1 Peturusu 3 - Ma Jou ai Demo-demo o Totobelohoka

O Peturusu wahibehehongo o feka-fekatika wato kiani naga manga hingounu manga roka-rokatika

^1-2 De naga moioli ahi behehongo abe ma dumutu ngini o feka-fekatika. Ho ngini o feka-fekata tinihibehehongo la niahigihene nia roka-rokatika. De ngaro naga nia rokata abe ona ko yodafongua Ma Jou ai Demo-demoika, masara ngini niahigihenohi onangika la ona ahao iwingaku nanga Baluhika ma titi ti ngini nia wowango ma datorino. Angamoi marai nia rokata inilega-lega hiadono yomafikirohi ma titi nia wowango ma datoro ma debi-debini de nia horomati ma amoko onangika. De gea ona ma bahauku de ngaro ko niadotokua ma titi nia demoino onangika masara ka idadiohi ona iwingaku nanga Baluhu idodutuika.

^3-4 De ngini ufa niafikiri nia hailoa ma gou-goungu imanoa nia badanga ma poretino. Angamoi ngaro nimatadauriye la nia tadauru ma rupa o fara moi ma hohailoa, eko ngaro nimahinoa o gurasi eko o baju duru ma hali, masara ko genanginoua ma titi hiadono naga nia hailoa ma gou-goungu. Masara koaho ngini nihitihira abe nia hiningaka nimahinoa de ma hailoa ma gou-goungu abe gea itongohono ka hiado-adonika. Abe ma titi nako ti ngini nia hininga de nimahitipokouku de nagaoo nia hininga ma mobole o nyawaika, de gea ngaro o nyawa ko idadiua yamake de manga lako nia hininga gea, masara Ma Jou Una ka idadi wamake. De Una gea waetongo nia hininga ma hailoa gea wato duru ikurutiye to Una ai himangoka. Ho ngini o feka-fekata, iti nia hiningaka nimahitipokouku de nia hininga ma mobole niapake o nyawaika. Ena gea abe ngini kiani niahitihira nia wowangoka.

⁵ De ngini koaho nimahihohininga ma titi o ngo-ngofeka ma debi-debini ma dodihiraino abe ona yomahingano-nganono Ma Jouika la ka idadi ngini nimaaduru hoka onangoli. Angamoi onangoo ma dodihiraino de yomahinoa manga hiningaka de manga hailoa ma gou-goungu. Ho ona gea yahigihene manga roka-rokatika.

⁶ Abe hoka o ngo Sara muna gea mihigihene ami rokata o Abarahaamika, de gea ka idadi hohioriki abe to muna ami hingounu naga ami rokatika angamoi muna miahoko mato “Ahi baluhu” unangika. De tanu nginioo naa nimaketero abe hoka to munangoli ami hininga. Ho iti nginioo ma rorahai dika nitobadiai de ko nihawanua abe ma titi niohimanga nia kangelaika, de gea ka idadi tinihiromanga tato ngini hoka to o ngo Sara ngomi ora-ora angamoi gea nia hiningaka de duru imakiniiki de hoka to munangoli ami hininga.

O Peturusu ai behehongo o roka-rokatika

⁷ De naa moioli tinihibehehongo nginika. De ngini o roka-rokata, kiani niao irahai nia feka-fekatika. De kiani naga nia horomati onangika, de nia tauoka niogoana nia gogao abe ngini o giaberekioka. De ngini nihioriki abe nako o duniaka naa de ngini inihinooto de ka ngonahi o nauru de ani buturungoka de ani kuahaka. Masara nako Ma Jou ai himangoka de ngini o giabereki ka nimakadaene dika abe ma titi to Una ai hiowaino abe o wowango ma ngango ngini niaborimake Unangino, ho gea ka nimaketero dika to Una ai himangoka. Ho igoungu abe ngini o roka-rokata kiani niao irahai nia feka-fekata. De nako hokogea niao irahai, gea iniduhunu ma titi nia niniatino. Abe ma titi la ka idadi nia niniata Ma Jouiye ufa naga ma dudukoro masara Una ka idadi wohingodumu nia niniatino gea.

Ma oraha inahikangela de ufa homahibalaha de ma dorou

⁸ De naa ahi behehongo moiokahi abe tinihibehehongo ma titi nia gogao nia gogianongoruoka. De gea ngini mata-mata kiani nimahiketehiningamoi, de nako naga nia gianongoru abe yamao yohuha manga hiningaka eko yogarago, masara nginioo nia hiningaka de hoka niamao abe imaketero hoka to onangoli manga hiningaka. De kiani ngini nimakodora nia gogianongoruoka abe de nia hininga ma mobole de ma dodipokouku.

⁹ Abe nako hoka idadi abe womatengo wodiai ma dorou nginika, gea ufa nimahibalaha de ma dorou unangika. De nako hoka naga o nyawa iningelo nginika, gea ko idadiua nimahibalaha de o ngelo onangikali. Ufa hokogea nia hininga, masara koaho niagahoko Ma Jouiye la ona gea ahao yamake ma owa Unangino. Angamoi ma oraha niagahoko Ma Jouiye de gea duru imakiniiki de Ma Jou ai hininga abe ma dodihirainohi. Abe naga to Una ai hininga ma dumutu la wahiowa o nyawa-nyawaika, de woigo la ngone naa hodadi to Una ai hiowa ma ngekomo la ai hiowa gea adaene o nyawa utuika. Ho nako ngini nianiiki to Una ai hininga de ma owa niagahoko ma titi ona abe inihikangela nginika, gea ahao ka idadi ai hiowa itagi onangika. De hongoli nginioo niamake ma hiowa Ma Jouoka de aino angamoi to Una ai mau ngini nianiikoka.

¹⁰ De gea duru imakiniiki de Ma Jou ai Demo-demo abe ma dodihiraino ihitulihukuoka, de ai demo gea itemo ato, “De onagona dika abe yoigo yowango yosanangi dika la manga wowango itagi ma rorahaiika dika, ona gea kiani yomahipareta manga uru ma demoino la ufa ma dorou ihupu manga uruoka de aino. De kianioo manga uru yomahipareta la ufa yoelu-eluku la ato o nyawa yahibudi manga ngelukino.

¹¹ De abe ma titi manga wowango ma datoro ma dorou, enangoo kiani yatingakika onangoka de aino la ma rorahaioli yotobadiai manga wowangoka. De kiani ka ihikaika yoogoana manga gogao o nyawa mata-mataika la ufa yomaketeribuutu masara yowango o dame ma goronaka.

¹² Ho nako ona abe yoigo yowango yosanangi dika, ona gea kiani manga wowango yao itiai hokogea angamoi nanga Baluhu idodutu Una ka ihikaika walega-lega de wagoana o totiai ma nyawaika. De Unangoo wahigihene to ona manga niniata ma demoika. Masara onagona dika o dorou yotobadiai manga wowangoka, ona gea duru Ma Jou walawana onangika.” Hokogea ma dodihiraino ihitulihukuoka, ho naa tinihihohininga ma titi to Una ai demo gea. Ho ngini iti nia wowango niao itiai de ka idadi Ma Jou winihiowa nginika nia wowango ma goronaka.

Abe o nyawa inahikangela ma titi ngone hotobadiai ma rorahai

¹³ De naa moi tinileha nginika abe ma titi yotobadiai ma dorou. Sarakia, nako ngini ka ihikaika niatobaniiki o datoro ma rorahai dika nia wowangoka de gea naga o nyawa yoboaino la ato inihikangela nginika, gea ahao hokokia idadi nginika? Ka idadi ona yoboaino de ihirusaka ti ngini nia wowango Ma Jouika ma titi manga dorouino? Duru ko idadiua! Ho ngaro ufa dika de ngini nipusingi ma titi ona gea!

¹⁴ Abe ngaro ona inihikangela ma titi ngini nidiai o wowango ma datoro ma totiai, masara ka idadiohi ngini niamao Ma Jou ai owa ti ngini nia hiningaka. Ho gea ngaro ufa dika de ngini niamodongo onangika, de ufa nia hininga ihuha.

¹⁵ Masara koaho ngini nia hiningaka de ka niwihigiriiri dika o Kristusika de nagaoo nia horomati kohaamoko Unangika abe hoka itiai niwihoromati ti ngini nia Baluhu idodutuika. De nako hoka o nyawa inileha nginika abe ma titi nia nganganono de nia ngongaku hokokia, kiani nimahidiaiokau la hokokia nipaluhu manga demoika, la nia bobaluhino de nioodemo to ngone nanga ngongaku.

¹⁶ Masara abe ma oraha nanga ngongaku nioodemo de niahitararono o nyawaika, gea kiani nitemo de nia hininga ma mobole de nia horomati onangika la ufa niahowono nia demo-demoino. De nako ti ngini nia demo de nia datoro ka ihikaika ma rorahai dika nidiai ma titi nimanoa o Kristusoka, de gea ahao o nyawa ko idadiua initae de inihitaana nginika. Angamoi nako hoka o nyawa initae nginika ato niahowonoka, ona ahao inimake abe nia datoro de nia demo ka ma rorahai dika. Ho ka de yamake abe nia datoro ma rorahai dika de ona yamalekoka de yomangaku ato, “Abeika nanga dadae ma demoino ma titi ona gea de duru ka hangofu angamoi manga dorou ko iwa!” Ho gea ngohi tinihigaro nginika la ka ihikaika nia datoro ma rorahai nitobadiai nia wowangoka.

¹⁷ Ho abe ma titi o kangela haohana, gea koaho inahikangela ma titi nanga datoro ma rorahaiino dika, iti de Ma Jou ai mau haohana ma kangela gea. Masara ufa hiadono ngone kiani hohimanga o kangela mangale ma titi to ngone ma hirete nanga howonino, angamoi gea hohioriki ko to Ma Jou ai mauua ma titi ngone ai nyawaino.

¹⁸ De abeika ngone hongano-nganonohi ma titi o Kristusu ai kangela abe ma dihiraino Unangoo wohimangoka. Angamoi igoungu o Kristusu ma moiokau iwihikangela ka hiadono wohonenge ma titi o howono. Masara gea ko mangaleua ma titi to Una ai howono hiadono iwihikangela, angamoi Una duru wototiai dika. Masara Una iwihikangela ma titi ngone o nyawa nanga howo-howono abe ko hototiaiua. De hokogea Una iwihikangela la ka idadi ngini naa winihiboa Ma Jouino. De igoungu abe Una gea iwihohonenge abe ma titi ai badangino, masara ipahaino de ahao iwihiwangokali ma titi Ma Jou o Womahino. Ho koaho ngone nanga datoro ma rorahai dika hotobadiai nanga wowangoka.

^19-20 De naga moioli abe duru ma dodihiraka de o Kristusu wodiaioka ma titi Ma Jou o Womahino, de gea o Kristusu wodiai abe ma oraha o Nuhi ai wowango. Abe ma dihiraino gea o Nuhi ka wowangohi o duniaka de una ai gogiriaka womadiai ai kapa. De gea ai kapa ko wabootuahi de watobahingahu-ngahu Ma Jou ai demo o nyawa-nyawaika. Angamoi Ma Jou duru womatongohono ma titi ai ngamo o howonika ho ma oraha wahidoakohi onangika la wato yotoba de iwingaku Unangika. De gea igoungu o Nuhi wotobahingahu-ngahu onangika masara tanu gea o Kristusu abe wotemo to Nuhi ai uruino ma titi Ma Jou o Womaha ai kuahaino. De ona yowoe-woe yoihene ai demoino masara ko iwihingounua, ho ma oraha naa de ona yomamakeoka manga hohowono abe ma titi manga nyawa yabuika o hohowono ma ngioka. Masara ona abe iwihingounu Unangika, ona yatufange Ma Jou waduhunu ma titi o kapaino, abe ona o akere ma ngooto ma goronaka masara waduhunu la ufa manga wowango ihonenge.

²¹ De naa ngohi tinihiketero ngini de ona yatufange ma dodihiraino gea. Abe imaketero hoka ona yatufange waduhunoka o akerino la ufa yohonenge, hokogenangoo de ngini ma oraha naa winiduhunoka ma titi o akerino. Abe ahi demo gea ma titi Una winiduhunu nia gogohiki ma akerino. Masara ngone hohioriki abe ma gogohiki gea tanu ma dodunguu dika abe inahihohininga ma titi o Yesusu Kristusu ai momomiki ai honengoka de aino la Una wowangokali. Ho ka idadi hotemo hato nia gogohiki gea ihititi o Yesusu Kristusu ai momomikino, ho gea tanu ai momomiki ma kuahaino wapake la nginioli niamake nia wowango ma hungi Unangika. De nako o gogohiki ma hidumutu ma gou-goungu, gea ko ma titiua la nanga peseke ihiofi nanga badangoka de aino, masara gea imaketero hoka ngone hopaluhu Ma Jouika ma oraha Una wonaahoko. De nanga babaluhino gea de ngone homahingahu abe ma titi nanga hininga duru ma goronaka de hoigo hato ma rorahai dika hanii-niiki. Ho ngini kiani nia hininga ma hirahi nianoaka la ma hungioli niatobaniiki nia wowangoka. De ufa ngini niawohanga abe nia wowango ma hungi gea ihititi o Yesusu Kristusu ai momomikino.

²² Abe Una gea wodoaiyeoka daku o Horogaiye de ma oraha naa Una naga wogogerukuoka Ma Jou ai nirakoka abe ai gogere gea ka enangohi ikurutiye o Horogaka. De ma oraha naa ngaro o kia dika abe naga de ma kuahaka masara gea mata-mata naga ma hingounu Unangika angamoi Una wohikalaka. Ho ngaro o momalaekata eko ngaro o popareta o kia dika eko ngaro o kia dika abe naga de ma kuahaka, ma, gea mata-mata naga ma hingounu o Yesusu Kristusika. De gea ka idadi hohioriki abe o Kristusu wolakuoka mangale ma titi ai kangelaino de ka winiikohi to ai Baba ai mau. Ho ahi demoino gea de toigo tinihigaro la ngini nimaaduru hoka o Kristusoli ai hininga. Abe Una gea ngaro iwihikangela masara ko womahipipidilua Ma Jouoka de aino ho ka ihikaika ma totiai dika watobaniiki. De imaketero abe hoka o Kristusu wamakeoka ai hiowa Ma Jouoka, ho nginioo ahao kiani niamake ma hiowa Unangoka. Ho ngaro o kangela o kia dika niaohana ma oraha naa, masara ufa niawohanga ma titi nia hiowa gea abe ahao dokengika ngini niamake. De nia nganganono gea ka idadi iniduhunu la o duniakahi naa de ngini niwango nitotiai Unangika.