1 Samuele 12 - Ma Jou ai Demo-demo o Totobelohoka

O Samuele ai hingahu ma baha o Isiraele ma nyawaika

¹ De ma oraha gea o Samuele wahingahu o Isiraele ma nyawa manga doomu ma amokika, wato, “Ngohi naa ti ngini nia hihira duru ma dekanoka de gea abe duru nimagahoko ngohino tinihigihene de tinihidoaka o koano.

² De abeika, ma oraha naa ti ngini nia koano naga! Duru ma dekanoka ngohi tinihihira abe ka o goduuruohi de ngohi tomulaenge tinileleani. De naa tomaokoino nia himangoka de ahi pea duru iarehoka abe duru ihiperekioka masara ahi ngofaka o nau-nauru nagahi nginioka.

³ De ngohi naa duru Ma Jou o Yawe ai himangoka de o Saulu ai himangoka, abe Ma Jou wihitunguuoka wihidadi ti ngini nia koano, de naga abe ngohi tinileha ngini mata-mataika. Sarakia, naga o nyawa nginioka abe tinidohiki hiadono nia hapi eko nia keledai tomale? Eko naga nginioka abe niato ngohi tinirusi? Eko naga nginioka abe niato ngohi tiniribuutu de ma dubuho? Eko naga ma oraha tinitailako nia howono de todafongo o hewaino ma tiwi la gea taniiki to ona dika manga mau? Ma oraha naa de ka idadi nihihingahu ngohino ahi howono o kia dika abe niamakeoka de tahowonoka. De ngohi tomahidiaioka la ma howono gea tomangaku de tohitiai ahi howono nginika hiadono nisanangioka.” Hokogea o Samuele ai leleha ona mata-mataika.

⁴ De ona manga babaluhu ma demo o Samuelika imakadaene mata-mataika, ato, “Mia baluhu, koua! Ko ma moiuahi ngona nomirusi eko nomihitubuho o kangelaino. De ma oraha nomitailako la mia hohowono naputuhu de ngaro miato de mia tiwi minihidoaka la naniiki to ngomi mia hininga masara duru ko ma moiuahi mia hewa ma tiwi hokogea nodafongo.”

⁵ De ahao o Samuele wotemoli onangika wato, “Irahai nia demo gea de ngohi duru tosanangi nia demo hokogea Ma Jou o Yawe ai himangoka de nia koano ai himangoka. De hokogea irahai la gea ko moiua o Isiraele ma nyawa abe ahao ihitae ato, to ona manga kiahonangino ngohi naa tomahitongohi.” Hokogea o Samuele ai demo ai gogianongoruika. De ona yopaluhu, ato, “Mia baluhu, ani demo gea Ma Jou ai himangoka miato nagoungu.”

⁶ De ahao o Samuele wohigila-gila wotemo, wato, “De ngini kiani nimahihohininga gea Ma Jou o Yawe, abe ma dihira gea, wairiki o Musa de o Harunu de wahidadi ti ngini nia hihira. Ho de gea Una Ma Jou abe wahihupu nia totofora o Mesiiri ma tonakino de wao hiadono wahiboa nenangino.

⁷ Ho naa tomagahoko la ngini nikokiriidi ahi himangoka naa de ngohi tinihihohininga abe gea Ma Jou o Yawe wodiai de ai buturungu la wonaduhunoka ka hiadono o wange naa. Abe ngaro ma dihira to ngone nanga totofora waduhunu de ma oraha naangoli duru ma ngoeoka wonaduhunoka ngone naa.”

⁸ “De naa tinihihohininga de nanga totofora manga ade-ade la idadi o hitiari nginika angamoi o Isiraele ma nyawa ma dihiraino ma ngoeokau iwiwohanga manga Jou. Abe ma dihira o Yakubu de ai ngofa-ngofaka mata-mata yomaturuuru o Mesiiri ma tonakika masara ika-ika de ai totoforauku, o Isiraele ma nyawa, naga manga kangela. De ona duru ihigari-gari manga kangela ma dubuho Ma Jou o Yaweika de Ma Jou wagihene! De Una ahao o Musa de ai riaka, o Harunu, wahidingoto de wapake la ai nyawa gea wahihupu manga kangelaino o Mesiiroka, de ona Ma Jou wao o tonakino naa.

⁹ Masara ai nyawa gea ko itedekanua de iwiwohanga manga Jou, Ma Jou o Yawe, ho Una wahohowono de wipake o tentara manga haeke o Sisera, abe wahipareta o koano o Hasoro ma kotaka ai tentara. De nanga Jou wihigunoa o Sisera gea la waparangi de wahikala o Isiraele ma nyawa. Ho ona ahao yogogere o Kanani ma nyawa manga koano ai kuahaka abe una wogogere o Hasoro ma kotaka. De ngaro o Isiraele ma nyawa manga Jou waduhunoli ma ka ihikaika iwiwohangokali ho wahidoaka o Filistina ma nyawa manga kuahaika de ma moioli wahidoaka o Moaba ma nyawa manga koano ai kuahaika.”

¹⁰ De o Samuele ai hohininga ma demo gea wohigila-gila wato, “De ipahaino de duru yokangelali de ona de manga huha ma gari yomagahokoli Ma Jou o Yaweika de yogari-gari yomangaku manga howono Unangika, ato, ‘Mia Jou, Ma Jou o Yawe, ngomi naa miahowono ma amokoka Ngonaika abe miniporetika de mimahuba-huba o Baala de o ngo Asitorete ma popangaoika. Masara ka de Ngona nomihihupu to ngomi mia kangelaino naa, abe mia musu imihikangela, de ngomi minihibehehongo ka Ngonaika dika mimahuba-huba.’

¹¹ Hokogea ngini nihigali-gali niwihibehehongo Ma Jouika masara ahao ipahaika nia behehongo gea ko nianiikokauali! De abeika Ma Jou o Yawe ai duduhunu nginika abe wahidingoto o Gideono, de o Baraka, de o Yefata la inihihupu nia kangelaino hiadono nisosanangiokali. De naa ma bahaino, gea ngohi o Samuele abe Una Ma Jou wohipake ngohi la ka idadi nigogere nisosanangi to Una ai baliara ma goronaka.”

¹² “Masara ka de o Amono ma nyawa manga koano o Nahasa winingino la winiparangi de ngini niwimodongo o koanoika gea. De ngini niboa ngohino de nimagahoko la nginioo naga nia koano la unangoli winihihira. Hokogea nia gogahoko ngaro nagau nia Koano, abe Una gea Ma Jou o Yawe.”

¹³ “Ho abeika, ti ngini nia ngiriki, una nenanga ti ngini nia koano de naa una nagau nginioka. Abeika ngini nimafikiri! Ka de nimagahoko Ma Jou o Yaweika de nia gogahoko winihidoakoka. De unangoo Ma Jouoka de waino abe naa wihidadioka nia koano o Saulu abe winihikoano ngini mata-mataika.”

¹⁴ “Ho ngini naa nako ka ihikaika de nia horomati ma modongo Ma Jou o Yaweika, de nimahuba-huba ka Unangika dika, de to Una ai hingahu nginika duru niwihigihene, de ahao mata-mata ka ma rorahai dika nginika. Iti ngini de nia koano mata-mataika ka niwiniiki nia Jou dika, abe nako hokogea Ma Jou o Yawe wosanangi winihiowa nia wowangoka.

¹⁵ Masara nako ngini nialawana Ma Jou o Yawe ai behehongika de nioluku niwihigihene, de ahao Unangoo winilawana nginika. De nako hokogea Ma Jou winilawanoli de ahao to Una ai hiaturu nginika ihiboali o kangela kohadubuho nginika. Ho ngaro ngini, de ngaro nia koano ma, nia kangela inidaene imaketero abe hoka ma dihira ti ngini nia totoforali manga kangela yamake Unangino.”

¹⁶ “Ho naa Ma Jou o Yawe de ai buturungu wohitunguu abe winihioriki ti ngini nia hininga duru de ma dualonoka. Ho ngini nimarii-riidoka dika nimaokoino nenangoka la niamake o dodunguu abe bootino ahao Ma Jou o Yawe wodiai.

¹⁷ Abe ngini mata-mata duru nihioriki ma oraha naa o hiwara ho duru ko iawanua de ngini nia gandumu nidatomo la ma oraha o hiwara hokonaa de ka idadi nia gandumu niautuku. Masara ngohi naa tomagahoko Ma Jou o Yaweika la wohidingoto o kuruuhu de o awana duru o wange naa dika. Ka de Una wohihigihene de wohidingoto o kuruuhu de o awana gea de duru winihitaana nginika abe nidiai duru itorou Unangika ma oraha nimagahoko Ma Jou o Yaweika la winihidoaka o koano!”

¹⁸ Ho gea wahingahu ibooto de ahao o Samuele womagahoko o awana Ma Jou o Yaweika de jai-jai dika de idadioka. Ma Jou o Yawe wohidingoto o kuruuhu de o awana duru o wange gea! De o nyawa mata-mata genangoka duru iwimodongo Ma Jou o Yaweika de ngaro o Samuelikaoo ma duru iwimodongo.

¹⁹ De ona yopoa-poaka, ato, “Mia baluhu, nomigahoko ani Jouika, Ma Jou o Yaweika, angamoi nako ko nomigahokua de marai ngomi duru ma oraha naa dika de mikokihonenge! Ngomi naa mimangaku duru mia howono ma ngoe Ma Jouika. De igoungu, ngomi mimagahoko la womihidoaka o koano masara naa mihioriki mia gogahoko gea duru ihowono ho mia howono ka mihidogo dika. Ho mia baluhu kiani nomihidemo Ma Jou o Yaweika.”

²⁰ Masara o Samuele wopaluhu onangika wato, “Ngaro ufa ngini nihawana. Ngini ngaro ufa nihawana angamoi Ma Jou wosanangi abe niagoungu nimangaku nia howono Unangika. Masara iti naa niagou-goungu nimahuba-huba Ma Jou o Yaweika dika de kiani de nia hininga ma gahumu. Abe ibootohi niwiporete Unangika.

²¹ Ho ibootohi ngini nimahuba-huba o popangaoika abe parahaja dika, angamoi gea duru ko idadiua iniduhunu eko inihihupu o boditoino. Duru tagou-goungu tinihingahu abe o jou ma homoa mata-mata gea duru parahaja dika nimahingano-nganono enangika!

²² Ma Jou o Yawe winihibehehongoka ngini o Isiraele ma nyawa winihidadioka to Una ai nyawa de ai gogao nginika gea duru ko idadiua itoaka. Ho ngaro ma oraha nenanga eko ngaro ma oraha nanga himangika abe ko iboauahi masara duru ko iwa ma oraha abe Una wininoaika. De angamoi nako hoka Una wininoaika gea wohirusaka o nyawa manga horomati to Una ai romangika abe ka to Una ai romangohi ihikurutiye. De ufa niawohanga Una womangiriki o Isiraele ma nyawa la yodadi to Una ai nyawa abe duru womadingakoka.”

²³ “De nako ngohi naa, ngaro ufa nihawana ngohi ahao ko tininiatokaua abe nako hokogea ngohi todiai de ngohioo tahowonoka Ma Jou o Yaweika. De ngohi ko tomatogu-togumua tinidotoko la nianiiki abe irahai de itiai Ma Jou ai himangoka.

²⁴ Masara nginioo kiani de nia horomati ma modongo ma gou-goungu, de nia hininga ma gahumu, nimahuba-huba Ma Jou o Yaweika dika. De ka ihikaika nimahihohininga mata-mata abe winiduhunoka la nia hiningaka ka ihikaika naga nia higiriiri itagi Unangika.

²⁵ Masara nako ngini ko nitobaua nia howonino de ka nianiikohi nia biaha abe ihowono, gea de ahao o hibinaaha inikokidaene nginika de nia koanoikaoo iwidaene.” Hokogea o Samuele ai hingahu o Isiraele ma nyawaika o wange gea.