1 Samuele 1 - Ma Jou ai Demo-demo o Totobelohoka

O ngo Hana de ami rokata o Ekana manga ade-ade

¹ O ade-ade naa imulaenge de o Isiraele ma nyawa womatengo ai romanga o Ekana. Una womahidutu o Efaraimi ma dutuika de wogogere o Rama ma kota abe naga o loku-lokuoka o Efaraimi ma tonakoka. De o Ekana ai baba o Jerohama, de ai ete o Elihu, de manga fam Tohu abe o Efaraimi ma nyawa o Sufu ma doomuino.

² De o Ekana gea ngoi fekata yahinooto de manga romanga o ngo Hana de o ngo Penina. O ngo Penina naga o ngofa-ngofaka masara o ngo Hana ami ngofaka ko iwa.

³ De o tao-taongiye o Ekana woiki o Silo ma kotaika la womahuba-huba Ma Jou o Yaweiye abe Una Ma Jou Wopoputurungu. De o Ekana to una ai aewani wao la ena womahihuba Ma Jouika genangoka. De naga yogogere Ma Jou ai Tauoka o nauru yahinooto abe yomahidutu o Lewi ma dutuika de manga tagongo la o nyawa yahidemo Ma Jou o Yaweika. Ona o hidemo gea o Eli ai ngofaka yahinooto de manga romanga o Hofini de o Pinehasa de manga karajaanga moi la yaduhunu o Isiraele ma nyawa manga aewani yahihuba iharo-harongo Ma Jou o Yaweika.

⁴ De o tao-taongiye ma oraha o Ekana womahihuba ai aewani Ma Jouiye de wamake o roehe ai huhubaino abe ona ai tauoka ka idadi yaolomo, de ahao una wahikodoku ai aewani ma roehe gea ona mata-mataika abe naga ai tauoka. Nako o ngo Penina de ami ngofa-ngofakika manga hidoku imaketero dika.

⁵ Masara ma hidoku abe womihidoaka o ngo Hanaika utuohi ilamoko angamoi duru o Ekana ai dora ilamoko munangika. De hokogea una womihininga angamoi Ma Jou o Yawe wodiai munangika la ami ngofaka ko iwa.

⁶ Abe nako o ngo Hana naga to muna ami huha ma ngoe ma titi Ma Jou ami ngofaka ma ngi wohitatoko hiadono muna ko idadiua mamake o ngofaka. De ami dodiawo, o ngo Penina, ka ihikaika momihitipokouku o ngo Hanaika de o hohedu ma demo ma titi muna ko mamakeua o ngofaka.

⁷ De hokogea idadi o tao-taongiye ma oraha yoiki Ma Jou o Yawe ai Tauika. Abe o ngo Penina momihikangela o ngo Hanaika ka hiadono moari-ari de moluku molomo angamoi o ngo Penina duru momihitipokouku de ami hohedu ma demo.

⁸ De ami rokata o Ekana gea ami dubuho una wamao hiadono womileha munangika wato, “Hana, adodoa ho noari-ari? Adodoa ho o inomo ko nolomua, de adodoa ho ngona ka ihikaika ani hininga ihuha? Ngohi ani rokata duru tonidora de kiani ngona duru nosanangi ma titi gea angamoi nanga gogao irahai. Ho nako hoka ani ngofaka o nauru yangimoi ka idadi hohikohowono de to ngone nanga gogao abe duru irahai de kiani nanga gogaoohi hopaliara e?” Hokogea o Ekana ai lalaru ma demo munangika.

O ngo Hana de Ma Jou ai hidemo ma nyawa o Eli manga ade-ade

⁹ De ma moiuku ma oraha ona o tau moi naga o Silo ma kotaka de ona yolomo de yokere ibooto de ahao o ngo Hana moiki momatingaka de momaniata Ma Jou ai Tauoka. De naga genangoka o Eli abe una gea wileleani Ma Jou abe o nyawa wahitobahidemo Unangika. De una wogogeruku o kuruhiioka Ma Jou o Yawe ai Tau ma ngoranoka.

¹⁰ De o ngo Hana moboa motigino de ami hininga ihuhaholi de momaniata de ami gari Ma Jou o Yaweiye.

¹¹ De ami niniata ma goronaka muna mihibehehongo Ma Jou o Yaweika mato, “Ma Jou o Yawe abe ka Ngonahi Nopoputurungu, nako Ngona nomalega ahi kangelaika, de naga ani dora ma hiokoo ngohino, tomagahoko ahi Jou ani duduhunu. Ngaro ngohi to Ngona ani gilaongo naa ma tomagahoko la ufa nohiwohanga de nohihidoaka o ngofaka o nauru. De nako ahi ngofaka gea tamake ahao titingaka Ngona Ma Jou o Yaweika ka hiadono ai wowango ma bahaika. De una wodadi o Nasiri ma nyawa ma titi una o nyawa abe Ngona Ma Jou nomadingakoka. Ho ahao naga de ai dodunguuoka abe ko ma iwa ai tadauru aguti eko akulu angamoi una Ngona nomadingakoka la wonileleani ka hiadono ai wowango ma bahaika.”

¹² De o ngo Hana naa momaniata Ma Jou o Yaweika de o Eli gea womilega-lega.

¹³ De ngaro ami uru ma kai ikelu-kelu masara momaniata doka ami hiningaka dika ho ko iwa ami ilingi abe ka idadi o Eli woihene. Ho una womimake hokogea de doka ai hiningaka wato, “Bote muna gea imidaluku.”

¹⁴ Ho una womitaere wato, “Ngona hokokia nomahimatoko ma dekanino ani howono o dalukino? Kiani ngona ani angguru ma gohaka naolukoka!” Hokogea womitaere o ngo Hanaika.

¹⁵ Masara o ngo Hana mopaluhu unangika mato, “Ahi baluhu, ufa nofikiri ngohi ihidaluku angamoi ko enangua abe ma titi ngona nohimake toari-ari hokonaa. Ngaro o angguru ma gohaka eko o daluku utu ma duru ko taokerua. To ngohi ahi kangela ilamoko ma titi ahi hininga ihuhaholi hiadono ahi huha tomahingahu Ma Jou o Yaweika.

¹⁶ Ahi baluhu, ufa nofikiri ngohi naa o ngofeka ma dorou. Ngohi tomaniata de ahi jiwa ma gahumu abe ahi niniata ma demo ihititi ahi hininga duru ihuhaholi.” Hokogea ami demo unangika.

¹⁷ De o Eli wopaluhu wato, “Nako gea ngona naa ka idadi nolio de ani hininga iriidi. De angamoi o Isiraele ma nyawa nanga Jou ahao wonihidoaka ena gea abe ngona nomagahoko Unangino.” Hokogea womilaru o ngo Hanaika.

¹⁸ De muna de ami sanangi mato, “Iti ngohi naa ani gilaongo tonihisanangi.” De ahao muna genangino mosobo de momalingiri o inomo de molomo de ami himanga ko ma fufutuokaua.

O Samuele womaboa

¹⁹ De ahao ma dawangeino o Ekana de ona ai tauoka duru o ngoru-ngorumino yomomiki de yoiki yomahuba-huba Ma Jou o Yaweika. Yomahuba ibooto de ahao yosobo yolio manga tauika o Rama ma kotaka. De ma oraha o Ekana womaidu de o ngo Hana, Ma Jou o Yawe womihininga de ami niniata wapaluhu ho hiadono ahao muna de ami badangoka.

²⁰ Ho ami gahe adonoka de muna mamake ami ngofaka hoka momagahokoka. De ma oraha momagerewoto ami ngofaka o nauru de mihiromanga o Samuele angamoi mato, “Ngohi tomagahoko Ma Jou o Yaweiye la una ahi ngofaka naa tamake.”

O ngo Hana ami ngofaka o Samuele mitingaka Ma Jouika

²¹ De ma oraha adonokali abe o Ekana de ona ai tauoka yoiki o Silo ma kotaika la manga huhuba yomahihuba Ma Jou o Yaweiye abe hoka manga biaha o tao-taongiye yomahihuba. De ma oraha naa yoiki de nagaoo o Ekana ai huhuba abe ma dihiraino wihibehehongokau Ma Jouiye. Masara o taongo naa o ngo Hana ko moikua ho o Ekana de o ngo Penina de to ona manga ngofa-ngofaka dika yoiki, o ngo Hana ko moikua.

²² De o ngo Hana momagoo-gogere dika manga tauoka angamoi muna mihingahu ami rokatika mato, “Ekana, marai ngohi ko toikuahi hiadono ma oraha adono nanga ngofaka naa tihipidilokahi ahi huhuino de ahao ngohi tiao Ma Jou o Yawe ai himangika ai tauoka. De genangoka ahao kiani o Samuele naa wogogere ka hiadono ai wowango ma bahaika.” Hokogea ami hilooa ma demo ami rokatika.

²³ De o Ekana wopaluhu, wato, “Hokogea ka idadi, nako ngohi tosanangi taniiki ani hininga dika abe nato irahaiohi ngona nomagoo-gogere nanga tauoka ka hiadono ani ngofaka nihipidiloka ani huhuino. De tonganono Ma Jou o Yawe wohiaturu la abe ngona ma dihira nihibehehongoka Unangika ahao idadi.” Hokogea o Samuele ai baba wotemo.

²⁴ Ho ipaha o Samuele ai lamoko adono abe ka idadi womatingaka ngoi memeino de ahao o ngo Hana miao Ma Jou o Yawe ai Tauika ngaro una duru ka o ngofakohi. De manga huhuba ma kiahonanga utuoli yao abe naga manga hapi ma nauru ma taongo hange ibooto, de naga o gandumu ma ngedere abe idadioka o tarigu ma alu-aluhu ngade-ngade o supa monaoko de hinooto. De nagali o angguru ma teongo o ngi moi iomanga de manga ngi gea abe manga biaha yodiai o kabingi ma kaiino. De mata-mata gea yao ma oraha ona yoiki Ma Jou o Yawe ai Tauika abe o Silo ma kotaka.

²⁵ De yomahiadonoka Ma Jou ai Tauoka de manga huhuba o hapi ma nauru gea yomahihubaka de ahao manga ngofaka o Samuele gea iwingotaka o Elika.

²⁶ De o ngo Hana mihihohininga unangika mato, “Ahi baluhu Eli, tomahilooa marai ko nohihiningaua? Duru tagoungu, ngohi naa o ngofeka abe ma dihira ngohi ani himangoka nohimake nenangoka tomaniata ma oraha ngohi duru de ahi hininga ihuhaholi tomagahoko Ma Jou o Yaweika.

²⁷ De ahi gogahoko Ma Jou o Yaweika ma oraha gea ahao Una wohihidoakoka abe o ngofaka nenanga ngohi tamakeoka Ma Jou o Yaweino.

²⁸ De mangale ma titi gea hiadono ngohi titingaka Ma Jou o Yaweika abe o wange naa tihidoakoka Unangika la una ka idadi wileleani Ma Jou o Yawe ka hiadono ai wowango ma bahaika.” Hokogea o ngo Hana mihingahu o Elika de ahao genangoka ona yomahuba Ma Jou o Yaweika.