1 Peturusu 4 - Ma Jou ai Demo-demo o Totobelohoka

Kiani Ma Jou ai mau inahihira-hira de hatobapake nanga hiakunu abe Unangoka de aino wonahiakunoka

¹ Ho mangale ma titi ma dihiraino de o Kristusu duru iwihikangela abe Una naga de ai badangokahi, ho nginioo kiani nimahinoauku de to Unangoli ai hininga, ho ufa niato o kangela niodokaowara dika. Angamoi onagona dika ma titi Una hiadono o nyawa yahikangela, masara ona ka yodafongo dika abe yahikangela manga badangika, ona gea yomahitaanoka abe yahitihira manga hingounu Ma Jouika de o howono ko yahiparetakaua manga wowangoka.

² Ho abe ma oraha inihikangela nginika de tanu naga ma utumu niamake genangino. Angamoi nanga kangela ma goronaka de nanga hininga ma dumutu duru itagi Ma Jouika dika, abe gea de nanga hininga hatoli ko itagiokaua o howo-howonika. De gea ma titi hiadono nanga kangela ka idadi inaduhunu la hoporete o howonika. Ho nako ti ngini nia hininga hokogea, de ahao ka idadi ka ihikaika nianiiki Ma Jou ai mau nginika ma oraha naa de ka hiadono nia badanga homoi-homoi iborihonenge. La gea ngaro ibootoka o nyawa manga horoodo nianiiki.

³ Angamoi bote iniwedonoka nia oraha abe o horoodo gea nianii-niiki. De igoungu abe ma dihiraino de ngini ka nianiikohi o nyawa manga hafini abe ona ko iwihiorikua Ma Jouika. De abe to ona manga hafini gea hoka manga gimono ma dorou abe duru yahipareta onangika, de o hafini ma dorou, de abe ona yatobadaluku. De utuoli manga datoro naga abe hoka yoigo yaniiki o rame-rame abe genangoka o nyawa yatobadaluku de gea hiadono manga badanga ma hafini ho ona ko yomahiparetakaua. De nagali abe ona hoka yomahijou de o kiahonangika. De gea mata-mata ngaro ibootoka nianiiki angamoi ma oraha naa niatobaniikoli Ma Jou ai mau nginika. Angamoi ma dihiraino de nia oraha iniwedonoka la o horoodo gea nianii-niiki, ho ibootohi nianiiki enangika!

⁴ De abe nia dodiawo gea abe ma dihiraino de nimakokutuono niahowo-howono de ona, ma oraha naa de ona duru iniheranga abe ngini ko nianiikokauali de ma datoro gea abe ona yahiraramaka de manga hafini ma dorou. Ho naa ona iningelo-ngelo nginika abe ma titi ngini ko nimakiniikokauali de ona.

⁵ Masara ufa niawohanga abe ona ahao dokengika de kiani yomahitararono Ma Jouika ma titi manga datoro homoi-homoi abe yodiaioka. De Una gea womahidiaioka la watailako de waputuhu ma titi o nyawa mata-mataika manga wowango ma datoro, abe ngaro o nyawa abe ma oraha naa ka yowangohi eko ona abe yohone-honengoka.

⁶ De genangino ka idadi hamake o Abari ma Rorahai ma hofoko, angamoi naga nanga gogianongoru yohone-honengoka abe ma dihiraino de iwingaku Unangika ma oraha ma abari gea yadotoko onangika. De ona iwingakuoka de ipahaino o nyawa yahihohowono onangika ma titi manga ngongakuino, abe yapake o dunia naa ma nyawa manga hiaturu hiadono yahikangela. Masara gea ipahaino de ka idadi ona iwingaku-ngaku yamake o wowango ma ngango Ma Jouino, de gea ma titi o Abari ma Rorahai yongakuoka. De ona gea ngaro ufa de yohawana ma titi Ma Jou ai hohowono abe hoka ona utu ko iwingaku-ngakua. Ho gea ena ma hofoko abe ka idadi ngone o nyawa hamake o Abari ma Rorahaiino.

⁷ De naa tinihihohininga nginika abe o dunia ma bobaha itigioka. Ho mangale gea itigioka ho ngaro o kia dika niohimanga masara ngini nimatongohono ma dorouino de nihidodiai la ka ihikaika nimaniata.

⁸ De naa moi ahi demo kiani nihitihira angamoi ka enangohi ikurutiye, de gea ngini ka nigila-gilahi nimakokodora de nia dora duru kohaamoko nia gogianongoruika. Angamoi ngaro idadi abe nanga gogianongoru duru ma ngoe inihowono nginika, masara nako ngini nimakodora, gea ahao nimahikokinginioo ka idadi nimahikokoofi nia gogianongoru manga howo-howono gea nginika.

⁹ De nako nia gogianongoru inirekata nginika, gea kiani nimakokadafongo de nimakao irahai, de ufa niahigurubungu onangika abe ona inirekatino.

¹⁰ De ngini homoi-homoi niaborimakeoka nia hiakunu Ma Jouino abe Una winihidoakoka la ngini nimakokuduhunu nia doomuoka. De tanu nia hiakunu gea ka moiua dika masara naga irupa-rupa ma hiakunu, de ma hiakunu gea Ma Jou ai hiowa nginiuku. De gea nia hiakunu abe niaborimakeoka, gea ngini homoi-homoi kiani niapake nia doomu ma goronaka la nimaketeleleani nia gogianongoruoka. De abe ngini niaboripake nia hiakunu, gea nianiiki itiai Ma Jou ai gareja ma hiaturu ma titi ngone ai nyawaino.

¹¹ De abe ma titi nia hiakunu gea abe Ma Jou winihiakunoka nginika, ngini utu winihiakunu la nitobadotoko o doomu ma himangoka. Ho ngini abe hokogea winihiakunu, gea tinihuloko tato ngini kiani nihidodiai la Ma Jou ai Demo-demo duru nianiiki itiai abe ti ngini nia dodotoko ma demo ma goronaka. De abe ngini utuoli winihiakunu la nitobaleleani eko nitobaduhunu nia gogianongoru utuika, de ngini gea kiani nia tagongo nidiai irahai la nia gogianongoru yamake ma utumu nia hiakunino gea. Abe ngini kiani nidiai nia tagongo de Ma Jou ai buturungino, angamoi tanu ti ngini nia buturungu gea ka Unangino dika winihidailako. De nako nia borihiakunu niao itiai abe imakiniiki de Ma Jou ai hininga nginika, gea de ahao nia datoro mata-mata itagi irahai ti ngini nia doomu ma goronaka. De mangale ma titi mata-mata itagi irahai ho hiadono o nyawa iwihigiriiri Ma Jouika. De abe ma titi ti ngini nia higiriiri Ma Jouika, gea hohioriki abe ihititi o Yesusu Kristusoka angamoi ma titi to Una ai duduhunu nia gareja ma doomuoka hiadono niwihigiriiri ai Baba Ma Jouika. De gea itiai hihigiriiri Ma Jouika angamoi ka Una dika abe duru de ai medebini ma dararonoka de ai kuaha duru kohaamoko. De gea imanoa ka Unangoka dika ka hiadono ma oraha naa de ka hiado-adonika. De ai medebini gea ma titi hiadono itiai ngone mata-mata hihigiriiri Unangika. Amin. Ho naa ngohi duru tinihigaro nginika la nia borihiakunu niao itiai la ka idadi nihiboa o higiriiri Ma Jouika.

Ngone ka idadi hogarago ngaro inahikangela ma titi o Kristusu hinii-niiki

¹² Ahi gogianongoru abe duru tinidora nginika, ufa ngini niheranga abe ma titi ngini naga o kangela ma dodubuho ma goronaka. De tanu ngaro ufa niheranga nako idadi abe inihikangela nginika. Angamoi nia kangela gea tanu idadioka o hitaili nia ngongakuika abe hoka yatailako de ihiputurungu nia ngongakuika gea.

¹³ Ho ufa niheranga masara koaho nigogarago. Angamoi nako inihikangela nginika ma titi o Kristusu, gea ngini de Una nimakokutuono niamao to Una ai kangela, de gea ngini hatoli nimahidutuku o Kristusika. De abe nimakiniiki de Una ai kangela ma goronaka, gea ahao dokengika ma oraha Una womahimatokoli de ka idadi ngini nimakokutuono abe duru nigogarago Unangoka. Abe ma oraha gea womahimatoko de Una naga duru de ai medebini ma dararonoka, de genangino ma titi hiadono ngini duru nigogarago de nimorenoka. De nia garago gea ahao duru ilamokoholi angamoi nengokadau de ti ngini nia kangela enangoo duru ilamoko. Ho ngini ngaro ufa de nia hininga duru ihuha ma titi nia kangela niaohana, masara ka idadi nigogarago angamoi nia kangela gea ahao dokengika de ihihofoko de o gogarago nginioka!

^14-16 De nako o nyawa iningelo de inihikangela nginika ma titi nianiiki o Kristusu ai romangika de nidadi to Una ai nyawa, de gea ngini ngaro ufa dika de inimaleke masara ka idadi nisanangi angamoi genangino de Ma Jou ai hiowa ngini niamake. De abe iniruwae nginika, gea inihitaanoka abe Ma Jou o Womaha womanoa nginioka. De Una abe womanoa nginioka, Una gea duru de ai medebini ma dararonoka, ho ufa nia huha ilaku nia hiningaka masara koaho ngini nisanangi angamoi Ma Jou o Womaha womanoa nia hiningaka! Ho gea ka idadi duru nisanangi nia hiningaka angamoi inifetongo o Kristusu ai nyawa de hiadono niwihigiriiri Ma Jouika! Masara nako hoka ngini niamake o kangela mangale ti ngini ma hirete nia howonoka de aino iboa, gea ko ihihofokua de Ma Jou ai hiowa nginika. Ho ngini ufa hiadono inihikangela ma titi o nyawa niatoma eko o kia naga nimadohikoka eko niatobahiade-ade o nyawa utu manga wowango eko ma titi utu abe ngini nidiaioka o dorou nia wowangoka.

¹⁷ De naa, ahi gogianongoru, ka idadi utuohi tinihitararono abe ma titi nia kangela abe niaohana ma oraha naa. Abe nia kangela gea idadi ma dodunguu la ngone hohioriki abe duru itigioka ma oraha la Ma Jou watailako o nyawa. De abe ma oraha Una watailako o dunia mata-mataika de nagali abe wonahigunoa la ngoneoo to Una ai nyawa nanga dodotoko ma dubuho inadaene. Angamoi Una woigo wonahitiari nanga kangelaino gea la utuohi nanga wowango hao itiai to Una ai himangoka, ho wonahigunoa la o kangela inadaene ngoneuku. Ho mangale ma titi imulaengoka abe nanga kangela ma ngoe haohana, gea hohioriki abe itigioka ma oraha Una watailako o dunia mata-mataika. De abeika ngaro ngone abe hodadioka to Una ma hirete ai nyawa masara o kangela inadaene. Ho hongoli o dunia ma nyawa manga kangela kohadubuho yadaene onanguku! Abe o nyawa gea ko ihigihenua Ma Jou ai Abari ma Rorahaiika, ho duru ka to onangohi manga hohowono ahao itubuho onanguku abe ma oraha Una watailako ona manga wowangoika!

¹⁸ De ahi demo gea imakiniiki de Ma Jou ai Demo-demoka moi naa abe ma dodihiraino de ihitulihukuoka. Abe itemo ato, “Ngaro o nyawa abe yototiaioka Ma Jou ai himangoka de abe yamakeoka o wowango ma ngango Ma Jouino, masara onangoo kiani o kangela yamake manga wowango ma goronaka. Ho nako o totiai ma nyawa abe Una waduhunoka manga howo-howonino de hiadono kiani ona yamake o kangela o duniaka, hongoli ona yatobahowo-howono abe ko iwihiorikua Ma Jouika, ona gea ahao done hokokia ma dubuho manga hohowono Unangoka de aino? Angamoi ka to onangohi manga hohowono duru itubuho.” Hokogea ma dodihiraino ihitulihukuoka. Ho gea ma titi hiadono tinihigaro nginika tato ufa hiadono ngini niheranga ma oraha inihikangela.

¹⁹ Ho naa ngohi tinihigaro nginika tato igoungu ma oraha naa de Ma Jou winihidoaka la o nyawa inihikangela nginika. De nia kangela ma goronaka gea de kiani nigila-gilahi dika ma rorahai nitobadiai. De abe ma titi ngini naga nia kangela ma goronaka, ho gea ka idadi nimahinganono Ma Jouika de nimakelenga ai giama ma hoatoka. Angamoi Una gea abe winitulaada ngini duru ko wininoaikaua, ho ka idadi nimahinganono Unangika.