ngaro o boki o singa, nako ena gea imadogilioro ngohino de ngohi duru de ahi buturungu tafokoto to ena ma ngomahika de ahi giama ma hononga tohipoha de ahi tutukunu ka hiadono ihonenge.

³⁶ De una o Filistina ma nauru gea ahao wodadi hoka o aewani gea angamoi ngohi tolakuoka o beruanga de o singaino ho hiadono ngohi ihimoroini tihimanga o Filistina ma nauru nenanga abe una duru ko Ma Jou ai nyawaua. Abeika una waemono Ma Jou Wowango-wango ai tentara de una o Filistina ma nyawa abe inamusu ngone, ho done sarakia de hiadono ngohi tihigunoa la ka wowangohi?

³⁷ De imaketero abe hoka Ma Jou o Yawe ngohi naa wohihihupu o singa de o beruanga ma giamino, ahao hokogenangoli Una wohiduhunu wohihihupu o Filistina ma nauru ai giamino ma oraha tiparangi unangika.” Hokogea o Dautu ai domoroini Ma Jouino wohidemo. De o Saulu wopaluhu, wato, “Nako gea noiki dika la ngona niparangi o Goliatika gea de tonigahoko ngaro Ma Jou o Yawe naga woniniiki.” Hokogea o Saulu wotemo.

³⁸ De ahao o Saulu woigo widuhunu o Dautu hiadono wihidoaka unangika to una ai parangi ma dadatoko abe o parangi ma sapeo o tabaagaino de ai baju abe yodiai o behi ma alu-aluhu ihikokangohamika. De o koano ai parangi ma pakeanga gea wihinoauku o Dautu ai badanguku.

³⁹ De ahao o Dautu wale ai humaranga de womahidubulu ai goronaino abe o parangi ma baju ma poretoka. De angamoi ko ma moiuahi wapake o tentara ma pakeanga hokogea ho wataili wotagi masara ka de woaguru de wamao iwihikangela ma baju. Ho womademo, wato, “Ngohi tomahilooa, masara ko tabiahauahi de o dadatoko ma pakeanga hokonaa ho marai ngaro ufa dika e?” De o koano ai parangi ma pakeanga gea wakokihuputoka.

⁴⁰ De ahao waleino ai domba ma gogoana ma tutukunu de wouti ma dolauku abe genangoka naga o akere ma ngairi ma eteteke de genangoka womagoraka o hakaru ma eteteke ma nou-nouhu o gahumu motoa de wonoa ai domba ma gogoana ma popojeuku. De ai kawai naga ai giamoka wasoino de wogila-gila womahitigi o Goliatika.

⁴¹ De o Goliata unangoo woboaino wotagi o Dautu wibuhuku. De ai dodiawo abe wigao ai dadatoko naga wihihira-hira o Goliata ai himangoka. De una ka wotigi moduku o Dautika.

⁴² De naa ka idadi ona yomakamake itararonoka de o Goliata ai hiningaka ka o hohedu dika ipuda o Dautika angamoi wimake una naa abe iwihidingoto ka o ngofaka dika abe ai kai inouhu de ai rupa worahai!

⁴³ De wotemo o Dautika wato, “Ho de ma titi o kia o gota o dodibako gea naoino? Bote ngona nato ngohi o kaho dika.” Hokogea wotemo de ahao o Goliata womulaenge womagahoko ai jou-jouika la iwihikoboto o Dautika.

⁴⁴ De wotemoli unangika wato, “Ngofaka, naino dika la ka idadi ani honenge tohidoaka o totaleoika de o aewanika la ngona nodadi to ena dika ma inomo!” Hokogea wihohedu o Dautika.

⁴⁵ De o Dautu wopaluhu de ai ilingi ma amokiye, wato, “Ngona noboa ngohino de ani humaranga, de ani kuama, de ani hokiiki. Masara ngohi toboa ngonaino de Ma Jou o Yawe ai romanga abe Una Ma Jou Wokokurutiye, Ma Jou abe wahihira-hira o Isiraele ma nyawa manga tentara abe ngona nahoheduoka onangika.

⁴⁶ De o wange naa Ma Jou o Yawe wonihikala! De ngohi ahao tonitoma de ani pea tatobikoka! Duru o wange naa dika de ngohi tohidoaka o inomo ilamoko o totaleoika de o aewanika abe ti ngini o Filistina ma tentara nia honenge ko nia ngoe! De hokogea idadi la o dunia ma nyawa mata-mataika ka idadi iwihioriki to ngomi mia Jou abe Una naga womanoa ngomi o Isiraele ma nyawa mia hidogoronaka.

⁴⁷ De o nyawa mata-mataika ahao iwihiorikoo abe Una Ma Jou o Yawe ko woperelua o parangi ma dae la gea ena wapake la ai nyawa wahihupu o boditoino. Ho o parangi nenanga naga Ma Jou ai giamoka de ko to ngoneua nanga giama imanoa. De mia Jou o Yawe ngini o Filistina ma nyawa womihidoaka ngomi o Isiraele ma nyawaino.” Hokogea o Dautu ai demo wohiboaka.

⁴⁸ De o Goliata wingika o Dautika masara o Dautu unangoo wotagi wibuhuku abe womataiti womapopaata manga parangi ma ngi ma hidogoronaka la genangoka yomakamake.

⁴⁹ De ka de womapopaata de wagoraka o hakaru moi ai popojeino de wakelenga ai kawai ma hakaru ma ngiuku de womulaenge waloliti! De waloliti kohagiria la ma oraha abe wapidili de o hakaru gea duru itagi kohabuturungu. De igoungu ka de wapidili de ma hakaru duru itagi o Goliata ai pea ma nyore-nyoreoko de ma buturungu hiadono iwohamoko ma hakaru! De ka itodokanino o Goliata woruba womotumuku dau ma tonakuku.

⁵⁰ Ho o Filistina ma nauru abe duru wolamoko gea o Dautu wihikalaka! De ngaro ko iwa to una ai humaranga ma o Goliata gea wihiruba wapake ai kawai de o hakaru dika!

⁵¹ Ka de woruba de o Dautu duru womataiti widoara unangika de o Goliata ai humaranga abe o dopo-dopoino ma doto arihononga gea o Dautu wahiata ma harumino de gea ena wapake la witoma o Goliata de ahao ai pea watobikoka. De o Filistina ma tentara yamake una abe wojago woparangi, abe duru yomahinganono unangika, una wohonengokau! Hokogea yamake de yomadogilioro manga poretoko de yokokiloara.

O Isiraele manga tentara yadoara o Filistina manga tentara de ko manga ngoe yatomaka

⁵² De abe ma oraha o Isiraele manga tentara yamake o Goliata wohonengoka de ona ihiboa-boaka o lolaku ma hagaaga de ka ma moi yomapopaata yokokiuti dau ma dolauku. De yakiniiki o Filistina ma tentara abe naa yokokiloara manga poretoko. De o Isiraele ma tentara yakokidaene manga musu gea de manga ngoe yatoma. De yogila-gila yanii-niiki de yatoma ka hiadono o Gaata ma kotaika de hiadono o Ekono ma kota ma ngoranika. Ho o Filistina ma tentara manga honenge de ona abe yonabo-naboka hiadono ko idadiokaua yomangakunu yotagi naga yahikabarihi o Saraimi ma ngekomoka ka hiadono o Gaata ma kotaika de o Ekono ma kotaika.

⁵³ De ahao o Isiraele manga tentara yogilio o Filistina ma tentara manga dodogumu ma ngioka de yomakokigoraka manga kiahonanga mata-mata angamoi ko moiokaua ma dutu genangoka.

⁵⁴ De o Dautu o Goliata ai pea wao o Yerusaleeme ma kotaika masara o Goliata ai parangi ma dae wao de wagogono to una ai tau o ngoerino ma goronaka.

⁵⁵ De abe kanganoinohi ahao ma oraha o Dautu woaguru manga himangoka la yomarihimanga una de o Goliata de manga koano o Saulu wilega-lega unangika. De ma koano wileha ai tentara ma hidimono o Abaneraika wato, “Una gea ma goduuru to onaguna ai ngofaka?” De o Abanera wipaluhu unangika wato, “Ahi koano, naa tagou-goungu tonihingahu abe ngohi duru ko tihiorikua!”

⁵⁶ De ahao ma koano wihuloko wato, “Nako gea ngona kiani noikohi naleha-leha o nyawaika hiadono inihingahu una to onaguna ai ngofaka.”

⁵⁷ Ho ipahaino ma oraha o Dautu wihohonengoka o Goliatika de wolioino, o Abanera wiao la ka idadi o Dautu woboa ma koano ai himangoka. De woboaino de nagahi o Filistina ma nyawa gea ai pea o Dautu ai giamoka.

⁵⁸ De ahao ma koano o Saulu wileha wato, “Ngona naa done ani baba onaguna?” De o Dautu wipaluhu ai koanoika wato, “Ngohi naa to ani duduhunu o Isai ai ngofaka, de una gea o Beteleheemoka ma nyawa.”