1 Samuele 11 - Ma Jou ai Demo-demo o Totobelohoka

O Saulu wahikala o Amono ma nyawa

¹ De ngade-ngade o mede moi ipaha de naga o Amono ma nyawa manga koano o Nahasa woboa o Isiraele manga kota o Yabesino la waparangi onangika. O Yabese ma kota naga o Gileada ma tonakoka. De o Amono ma koano woboa ka ma moi de ai tentara de o Yabese ma kota gea yahigororomino la yaparangi. De o Yabese ma nyawa duru yamodongo onangika de manga dimo-dimono yoiki manga musu manga koanoika de duru yomagahoko ato, “Ngaro ufa nomiparangi ngomino. Abeika o hikadame ma behehongo hodiai de ngomi o Yabesoka naa ka idadi nomihikokidadi to ngona ani huhuloko dika de ngomi misanangi dika minileleani.” Hokogea manga hawana ma demo o Amono ma koanoika.

² Masara manga koano o Nahasa gea wato, “Nako ngohi, ka idadi hokogea nia hininga taniiki la homakadame. Masara ma titi ngini tinietongo ko o nau-naurua angamoi nihawana niparangi ho tinihitunguu abe ngini o nau-nauru abe duru niahimaleke o Isiraele ma nyawa mata-mataika. De nia dodunguu hokonaa todiai, ngini o nau-nauru mata-mataika abe nigogere nia kotaka nenanga nia lako ma niraka ma gomono tahuputokahi!” Hokogea ma koano gea wahihuha onangika.

³ De o Yabese ma kota ma dimo-dimono yopaluhu unangika, ato, “Ngaro hokogea ma ka idadi. Masara kiani mimagahoko la nomihidoaka ma oraha o wange tumidino la mia hidingoto ma nyawa ka idadi yoiki yatutumu o Isiraele ma kota mata-mataika imigahoko la abeika nako naga mia gogianongoru yosanangi yoboa imiduhunu. De nako ko moiua ato yoboa imiduhunu de ahao ngomi mimahidoaka dika ngonaika de ka idadi nodiai ngomino hoka notemoka.” Hokogea o Yabese ma nyawa manga dimo-dimono manga hininga angamoi duru ko yomoroinua yaparangi o Amono ma nyawaika.

⁴ De ma oraha o Yabese manga hidingoto ma nyawa yoboa o Gibea ma kotaino, abe genangoka o Saulu wogogere, de ka de manga kangela yahingahu onangika de o Gibea ma nyawa duru yoari-ari. Abe onangoo manga hininga ma huha ma titi o Amono ma koano ai sade ma hidee manga gogianongoruika o Yabese ma kotaka.

⁵ De ma oraha gea o Saulu naga wolio ai redino de una ai hapi waniiki ma poretino ho ma oraha woboa de wagihene ai kokawaaha yoari-ari duru de manga huhaka. De una waleha wato, “Ho naa ma titi o kia hiadono niari-ari?” De ona iwihingahu o Saulika abe kangano naga o Yabese ma nyawa manga hidingoto yamuruono yoboa yahingahu abe hokokia o Amono manga koano ai hidee wahikangela.

⁶ Ka de o Saulu woihene ma abari gea de Ma Jou o Womaha de ai buturungu wilufungu de duru ai ngamo ifae o Amono manga koanoika.

⁷ Ho ahao waleino o hapi hinooto de watomaka de ahao watobi-tobikuku de ma dobiki wahikokidoaka ai hidingoto ma nyawaika hiadono ona homoi-homoiika naga o hapi ma dobiki moi. De ahao ona wahidingoto o Isiraele ma tonaka mata-mataika de manga koano ai hingahu o doomu homoi-homoiika yadofanga onangika hokonaa, ato, “Naa naga nanga musu ato inaparangi! Ho nanga nau-nauru, ngohi nia koano tinibehehongo la nihiniiki ngohi, o Saulu de nanga baluhu o Samuele, abe ma oraha naa kiani nanga musu gea haparangi. De o hapi ma dobiki nenanga tinihimatoko de ma titi hokonaa, duru hokogenangoli ahao idadi to ona manga hapikaoo abe ona yoluku inaniiki o Amono ma nyawa haparangi.” Hokogea ai behehongo o Isiraele ma nyawa mata-mataika de Ma Jou o Yawe wahihawana o Saulu ai ngamoika hiadono ka ma moi manga nau-nauru yokokiboa o Saulino.

⁸ De o nau-nauru gea o Saulu watoomu o Besekoka de wahiaturu de manga dodoomu de manga hihira la yodadi o tentara. De ahao yaetongo manga tentara de ona abe yoboa o Isiraele ma tonaka ma dobikino abe enangohi ilamoko ona mata-mata yasana o ratuhu hange. De ona yoboa o Isiraele ma tonaka ma dobikino abe enangohi ieteke manga ngoe yasana moruange.

⁹ Ho o Saulu ai hidingoto ma nyawa wahuloko la ai hingahu naa yototaka o Yabese ma nyawaika, wato, “Ngomi o Isiraele ma tentara itebini o wange ikorona de miboaka miniduhunu la minihihupu nia boditoino.” Ho ka de hokogea o Yabese ma nyawa manga kota ma amokika yoihene de duru yogarago manga koano ai hingahuika.

¹⁰ De ahao o Yabese ma kota ma dimo-dimono yoiki yahingahu manga musuika ato, “Marai itebini miboali minitutumu de ka mimahidoaka dika nginika de o kia dika nidiai ngomino iti ti ngini nia mau.” Hokogea dika manga demo o Nahasika.

¹¹ Masara ko itebinuahi ma dawangeino de o Saulu de ai tentara yoboaka. Masara kanganoinohi ai tentara waregu o doomu hange. Ho ka ifufutuohi de o Amono manga tentara ma dodogumu ma ngi ihigororominoka de ahao ka ma moiika yangohama de duru o Amono ma tentara yatodokana ho igapanga o Isiraele ma tentara yatoma ko manga ngoe ka hiadono o wange ikorona. De o Amono ma nyawa manga tentara ma hou-hou duru yahikabarihoka hiadono yomatengo-tengokahi yoara.

¹² Hokogea o Amono ma nyawa yahikalaka de ahao naga o Isiraele ma nyawa yotemo o Samuelika, ato, “O kiaka o nau-nauru gea abe ato o Saulu ko wakunua wonahikoano, nako ona gea nahidoaka to ngomi mia giamino de ngomi miahohowono ka hiadono yohonenge.” Hokogea manga hiningaka ma hibalaha.

¹³ Masara o Saulu una dika wopaluhu onangika wato, “Ko moiua nanga nyawa hahohonenge o wange naa angamoi naa o gogarago ma wange ma titi Ma Jou o Yawe to Una ai nyawa, abe ngone o Isiraele ma nyawa, wonahihupuoka o boditoino.” Hokogea o Saulu ai nyawa wahiriidi.

¹⁴ De ahao manga baluhu o Samuele wahingahu o Isiraele ma nyawaika wato, “Irahai ngone homatoomuinoli o Gigaloka la ka idadi hodiai ma dodunguu abe o Saulu wodadi nanga koano ma gou-goungu abe hokogea to ngone mata-mata nanga hininga.”

¹⁵ Ho ona yokokiloikoli o Gigalika de genangoka yodiai manga hiaturu ma doomu Ma Jou o Yawe ai himangoka. Abe manga doomuoka de ihitunguu o Saulika abe duru de manga hininga ma gou-goungu iwihidadi manga koano. De yomahihuba o hikadame ma huhuba Ma Jou o Yaweika de o Saulu de o Isiraele ma nyawa genangoka duru yorame-rame de manga garago ilamoko mata-mata.