1 Samuele 14 - Ma Jou ai Demo-demo o Totobelohoka

O ayata 2-5 de 16-19 de 24-46 ko atailakouahi O Saulu waparangi o Isiraele manga musu ka ihikaika

¹ De ona manga dodogumokahi de o wange moiuku de o Yonatana, abe ai baba manga koano o Saulu, witemo ai dodiawo o goohi abe ka ihikaika ai parangi ma dae de ma dadatoko watobaao-ao, wato, “Abeika ngone dokenangika hoiki la ka idadi homahitigika o Filistina ma nyawa manga gogoana ma ngi daku o bakoro ma peaino.” Hokogea o Yonatana ai hidee masara ko wihingahua ai babaika.

² De ma oraha gea ai baba o Saulu naga o gota moi ma timiuku o Migirono ma kapongoka, abe ko ikurutikaua de o Gibea ma kota. De ai tentara ma nyawa abe yomakiniiki de una naga yaratuhu butaanga.

³ De o Sauloka nagali o Ahia abe una manga hidemo ma nyawa Ma Jouika, de una womahinoaukuoka ai baju abe ma romanga o efodo. De o Ahia una gea ai baba ai romanga o Ahitubu. De o Ahitubu una de ai dodoto o Ikaboto onangoli manga baba o Pinehasa. De iyeoli o Pinehasa ai baba o Eli. De ma dihiraino de o Eli unangoo wodadi manga hidemo ma nyawa Ma Jouika ma oraha ona mata-mata naga o Silo ma kotaka. Ho ngaro o nyawa manga ngoe naga genangoka masara ko moiua ihioriki abe o Yonatana wosoboka abe manga dodogumu ma ngikoa de waika ma hoanika.

⁴ De o Yonatana ai dumutu la womahiadono o Filistina manga gogoana ma ngiika, ho kiani watilakuru o loku ma sola gea. Abe ma titi naga o bakoro hinooto ai arihonongaka ma oraha watilakurika. De ma bakoro moi ihiromanga enangika ato o Bosese de abe moioli gea ihiromanga o Sene.

⁵ De o bakoro abe dau ma honongauku idateke gea o Mikamasa ma himangoka, de ma bakoro moioli abe daku ma honongaiye idateke gea o Geba ma himangoka.

⁶ De genangoka ahao o Yonatana witemo ai dodiawoika gea abe watobaao-ao ai kiahonanga wato, “Abeika ngone hoiki dokaika o Filistina ma nyawa gea manga gogoana ma ngiika. Abe ona gea duru ko iwihiorikua nanga Jou o Yawe, ho marai Una wosanangi wonaduhunu ngone naa. De nako Una gea duru ko iwa abe ka idadi iwihikala Unangika. Abe ngaro ai nyawa ko manga ngoe eko ka manga hohutulu dika masara ko adodoaua angamoi Una gea ka idadi wapake la wahikala nanga musuika!”

⁷ De ai dodiawo abe ai parangi ma dae de ma dadatoko watobaao-ao, wato, “Nako ngohi, abeika ngohi naga ani datekoka, ho o kia dika ani hininga adaene genangika nato nodiai, hokogenangoo de to ngohioo ahi hininga tosanangi toniniiki.” Hokogea womahitaana ai tagongo o Yonatanika.

⁸ De o Yonatana wopaluhu, wato, “Nako ngonaoo ani hininga hokogea, abeika doka ma honongaikali hoiki la genangoka ka idadi homahimatoko onangika.

⁹ De nako ona inamake de yotemo, ato, ‘Genangoka dika niaino!’ Nako hokogea manga demo ngone homatogumu dika ufa hogila-gila hodoa onangiye.

¹⁰ Masara nako ona yotemo, ato, ‘Niaiye dika la ka idadi homakotoma.’ Nako hokogea yotemo de ahao manga demo idadioka o dodunguu Ma Jou o Yaweino abe Una woigo wonaduhunu la hahikala.” Hokogea o Yonatana ai ngongaku ma demo.

¹¹ Ho ona yaika de ka de o Filistina ma tentara gea yamake de yabanarata onangika ato, “Abeika, o Isiraele ma nyawa manga gogogonino yohupu yomalia-liara naangino!” Hokogea manga hohedu ma demo.

¹² De ahao yadodanauru o Yonatana de ai dodiawoika ato, “Ngini nidoaiye dika la ngomi minidotoko de o dodotoko moi abe duru de ma dubuhoka.” Hokogea yahoheduoli. Masara o Yonatana wihigaro ai dodiawoika gea wato, “Naino nohiniiki ngohi la hodoa de hahimanga dika onangika, angamoi nanga musu gea Ma Jou o Yawe wahidoakoka to ngone nanga giamino. Ho ngone o Isiraele ma nyawa ka idadi hahikala onangika.”

¹³ Ho o Yonatana ma bakoro duru kohagurutiye genangiye wodoa de kiani wodoa womaliara de ai giama de ai lou. De hokogenangoo ai dodiawo winiiki wihidoduruiye. De ka de yomahiadono daku o bakoro ma peaiye de duru o Yonatana de ai duduhunu yapai-pairi manga musuika hiadono o Filistina ma nyawa gea de manga hawana yomadohuku masara Ma Jou o Yonatana de ai dodiawo wahiputurungu hiadono o Filistina ma tentara genangoka yakokitomaka.

¹⁴ De manga honenge yahikabarihi manga gogoana ma ngi ma amokika abe ma dola daku gea ko iwoatikaua. De ona abe o Yonatana de ai dodiawo yatoma genangoka ngade-ngade manga ngoe yamonaoko.

¹⁵ Ka de hokogea idadi de o Filistina ma nyawa mata-mataika yatodokana de yopusingi ngaro manga dodogumu ma goronaka de ngaro o dola ma gurutika. Ho ngaro ona o gogoana ma ngioka eko ona o dodoomuoka abe manga karajaanga o Isiraele ma nyawaika yatobangohama de yaora-ora, onangoo yahipareta de o hawana hiadono duru yakapusaka. De duru ma oraha gea naga o tonaka ikelu-kelu de ona mata-mataika manga hawana ka idogo hiadono ngaro manga tentara abe ma gurutika onangoo yadaene.

O Isiraele ma nyawa yahikala o Filistina ma nyawaika

¹⁶ De ma oraha gea o Saulu de ai tentara ka nagahi o Gibea ma kotaka abe o Benyamini manga tonakoka. De to una ai gogoana ma nyawa abe ka ihikaika yomalega ma gurutika done manga musu yomatohiki yoboaino, ona gea yomalegaika de abeika, ona yamake o Filistina manga tentara ko manga ngoe gea yomulaenge yomadohuku de yomahikabarihi yaika yaino.

¹⁷ Ho o Saulu wahuloko ai nyawaika wato, “Niaetongo nanga tentara mata-mataika la hohioriki nako naga abe ko yaiwaka.” De ona iwiniiki ai pareta ma demo gea ho yaetongo ipahaino de ahao iwihioriki abe o Yonatana de ai duduhunu watobaao-ao ai kiahonanga, ona yahinooto gea ko yaiwaka.

¹⁸ Ho o Saulu wihuloko manga hidemo ma nyawa o Ahiaika wato, “Ngona nainohi de naoino ani baju o efodo gea la ka idadi hohioriki Ma Jou ai hininga ma mau.” Hokogea wihuloko angamoi ma oraha gea o Ahia abe womahinoauku ma efodo gea o Isiraele ma nyawa manga hima-himangoka.

¹⁹ Masara una de o Ahia ka manga gogiriakahi yomakoketemo de doka o Filistina ma nyawaka de yodogo-dogo yolilifanga. Ho o Saulu wihulokoli o Ahiaika wato, “Ibootohi, angamoi nanga oraha ko iwaka! Koaho ngone mata-mata hosobo dika la homataiti haparangi o Filistina ma tentaraika!”

²⁰ De ahao o Saulu de to una ai tentara yagihene manga gigoro de yomataiti yadoara de yamake o Filistina ma tentara gea ka yomahikokoona yomaketeparangi de yomakokotoma. De duru mata-mataika o kapusaka dika yahipareta. Ho duru o Saulu de ai tentara yolaku yaparangi.

²¹ De ma dihira naga o Isiraele ma nau-nauru utu yomahisapuru o Filistina ma nyawa manga tentaraika de ngaro ahao manga gogianongoruikaoo yaparangi ma yomafikiri iti ufa ona ma hirete yohonenge. Masara naa ka de yamake o Filistina ma tentara yokala de yomangalioli to ona manga doomuika la yolio yaduhunu o Saulu de o Yonatana de manga gogianongoruika.

²² De hokogenangoli o Isiraele manga tentara abe ma dihiraino ona ka yomagogono o loku-lokuoka dika o Efaraimi ma tonakoka gea, onangoli yohupu de yoboa yaduhunu manga gogianongoru. Masara naa, ka de yagihene o Filistina ma tentara gea yokokiloara de manga hawana ihihanga hiadono onangoo yaniiki yaparangi manga musuika.

²³ Ho o wange gea dika de Ma Jou o Yawe o Isiraele ma nyawa wahihupu manga boditoino de o Isiraele manga tentara gea ka yaparangiohi yaniiki manga musu ka hiadono o Bete-Awene yatilakurika.

O Saulu womahikoboto moi abe ko wafikirikaua

²⁴ De ma wange gea o Saulu duru woigo la wahibinaaha manga musu mata-mataika hiadono ko moiokaua. Ho una ai hininga la wahigaro o Isiraele ai tentaraika la yomataiti yahibinaaha o Filistina ma nyawaika, ho una wahikoboto moi ai tentara ma nyawaika wato, “O wange naa ka hiadono ihumuririhuku de nginioka onagona dika yomatogumohi la yolomo o inomo o kia dika, ona gea kiani yohonenge. Angamoi koaho hahouohi nanga musu gea de ahao ka idadi holomoli.” De ai tentara ma nyawa yaniiki ai demoika ho mangale ma titi ai hikoboto ma demo gea de ona duru yakokiboleoka.

²⁵ Abe ma wange gea manga musu yowohama o fongana ma goronaika, de ma oraha yahidoduru onangika de o Isiraele ma nyawa yamake o ofungu ma gula ma amoko.

²⁶ Masara ona ko moiua yaolomo ma gula angamoi yohawana ma titi ma hikoboto ma demo gea.

²⁷ De masara nako o Yonatana una kangano ko woihenua ma titi ai baba ai hikoboto ma demo gea. Ho ma oraha una wamake o ofungu ma igutu moi de ai tutukunu ai giamoka ka wohingohama doka ma goronaika la ka idadi womale ma gula. De womale ipahaino de ka oko dika waolomo. De ahao o Yonatana wamao hoka ma inomo gea iwihiputurungoli.

²⁸ Masara wolomo ipahaino de naga o tentara ma nyawa womatengo wihingahu unangika wato, “Adoo! Kangano ani baba wonahikoboto ngone mata-mata wato o wange naa ko idadiua holomo o inomo o kia dika done ma koboto gea inadaene! Ho gea ma titi hiadono ngone inakokiboleoka.”

²⁹ De ma demo gea woihene de o Yonatana wipaluhu wato, “Adoo! Ahi baba ai hikoboto ma demoino gea de ka wonahihuha dika. Abeika ngohi naa, angamoi kangano taolomo ma inomo ma hohutulu gea de ihihiwangoroka, ho duru ihiduhunu.

³⁰ Ho nako hoka kangano una ko wonahikobotua, ahao nanga gogianongoru tanu ka idadi yolomo dika ma oraha yamake ma inomo abe naga nanga musu manga hidogoronaka. De gea nako yolomo ahao manga buturungu ka ilio manga badangino de to ngone nanga musu o Filistina ma nyawa utuohi yowoe abe ka idadi hahikala de hahohonenge! Masara hiokoo ma hikoboto ma demo gea inatotapupana!”

³¹ De ma wange gea ona duru yanii-niiki o Filistina ma nyawaika abe o Mikamasoka ka hiadono o Ayalonika, ho manga musu gea onagona dika yadaene de yahohonenge onangika. Masara o Isiraele ma nyawa ona ka yodogo-dogo yabole.

³² De ipaha yofutuoka de ahao ona mata-mata duru de manga hafinoka, ho yomataiti yomale manga musu manga kiahonanga de manga aewani la yomahitoona. De gea yomataiti yomadoma ma domba de ma kabingi de ma hapi la ka idadi yaolomo, abe ka ma tonaka ma lokuoka dika de yatoma ma aewani gea. Masara gea ma awunu ko ihikopoauahi de ka oko dika yaolomo ma roehe abe naga de ma awunohi.

³³ Ho ipahaino naga o nyawa yamake manga datoro gea de yakalaki manga koano o Saulika ato, “Abeika, nanga tentara ma nyawa ona yahowono Ma Jou o Yawe ai himangoka angamoi yaolomo o aewani ma roehe abe nagahi de ma awunohi.” De gea woihene de o Saulu duru wongamo de wataere ai nyawaika wato, “Ngini naa niatilakuroka to Una ai behehongo! Abeika nialuluino o hakaru ma amoko moi naangino la idadi ma aewani ma luluiti ma ngi.”

³⁴ De ahao una wahuloko ai nyawa yamuruono naga la yototaka ai demo o tentara ma nyawa mata-mataika. De ai huhuloko ma demo hokonaa, wato, “Ngini mata-mata niao ma hapi de ma domba de ma kabingi ngohino, la ka idadi ma tomara haluiti naa o hakaru ma lokuoka de to ena ma awunu iuihuku. Angamoi kiani ma aewani ma awunu yamatahi de ahao ngini niaolomo. Done niahowono Ma Jouika nako ma awunu nagahi ma roehoka ma oraha ngini niaolomo.” Ho ma futu gea de o tentara ma nyawa mata-mata yaoino manga aewani de yaluiti genangoka.

³⁵ De ahao o Saulu wodiai o huhuba ma ngi genangoka, de gea ma huhuba ma ngi duru ihira abe una wodiai la ka idadi o huhuba yomahihuba Ma Jou o Yaweika.

³⁶ De ahao o Saulu wotemo wato, “Abeika o futu naa dika hosoboli de hanii-niiki o Filistina ma nyawaika ka hiadono o wange ipotokaiye, la ka idadi hahikangela de hahibinaaha hiadono ona duru ko moiokaua yowango.” De gea ai nyawa iwipaluhu ato, “Ka idadi, abe o kia dika adaene ani hininga de ngomi naa ka miomodeke.” Masara manga hidemo ma nyawa una wato, “Koaho hilehahi nanga Jouika la hohioriki to Una ai hininga.”

³⁷ Ho o Saulu wilehahi Ma Jouika wato, “Sarakia, to Ngona ani hininga la ngomi naa mianii-niiki o Filistina ma nyawaika? De marai Ngona nosanangi nomiduhunu la ka idadi miahikala onangika, eko sarakia?” Masara una wileha ipaha de ko iwa o babaluhu ma demo Ma Jouoka de aino ma wange gea.

³⁸ De o Saulu womafikiri ma titi gea de wato bote naga ai nyawa abe yahowono Ma Jouika. Ho una wahuloko ai nyawaika wato, “Ngini mata-mata abe nidadi ahi tentara ma hae-haeke kiani nikokiboaino ngohino! Angamoi boteua naga nanga hidogoronaka abe yahowono Ma Jouika o wange naa.

³⁹ De ngohi naa tomahikoboto Ma Jou o Yawe ai himangoka, abe tato onagona dika yahowono Unangika, abe ngaro ahi ngofaka o Yonatana de ngaro o nyawa utu, masara naa tomahikoboto tato una wahowo-howono gea kiani iwihohonenge!” Hokogea o Saulu ai demo masara ona mata-mata ka yomarii-riidoka dika, ko moiua yotemo.

⁴⁰ De ahao o Saulu wahuloko ona mata-mataika wato, “Marai ahi ngofaka o Yonatana de ngohi, ngomi imihinooto mimaokoino naangoka dika. De ngini utu mata-mata kiani nimaokoino ga doka.” Ho ai kokawaaha yopaluhu ato, “Iya, ka idadi, iti hokokia dika adaene de ani hininga.”

⁴¹ De yomahiaturu hokogea de ahao o Saulu womaniata wato, “Mia Jou o Yawe, abe Ngona to ngomi o Isiraele ma nyawa mia Jou, ngomi naa duru mimagahoko la nomahimatoko onagona yahowonoka de onagonali ko yahowonua ani himangoka. Abe bootino mia hidemo ma nyawa una waumo o Urimi de o Tumimi gea la genangino de ka idadi minihioriki ani hininga abe onagona yahowonoka. De gea nako o Urimi adaene de ahao imihitunguu ngohi de o Yonatanika. Masara nako waumo de o Tumimi adaene de gea yahitunguu o Isiraele ma nyawa utuikali abe ona yahowonoka ani himangoka. Hokogea tomagahoko la nomihimatoko onagona yahowonoka.” De womaniata ipahaino de manga hidemo ma nyawa waumo, de o Urimi adaene. De genangino Ma Jou wahimatoko abe o Isiraele ma nyawa yowoe-woe ko yahowonua, angamoi ihitunguu o Saulu de o Yonatanika.

⁴² De ahao o Saulu wotemoli manga hidemo ma nyawaika wato, “Kiani naumo ma moioli la hohioriki gea ihitunguu ngohino naa eko ahi ngofaka o Yonatanika iwitunguu.” De waumoli de iwitunguu o Yonatanika abe una wahowonoka.

⁴³ Ho o Saulu witemo ai ngofakika wato, “Abeika nohihingahu, ani datoro ma dorou o kia nodiaioka?” De wipaluhu wato, “Marai ahi tutukunu ma dekara dika tohingohama o ofungu ma gulaika de gea tamao ma hohutulu ahi uruino. Ho naa tomahidoaka la ngini ka idadi nihihohonenge dika.”

⁴⁴ De ai baba wopaluhu wato, “Ani demoino gea de ngona nagoungu, kiani ngona nohonenge. Abe nako ngomi ko minihohonengua ahao utuohi itubuho Ma Jou ai hohowono ihidaene ngohino naa.”

⁴⁵ Masara duru ma oraha gea de ai nyawa manga ngoe yatoaka o Saulu ai demo ho onangoli yotemo ato, “Duru ko idadiua hahigunoa la o Yonatana iwihohonenge! Angamoi mangale ma titi una gea hiadono ngone o Isiraele ma nyawa ka idadi hahikala nanga musu ho nanga lolaku ma amoko naa hamakeoka! Ho naa ngomi mimahikoboto Ma Jou o Yawe ai himangoka, miato ngaro o Yonatana ai tadauru o ngai moi dika yaruwae masara gea duru mioluku! Angamoi duru itararonoka ngone mata-mataino abe kangano Ma Jou Una ma hirete widuhunu o Yonatanika la wakunu wodiai ai datoro duru ma amoko gea ho ka idadi wahikala nanga musu!” De manga demoino gea de o nyawa manga ngoe iwiduhunu o Yonatana ai boditoka de aino la ufa iwihohonenge.

⁴⁶ De hokogea ipaha de ahao o Saulu wahuloko ai tentara la ibootohi yaniiki de yaparangi o Filistina ma nyawaika. Ho ona mata-mata yolioino, de o Filistina ma nyawa onangoo yokokilio manga tau homoi-homoiika.

O Saulu ai wowango ma ade-ade hohidotoomuino

⁴⁷ Ma oraha o Saulu wodadioka o Isiraele ma nyawa manga koano de duru iwimagawe waparangi o Isiraele ma nyawa manga musu arihononga. Waparangi o Moaba ma nyawaika, de o Amono ma nyawaika, de o Edomo ma nyawaika. De o kokoano abe yahikoano o Soba ma tonakoka o Saulu wakokiparangi de ka ihikaika kiani waparangi o Filistina ma nyawa abe duru manga datekoka. De o nyawa mata-mataika abe yamusu o Isiraele ma nyawaika o Saulu waparangi onangika de wahikala ree-ree.

⁴⁸ De una duru de ai nauru ma domoroini ma gahumu o Saulu o Amaleke ma nyawa waparangi hiadono duru wahikalaka. De naga manga musu abe duru yatobaora-ora masara to ona manga kuaha o Isiraele ma nyawaika o Saulu wohiwederoka hiadono wahihupu ai nyawa manga musu ma kuahaino.

⁴⁹ De o Saulu ai ngofa-ngofaka o nauru manga roma-romanga o Yonatana, o Yisiwi, de o Malakisua. De ngoi ora yahinooto abe muna o riaka ami romanga o ngo Meraba de ngomi dodoto ami romanga o ngo Mikala.

⁵⁰ De o Saulu ngoi fekata ami romanga o ngo Ahinoama abe ami baba o Ahimasa. De naga o Saulu ai ria-dodoto womatengo abe wodadi ai tentara manga hidimono, de una gea ai romanga o Abanera de ai baba o Nere.

⁵¹ De o Saulu woama o Nereika angamoi una de o Kisi, o Saulu ai baba, ona o ria-dodoto idodutu abe manga baba moi de to una ai romanga o Abiele.

⁵² De o Saulu ai dekana wahikoano o Isiraele ma nyawa de hokogenangoo ai dekana waparangi o Filistina ma nyawaika. De mangale ma titi gea hiadono ka de una wimake ai kokawaahaka o nauru womatengo abe de ai buturungoka eko abe wotobamoroini de o Saulu itaiti una gea wihidadi ai tentara ma hidogo.