1 Korintusu 9 - Ma Jou ai Demo-demo o Totobelohoka

O Paulusu womahingahu ai hininga ma titi ai karajaanga Ma Jouoka

¹ Abeika ngohi naa. Ngohi o hiluasa ma nyawa, abe moioo de ko iwa ihihipareta ngohino. De igoungu naga ahi kuaha ngone hingaku-ngakuoka mangale ma titi abe o Kristusu wohihidoakoka ngohino ahi gogere nanga garejaka. Abe ngohi wohihidingoto o Kristusu la o Abari ma Rorahai tahingahu-ngahu o nyawaika. Angamoi de to ngohi ma hirete ahi lako hinooto timake nanga Baluhu idodutu o Yesusu. Masara ngaro hokogea ma, ngohi tomahidadi imaketero hoka o huhuloko o nyawaika la tato ona taduhunu de tahiboa Ma Jouika. De ngini nia ngongaku ihitaanoka to ngohi ahi karajaanga nanga Baluhika, abe ngini nidadioka to ngohi ahi karajaanga ma hofoko.

² De ngaro o nyawa utu ihitae ngohino ato, “O Paulusu gea Ma Jou ko wihikarajaangua, masara una ma hirete womagorakiye.” Ngaro utu hokogea manga hininga hiadono ona ko yodafongua ahi demo, ma ngini kiani nihingaku abe ngohi Ma Jou wohihitagongino de to Una ai Abari ma Rorahai. Angamoi ngini ma hirete nia ngongaku, ena gea ihihitaanoka abe ngohi naa igoungu tokarajaanga ahi tagongo gea nanga Baluhika.

³ De igoungu naga o nyawa utu ihitae-tae ngohino abe ona ato bote ko iwa ahi kuaha Ma Jouoka. De marai ona gea inihigaro nginika la ato ufa nimiduhunu ngohi de ahi dodiawo o Baranabasa ma titi ngomi ko Ma Jou ai hidingoto ma nyawaua. Ho hokonaa tomadatoko de ahi hitiari onangika la tato ibootohi ona gea ihitae ngohino.

⁴ Nako ngohi de o Baranabasa, mode ngini niato bote ngomi ko idadiua miolomo de miokere nginioka abe ma titi mia karajaanga nia hidogoronaka?

⁵ De mode ngomi ma oraha miloiki mitulu-tulu o kiaika dika de ngini niato bote ko idadiua mia fekata abe yongaku-ngakuoka ngomi miao? Nanga gogianongoru utu abe Ma Jou wahitagongino de o Abari ma Rorahai, hoka nanga Baluhu idodutu ai doo-dodoto, de o Peturusu, de utuoli naga, ona mata-mata, ma, ka idadi manga fekata yao.

⁶ De ngomi mata-mataino de bote ka ngohi de o Baranabasa dika imihinooto kiani mikarajaanga la mia inomo mimahidailako? Tanu hokogea ko itiaiua. Angamoi ngini ma hirete nimihioriki abe ngomi naa igoungu Ma Jou ai hidingoto ma nyawa de naga mia kuaha Unangoka de aino.

⁷ Abeika naa tinileha. Sarakia, nako naga womatengo womahingohama o tentaraika la una de ai dodiawo yaparangi manga musuika, sarakia, una gea kiani to una ma hirete ai tiwi wapake la ai baju de ai inomo womahiija? Ko hokogenangua! Eko hokonaa. Sarakia, naga womatengo wotobaredi-redi abe ai angguru ma redi wodatomoka, de ipaha ahao ai angguru ma hofoko ko idadiua waolomo genangino? Ko iwa moi idadi hokogea! Eko hokonaa. Bote naga o domba ma gogoana abe o wange-wangeiye wogoana ma domba, masara ko idadiua ma domba ma huhu ma teongo waokere? Duru ko iwa hokogea!

⁸ De ahi hiketero gea ko o nyawaua dika manga hininga, masara Ma Jou ai Paretakaoo de imaketero ma hitiari ngoneino.

⁹ Abe ai Pareta o Musa ma dodihiraka wohitulihuku wato, “Nako nia hapi moiani naga ikarajaanga la adoko-doko ma pine hiadono ma hofoko imakitingaka de ma hahaku, gea ufa ma uru niapakiti, done ko idadiua iolomo ma pineino.” Hokogea itemo Ma Jou ai Paretaka. Masara sarakia, ma pareta gea ma dumutu o hapika?

¹⁰ Ekola ma pareta gea Ma Jou wotemo la ahao idadi ma utumu ngomino abe ngomi mikarajaanga de wiwileleani Unangika? Hokogea igoungu, abe ma pareta gea imihidumutu ngomino. Abe hoka ona yotobadato-datomo de ona yotobautu-utuku, ona mata-mata yonganono de ahao yamake utu manga gugutukino.

¹¹ De ngomi nengokadau Ma Jou ai Demo-demo ma mui midatomoka nginioka, ho done sarakia ka o duniaka dika ma perelu migahoko de ko nimihidoakua ngomino?

¹² De nanga gogianongoru utu naga abe yoboa nginino de Ma Jou ai Demo-demo ihikodoku nginika, de ona gea manga hidailako nginioli niahikodoku onangika. Ho nako ona gea manga perelu niahidailako, hongoli ngomi naa kiani nimihidailako angamoi ngomi ma dodihiraka de Ma Jou ai Demo-demo minihingahu nginika. De ngaro hokogea tanu itiai, ma, ngomi mia perelu ko mimagahokua nginika. Abe ngomi miato ngaro hokokia dika mia huha, ma, koaho ka mikangela dika, la ufa o Kristusu ai Abari ma Rorahai miatukoro nginika.

¹³ De abeika ona yotobakarajaanga Ma Jou ai Tauoka. De bote gea ngini nihioriki ona gea manga inomo yomamake Ma Jou ai Tauoka. De imaketero hokogea ona o doomu moioli abe yokarajaanga o huhuba ma ngioka. De naa ona o hidoku moi ka idadi yomamake o nyawa manga huhubaka.

¹⁴ Ho duru imaketero hokogea de ngomi abe miahingahu-ngahu o Abari ma Rorahai. Abe nanga Baluhu idodutu wohuloko wato, “Onagona dika o Abari ma Rorahai yahingahu-ngahu o nyawaika, o nyawa gea abe yoihe-ihene kiani yahidailako to ona manga perelu onangika.”

¹⁵ De ngaro hokogea tanu itiai Ma Jou ai himangoka, masara ngohi naa duru ko ma moiuahi tomagahoko nginika la ahi perelu nihihidailako. De ngaro ma oraha naa naga de ahi demo naa totulihi, ma gea ngohi ko tomagahokua nginino. Angamoi nako ngohi, tanu koaho tohonenge dika la done o duniaka dika ma utumu tamake abe naa ahi karajaangino. Abe nako ngohi o Abari ma Rorahai tahidoaka dika o nyawaika de gea ngohi ko kia-kiaua tamake onangino, duru enangohi todogarago. Masara nako hiadono o dunia ma utumu dika tamake o nyawaino, gea ahi garago hatoli ikuranga.

¹⁶ De abe ma titi ngohi o Abari ma Rorahai tahingahu-ngahu, gea duru ko idadiua tomahigiriiri ma titi ena gea, angamoi ma dihira ahi hiningaka de duru tamao o didila ma amoko ngohino abe Ma Jou wohihuloko wato, “Ngona ahi Abari ma Rorahai kiani nahingahu-ngahu o nyawaika.” Ho gea nako ko tahingahua, gea de ahao kiani o kangela tamake ahi wowangoka.

¹⁷ De nako hoka ma dihira ngohi ma hirete tomaputuhu tato o Abari ma Rorahai tahingahu-ngahu o nyawaika, gea de ahao itiai o hidailako tamake o nyawaino. Masara hokogenangua idadi. Ma dihira gea Ma Jou wohiiriki ngohi de wohihitagongo ngohino la wato ai Abari ma Rorahai tahingahu-ngahu. Ho gea ko to ngohiua ahi ngiriki, masara Una wohiiriki ngohi.

¹⁸ Ho ma utumu done o kia tamake ahi karajaangino? Ma oraha ngohi tahingahu-ngahu o nyawaika ma gea o Abari ma Rorahai tahidoaka dika onangika ngaro ona ko kia-kiaua ihihidoaka ngohino, de gea ena abe taetongo ahi utumu ahi karajaangino. Ho ngaro ufa de ngohi tomagahoko ahi hewa ahi karajaangino, angamoi ahi utumu naga tamakeokau. De hokogea tomaputuhoka tato ahi kuaha ko tapakeua abe tanu ka idadi ahi hewa gea tomagahoko nginino, ma hokogenangua todiai. Ho ngohi naa ahi hiningaka de duru tamao abe kiani o Abari ma Rorahai tahingahu-ngahu o nyawaika.

O Paulusu womahidoaka ai date-datekika la wato wakokiduhunu ma titi Ma Jouika

¹⁹ De ngohi naa ko o nyawa manga huhulokua ho ko moiua de ihihulo-huloko ngohino. Masara ngaro hokogea ma, ngohi tomahidadi imaketero hoka o huhuloko o nyawa mata-mataika abe o nyawa amomoi tomahidadi hoka onangoli homoi-homoiika la bote o nyawa hatoli yowoe taduhunu de tahiboa Ma Jouika.

²⁰ Abe nako ngohi o Yahudi ma nyawaka tomanoa, gea tomahidadi imaketero hoka onangoli la ka idadi o Yahudi ma nyawa taduhunu Ma Jouika. De nako tomanoa onangoka abe o Musa ai Pareta duru yanii-niiki, ngohioo ma pareta gea kiani taniiki, ngaro ma pareta gea ko ihihiparetakaua ngohino. Abe ma pareta gea ka idadi taniikohi jai-jai la tato o nyawa gea ka idadi taduhunu.

²¹ De nako ngohi naga onangokali abe ko o Yahudi ma nyawaua de o Musa ai Pareta ko aniikua, gea ahao ngohioo hoka onangoli la onangoo, ma, ka idadi tahiboa Ma Jouika. Masara ngaro hokogea tofetongo ma ko totemoua tato Ma Jou ai Pareta ngohino ko taniikua. Hokogenangua totemo angamoi igoungu naga o Kristusu ai pareta ka taniikohi.

²² De nako ngohi naga nanga gogianongoruoka abe to ona manga tobahioriki nanga ngongakuoka ka ikurangohi, de ahao ngohi hoka onangoli la onangoo gea ka idadi taduhunu la hiadono utuohi ona manga ngongaku ibaluhu. Ho, ngaro o nyawa hokokia dika naga, ma ngohioo hokogea abe hoka onangoli mata-mata la tato ona utu ka idadi taduhunu Ma Jouika.

²³ De gea mata-mata todiai la ma titi o Abari ma Rorahai utuohi ihikabarihi o nyawaika de o nyawa yowoe-woeoo yamake ma utumu genangino imaketero hoka ngohioli ma utumu genangino tamakeoka.

²⁴ Abeika tohiketero. Nako o nyawa yomaketeroreebe yomapopaata, ona mata-mata yomapopaata, masara ka womatengo dika wolaku de una gea ma hadia wamake manga roreebeino gea. Nginioo kiani hoka nimapopaata nia roreebeoka la ka idadi ma utumu niamake genangino. Abe gea ahi demo ma titi kiani ngini niwango hokokia nia wowangoka la hiadono nia utumu niamake Unangoka de aino.

²⁵ De naa moioli tohiketero. Abe onagona dika ato ahao yomarihimanga de manga musu la ihioriki onagonahi yolaku o goguleoka, ona gea mata-mata ko yomarihimanguahi de kiani yolatiohi la yomaribuutu to ona ma hirete manga badanga. De naga manga pokoro ma hafini utu de gea ka yomatongohono dika abe yolomo ma duga-dugaka dika la manga badanga gea idogo iputurungu. Hokonaa de hokonaa manga badanga ihiribuutu la manga badanga gea ko yomarihimanguahi de manga musu, de imahidiaiokau manga badanga. De naa tinileha, ona mata-mata ihipareta manga badangoka la o kia ahao yamake? Gea o roreebe ma hadia dika yamake abe ko iumurua abe ka jai-jai dika de irusaka. Masara ngoneoli naa homahipareta nanga wowangoka la ka idadi hamake ma utumu abe itongohono ka hiado-adonika.

²⁶ Ho gea ma titi hiadono tomahiketero tato ngohi tomapopaata de ma ngekomo ma rikoto taniiki itiai ka hiadono ma roreebe ma batingika tomahiadono. Eko nako tomahiketero hoka totobatidingi, gea ko o hidalokikaua tatidingi, masara ahi giama ma dumutu moioli, de genangika tatidingi. Abe ahi hiketero ma titi hokonaa. Ngohi ahi wowangoka naa de kiani tomahipareta la ka idadi ahi dumutika tomahiadono la o Horogaka ma utumu tamake.

²⁷ De gea ma titi hiadono ngohi ahi badanga naa duru tohipareta de tomaribuutu hiadono idadioka hoka o gilaongo. De igoungu ngohi o Abari ma Rorahai tahingahuoka o nyawa utuika la ona ahao ka idadi manga utumu yamake o Horogaka. Masara ngaro hokogea, ma, ngohi ahi wowangoka naa de kiani ka ihikaika ahi badanga tohipareta done torehene de ahao ahi wowango ma bahaika tomahiadono de ngohi ma hirete ko tamakeua ma utumu gea. De gea duru o hiokoo ma amoko nako hiadono idadioka abe ngini tinihingahu-ngahuoka ahao ma utumu niamake masara ngohi naa ko tamakeuali.