1 Korintusu 4 - Ma Jou ai Demo-demo o Totobelohoka

Ona o Abari ma Rorahai yatobahingahu-ngahu abe manga wowango ma huha de ma kangelaoo

¹ Ahi gogianongoru, nako ngomi naa abe Ma Jou womihidingoto la o Abari ma Rorahai miahingahu-ngahu o nyawaika, koaho o nyawa imifetongo hokonaa. Ngomi naa o Kristusu ai duduhunu de ngomi Ma Jou womihitagongo de to Una ai dodotoko abe ma dodihiraino Una wagogonohi o nyawaino. Hokogea koaho o nyawa imifetongo ngomi.

² De abe ma titi Una womihitagongo ngomino, naa o demo moi abe duru igoungu ato, onagona dika abe o nyawa utu yahitagongo moi onangika, ona gea kiani yomahitaana de yatobagou-goungu abe manga tagongo gea yodiai itiai.

³ De masara nako ngohi, abe ngini niato nihitailako ngohino la nihioriki ngohi tatobagou-goungu eko koua, gea ngohioka ko kia-kiaua. Eko ngaro o nyawa utu ato ihitailako ngohino ma enangoo ko topusingua. De ngaro ngohi ma hirete ma ko idadiua tomahohowono tato ahi tagongino gea duru todiai itiai eko koua, angamoi gea Ma Jou dika duru wohioriki.

⁴ Abe ngohi ahi hiningaka, ngaro tonganono, ma ko tamakeua abe ihihohowono. De masara ngaro hokogea tomahingahu, ma ngohi ko totemoua tato ko iwa ahi howono, angamoi ka Ma Jou ma hirete dika abe wakunu wonatailako ngoneino de waputuhu duru itiai ma titi nanga tagongino hodiai itiai eko koua.

⁵ Ho ngaro ufa ma oraha naa de ngini nimitailako ngomi naa, angamoi o hitailako ma oraha ko adonuahi. Masara koaho niodamaa dika hiadono nanga Baluhu idodutu woboali, angamoi ma oraha gea de ahao Una o kia dika agogonika o fufutuika, gea Una wale de wao ma dodawangeino. Abe ma oraha gea Una o nyawa manga hininga de manga hidee watailako de wahimatoko. De ahao o nyawa homoi-homoi yamake ma higiriiri Ma Jouino abe itiai yamake.

⁶ De ahi gogianongoru, ahi huratoka naa abe tapake to Apoloso ai romanga de to ngohi ahi romanga, gea mia romanga tapake de tohitulihuku dika la tinidotoko nginika. Abe ngohi tato tinidotoko la ngini Ma Jou ai Demo-demo duru nianiiki de ufa hiadono o nyawa onagona dika de ngini niagorakiye de niahigiriiri ona gea, done utu duru niagorakiye de naga utuikali duru niadohata.

⁷ De naa tinileha de tinitaere nginika abe ngini hatoli nikurutiye o nyawa manga himangoka. Mode ka onagona inihingahu nginika ato, “Nako de o nyawa utu, ka nginiohi nisosawaro de nia demo ma ilingi inouhu”? Mode ko nihiorikua abe nia hiakunu mata-mata gea inihidoaka dika nginika? Ho nako nia hiakunu gea de ngini ka nidafongo dika, gea adodoa ho nimahigiriiri hoka nia karajaangoka de aino iboa?

⁸ Ngini naa niato bote nia wowangoka ingodu-ngodumoka. Abe niato bote nia hiakunu Ma Jouoka de aino duru iniwedonoka ho ko iwa nia kuranga, de hiadono ngini nimamao hoka nidadioka o kokoano! Duru irahai gea! Ma, hiokoo, ngomi naa ko mimadaenua. De tanu ngohi duru tosanangi nako niagou-goungu nidadioka o kokoano, la gea ngomioo mininiiki de ahao ka idadi ngone mata-mata hahikoano o nyawa ko manga ngoe!

⁹ Masara nako ngohi, ngohi tato ngomi abe Ma Jou womihidingoto la o Abari ma Rorahai miahingahu-ngahu, ngomi naa Ma Jou duru womihitipokouku o nyawa manga himangoka. Ngade-ngade ngomi mimaketero de ona o bui ma tauoka abe ko itedekanokaua de ahao yahohonenge ona gea. Ngomi imihimatoko o dunia ma nyawa manga himangoka de Ma Jou ai momalaekatoo manga himangoka la ona mata-mata imiwuningi.

¹⁰ Ngomi naa imifetongo o bodo ma nyawa angamoi o Kristusu wiwiniiki, masara nako ngini hokogenangua, abe bote ngini duru nisosawaro o Kristusoka. De nako ngomi ka imibole-bole dika, masara ngini nipoputurungu! De nako ngini, niamake o hayanga o nyawaino, masara ngomi naa imiemono dika.

¹¹ De ka hiadono ma oraha naa naga ngomi duru imihafini de mia ngomaha yodudungu de mia baju ikuranga. De ngomi naga imipoha-poha, de midadioka hoka mipoparadidu.

¹² Ngomi mikarajaanga ma dubuho de mia giama la ka idadi o inomo mimamake. O nyawa imihikoboto ngomino, ma ngomi onangika gea miagahoko ma owa Ma Jouino. O nyawa yoigo la mia badanga ihiodiri, ma, mimatongohono dika.

¹³ O nyawa imihiade-ade de ma dorou, masara ngomioli miabalaha mitemo-temo ma owa dika onangika. De ka hiadono ma oraha naa naga ngomi midadioka hoka o wale dika de o dunia ma peseke.

O Paulusu wahigaro wato ko woboauahi onangika de koaho manga hininga gea aturuuruoka

¹⁴ De ahi demo-demo abe ahao naa niabasa ibooto, gea totulihi de ko ma titiua ngohi tato tinihimaleke. Hokogenangua ma titi, ma ngohi naa tato tinitaere masara de o dora, angamoi ngini naa hoka ahi ngofa-ngofaka duru tinidora.

¹⁵ Abe ngaro o nyawa abe ato inidoto-dotoko nginika o Kristusu ai dodotokino bote ona gea duru yowoe, masara ti ngini nia baba ko yowoeua. Abe nako ti ngini nia baba o Kristusoka, gea ka ngohi tomatengo dika nia baba, angamoi ma dihira gea ngohi abe o Abari ma Rorahai tinihingahu nginika hiadono ngini niwingaku Unangika.

¹⁶ Ho naa duru togahoko nginika la nihihigihene ngohi nia babaino la hiadono ngini nimaaduru abe hoka to ngohioli naa ahi wowango ma datoro.

¹⁷ Ho gea ma titi hiadono nanga gianongoru o Timotiusu tihidingoto nginika, angamoi una to ngohi ahi ngofaka nanga Baluhoka abe duru tidora de abe una duru wingaku o Kristusika. Una gea tihidingoto la tato winihihohininga nginika hokokia ngohi ahi wowango imakiniiki hoka o Kristusoli ai hininga. De ahi wowango ma datoro o Kristusoka gea duru imaketero abe hoka todoto-dotoko o gareja homoi-homoiika.

¹⁸ Ahi gogianongoru, ngohi tinihioriki abe nginioka naga utu abe duru nimagorakiyeoka, ma titi bote ngini niato ngohi ko toboakaua nginika.

¹⁹ Masara naa ngohi tinihingahu tato ko yomotedekanokaua de toboa nginika, iti abe de Ma Jou ai mau. De ti ngini gea nia demo-demo utu toihenoka, ho ahao ma oraha de toboa nginika de ngini abe nimagora-gorakiye ko nia demoua ngohi tatailako, masara ti ngini nia buturungu Ma Jouoka de aino, ena gea tato tatailako nginioka.

²⁰ Angamoi nako hodadioka Ma Jou ai kokawaaha abe Una wonahikoano, gea igoungu naga to Una ai buturungu imanoa ngoneoka. Masara ai buturungu gea ko imanoaua nanga demo-demoka dika, masara gea imanoa to ngone nanga wowango ma datoroka.

²¹ Ho naa tinileha, Sarakia ngini? Ngini nioigo la ngohi toboa nginika de o boboha tomagao, ekola koaho ngohi toboa de o dora de o hininga ma bole-bole? Iti ngini. Nako tomahiadonoka de nia hininga hoka ma dihirainohi, gea kiani tinihohowono. Masara nako nia hininga niaturuuruoka, gea ka idadi tinihigaro dika de ahi dora ma demo. Gea iti ngini dika nia ngiriki.