1 Samuele 13 - Ma Jou ai Demo-demo o Totobelohoka

O ayata 17-23 ko atailakouahi O Saulu womulaenge waparangi o Filistina ma nyawaika

¹ De o Saulu ai ngumuru adonoka ai taongo moruange ma oraha wodadi o koano de una wahikoano o Isiraele ma nyawa ai taongo moruata de hinooto ma dekana.

² De ma moiuku o Saulu wairiki o Isiraele ma tentaraino o nau-nauru yasana hange abe duru yososawaro yoparangi de ona utu wahuloko la yolio dika. De ahao ai tentara yasana hange gea o Saulu waregu abe yasana hinooto wato iwiniiki una. De o tentara yasana moi wahuloko la ona iwiniiki ai ngofaka o Yonatana. De ahao o Saulu de ai tentara yasana hinooto yoiki o Mikamasika itigi o loku-lokuika abe naga o Betele ma tonakoka. De o Yonatana de o tentara yasana moi, abe una wahihira, ona yoiki o Gibeaika abe o Benyamini ma nyawa manga tonakoka.

³ De ahao o wange moiuku o Yonatana de ai tentara yaparangi o Filistina manga tentara abe naga manga gogoana ma ngioka abe o Geba ma ngioka. De o Yonatana de ai tentara yasana moi yaparangi o Filistina ma tentara genangoka ka hiadono ona yahibinaahaka. De ma abari gea itagi o Filistina ma nyawa mata-mataika ato bari adonoka o Isiraele ma nyawa yomulaenge yalawana o Filistina manga poparetaika. Ho o Saulu ai hidingoto ma nyawa yoiki o Isiraele ma tonaka ma amokika yotulu-tulu moduku ma kapo-kapongika de ma kota-kotaika manga guguli yawuwu de yopoa-poaka ato, “O Isiraele ma nyawa naga o abari nenanga kiani nikokiihene!”

⁴ Hokogea yodiai hiadono o Isiraele ma nyawa yoihenoka abe manga koano o Saulu wahibinaahaka o Filistina manga tentara ma doomu o Gebaka de ma titi gea hiadono ma oraha naa o Filistina ma nyawa manga dohata o Isiraele ma nyawaika ka idogo-dogo. Ho o Saulu wabehehongo la o Isiraele ma nau-nauru yokokiboa unangino o Gigaloka la o tentara manga ngoe watoomuinoli genangoka.

⁵ De o Filistina ma nyawa to onangoo manga tentara yatoomuino o Mikamasoka abe naga o Bete-Awene ma honongaka o wange ma hiwariha. De ona duru ko manga ngoeholi hiadono ona abe de manga goroba parangioka naga yasana hange, de ona abe yobarenuku o kuda ma poretoka yasana butaanga, de manga tentara abe yalou-lou ko idadiua yaetongo angamoi manga ngoe hoka o dowongi ma mui o gahi ma ngigoroka ho ko idadiokaua haetongo o tentara abe o Filistina ma nyawa yahipareta.

⁶ Ho ka de o Isiraele manga tentara yamake manga musu yowoeholi hokogea de duru manga domoroini ko iwaka hiadono ona homoi-homoiika yomalingiri manga gogogono ma ngi. De o tentara utu yomamake manga gogogono ma ngi o arukoka, utu o hakaru o bilatuoka, de utu o hakaru ma ago-agomo ma hidogoronaka. De manga tentara utu yowohama o lungu-lungunu ma ngiika, de utu yomagogono dau o humu-humu ma baitoka.

⁷ De manga ngoe yoara o Yorodani ma akerika de yomahihora doka ma honongaika de yogila-gila o Gaada ma nyawa de o Gileada ma nyawa manga tonakika. Masara manga koano o Saulu ko woarua, una de ai tentara abe ko yoarua yomanoa manga ngioka o Gigaloka masara ai tentara ma hou gea manga hawana yahifafara.

O Saulu Ma Jou ai behehongo ko waniikua ho o Samuele duru witaere

⁸ De duru genangoka o Saulu de manga tentara ma hou iwidamaa o Samuele o wange tumidino hoka ma dihira wihibehehongoka o Saulika. Masara o wange tumidoka gea de o Samuele ko woboauahi la ka idadi wagahoko o duduhunu Ma Jou o Yaweiye de wahihuba manga huhuba. De o Saulu ka ihikaika ai hininga ma huha idogo angamoi ai tentara ka ihikaika yokuranga angamoi ka ihikaika utuohi naga abe onangoo yoara.

⁹ Ho wahuloko onangika abe yagoana manga aewani abe ena gea o Samuele ahao wahihuba, wato, “Marai o Samuele ko woboauau ho niaoino nanga huhuba iharo-harongo ma aewani de nanga hikadame ma huhuba la gea ngohi dika tonahihuba.” Hokogea wotemo de hokogea o Saulu wodiai.

¹⁰ De o Saulu gea manga huhuba iharo-harongo ahao ngade-ngade wahihuba ibooto de o Samuele woboa. Ho o Saulu woiki wibuhuku.

¹¹ Masara o Samuele duru ko wisanangiua unangika, wato, “Naa o kia abe ngona nodiaioka?” De o Saulu wopaluhu unangika wato, “Ngohi ka ihikaika tamake ahi tentara yomahikabarihoka masara ngona ko noboauahi hoka nohihibehehongoka. De ngohi tahiorikoka o Filistina manga tentara nagau o Mikamasoka de yomahidiaioka imiparangi.

¹² Ho ngohi tomatemo doka ahi hiningaka, tato, ‘Abeika o Filistina ma nyawa yomahidiaioka hiadono ngade-ngade yotagioka imingino. Ona hokogea de ngohi ko tomagahokuahi Ma Jou o Yaweika la wonaduhunu!’ Hokogea de ipuda ahi hiningaka abe nanga huhuba iharo-harongo kiani ngohi ma hirete dika tonahihuba. De ngohi todiai hokogea angamoi ani dekanino de ngona ko noboauahi.” Hokogea o Saulu womademo.

¹³ Masara o Samuele wato, “Ngona duru nobodo hokogea nodiai! Ngona naa nohitunguu ani lawana to ngona ani Jouika. Abe Ma Jou o Yawe ai behehongo ko nohingounua. Nako ngona nomatongohono dika de nihingounu Ma Jou o Yawe ahao ngona de ani totoforauku winihidadi o Isiraele ma nyawa manga koano ka hiado-adonika.

¹⁴ Masara naa ko idadiokaua hokogea ngini niahikoano o Isiraele ma nyawa ho ani oraha abe nahikoano onangika naga ma batingi. De mangale ma titi gea ko nihingounua ho hiadono Ma Jou o Yawe wilingiroka womatengoli abe ai hininga duru ma dumutu ka ihikaika la waniiki Ma Jou ai hininga. Ho una gea Ma Jou o Yawe marai wiirikoka la una gea ahao wonituruuru de unangoli wahikoano Ma Jou ai nyawa. De hokogea Ma Jou o Yawe kiani wodiai angamoi ngona Saulu ko nihingounua abe ko naniikua ai behehongo ngonaika.” Hokogea o Samuele ai dodaere ma demo o Saulika.

¹⁵ De ahao o Samuele o Gigala ka wanoaika dika de woikoka. De ahao o Saulu waetongo ai tentara ma hou de nagahi unangoka o nau-nauru manga ngoe yaratuhu butaanga dika. De onangoo o Gigala yanoa de o Saulu wao ai tentara ma hou gea o Gibeaika abe o Benyamini ma tonakoka.

¹⁶ De ahao o Yonatana una de o tentara abe naga iwiniiki ona yomatoomuino ka ma moi de ai baba o Saulu ai tentara ma hou abe yaratuhu butaanga gea. De manga dodogomu ma ngi itigioka de o Gibea, de ma ngi ma romanga o Geba ho ona mata-mata naa naga o Benyamini ma tonakoka. De o Filistina ma nyawa ona ka yomahidodogumohi o Mikamasoka.

¹⁷ De ipahaino de o Filistina ma nyawa gea yomaregu la naga manga doomu hange abe amomoi yosobo la yabaata o Isiraele ma nyawaika, masara manga dodagi ma dumutu imakokohowono. Abe ma doomu moi yoiki dau o Ofara ma kaponguku abe imanoa o Suala ma tonakoka.

¹⁸ De ma doomu moioli yotagi dai o Bete-Horono ma kotaoko, de manga doomu ma hange ona yoiki ma tonaka ma batingika abe o Seboimi ma dola ma datekino de imahitigino de o tonaka ma kakaaha gea.

¹⁹ De ma oraha gea ngaro o Isiraele ma tonaka ma amokika masara ko iwa o nyawa abe yotobatutuku o behi, angamoi o Filistina ma nyawa ko yahigunoaua o karajaanga gea. Abe ona yohawana nako naga abe o behi yotuu-tutuku, gea ahao o Isiraele ma nyawa ka idadi yamake manga parangi ma dae o humaranga de o kuama.

²⁰ De hongoli nako naga manga bajaka eko manga bahuku eko manga gugutuku ma dia ibuluoka ho yoperelu ihigihoroli, gea kiani yao o Filistina ma nyawaika abe yosawaro yokarajaanga de o behi la yodiaioli. Nako ona ma hirete duru ko yahigunoaua.

²¹ De o Filistina ma nyawa abe yosawaro ihigihoro o alata ma doto, gea manga karajaanga ma hewa duru ihali. Abe nako ihigihoro o bahuku eko o gugutuku ma dia eko o hapi ma tutuduku ma gota, gea kiani o Isiraele ma nyawa yofangu o haaka ise-senge moi onangika. De nako o bajaka ma doto moi eko o sangkolo ihigihoro, gea kiani yofangu o haaka ise-senge hinooto.

²² Ho ipahaino abe ma oraha adonoka la yomaketeparangi de o Isiraele ma nyawa duru ko iwa o humaranga de o kuama onangoka. Abe manga koano o Saulu de ai ngofaka o Yonatana ona yahinooto dika naga de ma enanga.

²³ De ma oraha gea de o Filistina manga tentara o doomu moi yoiki o Mikamasa ma loku ma solaiye de duru yogoana genangoka done o Isiraele ma nyawa yatilakuru.