1 Samuele 15 - Ma Jou ai Demo-demo o Totobelohoka

O ayata 4-6 ko atailakouahi Ma Jou o Yawe ai behehongo o Saulu waniiki ko itiaiua

¹ De o wange moiuku de o Samuele wihingahu o Saulika wato, “Ma dihira Ma Jou o Yawe wohihidingoto ngohi la tonihitunguu de o minya tonidogopoa abe genangoka de tonihidadi o Isiraele ma nyawa manga koano angamoi Una hokogea wohihibehehongo ngohino. Ho naa naga Ma Jou o Yawe ai behehongo moioli ngonaika abe kiani duru nohigihene enangika.

² De hokonaa Ma Jou o Yawe Wopoputurungu wonihingahu, wato, ‘Ngohi tato adonoka ma oraha kiani tahibalaha o Amaleke ma nyawaika. Angamoi ma dodihiraka abe ma oraha ahi nyawa yohupu o Mesiiri ma tonakino de o Amaleke ma nyawa duru yahikangela o Isiraele ma nyawa ho kiani tahibalaha onangika.

³ Ho ngona kiani noiki naparangi o Amaleke ma nyawaika ka hiadono ona nakokitomaka de hiadono manga aewani de manga kiahonanga enangoo nahibinaaha mata-mataika. Moioo de ko iwa ngaro o nyawa de ngaro manga kiahonangino abe ka idadi nanoaika, ma kiani mata-mata nahibinaaha ngaro o nau-nauru eko o ngo-ngofeka, de ngaro manga gogilauohi de ngaro yaperekioka. Abe kiani ahi hohowono yadaene ona mata-mataika ho to ona manga hapi, de manga domba, de manga unta, de manga keledai, enangoo nahikokibinaahaka.’”

⁴ Hokogea Ma Jou wihibehehongo ho ahao o Saulu de ai tentara yomahidiai yoparangi o Telaimi ma kapongoka. De naga manga nyawa yasana o ratuhu hinooto abe yolou-lou de nagali o Yehuda manga dutuino yasana ngimoi.

⁵ Ho ona mata-mata yotagi-tagi de yomahitigi o Amaleke manga kotaika masara yomagogono ma hoanoka abe o tonaka gea ma dolaka.

⁶ De ma tonakoka gea nagali o Keni ma nyawa yogogere genangoka, ho o Saulu wahidingoto ai nyawa la yadofanga ai hingahu ma demo onangika. De ai demoino gea una wahingahu wato, “Ngini o Keni ma nyawa kiani nisobo de nianoaka o Amaleke ma nyawa gea done nginioo inihidotadaene ma oraha ngohi toboaino de tahibinaaha onangika. Angamoi ma dihiraino ma oraha ngomi o Isiraele ma nyawa mihupu o Mesiiri ma tonakoka de miaino de ti ngini nia hininga ma rahai itagi ngomino. Ho ngohi naa duru toluku tiniparangi nginika.” De o Keni ma nyawa yoihene ai hingahu ma demo gea de ahao igoungu ona yosobo yamalaika o Amaleke ma nyawa.

⁷ De o Keni ma nyawa yosoboka de ahao o Saulu de ai tentara yomulaenge yaparangi o Amaleke ma nyawa manga kota o Hawilaka de wogila-gila waparangi onangika. De gea yogila-gila yaparangi de yakokitoma o Amaleke ma nyawa mata-mataika ka hiadono manga tonaka ma batingika o Siuroka abe imakadateke de o Mesiiri ma tonaka o wange ma hiwariha.

⁸ De o Amaleke ma nyawa manga koano o Agaga iwitaoko dika de iwiao masara ai kokawaaha yakokitoma ka hiadono duru yahikokibinaahaka mata-mata.

⁹ Ho ka manga koano o Agaga dika abe iwihigunoa la ka wowangohi. De manga hapi de manga dombaino yairiki la ka enangohi abe duru ma rorahai de ena abe ka ma goo-goohi abe duru ikokutufuru de gea ena yao. De nagali yomagoraka o Amaleke ma nyawa manga kiahonangino o kia dika irahai abe yoigo yomahitoona. Ho abe yahibinaaha ka ena dika abe yaetongo ko kia-kiaua ma utumu.

O Saulu Ma Jou o Yawe ko wietongokaua o Isiraele ma nyawa manga koano

¹⁰ De ahao Ma Jou o Yawe wihingahu o Samuelika wato,

¹¹ “Ngohi naa duru tomatoduba o Saulu ma dihira tihidadioka o koano angamoi una ko waniikokaua to Ngohi ahi behehongo unangika abe naa ma moioli woluku wohihingounu Ngohino.” Ka de hokogea o Samuele woihene de ai hininga duru ihuhaholi hiadono o futu moiino de ai hininga ma huha o Saulu wigahoko Ma Jou o Yaweika.

¹² Masara ma dawangeino abe ka o ngoru-ngoruminohi de o Samuele wosobo wilingiri o Saulu. De naga o nyawa iwihingahu ato o Saulu wosoboka woiki o Karamelika de wohigoko genangoka o hohininga ma dodunguu la ka idadi o nyawa manga horomati itagi una ma hireteika. De wohigoko ibooto de ahao wogila-gila o Gigalika. Ho gea o Samuele woihene de ahao wogila-gila ai dodagi ma dumutu o Gigalika.

¹³ De ma oraha o Samuele woboa o Gigalino de o Saulu wimake ho wibuhuku de ai garago, wato, “Duru tonigahoko la Ma Jou o Yawe wonihiowa ngonaika. De Ma Jou o Yawe ai behehongo ngohino taniiki hiadono tabooto todiai mata-mata gea abe Una wohihibehehongoka la todiai.”

¹⁴ De ahao o Samuele wopaluhu, wato, “Ho nako gea, adodoa ho ngohi toihene o hapi ma ngoe imoo-moo de naa o domba ma ngoe imehe-mehehe?” Hokogea o Samuele hoka wihidumutu o Saulika ai howono.

¹⁵ Masara o Saulu womademo wato, “Igoungu, naga o domba de o hapi abe ka enangohi duru irorahai abe ko miahibinaahaua masara naga ma titi irahai de gea miato miaoino la idadi nanga huhuba o domba de o hapi abe hahihuba to ngona ani Jouika, Ma Jou o Yawe. Gea dika ma titi hiadono naga o hapi de o domba nenangoka masara manga aewani utu duru miahikokibinaahaka.”

¹⁶ Tanu o Saulu ka wotemohi masara o Samuele ai demo watoaka, wato, “Saulu, ibootohi nomademo! Kiani noihene abe o futuika Ma Jou o Yawe wohihingahu ngohino.” De o Samuele wihingahu hokogea de itaiti o Saulu wileha unangika, wato, “Ma Jou ai demo o kia wonihingahu ngonaika?”

¹⁷ De o Samuele wihiree-reeika wato, “Ngaro ma dihiraino ngona nomahitipokouku, masara ka enangua dika hiadono Ma Jou woniiriki ngona. Sarakia, ngona ko nomangaratiiua abe nodadioka o Isiraele ma nyawa manga dutu mata-mataika manga hihira? Ma Jou o Yawe woniiriki de wonihitunguuoka abe wonihidadioka o Isiraele ma nyawa manga koano.

¹⁸ De naa ma duru Ma Jou o Yawe wonihikarajaanga de ai behehongo hokonaa ngonaika, wato, ‘Ngona kiani noiki de nahibinaaha o howo-howono ma nyawa abe ma titi o Amaleke ma nyawa kiani nahohonenge mata-mataika hiadono ko moiokaua yowango.’ Hokogea Ma Jou o Yawe ai hingahu ngonaika.

¹⁹ Ho adodoa ho ngona ko nihingounua Ma Jou o Yawe? Ngona ani hininga ma horoodo dika naniiki la nomagora manga kiahonanga ho gea Ma Jou ai behehongo nohikawalimi hiadono nodiai abe Una wato ko idadiua! Ngona nodiai Ma Jou o Yawe ai himangoka abe Una womalega ani datorika de wato duru itorou!” Hokogea o Samuele witaere manga koano o Saulika.

²⁰ De ahao o Saulu womademoli, wato, “Masara nako ngohi, duru tagou-goungu Ma Jou o Yawe tihingounu. Abe gea wohihikarajaanga gea todiai mata-mata. Ma igoungu, manga koano o Agaga gea tiao naangino masara o Amaleke ma nyawa utu takokihohonengoka mata-mataika.

²¹ Masara ahi tentara dika, ona gea yomagaoino o Amaleke ma nyawa manga domba de manga hapi, abe ka enangohi irahai dika, de yomagao o Gigalino naa la ka idadi hahihuba to ngona ani Jouika, Ma Jou o Yawe.” Hokogea o Saulu womahipongono.

²² De o Samuele wopaluhu wato, “Nako ngone hoigo hihisanangi Ma Jou o Yaweika, o kiahi woigo hodiai, homahihuba o domba ma nauru ma haki iharo-harongo eko ai demo ngoneino hohigihene? Abe o hingounu de o huhuba nako Una wohikohowono de duru o hingounohi abe Ma Jou wosanangi.

²³ De abe ngone hilawana Ma Jouika gea Una waetongo o howono abe imaketero hoka homai-maihi. De abe nanga pea ma dogowini to Una ai behehongika, gea waetongo imaketero hoka homahuba-huba o popangaoika. Ho Saulu, abeika abe inidaene ngonaika naa, mangale ma titi ngona naoluku naniiki Ma Jou o Yawe ai demo ngonaika ho hiadono ngonaoo wolukoka nahikoanohi ai nyawaika.” Hokogea Ma Jou ai hininga o Samuele wihitararono o Saulika.

O Saulu womagahoko la o Samuele wiapongo ai howono

²⁴ Hokogea o Samuele witemo de ahao o Saulu womangaku ai howono, wato, “Igoungu, ngohi naa tahowonoka. Ahi baluhu, ani hiaturu ma demo de Ma Jou o Yawe ai behehongo ngohino, ko tagou-goungua taniiki angamoi duru tamodongo ahi nyawaika abe hokokia yodiai manga hininga ngohino nako to ona manga mau ko tahigunoaua yaniiki.

²⁵ Ho, ahi baluhu duru togahoko la ngona nohiapongo abe tahowonoka de tomagahokoo la ngona nohiniiki ngohi la ka idadi tomahubali Ma Jou o Yaweika.” Hokogenangika dika o Saulu ai hininga ma toduba.

²⁶ Masara ai gogahoko gea o Samuele woluku, wato, “Ngohi ko toniniikua o huhuba ma ngiika! De gea angamoi ngona naolukoka Ma Jou o Yawe ai behehongo ngonaika ho Unangoo woniolukoka la o Isiraele ma nyawa nahikoanohi.”

²⁷ Hokogea wihingahu o Saulika de ahao o Samuele womaleloro ai poretoko la o Saulu widogunoaika. Masara o Saulu duru de ai buturungu wohitaili witumungu la ufa o Samuele wolio ho ai baju ma barenika waso de watauru hiadono o Samuele ai baju wakakihi hiadono itoaka.

²⁸ De o Samuele wihingahu, wato, “Abeika, imaketero hoka ngona ahi baju natoaka, de hokogenangoo o koano ma karajaanga Ma Jou o Yawe watoakoka ngonaino! De o koano ma karajaanga gea Ma Jou wihidoaka o nauru moiikali, abe womatengo gea nako ngona de una ka unangohi ai wowango ma datoro itiai.

²⁹ De Ma Jou womaputuhoka abe ngona wonituruuru de o nauru womatengoli de ai putuhu gea ko watoturuurua. Angamoi nako Ma Jou, Una gea o Isiraele ma nyawa manga gimono ma dararono. Ho Una duru ko woelu-elukua de ai hininga ko watoturuurua angamoi Una ko o nyawaua. Abe nako o nyawa, ona manga hininga yatobaturuuru.” Hokogea o Samuele wihitararonohi.

³⁰ Masara o Saulu duru womagahokoli wato, “Ahi baluhu, duru tomahioriki ngohi igoungu tahowonoka. Masara tomagahoko la nohitunguu to ngona ani horomati ngohino ahi nyawa de manga dimo-dimono manga himangoka. Ho duru tomagahoko la ngona nohiniiki ngohi la homahuba to ngona ani Jouika, Ma Jou o Yawe.” Hokogea womagahokoli.

³¹ De o Samuele ai dora ipuda o Saulika hiadono waniiki ai gogahoko de yoiki o huhuba ma ngiika de genangoka o Saulu womahuba Ma Jou o Yaweika.

O Samuele wihohonenge o Agaga

³² De yomahuba ibooto de o Samuele wohibehehongo wato, “Manga koano gea o Agaga niwiaoino ngohino!” Ho o koano gea iwihiboa o Samuelino de una womafikiri wato, “Naa ahi kangela ipahaka marai ko kia-kiaua yodiai ngohino ho marai ka towangohi!” Hokogea de ai sanangiohi o Agaga.

³³ Masara o Samuele witemo unangika wato, “Naa idadi ngonaika duru imaketero hoka ngona ma ngoe nodiai o nyawaika. Abe de to ngona ani humaranga o ngo-ngofeka manga ngofa-ngofaka o nau-nauru nahihihanga ko manga ngoe de duru imaketero hokogea ngohi naa to ngona ngoni meme ami ngofaka tihihihanga.” Ka de hokogea o Samuele wotemo ibooto de ahao o humaranga wagoraka de o Agaga gea witobi-tobikuku Ma Jou o Yawe ai himangoka o Gigaloka.

³⁴ De ahao o Samuele wolio ai tauika abe o Rama ma kotaka de o Saulu wolio to una ai tauika abe o Gibea ma kotaka.

³⁵ De o Samuele ko witutumokaua o Saulika masara ka ihikaika de ai huha ilamoko wihininga. De Ma Jou o Yawe womatoduba o Saulu gea wihidadi o Isiraele ma nyawa manga koano.