1 Samuele 16 - Ma Jou ai Demo-demo o Totobelohoka

Ma Jou o Samuele wihidingoto o Beteleheemika la o Dautu wihitunguu abe Ma Jou wiirikoka la wodadi o Saulu ai duruuru

¹ De ahao Ma Jou o Yawe wileha o Samuelika, wato, “Samuele, hokokia ma dekanohi de ani hininga ma huha nihininga o Saulika? Ngona kiani nodafongo gea abe Ngohi taputuhoka abe nako o Isiraele ma nyawa manga koano, una tiolukokau. Ho naa nomahidiai noiki nihitunguu unangika abe tiirikoka la tihidadi o koano abe o Saulu ai duruuru. Ho naa kiani ani minya ma ngi o domba ma nauru ma tatadukino naomanga de o debi-debini ma minya de noiki daku o Beteleheeme ma kotaiye. Abe genangoka kiani nitutumu womatengo ai romanga o Isai angamoi to una ai ngofa-ngofakino naga womatengo gea abe tiirikoka la una gea tomadingakoka Ngohino la wodadi o koano.” Hokogea Ma Jou o Yawe ai behehongo o Samuelika.

² De o Samuele wopaluhu de ai hawana, wato, “Masara, ahi Jou, nako hokogea todiai de ahao o Saulu woihene! De una marai wongamo ka hiadono wohitoma ngohi!” De Ma Jou o Yawe wopaluholi wato, “Hokonaa ani ngekomo, ngona noiki de nao o huhuba ma hapi abe ma beka ka ma goohi, de ma oraha nomahiadono o Beteleheemika de nahingahu manga dimo-dimonika, nato, ‘Ngohi naa toboa nginino de ahi huhuba ma hapi nenanga la ngone homahihuba Ma Jou o Yaweika.’

³ De kiani o Isai unangoo niahoko la unangoo waniiki nia huhuba ma doomu. Hokogea nodiai ibooto de ahao Ngohi tonihingahuoli ahi hiaturu utuohi abe kiani nodiai. De una gea abe ahao tihidumutu ngonaika nihitunguu abe nihituagi de o minya la una gea nidingakoka Ngohino.” Hokogea Ma Jou wihidailako o Samuele ai ngekomo la ka idadi wodiai abe wihibehehongoka.

⁴ Ho o Samuele ai behehongo Ma Jou o Yaweino gea waniiki itiai. Masara ma oraha woboa o Beteleheemino de o kota ma dimo-dimono ka de iwimake o Samuele de yohawana ho iwileha o Samuelika, ato, “Mia baluhu, o kia ma howono nenangoka hiadono naa noboa nomitutumu? Eko sarakia, ngona naa noboa o dame dika nomigao?” Hokogea yotemo de manga hininga ma hawanoka.

⁵ De o Samuele wahingahu, wato, “Igoungu, de o dameino ma gogao ngohi naa toboa tinitutumu la ka idadi ngone homahuba Ma Jou o Yaweiye. Ho ngohi tinihibehehongo nginika la ngini nimahitebini la ka idadi ngohi nihiniiki de homahuba Ma Jou o Yawe ai himangoka de ngohi tonahihuba nanga huhuba naa.” Hokogea o Samuele ai behehongo onangika de ahao una woiki o Isaiika la una de ai ngofa-ngofaka o nau-nauru watoomuino. De ahao ona waduhunu de ma hiaturu abe kiani yaniiki la onangoo yomahitebini Ma Jou ai himangoka. Manga hidiai mata-mata gea ibooto de ahao wakokiahoko la yomakiniiki yomahuba Ma Jou o Yaweiye.

⁶ De ma oraha o Isai de ai ngofa-ngofaka yomatoomuino de o Samuele wimake ai ngofaka womatengo ai romanga o Eliaba de doka ai hiningaka wato, “Marai naa una abe Ma Jou o Yawe wiiriki la wihidadi o koano.”

⁷ Masara Ma Jou witemo o Samuele ai hiningaika wato, “Ko unangua abe naa tiiriki. Ufa ngona natailako o Isai ai ngofa-ngofakika ka manga rupaika dika, eko ani hininga yadaene manga gurutiye dika, angamoi o Eliaba gea ko unangua tiiriki Ngohi. O nyawa manga biaha hokogea dika yatailako o nyawa utuika, de yahidotelega de yairiki ka manga rupa manga poretino dika. Masara Ngohi Ma Jou o Yawe hokogenangua tatailako, Ngohi tomalega manga hiningaika abe ipuda o kiaika manga hininga ma goronaka de hokokia manga hidee ma dumutu. Gea ena abe Ngohi tahidotelega la o nyawa tairiki ona abe ka idadi tapake.” Hokogea Ma Jou wihitararono o Samuelika.

⁸ De o Samuele wihingahu o Isaiika abe Ma Jou woigo wiiriki womatengo ai ngofa-ngofakino la una ka idadi wipake. Hokogea ai demo ho o Isai wihuloko ai ngofaka o Abinadaba la una womahimatoko o Samuelika ho kiani wotagi o Samuele ai himangino. De Ma Jou wihihira o Samuele ai hiningaka ho o Samuele wotemo, wato “Una naa ko unangua abe Ma Jou o Yawe wiirikoka.”

⁹ Ho ahao o Isai ai ngofaka o Siama wiahokino, masara ma moioli o Samuele wotemo wato, “Ngaro unangoo naa masara Ma Jou o Yawe ko wiirikua.”

¹⁰ De hokogea o Isai ai ngofa-ngofaka yomaketeturuuru yomahimatoko o Samuele ai himangino hiadono ai ngofaka yatumidi ibooto yomahimatoko. Masara o Samuele wihingahu o Isaiika wato, “Ma Jou o Yawe ko moiua ani ngofa-ngofakino nenanga wairiki!”

¹¹ De ahao wilehali o Isaiika wato, “Ho sarakia ani ngofaka o nau-nauru nahimatoko ngohino naa namataka?” De o Isai wopaluhu, wato, “Koua, naga womatengohi ahi ngofaka abe una ma baha. Masara una naga mia domba ma duduono wotobagoana de wapaliara doka ma hoanoka.” Ka de gea woihene de o Samuele wihuloko o Isaiika wato, “Ani ngofaka gea kiani itaiti nibehehongo la woboaino. Ngone ko hogogerukuahi holomo ka hiadono una nenangino woboaka.” Hokogea o Samuele ai behehongo.

¹² Ho o Isai o nyawa wahidingoto ai ngofaka gea iwile. De ipaha una ahao woboaino de Ma Jou witemo o Samuelika wato, “Naa una abe tiirikoka ho naa una nihitunguu de o debi-debini ma minya.” De o ngofaka o goduuru gea worahai de ai kai inouhu de ai lako de ma garagoka.

¹³ De to una ai romanga o Dautu de una ahao womaokoino ai ria-riaka manga hidogoronaka de o Samuele wasoino o debi-debini ma minya ma ngi o domba ma nauru ma tatadukino gea de wigopoa o Dautu ai pea daku ai mumukuku. Hokogea wihitunguu de duru o wange gea de imahikaika de o Dautu iwilufungu de Ma Jou o Yawe ai Womaha. Ho gea o Samuele mata-mata abe Ma Jou wihikarajaanga wodiaiokau de ahao wolio ai tauika o Rama ma kotaka.

O Dautu wileleani o Saulu ai tauoka

¹⁴ De ma oraha gea Ma Jou o Yawe ai Womaha ko womanoakaua o Sauloka masara ai duruuru gea o tokata ma dorou abe Ma Jou o Yawe wohidingoto la iwihikangela o Saulika hiadono ai hininga duru de ma huhaka de iwilufungoka de o hawana.

¹⁵ De naga o nyawa abe iwileleani o Saulu yotemo, ato, “Mia koano, duru itararono abe ena inihihuha gea marai o tokata Ma Jouoka de aino!

¹⁶ Ho irahai mia baluhu nahibehehongo ani duduhunika abe ka ihikaika naga yomahidiaioka ani datekoka la iniduhunu. Nahibehehongo onangika la yolingiri o nauru womatengo abe duru wososawaro o totabua woragoho. De ahao ma oraha ani hininga duru ihuha de ka idadi una gea ai totabua waragoho de ma ilingi inihitogumu ani huhaino.” Hokogea ona iwihigaro o Saulika.

¹⁷ Ho o Saulu wahuloko ai duduhunika yamuruono naga, wato, “Ngini niwilingiri womatengo abe wososawaro woragoho o totabua de ma oraha niwimake niwiao ngohino naa.” Hokogea wahibehehongo onangika.

¹⁸ De naga womatengo ka o goohi o Saulu ai duduhunu ma doomuino gea wihingahu o Saulika wato, “Ahi koano, ngohi timake womatengo una o Beteleheeme ma nyawa abe o Isai ai ngofaka. De una duru wososawaro ai totabua waragoho de unangoo ai wowango ma datoro duru irahai de una ai nauru de ma domoroinoka. De bari duru wagou-goungu dika wotemo de una de ai horomatioka o nyawaika de abe duru ai utumu Ma Jou o Yawe winiiki.” Hokogea o Saulu ai duduhunu womatengo o Dautu wigorakiye.

¹⁹ Ho o Saulu ai hidingoto ma nyawa wahidingoto o Isaiika la ai demo yototaka, abe wato, “Ngohi ani koano tonihuloko ngonaika la ani ngofaka o Dautu abe o domba wotobagoana nihidingoto ngohino.” Hokogea o Saulu ai behehongo o Dautu ai babaika.

²⁰ Ho o Isai wohingounu ai behehongika de ai ngofaka o Dautu gea wihidingoto o Saulika. De naga ai hidoaka o koanoika abe o kabingi moi ka ma goohi, de o keledai abe to ena ma poretoka ihibarene de o angguru ma teongo ma gohaka de o inomo ma ngoe.

²¹ Hokogea hiadono o Dautu womaturuuru o Saulu ai tauika de wileleani ai koano de ai totabua abe wotobarago-ragoho la o Saulu wihiriidi. De o Saulu duru wiigo o Dautika de ika-ika o Dautu wihikarajaangoli la waniiki ona abe o Saulu ai parangi ma dae de ma dadatoko yatobaao ho ahao o Dautu watobaniiki onangika.

²² De ahao o Saulu ai behehongo moioli ai duduhunu yototaka o Isaiika, abe o koano ai demo hokonaa, “Isai, ngohi ani koano naa tonihibehehongo la ani ngofaka o Dautu nihigunoa la wodadi ahi duduhunu moi abe duru ahi datekoka wohileleani angamoi ani ngofaka gea duru wohihisanangi ngohino.” Hokogea o Saulu woigo de hokogea idadi.

²³ De abe ma oraha o tokata ma dorou Ma Jouino gea duru iwihihuha o Saulika de o Dautu ai totabua waleino de waragoho la ai koano wihiriidi de ai hininga ma huha itogumu. Abe ka de hokogea o Dautu waragoho ai totabua de ma ilingi o tokata ma dorou ihititoko hiadono imatingaka o Saulino.