1 Korintusu 3 - Ma Jou ai Demo-demo o Totobelohoka

Nako o garejaka de nimaregu, gea ahao niamake o hofoko ma dorou nia reguino

¹ Ahi gogianongoru, marai ngini ka niohiningahi abe ma dihira ma oraha ngohi nagahi nginioka. Abe ma oraha gea de ahao o Abari ma Rorahai niodafongo, de gea ngini hoka o ngofaka ma gogilauohi o Kristusoka. Ho ma oraha gea ngaro tanu toigo totemo eko todotoko nginika abe hoka ngini nibaluhoka nanga ngongakuoka, ma ko tadadiuahi angamoi ma oraha gea ngini ko nibaluhuahi. Ho ma oraha gea kiani totemo nginika abe hoka ngini o dunia ma nyawahi, angamoi gea ngini hoka o ngofaka ma gogilauohi o Kristusoka.

² De nako tohiketero ahi dodotoko de o inomo, ma oraha gea de tinihitoofo ka de o huhu ma teongohi dika abe ko idadiuahi ngohi tinihitoofo de o inomo ma dodogowini angamoi gea ngini ko niakunuahi niaolomo ma oraha gea. Masara, hiokoo, angamoi ngaro hiadono ma oraha naa naga ma ngini ka niakunuahi gea,

³ angamoi hiadono naa ngini hatoli hoka o dunia ma nyawahi nia wowango. Abeika, nginioka naga o daleana hiadono nimaketetaleana, de nagali nimaketeribuutu. Ho sarakia, gea ko inihitaanua abe ngini hoka o dunia ma nyawahi? De ngini ka niwangohi hatoli imaketero hoka o dunia ma nyawali yowango.

⁴ De naga nginioka womatengo womahingahu wato, “Ngohi o Paulusu tiniiki,” de naga womatengoli wato, “Ngohi tiniiki o Apoloso.” Ho naa tinileha, mode gea de ko inihitaanua abe ngini igoungu nimaketero de o dunia ma nyawali?

⁵ De naa moioli tinileha. O Apoloso, una onaguna? De ngohi o Paulusu, ngohi onaguna? Ngomi ka o duduhunu dika abe miniduhunu ngini la ka niwingaku Ma Jouika. Abe ngomi homoi-homoi midiai dika ma karajaanga abe Ma Jou womihitagongo ngomino.

⁶ Mia karajaanga gea imaketero hoka ngohi ma mui todatomo de ahao o Apoloso una watotuagi de o akere, masara Ma Jou dika ma datomo gea wohifero-fero.

⁷ Ho gea ngaro womatengo wotobadatomo eko ngaro womatengoli wotobatuagi, ma, ona gea ko kia-kiaua de ko yokurutiyeua. Masara ka Ma Jou dika, Una gea wokokurutiye, ho ma datomo gea Una dika wohifero-fero.

⁸ De womatengo gea wotobadatomo de womatengoli gea wotobatuagi, ona yahinooto gea yomaketerimoi dika, abe ona yahinooto mata-mata Ma Jou ai duduhunu. De masara ahao manga utumu yomaketemomomoi Ma Jouino, angamoi ahao to ona manga karajaanga homoi-homoi watailako.

⁹ De ngomi naa igoungu mimaketerimoi dika angamoi ngomi naa Ma Jou ai duduhunu abe mimakuduhunu de Ma Jou ai karajaanga, de nginioli nimaketero hoka Ma Jou ai redi, ekola hoka Ma Jou ai tau.

¹⁰ De nengokadau ngohi ma tau gea tokarajaanga, abe ma dihira ngohi tinidotoko nginika, de gea ka idadi totemo tato tokarajaanga nginioka abe ngini gea nidadioka to Una ai tau. Masara ahi karajaanga gea tohiromanga ma owa Ma Jouino, angamoi Una wohihiakunu ngohi la hiadono takunu tokarajaanga to Una ai nyawaka, eko to Una ai tauoka. Ho ma dihira abe tomulaenge tinihingahu o Abari ma Rorahai nginika, gea tohiketero tato to Una ai tau ma lifunu todiai. De gea todiai imaketero hoka o nyawa womatengo wososawaro wotobadiai o tau-tau. Ho ai tau ma lifunu todiaiokau, de ma oraha naa naga o nyawa utu yokarajaanga de ihidogo ma lifunu ma lokuoka. Masara onagona dika yokarajaanga ai tauoka gea, ngaro ngini eko ngaro o nyawa utu de ato yokarajaanga eko inidotoko nginika, ona gea kiani duru ihidodiai hokokia yokarajaanga.

¹¹ Ona gea kiani ihidodiai angamoi o tau ma lifunu ibootokau, de ma lifunu utu duru ko iwa abe o nyawa yakunu yodiai, angamoi o tau ma lifunu gea o Yesusu Kristusu. Ho mangale ma titi gea hiadono ngohi tato ufa o nyawa yadotoko ato naga womatengoli ko o Yesusu Kristusua abe ka idadi waduhunu o nyawa manga howonino, angamoi gea ka Una dika wakunu.

¹² De igoungu o nyawa onagona dika ato yokarajaanga o tau ma lifunu ma lokuoka de yodogo enangika, ka idadi yodogo dika. Masara kiani ona gea ihidodiai abe o kia yairiki la ihidogo enangika. Ka idadi ona yairiki ma kiahonanga ma rorahai abe itongohono hoka o gurasi eko o haaka eko o hakaru ma leto-letongo. Nako hokogea manga ngiriki, gea ahao irahai manga karajaanga ma hasili. Masara bote naga yotobakarajaanga utuoli abe ona yairiki ma kiahonanga abe ko ihaliua de ko itongohonua de o uku, abe gea hoka o gota eko o ruruubu eko hoka o gooko ma roehe. De gea ma kiahonanga ngohi tohiketero abe hoka o nyawa manga leleani abe iwileleani Ma Jouika. Abe utu marai manga leleani duru itaana de Ma Jou ai hininga, gea imaketero hoka ma kiahonanga ma hali-hali abe duru itongohono ma tauoka. Masara utuoli naga marai ona gea manga leleani ko itaanua, ho gea imaketero hoka ma kiahonanga abe ko irahaiua de igapanga youkuoka nako de o uku. Ho igoungu ka idadi o nyawa yairiki enangino o kia dika de gea apake ma oraha yokarajaanga ma tauoka.

¹³ Masara ahao naga o wange gea abe o dunia ma bobaha yadonoka de genangoka ahao manga karajaanga o nyawa mata-mata yamake de duru itararono. Abe ma wange gea to ona manga karajaanga homoi-homoi o Kristusu wohitailako de o uku. De ma uku gea ahao idadi o himatoko moi abe ihimatoko manga karajaanga o kia itiai de manga karajaanga o kia ko itiaiua.

¹⁴ De manga karajaanga gea abe ihidogo o tau ma lifunu ma lokuoka, nako ma uku yatailakoka de ko youkua, gea ona yamake ma utumu Ma Jouino abe ma dihiraino wohibehehongoka ma titi manga karajaanga ma rorahai gea.

¹⁵ Masara nako hiadono manga karajaanga utu youkuoka, gea ona ko yamakeua ma utumu genangino. De ngaro ma utumu ko yamakeua, ma, Ma Jou ko wahibinaahaua ona gea. Masara gea ona hoka o nyawa abe manga tau yahiduku de o nyawa utuoli kiani yaduhunu abe yaadoara de hiadono manga tau ma goronaika yangohama ho yahihupu, masara ma ukuoka de aino yoboa. Abe ma titi manga wowango nagahi, masara manga kiahonanga duru ko kia-kiakaua. Ho ona abe hokogea manga karajaanga Ma Jou ai tauoka, ona gea ahao ko yamakeua ma utumu ma titi manga karajaangino gea.

¹⁶ Ahi gogianongoru, mode ngini ko nihiorikua abe ngini ma hirete to Ma Jou ai tau, de abe Ma Jou o Womaha Una wogogeroka nginioka? Ho mangale ma titi ngini naa to Una ai tau, ho koaho ufa nimaregu angamoi done ai tau gea ikilianga.

¹⁷ De mode ko nihiorikua abe onagona dika yakilianga Ma Jou ai tau, ahao Ma Jou wahibinaaha ona gea? Hokogea wodiai angamoi Ma Jou ai tau gea duru itebini Ma Jou ai himangoka. De ngini naa tinihiketero tato ngini naa Ma Jou ai tau.

¹⁸ Ho abe ma titi nia regu homoi-homoi nia doomuoka, gea hiadono ngohi tinihitiari tato ufa hiadono ngini nimabudi de nimagorakiye. Abe utu naga tinihioriki nimagoraka ma titi nia haeke homoi-homoiino manga sosawaroino. Ho ngaro nia regu ma haeke homoi-homoi ngini niato mata-mataika de ka unangohi wosawaro, ma ufa hiadono genangoka de ngini nimagorakiye. Angamoi nako naga nginioka onagona dika abe nimahiromanga ato nisosawaro de o duniaka manga sosawaro, koaho ngini o duniaka manga sosawaro ena gea nianoaika dika. De gea nianoaika de ahao marai o dunia ma nyawa inihiromanga nginika ato nibodo, masara gea ngaro ufa dika de nipusingi de manga demo gea. De gea o dunia ma sosawaro nianoaikahi de ahao ka idadi ngini niamake o sosawaro ma gou-goungu.

¹⁹ Abe o duniaka manga sosawaro, gea o bodo Ma Jou ai himangoka. Abeika Ma Jou ai Demo-demo abe ma dihira ihitulihukuoka ato, “O sosawaro ma nyawa manga sosawaro Ma Jou wale de gea wohikawalimi la idadi hoka o modoi onangika abe yatobaliko genangoka.”

²⁰ De moioli Ma Jou ai Demo-demoino itemo ato, “O sosawaro ma nyawa manga hininga de manga hidee Ma Jou wohioriki mata-mata, de Una waetongo to ona manga hininga gea wato, ‘Ka parahaja dika.’” Hokogea itemo Ma Jou ai Demo-demoka.

²¹ Ho ufa ngini nimagorakiye de niato, “Ngohi to Paulusu ai nyawa,” eko, “Ngohi to Apoloso,” angamoi nako nimahigiriiri ma titi ti ngini nia hihira onagona, gea niapakeoka o duniaka naa ma sosawaro de masara to Ma Jou ai sosawaro ko niapakeua. Ho gea duru ka parahaja dika nia hininga de gea ko niataanua abe nimahigiriiri. De abeika naa moi nimafikiri. Ma Jou wohikaaturu la duru mata-mataika Una winihidoakoka nginika la idadi ti ngini nia utumu.

²² Ho ngaro ngohi o Paulusu eko o Apoloso eko o Peturusu, ma, ngomi mata-mata midadioka ti ngini nia utumu mangale ma titi ma dodotoko niamake ngomino. De ngaro o dunia naa ma ka idadi ngini niamake ma utumu genangino. Eko o kia dika naga idadi ma oraha naa naga eko o kia dika abe ahao idadi abe ma oraha ko iboauahi, masara genanginoo ka idadi niamake ma utumu. Eko ngaro ti ngini nia wowango eko ngaro ka hiadono ngini nihonenge, masara gea mata-mata de ka idadi ngini niamake ma utumu genangino. Ho ngohi tato ufa ngini nimangiriki o nyawa womatengoino dika la ka unangino dika niamake ma utumu, angamoi gea mata-mata abe ahao naa tofetongoka, tanu genangino mata-mataika ka idadi ngini niamake ma utumu.

²³ De ufa niawohanga abe ngini nidadioka to Kristusu, ho tanu itiai Una wamake ma utumu eko o higiriiri nginino. De o Kristusu Una gea to Ma Jou. Ho ngohi tinihioriki ngini nioigo o nyawa nimangiriki la nidadi to ona manga nyawa, ho naa tinihigaro tato koaho ngini nimangiriki Ma Jou la niwiniiki ka Una dika.