1 Korintusu 6 - Ma Jou ai Demo-demo o Totobelohoka

Ngone o garejaka nanga gurubungu abe hato hokokia hourusu?

¹ De naa tinileha, nako nginioka de yomatengo naga manga gurubungu manga gianongoruika, done ma titi o kia hiadono nia gurubungu gea niao onangika abe yotobauru-urusu o nyawa? Abe ona yotobauru-urusu o nyawa, ona gea ko yototiaiua Ma Jou ai himangoka, ho done adodoa ho ngini o putuhu ma gou-goungu nilingiri onangoka? Koaho o totiai ma nyawaika niahimanga o garejaka, la ona ka idadi yaputuhu nginioka onagona manga gurubungu itaana eko ko itaanua.

² Mode ngini ko nihiorikua abe ahao naga ma oraha abe o dunia ma bobaha adonoka de ahao ngini niauru-urusu o dunia ma nyawa manga hohowono? Ho nako ahao ngini o dunia ma nyawa manga hohowono niaurusu, tanu ma oraha naa de ngini ka niakunoka nia gurubungu ma hohumuduru ma ka idadi niakunu niaurusu ngini ma hirete.

³ De mode ngini ko nihiorikua abe ahao o momalaekata de ngone Ma Jou ai nyawa haurusu ma malaekata gea? Ho nako ngone ahao ka idadi hakunu o malaekata haurusu, de hongoli ka o dunia naa ma wowango dika, ho marai ka idadi hakunu haurusu.

⁴ Ho gea nako nginioka naga o dunia naa ma wowango ma gurubungu biaha dika abe kiani o nyawa yaurusu, gea ufa niao onangika o gareja ma poretika! Angamoi done sarakia de gea niao o nyawaika abe duru ko iwa manga gogere o garejaka?

⁵ De ngaro ahi dodaere ma demo naa moi inihimaleke ngini, ma naa kiani totemohi. Sarakia, mode nginioka ko moiua nisosawaro ho hiadono ko niakunua niaurusu nia gogianongoru manga gurubungu?

⁶ Bote gea ma titi ho hiadono nginioka naga yomatengo de manga gurubungu de hiadono manga gogianongoru o Yesusoka yao o hiurusu ma ngiika, de genangoka yomarihimanga abe ona ko iwingakua Ma Jou la ona gea yaurusu manga gurubungu gea. Masara tanu hokogenangua, angamoi ngohi tohioriki naga utu nia hidogoronaka abe yososawaro de ka yakunu yaurusu nia gurubungu. Ho ona gea ngini kiani niagoraka la ona ka idadi yauru-urusu ti ngini nia gurubungu o gareja ma goronaka.

⁷ De mangale ma titi naga nginioka nia gurubungu hiadono niato kiani o nyawa iniurusu, gea duru inihitaanoka abe ngini ko iniurusuahi de duru nikalakau! Abe koaho nia gogianongoru o Yesusoka manga howono nginika, koaho niamalaika dika. De ngaro naga inirusi, ma koaho enangoo nianoaika dika ma iti ufa o hiurusu ma ngiika niloiki!

⁸ Masara nginioka hokogenangua nidiai. Abe nginioka ngini ma hirete niahowo-howono de niarusi-rusi, de gea hiokoo angamoi nidiai de gea nia gogianongoruika o Yesusoka!

Ufa nimaaduru abe hoka onangoli yotobadiai ma dorou!

⁹ Ho ngini ufa nimaaduru abe hoka onangoli yotobadiai ma dorou. Ho marai ngini ka niawohanga abe o nyawa ma dorou ona gea Ma Jou ko wadafongua? Abe o nyawa hokogea ko idadiua yodadi ai kokawaaha ho Ma Jou ko idadiua wahikoano onangika. Ho ngohi tinihigaro tato ufa hiadono o nyawa inibudi nia hiningaka la niato o dorou o kia dika ka idadi nidiai de gea niato bote Ma Jou ka winidafongohi. Abe naa ona ko idadiua Ma Jou wahikoano, ona abe yomakitigi ko itiaiua, de ona yomahuba o pangaoika, de ona yoilakoka masara o nyawa utu manga fekata eko manga rokata yomagora, de ona yomakitigi o nauru de o nauru,

¹⁰ de ona yotobatohiki, de ona yotobataleana, de ona yotobadaluku, de ona yotobadoa-doana, de ona yotobarusi-rusi. Ona gea mata-mata de ko idadiua yodadi Ma Jou ai kokawaaha.

¹¹ De ma dihira ngini utu hokogea nia wowango, masara naga ma moiuku de ngini iniohikoka de inihitebinoka. De gea ma oraha abe inihitotiaioka de nanga Baluhu o Yesusu Kristusu ai romanga de Ma Jou o Womaha ai kuahaino. Ho naa ngaro ufa nianiikohi nia wowango ma hira gea.

Ti ngini nia badangoka de kiani nia horomati nihimatoko Ma Jouika!

¹² Naga nginioka nia demo ma dulu hoka niato, “Nako ngohi, mata-mata ma gea ka idadi todiai angamoi o pareta ko taniikua de ahi bohono ko iwa.” Hokogea nia demo ma dulu. Masara ngohi tato, ngaro “mata-mata ka idadi” ma, nako ngohino ko mata-mataikaua ihiduhunu. De ngaro “mata-mata ka idadi” ma, nako ngohino toluku o kia dika abe ato ihihipareta ngohino. Ho ngaro o bohono de o pareta ko ihihiparetakaua, masara ngohi ka tomahiparetahi de tomagoanohi angamoi tato done naga moi de idadioka ahi biaha de hiadono ena gea ihihipareta ahi wowangoino.

¹³ De o demo moioli naga yotemo-temo nginioka ato, “O inomo naga la ihisanangi nanga ohu, de nanga ohu naga la ka idadi ma inomo ihisanangi enangika.” De ma demo gea igoungu, masara ahao naga ma oraha abe nanga ohu de nanga inomo gea hinootoo Ma Jou wohibinaaha mata-mata. Masara abe nanga badanga, ufa ngone hafikiri hato nanga badanga naga la homahisanangi dika de homakitigi abe ko itiaiua. Hokogenangua ma titi, masara nanga badanga naga la hihisanangi nanga Baluhu. De nanga Baluhu, Una gea nanga badanga ma dutu.

¹⁴ De ngini ufa niafikiri niato to ngone nanga badanga ko kia-kiaua Ma Jou ai himangoka. Angamoi Ma Jou de ai kuaha wihimomiki nanga Baluhu ai honengino, de imaketero hokogea naga ma oraha ahao ngoneoo nanga badanga ma wonahimomiki nanga honengino.

¹⁵ Mode ngini ko nihiorikua abe ti ngini nia badanga homoi-homoi gea o Kristusu ma hirete ai badanga ma kiahonanga? Ho gea de mode ngohi ka idadi o Kristusu ai badanga ma kiahonanga naa taoika de tomahikodofanga la ahi badanga tohidadi moi de ona abe biaha yomatobafukunu manga badanga? Duru ko idadiua!

¹⁶ Abe ma dodihiraka naga itulihuku Ma Jou ai Demo-demoka ato, “Ona yahinooto ahao yodadioka o badanga moi.” Ho mode ngini ko nihiorikua abe nako o nyawa yomahikodofanga onangika abe biaha yomatobafukunu manga badanga, gea ko nihiorikua abe ona yahinooto yodadioka o badanga moi?

¹⁷ Masara ona gea abe yomahikodofanga nanga Baluhika, onangoli gea yodadioka yomahiwomaha moi de de Una. Ho onagona dika yomahikodofangoka nanga Baluhika, ufa ona gea yomahikodofangoli onangika abe ko itiaiua yomakitigi de ona.

¹⁸ Ho naa ngohi tinihitiari hokonaa. Ufa ko nimakitigi abe ko itiaiua! Ma kiani nia badangoka o howono gea kiani nianoaka! De o demo moioli naga yotemo-temo nginioka ato, “O howono o kia dika ngone hodiai, de gea ko inataulinoua nanga badangino de ma howono gea ko iwa ma hofoko nanga badangoka.” Marai hokogea yotemo-temo, masara gea manga demo ko itaanua. Angamoi abe ona yomakitigi ko itiaiua, ona gea yahowonoka duru to ona ma hirete manga badangoka, de gea manga howono ma hofoko naga abe yahikatingaka ona Ma Jouino.

¹⁹ De mode ngini ko nihiorikua abe ti ngini nia badanga homoi-homoi, gea to Ma Jou ai tau? Una womanoa nia badangoka. De Ma Jou o Womaha, Una Ma Jou o Baba winihidoaka nginika la womanoa nginioka. Ho, ufa ko niahowono Unangika de nihipeseke to Una ai tau gea, angamoi igoungu nia badanga gea Ma Jou ai tau. De ngaro ngini ma hirete, ma, ko ti nginiokaua,

²⁰ mangale Ma Jou ngini winiijakau de nidadioka to Una ai nyawa. Ho ti ngini nia badangoka de kiani nia horomati nihimatoko Ma Jouika!