1 Korintusu 5 - Ma Jou ai Demo-demo o Totobelohoka

Womatengo o garejaka ai howono

¹ De ngohi duru toheranga ma titi ma ade-ade ihihingahuoka abe bari nginioka naga o howono manga badangoka. De ma howono gea ngaro onangoka abe ko iwihiorikuahi Ma Jou, ma, onangoo ko yahigunoaua manga nyawa la o howono yodiai hokogea. Abe bari naga nginioka womatengo de una de ngoi meme bao ona yahinooto yomakitigi.

² De gea ngini ka nimagorakohi! Tanu irahai nako nengokadau ma oraha niwihioriki ai howono gea de nia hininga duru ihuha dika de nia koongo itifa dika la hiadono una wahowo-howono gea niwitingakoka nginino. Masara ngini hokogenangua nidiai. Ngini niwinoaika dika de ahao nimahigiriiri angamoi ko niwihohowonua!

³ Masara ngohi naa hokogenangua ahi hininga. Abe nako ngohi, ngaro ngohi ahi badanga ko iwa nginioka masara nako ahi hininga igoungu naga imatoomuino de ti ngini nia hininga. De una wahowo-howono gea, ngohi naa taputuhokau ai hohowono hokonaa, de gea taputuhu imaketero hoka ngohi de ahi badanga naga nginioka.

⁴ De ahi putuhu naa ihititi de ahi kuaha abe nanga Baluhu o Yesusu wohihidoakino ngohino. Ho hokonaa ahi putuhu. Kiani ngini o gareja moi nimatoomuino, de ma oraha gea ngohioo ahi hininga kiani naga nginioka. Ho gea ngone homatoomuino de nanga Baluhu o Yesusu ai kuaha naga ngohioka

⁵ de ahao una wahowo-howono gea hitingakoka ti ngini nia doomuino de hihigunoa la una gea ai badanga o Ibilihi ihibinaaha. De hokogea hodiai unangika la hato ai jiwa gea ahao Ma Jou ka wodafongohi abe ma wange nanga Baluhu woboali.

⁶ Nginioka naga utu abe nimahigiriiri ma titi nia doomuoka ngaro naga yahowo-howono Ma Jouika ona yoboaino nia doomuino, ma, ka niadafongo dika. Masara nia hininga gea ko irahaiua. Mode ngini ko nihiorikua abe o ragi ma hohutulu dika de o tarigu ma gakomo mata-mata ka ihifero? Gea imaketero hoka o howono ngaro ma hohutulu dika nginioka ma gea ka imahora ngini mata-mataika.

⁷ Abeika naa o Yahudi ma nyawa manga biaha abe o Totilakuru ma rame-rameoka yotobadiai. Ma oraha gea ona yatoomuino manga ragi mata-mata manga tau-tauoka de gea mata-mataika yakokiumoka. Gea yaumoka de ahao ona yomaharongo manga roti abe ko iwa ma ragi. Ho gea tohiketero de toigo la ngini nidiai hokogea. Abe una wahowo-howono nia doomuoka, una gea ngini kiani niwihihupuoka la nia hidogoronaka de waino wohupuoka. Abe gea imaketero hoka nimaadebini hiadono ma ragi ma dekanoka gea ko iwaka nginioka. De gea ahao ngini nidadioka hoka o tarigu ma gakomo ka ma hungiohi, angamoi ngini igoungu ko iwa ma ragi nginioka, abe Ma Jou ai himangoka ko iwa nia howono. Ho nako una gea niwihihupu, gea ahao ngini nidadioka o doomu moi abe ko iwa nia badangoka o howono, de gea ahao ka idadi tinihiromanga tato nitebini. Abe ngini nitebini mangale ma titi to ngoneoo nanga Totilakuru ma Domba o Kristusu, Una iwihohonenge la ngone naa wonahitebini.

⁸ De imaketero hoka o Totilakuru ma rame-rameoka de duru ko yapakeua o ragi, ho ngoneoli naa tonahigaro tato ufa hapake nanga ragi ma dekanoka gea ma dorou de gea ena abe ko itiaiua. Masara koaho ma roti abe ko iwa ma ragi, de gea hohiromanga hato ma roti abe ma rorahai de ma gou-goungu, koaho ma roti gea hapake nanga wowangoka.

⁹ Ahi gogianongoru, naa ma duruika abe o hurata moioli ngohi tinihuratoka nginika, de ahi hurata ma goronaka gea de tinihibehehongoka la ufa ngini nimaketedodiawo de ona yomakokitigi ko itiaiua.

¹⁰ Masara ahi behehongo gea ko ma titiua totemo tato ufa o dunia naa ma nyawa nimahisapurika onangika. Hokogenangua ahi behehongo ma titi. Abe naa o duniaka ma nyawa, onangoka igoungu naga yomakokitigi ko itiaiua, de naga abe yotobataleana, de abe yotobarusi-rusi, de naga abe yomahuba-huba o pangaoika. Masara nako ngini niato nimatingaka onangino, gea tanu ngini o dunia naa kiani nianoaka de nisobo o Horogaiye angamoi nako nenangokahi ka ihikaika naga o nyawa abe ko iwingakuahi. Ho ahi demo gea ko ma titiua abe nimatingaka onangino gea.

¹¹ Masara naa ngohi tinihurata de tinihibehehongo tato, nako onagona dika yomahingahu ato, “Ngohi ani ria-dodoto o Yesusoka.” Nako ona yomahingahu hokogea masara manga wowangoka de ka imaketero dika de o dunia ma nyawahi manga biaha, onangika gea abe ngohi ahi huratoka gea tinihibehehongo tato ufa ko nimaketedodiawo onangika. Abe nako ona manga wowangoka de yomakokitigi ko itiaiua, eko yotobataleana, eko yomahuba o pangaoika, eko yotobadoa-doana, eko yatobadaluku, eko yotobarusi-rusi. Ho nako o nyawa yomafetongo o gianongoru o Yesusoka masara manga wowangoka ma datoro naga hokogea, ngohi tato ngaro ka niolomo dika de ona, ma ko idadiua.

^12-13 Abe nako o nyawa o gareja ma poretoka, ngohi ko iwa ahi tagongo la ona gea taurusu manga howono. De ngaro nginioo ma hokogea. Angamoi ona gea Ma Jou dika ai tagongo la Una dika ma hirete waurusu. Masara abe naga nia doomuoka yahowo-howono, ho koaho ngini ma hirete dika niaurusu ti ngini nia nyawa manga howono. Angamoi abe hoka itulihuku Ma Jou ai Demo-demoka, Una wonahibehehongo wato, “O nyawa ma dorou kiani ngini niahihupuoka la nia hidogoronaka de aino yohupuoka.”