1 Korintusu 7 - Ma Jou ai Demo-demo o Totobelohoka

Ngone hoila-ilakoka koaho ngone ko homakitigiokaua la hato hihisanangi Ma Jouika?

¹ De naa marai ti ngini nia leleha abe nengokadau nihidingoto ngohino, naa ngohi topaluhu. Gea ngini nitulihi niato, “Irahai nako o nauru ko yomakitigiua de o ngofeka, eko sarakia nako ngona?” Hokogea ti ngini nia leleha ngohino. De gea ngohioo topaluhu tato, iya, tanu irahai hokogea. Abe mangale ma titi ma oraha naa naga o kokangela nanga wowangoka, ho tanu irahai nako ka idadi yomatongohono de ko yomakitigiua.

² Masara mangale ma titi duru ma ngoe idadi abe o nyawa yahiata-atara la yomakitigi abe ko itiaiua, gea ho ngohi tato koaho o rokata homoi-homoi ka nimakokitigiohi de nia feka-fekata de ufa nimahipipidili genangoka. De imaketero hokogea o fekata homoi-homoi, koaho nginioo ka nimakokitigiohi de nia roka-rokata.

³ De nako nginioka womatengo ngoi fekata moigo yomaidu de ami rokata, gea ufa hiadono una woluku ma koaho yomaidu, angamoi hokogea itiai o giabereki yodiai. De imaketero hokogea nako momatengo ami rokata woigo yomaidu de ngoi fekata, gea ufa hiadono muna moluku, angamoi hokogea itiai o giabereki yodiai.

⁴ Abe ma fekata muna ami badanga ko momaparetakaua, masara gea ami rokata wapareta to muna ami badanga. De imaketero hokogea ma rokatoli ai badanga de una ko womaparetakaua, masara ngoi fekata mapareta to una ai badanga.

⁵ Ho nako o giabereki de yomatengo yoigo yomatoomu, gea ibootohi nioluku ngini o giabereki nimaidu. De masara nako ahao naga ma moi ma moi abe o giabereki duru yamao abe koaho duru yomaniata Ma Jouiye, de gea ma rokata de ngoi fekata mata-mata yomaketehiningamoi abe koaho duru yomaniata Unangika. Nako hokogea ona o giabereki yakokiputuhu, gea de ahao ka idadi yomatongohono abe hokokia ma dekana, masara kalioli itedekana yomatongohono, done o Ibilihi yahiata-atara de ona ko idadiokaua yomatongohono de hiadono yahowono. De abe ma oraha yomaniata ipaha de koaho ona yomatoomuoli hoka ma dihirali.

⁶ Masara gea totemo ma ko o paretaua, masara gea o higunoa dika tinihidoaka nginika.

⁷ De abe ma titi o nyawa yoilaka, ngohi tanu toigo la o nyawa mata-mata ngaro ufa dika de yoilaka la ona yomaketero hoka ngohioli abe ngohi ahi dongohono naga ho ko toilakokaua. Masara ngohi tohioriki abe ngone o nyawa imaketemomomoi nanga hidoaka Ma Jouoka de aino. Abe ngone utu wonahidoaka ngoneino la ka idadi hoilaka, de utuoli wonahidoaka ngoneino la ufa hoilaka. Ho, nako ngini niila-ilakoka, gea ufa nioluku nimatoomu ngini de nia rokata eko nia fekata. De abe nginioli ko niilakuahi, gea ngohi tato irahai nako ka idadi nigila-gila dika abe hoka ma dihirainohi la ko niilakua de ko nimakitigiua de utuika.

De sarakia o nau-nauru abe ko iwa manga fekata eko o ngo-ngofeka yofao-fao?

⁸ De naa ngohi totemo nginika abe o nau-nauru ko iwa nia fekata de nginikali abe o ngo-ngofeka nifao-fao. Ngohi tato irahai ngini ka nigila-gila dika hokogea de ufa niilaka la ngini imaketero hoka ngohioli.

⁹ Masara nako ngini ko idadiua nimatongohono, gea ho koaho ngini niilaka, angamoi koaho niilaka done nia hafini ka ihikaika ifae o nyawaika.

Ngone ka idadi nanga rokata eko nanga fekata haoluku la ibootohi homakitigi? Marai koaho hokogea hodiai la hato hihisanangi Ma Jouika?

¹⁰ De naa ngohi o hitiari moioli tohidoaka nginikali abe nagau nia fekata eko nia rokata, de abe nako naga ngini inihinooto o giabereki niwingakuoka Ma Jouika mata-mata. Masara naa ko ngohiokaua de aino ma hitiari, masara naa nanga Baluhu o Yesusu ai demoka de aino iboa. De ma hitiari hokonaa. Ufa ma fekata mioluku ami rokata.

¹¹ Masara nako momatengo mioluku, ma ko idadiokaua moilaka moioli, masara kiani mowango momatengoka dika eko ho koaho ka idadi migilio ami rokatika dika. De ma pareta gea imaketero ma rokatikaoo, abe ufa ma rokata womioluku ngoi fekata.

¹² De o nyawa utuikali mata-mata, naa ngohi totemo nginika, de ko nanga Baluhua ai demo angamoi naa ko wotemoua abe ma oraha Una nagahi o dunia ma lokuokahi. Ngohi tato nako naga o nauru womatengo nginioka de ngoi fekata ko mingakua Ma Jouika, ma gea una ngaro ufa womioluku ngoi fekata gea, iti munangoo mohimoteke mogogere de de una.

¹³ De nako nginioka naga momatengo de to muna ami rokata ko wingakua, ma gea muna ngaro ufa mioluku ami rokata gea, iti una woigo wogogere de de muna.

¹⁴ Angamoi ma fekata mongaku-ngaku, muna o debi-debini mohiboa to ona manga tauino, de hokogenangoo imaketero abe ma rokata wongaku-ngaku, unangoli o debi-debini wohiboa to onangoo manga tauino. Masara nako ona o tau moi de ko moiua iwingaku Ma Jouika, gea de ahao manga ngofa-ngofaka ko yotebinua. Masara nako naga o tau moioli abe ma dimono ngaro una dika wingaku eko ngaro muna dika mingaku, masara gea manga ngofa-ngofakoo o debi-debini ma nyawa.

¹⁵ Masara nako ngini abe nia fekata eko nia rokata ona ko iwingakua, de ona aputuhoka ato inidokaowara nginino, gea niahigunoa dika la ona yosobo. Angamoi nako hokogea manga putuhu, ngini niwingaku-ngaku ko iwaka nia papakiti onangika abe ko iwingaku-ngakua. Masara iti ufa nginioka ma titi la ona ato yosobo, ma kiani duru nihitaili la ufa nimakoluku. De iti nimahohininga abe Ma Jou winiirikoka de winihidadi to Una ai nyawa la wato o tobariidi winihidoaka nia hiningaka, ho ngini ufa nimakalawana ngini de nia fekata eko nia rokata, masara kiani nimakao irahai la ma riidi gea niogoana.

¹⁶ Angamoi abeika naa moi nimafikiri. Ngini o feka-fekata, bote ka idadi nia rokata iwingaku Ma Jouika ma titi ti ngini nia wowango yamake. De nginioli o roka-rokata, bote ka idadi nia fekata Ma Jou waduhunu manga howonino ma titi ona ti ngini nia wowangoino amake. Ho ngini o giabereki, ngaro nia rokata eko nia fekata gea ko iwingakuahi, ma kiani duru nihitaili la ufa nimakoluku.

Sarakia, koaho nanga wowango moioli homaalingiri eko koua?

^17-20 Ahi gogianongoru, ahi demo abe ahao naa nabasaka ma titi ufa ngini o giabereki nimakoluku, gea ahi demo nginika ngade-ngade imaketero hoka ahi higaro ma demo utu abe naa ngohi tato tinihikodoku nginika. Abe nako naga womatengoani womahunaka de ahao wingaku Ma Jouika, gea ufa una womahibau o doterika de ufa yodiaioli done ihikawalimoli ai huhuna. De nako womatengoli naga ko womahunauahi abe ma oraha de Ma Jou wiahoko ai ngongakuino, una gea ngaro ufa de womahuna. Ho kangano tinihigaro tato nako ma dihirahi de niilakoka de ahao niwingaku Unangika, gea ufa nimakoluku. Ma masara nako ko niilakuahi ma oraha abe niwingaku, gea nigila-gila dika hokogea ho koaho ngaro ufa de niilaka. De gea imaketero de abe ma titi o huhuna. Abe nako nimahunaka, gea nigila-gila dika genangoka. Masara ngaro ko nimahunauahi, genangoo ma nigila-gila dika de ufa nimahuna. Abe ngaro o nyawa yomahunaka eko ngaro ko yomahunauahi, ma, gea duru ko kia-kiaua Ma Jou ai himangoka. Masara abe duru kiani o nyawa yodiai, kiani de Ma Jou ai huhulokoka dika de aino yaniiki. De ma pareta gea ngohi tohidoaka ma gareja mata-mataika.

²¹ De naa ma titi moioli tinihitararono. Abe nako ngini nengokadau o nyawa manga huhuloko ma oraha de Ma Jou winiahoko nia ngongakuino, de naa ahi lalaru ma demo tinihidumutu nginika. Ngaro ngini o nyawa manga huhuloko, masara gea ngaro ufa de niahuha nia hiningaka ma titi gea. Angamoi ngaro ngini o nyawa manga huhuloko, ma ka idadiohi irahai niwileleani Ma Jouika. Masara nako ahao ma ngekomo naga la nia baluhu ka idadi winihigunoa, ma ngekomo gea kiani nianiiki la nihupu ma rorahaiika la ibootohi o nyawa inihulo-huloko. Masara nako ma ngekomo ko nimakeua, ufa niahuha de ena gea.

²² Angamoi abeika, nako nengokadau ngini o nyawa manga huhuloko ma oraha Ma Jou winiahoko nia ngongakuino de hiadono niwingaku, ma oraha gea de Una winihihoheoka nia howonino, ho ngini nidadioka Ma Jou ai nyawa abe o howono ko inihiparetakaua. De nako ngini utuoli abe nengokadau ma oraha abe Ma Jou winiahoko nia ngongakuino de ma oraha gea nia garago nagau, abe ma titi ngini ko o nyawa manga huhulokinoua, ngini nidadioka naa o Kristusu ai huhuloko angamoi kiani naga nia hingounu nia Baluhu idodutuika abe imaketero hoka o nyawa manga huhuloko kiani yahingounu manga baluhika.

²³ De ngaro ngini o nyawa manga huhuloko eko koua, ma ngini mata-mata winiijakau Ma Jou de nidadioka to Una ai nyawa. Ho ufa ngini nimahibaluhu o nyawaika dika hiadono ngini nidadi hoka to ona manga huhuloko.

²⁴ Ho, ahi gogianongoru, nako ngini o nyawa manga huhuloko abe ma oraha de Ma Jou winiahoko ani ngongakuino la niwingaku, genangoka dika ngini nigogere de de Una. De nako ma oraha gea ngini ko o nyawa manga huhulokinoua, genangoo ma ka idadi nigila-gila dika genangoka de de Ma Jou.

Sarakia ona abe ko yoila-ilakuahi?

²⁵ De naa ka idadi topaluhu ti ngini nia leleha ma titi abe ona ko yoila-ilakua. De ngohioka ko iwa o pareta nanga Baluhoka de aino ma titi naa ena, ho naa to ngohi ma hirete ahi hininga totemo. De ngaro hokogea ma, ka idadi ahi demo naa ngini niangaku mangale ma titi nanga Baluhu wohiduhunu ngohino.

²⁶ De ngohi tato, mangale ma titi ma oraha naa de ngone hingaku-ngakuoka naga o kokangela nanga wowangoka ma titi nanga ngongakuino, ho koaho ufa ngini nia wowango moioli nimalingiri.

²⁷ Abe nako ngona noilakokau, gea ufa nomioluku ngoni fekata. Eko nako ko iwahi ngoni fekata, gea ufa ngoni fekata nomaalingiri.

²⁸ Masara nako hiadono naputuhoka de noilaka, gea ngona ko nahowonua. De imaketero hokogea nako o moholehe momatengo de muna moilaka, gea munangoo ma, ko mahowonua. Masara angamoi ma oraha naa o kangela ma ngoe inadaene, de nako hiadono o nyawa yoilaka, ahao ona kiani o kangela hatoli iwoe yohimanga manga badangoka. De gea ma titi ho hiadono ngohi tinihigaro tato ho koaho ufa niilaka, ngohi tato nia kangela abe naa tato tiniduhunu la nia kangela hatoli ikuranga.

²⁹ Ahi gogianongoru, hokonaa ahi demo ma titi. Angamoi bote nanga oraha ko itedekanokaua. Ho ma oraha nenangoka de imahikaika de ngini abe de nia fekatoka tanu ngini ko idadiokaua ti ngini nia fekata manga perelu niatihira. Masara kiani nia oraha niapake la niwileleani Ma Jouika.

³⁰ De nginioli abe niari-ari dika ekola naga utuoli nitobagie-giete dika, ngini koaho nimatongohono la ka idadi Ma Jou niwileleani. Eko ngaro ngini abe ma ngoe nimaija-ijaino nia kiahonanga, koaho ngini niwango abe imaketero de hoka nia kiahonanga ko iwa.

³¹ De ngaro nginioka onagona dika niapake-pake o dunia naa ma kiahonanga, ma ufa niodosanangiholi enangika, angamoi ko enangua abe itongohono ka hiado-adonika. Masara ma dunia ma rupa abe ma oraha naa hamake, gea ko itedekanokaua de aturuuruoka ma rupa.

³² Ho ngohi tinihigaro hokogea la o dunia naa ma pusingi ikuranga nginioka. Abe ma nauru onaguna dika abe ko woilakuahi ho ko iwa ngoi fekata, una gea ka idadi ai oraha wapake la wileleani de wihisanangi nanga Baluhu idodutuika.

³³ De masara ma nauru woila-ilakoka, una gea kiani wohidifikirohi de o dunia ma kiahonanga de womihisanangi ngoi fekatika. Ho gea to una ai hininga iregu hinootoka.

³⁴ De hokogenangoo de ma ngofeka. Abe ma ngofeka o ngo kia dika ko moilakuahi abe ami rokata ko iwahi, muna gea ka idadi mileleani nanga Baluhu idodutuika de ami badanga ma gahumu de ami nyawaoo ma gahumu. Masara muna moila-ilakoka, muna gea hatoli ami hininga ma pusingi naga, angamoi o dunia naa ma kiahonanga kiani molegaika enangika, de ahao kiani mihisanangioli ami rokata.

³⁵ De ahi higaro naa mata-mata tinihidoaka nginika la idadi nia utumu, de ko ma titiua ngohi tato tinihidapakiti naa de o pareta. De ngohi duru toigo la ngini niamake ma hohailoa de ka idadi ngini niwileleani nanga Baluhu idodutuika, de gea nia hininga homoi-homoi ko iregua.

³⁶ Masara nako naga o nauru womatengo abe yomakatarunoka, de muna gea duru mobaluhoka abe ami ngumuru adonoka abe itiai moilaka. Masara una gea nengokadauino womaputuhoka wato wileleani Ma Jouika de ai hininga ma gahumu, ho wato bole-boleohi woilaka de ngoi darunu done ai hininga iregu hinooto. Nako hokogea ai putuhu ma dihira, de masara naa ma duru de una doka ai hiningaka womatemo wato done wahowono angamoi ko wapoakaua womatongohono, una gea ka idadi woilaka dika de ngoi darunu. Gea una ko wahowonua abe ai hininga womahioriki de wato kiani ngoi fekata womile done wahowono. Ho gea ka idadi woilaka dika de muna.

³⁷ Masara nako una gea ka wapoahi womatongohono abe ngoi fekata ko womileuahi de ai hiningaka ko idomo-domoua, gea koaho ngaro wahiohi dika de woilaka. Masara iti una duru womaputuhoka abe ka idadi womahipareta to una ma hirete ai badanga ma hafini.

³⁸ Ho una abe womaputuhu wato woilaka, gea wodiai irahai. De unangoli abe wato ko woilakua, unangoo ma wodiai irahai. Masara nako ngohi, una abe ko woila-ilakua, ka unangohi wodiai irahai mangale ma titi ma oraha naa naga o kokangela nanga wowangoka.

Sarakia o ngofeka abe ami rokata wohonengoka?

³⁹ De nako o ngofeka momatengo abe de ami rokatoka, muna de ami papakitoka ami rokatika ka hiadono ma oraha wohonenge. Masara nako una wohonengoka, gea de ahao muna ka idadi moilaka de o nauru moioli. De ma nauru onaguna dika muna gea ka idadi moilaka, iti unangoo wingaku nanga Baluhika.

⁴⁰ Masara nako ngohi, ho koaho ngaro ufa de moilakoli la hatoli ami sanangi ilamoko. De ahi demo naa ngohi tonganono Ma Jou o Womaha naga ngohioka wohiduhunu la ka idadi tinihikodoku to Una ai hininga nginika. Marai hokogea dika ahi babaluhu ma demo nginika abe nengokadau ngini nihileha niato, “O nauru de o ngofeka kiani manga gogao hokokia?”