1 Samuele 10 - Ma Jou ai Demo-demo o Totobelohoka

O Samuele wihitunguu o Saulika abe Ma Jou wihidadi o Isiraele ma nyawa manga koano

¹ De ahao o Samuele naga wasoino o saitunu ma hofoko ma minya de wigopoa o Saulu ai mumukuku hiadono yodahahuru ai badanguku. De ahao wibounu de wihingahu wato, “Hokonaa tonibounu de tonihituagi de o minya atingakoka Ma Jouika nena la taniiki Ma Jou o Yawe ai behehongo ngohino. Abe hokonaa todiai la tonihitunguu abe Una wonihiakunoka la wonihidadi to Una ai nyawa o Isiraele ma nyawa manga hihira.

² De naa bootino homakitingaka de ka ngona dika nogila-gila o ngekomo nenanga dika naniiki. De ma oraha ngade-ngade nomahiadono o Benyamini ma nyawa manga tonaka ma batingika de naga genangoka o lungunu ma dodunguu abe ma dihira to ngona ani tofora o ngo Rahele imilungunu genangoka o Selasa ma kotaka. De genangoka ahao namake o nauru yahinooto de ona inihingahu ngonaika abe nia keledai yamakeokau de naa ani baba wohuha ma titi ka ngona dika done inihihangoka hiadono waleha-leha o nyawaika wato, ‘Sarakia ngini niwimake ahi ngofaka o Saulu?’”

³ “De ahao ma oraha nomahiadono ma gotaika gea abe duru kohaamoko o ngioka ma romanga o Taboro, de genangoka ahao nimakamake de o nauru yahange. Ona gea yoboa o ngekomino abe manga dumutu o Betelika ato yomahuba-huba Ma Jouika o Beteloka. De womatengo wao manga huhuba o kabingi ma goohi ma gahumu hange, de womatengoli naga ai huhuba ma roti ma gahumu hange, de womatengoli wao ai huhuba o angguru ma teongo abe o angguru ma ngi o aewani ma kaiino moi aomanga.

⁴ De ona yogianongoru ngonaika de manga garago de ato yoigo la manga roti ma gahumu hinooto inihidoaka. De manga roti gea kiani ngona nodafongo.”

⁵ “De ahao ngona de ani dodiawo nigila-gila hiadono niboa o Gibea ma lokuika abe ihiromanga Ma Jou ai Loku de genangoka naga o Filistina ma tentara manga gogoana ma ngi. De ka de ngini nimahiadono genangoka de nimakamake de o nau-nauru o doomu moi Ma Jou ai uru ma dodofanga de naga manga totabua yarago-ragoho, de naga manga gogereenge ihiboha-boha, de manga sulingi abe yawuu-wuwu, de manga hitar yokuti-kuti, de Ma Jou ai Demo-demo ma hitararono ihidemo.

⁶ De ka de nimakamake de ona gea de Ma Jou o Yawe ahao de ai Womaha wonihawo ngona hiadono ngonaoo nomulaenge nohidemo Ma Jou ai Demo-demo. De itodokanino to ngona ani hininga idadi hoka o hininga ma hungioli abe ahao ani wowango ma datoro aturuuru.

⁷ Hokogea ma dodunguu ahao namake ani wowangoka de ngona naniiki dika abe ipuda ani hininga ma goronaka abe namao hokogea irahai nodiai angamoi Ma Jou ka ihikaika naga ngonaka.”

⁸ “De ahao nogila-gila o Gigalika de nohidodamaahi o wange tumidi ma dekanino, abe hokogea ma dekana de ahao ngohioo toboa o Gigalika de homakamakeoli genangoka. De ngone ahao homahihuba o huhuba iharo-harongo de o hikadame ma huhuba Ma Jouika. De ma oraha gea de ahao naga utuohi ahi behehongo ngonaika abe kiani naniiki.” Hokogea o Samuele ai behehongo o Saulika.

O dodunguu mata-mata idadi abe o Samuele wihingahuoka o Saulika

⁹ De ka de o Saulu womadogilioro o ngekomika la wosobo de to una ai hininga Ma Jou waturuuruoka. De o wange gea dika de ma dodunguu mata-mata idadioka abe kangano o Samuele wihingahu ahao wamake.

¹⁰ Abe ma oraha o Saulu de ai duduhunu yomahiadono o Gibea ma lokuika de igoungu yamakeika o doomu moi Ma Jou ai uru ma dodofanga yoboaino. De o Saulu ka de ona wamake de Ma Jou o Womaha wihawoka hiadono unangoo womulaenge Ma Jou ai Demo-demo ma hitararono wohidemo.

¹¹ De ma oraha o Saulu wodiai hokogea naga o nyawa iwimake abe ma dihiraino iwihioriki de iwidodiawo. De onangoo iwimake waniiki Ma Jou ai uru ma dodofanga manga doomu de duru yatodokana. Abe ka de unangoo wohidemo Ma Jou ai Demo-demo ma hitararono de hokonaa manga demo, ato, “Marai duru ko tongakua idadi hokogea! Gea igoungu o Saulu una wodadioka Ma Jou ai uru ma dodofanga? Done sarakia hiadono o Kisi ai ngofaka una wodadi Ma Jou ai uru ma dodofanga?” Hokogea manga heranga ma demo angamoi ma dodihiraino de duru yahioriki o Kisi de o Saulu ko ma moiuahi Ma Jou ona wapake la ai hingahu yadofanga o nyawa utuika.

¹² Masara naga womatengo abe wogogere manga datekoka manga demo gea woihene de wotemo wato, “Ko ma titiua o nyawa manga baba Ma Jou ai uru ma dodofanga hiadono manga ngofakoo wahiakunu imakadaene. Angamoi onagona dika Una woigo wahiakunu la yodadi ai uru ma dodofanga ma ka idadi mata-mata.” De gea ma titi hiadono o demo ma dulu ma hungi idadioka. Abe nako o nyawa yoheranga o nyawaika abe itodokanino naga manga hiakunu Ma Jouino, abe ma dihiraino de ko iwa, de yotemo, ato “Gea igoungu o Saulu una wodadioka Ma Jou ai uru ma dodofanga?” Hokogea manga demo ma dulu ma hungi.

¹³ De ma oraha gea abe o Saulu wohidemo wahitararono de Ma Jou ai Demo-demo ibooto de ahao una de ai duduhunu abe widodiawo gea yodoa o lokuiye abe dakenangoka naga o kokawaaha manga huhuba ma ngi.

¹⁴ De genangoka naga o Saulu ai ama womatengo de waleha o Saulu de ai duduhunika wato, “Ngini ahao naa nimahimatoko! O kiaka ngini naa ma dekanino?” De o Saulu wopaluhu, wato, “Ngomi miloiki mia keledai gea miolingiri masara ngaro kohagurutika mitagi-tagi ma ko miamakeua. Ho ma bahaika wiwitutumu Ma Jou ai uru ma dodofanga o Samuele la wiwileha nako una ka idadi womihingahu o kiaika mia keledai itagioka.” Hokogea o Saulu woade-ade ai amaika.

¹⁵ De ai ama gea wilehali unangika wato, “Ho, winihingahu o kia nginika?”

¹⁶ De o Saulu wihingahu wato, “Una womihingahu abe mia keledai o nyawa yamakeoka.” Hokogea wopaluhu masara ko wihingahua ai amaika hokokia o Samuele wihitunguuoka wato una ahao wodadi o Isiraele ma nyawa manga koano.

O Saulu iwihitaana abe Ma Jou wihidadi manga koano

¹⁷ De ahao o Samuele wabehehongo o Isiraele ma nyawa mata-mataika la yoboa o Misapa ma kotaino la genangoka yomatoomuino Ma Jou o Yawe ai himangoka.

¹⁸ Ho yomakokitoomuinoka de o Samuele naga Ma Jou ai hingahu onangika abe Ma Jou o Yawe, to ona manga Jou, wihibehehongo la wadofanga o Isiraele ma nyawaika. Ho manga doomu ma amokika wadofanga Ma Jou ai hingahu, wato, “Ngohi ti ngini nia Jou, Ma Jou o Yawe, de ahi hingahu nenanga ngini mata-mata nitotoihene, Ngohi tiniao ngini o Isiraele ma nyawa o tonakino nenanga. Abe ma dodihiraka Ngohi tinihihupu nia kangelaino o Mesiiri ma tonakoka. De nia dodagioka naga o nyawa utu de manga koanoka abe onangoo ma ngoe inihikangela masara tiniduhunu hiadono o kokoano gea to onangoo manga kuahaino tinihihupuoka.

¹⁹ De abeika, ngaro hokogea ka ihikaika tiniduhunu masara ngini o Isiraele ma nyawa nihiolukoka Ngohi la tinihikoano abe ngini nihigali-gali nimagahoko dika, niato, ‘Ngomi duru mia mau la ka nomihidoaka dika womatengo mia koano.’ Hokogea ngini nimagahoko ho naa adonoka ma oraha nia gogahoko gea topaluhu abe Ngohi tiiriki womatengo nginino naa la tihidadi nia koano. Ho naa kiani nimahikaaturu la nimakeregu la nianiiki nia dutu ngimoi de hinooto. Gea nimahikaaturu ibooto de ahao de nia dutu ngimoi de hinooto homoi-homoi ngini niboa Ngohi nia Jou ahi himangoka ka hiadono nimakawalimi nimahikokimatoko Ngohino. Hokogea nidiai la Ngohi Ma Jou o Yawe tinihidumutu nia dutu moi abe onangino tairiki nia koano. De ahao nia dutu gea abe adaenoka kiani yomareguoli de to onangoli manga dodoomuoli la manga doomu homoi-homoiika yomakawalimi yomahikokimatoko ahi himangoka la hiadono tairiki manga doomu abe onangino tinihidumutu una abe tihidadi nia koano.” Hokogea Ma Jou ai hingahu o Isiraele ma nyawa mata-mataika abe yomatoomuino o Misapa ma kotaka o wange gea.

²⁰ Ho o Samuele wahokino o Isiraele ma nyawa manga dutu yangimoi de yahinooto manga hihira la ona yokokiboa la yomaokoino Ma Jou o Yawe ai himangoka. De ahao manga dutu yangimoi de yahinootoino o Benyamini ma dutu abe Ma Jou wairiki.

²¹ De ahao o Benyamini manga dutu dika manga dodoomu muruono naga homoi-homoiika to onangoo naga manga hihira ho manga doomu ma hihira gea yokokiboa la yomaokoino Ma Jou o Yawe ai himangoka de hokogea yodiai ka hiadono o Materi ma famino Ma Jou wairiki. De o fam Materi ma nau-naurino naga Ma Jou ai ngiriki ma dodunguu de iwidaene o Saulika abe una o Kisi ai ngofaka. Ho o Saulu gea ona iwilingiri masara una hoka ko iwiwa genangoka ngaro kangano naga!

²² Masara ko iwimakeua manga doomuoka ho hiadono ona iwileha Ma Jou o Yaweika de Una wahingahu, wato, “O Saulu gea una womagogono nia kiahonanga ma hidogoronaka.”

²³ De igoungu una iwimake manga kiahonanga ma hidogoronaka ho iwihihupu de iwiao manga kokawaaha manga himangoka de ona mata-mata ka idadi iwimake angamoi ngaro manga nau-nauru mata-mataika ma ka unangohi ai gurutiye wofoloi abe o nauru utu iwiadono ka o Saulu ai belekaino dika manga gurutiye.

²⁴ De ahao o Samuele wahingahu ona mata-mataika wato, “Naa una o Isiraele ma nauru abe Ma Jou o Yawe wiirikoka la wodadi o Isiraele ma nyawa nanga koano. De ngaro o Isiraele ma nau-nauru mata-mataika hahiketero de ko moiua hoka unangoli ngaro ai rupa eko ngaro ai hiakunu!” Hokogea o Samuele o Saulu wigorakiye o nyawa manga himangoka de ona mata-mata ka ma moiiye yokokipoaka ato, “Nanga koano higahoko la ai wowango o duniaka ikurutu!”

²⁵ Hokogea ipaha o Samuele wahingahu de ahao wahitararono o Isiraele ma nyawa mata-mataika genangoka abe manga koano ai karajaanga ma tagongo de ai kuaha ma duduga abe ma titi ai hiaturu ai kokawaahaika naga de ma dudugaka. De ma titi gea ma ngoe de mata-mata wotulihuku o buku ma luluino de ahao ma buku gea wagogono o ngi moioka abe iwidingakoka Ma Jou o Yaweika. Hokogea manga doomu ihibobaha ho o Samuele wahingahu ona ka idadi yokokilio manga kota de manga kapongo homoi-homoiika.

²⁶ De ma oraha o Saulu wolio ai tauika o Gibea ma kapongoka de o nau-nauru yamuruono naga abe Ma Jou manga hininga homoi-homoiika wokarajaanga de manga hininga adaene o Saulika ho ona ma oraha gea yomulaenge ka ihikaika iwidodiawo.

²⁷ Masara naga o nau-nauru utu abe manga wowango ma datoro itotorou iwihigurubungu ato, “O nauru nenanga ko kia-kiaua iwidaene ho done sarakia wonaduhunu nanga musu manga giamino?” De ona iwidohata de yoluku la manga hadia iwihidoaka unangika. Masara o Saulu ko wapusingua onangika.