1 Korintusu 2 - Ma Jou ai Demo-demo o Totobelohoka

O Paulusu womahingahu onangika ai hininga abe ma oraha wadotoko de o Abari ma Rorahai

¹ Ahi gogianongoru, marai ngini ka niohiningahi ma dihira ma oraha ngohi toboa nginika de Ma Jou ai dodotoko tinihingahu nginika. Abeika ngohi ma oraha gea abe ngohi tinihingahu de totemo-temo nginika de ahi demo ma oraha gea ko tohikurutiyeua abe hoka ona yomatobagoraka manga demo. De gea ko tomahingahua nginika tato, “Ngohi naa duru tososawaro ho abeika ngini nitotoihene ahi demoino naa.” Hokogenangua todiai ngohi.

² Masara gea ngohi ko tomulaenguahi tinidotoko nginika de tomaputuhoka tato, “Nenangoka ahi dodotoko moi dika de utu tanoaikahi dika. Ho ahi dodotoko tahingahu onangika, gea to Yesusu Kristusu ai ade-ade de abe ma titi ai hohonenge o gota isosalioainoka. Gea dika tahingahu onangika naa.” Hokogea ahi hiningaka itemo.

³ De naa tomahingahu dika abe ma oraha gea toboa nginika de ahi hiningaka ko iputurunguahi, ho duru tohawana dika ka hiadono tofafara.

⁴ De gea ahi dodotoko de ahi demo-demo nginioka ko imaketeroua de o dunia ma sosawaro ma demo-demo abe ona utu apake la o nyawa yaribuutu la ato yangaku manga demoika gea. To ngohi hokogenangua, masara ngohi Ma Jou ai dodotoko gea tinihingahu dika nginika la Ma Jou o Womaha, Una ma hirete ka idadi womahimatoko nginika de to Una ai buturungu. Abe ma dodotoko gea duru wohitaana ti ngini nia hiningaika.

⁵ De hokogea tinihingahuoka ma dihira la tato ufa ngini nia ngongaku ihititi o nyawa manga sosawaroino, masara ahi hininga ma oraha gea tato nia ngongaku kiani Ma Jou ai buturungino dika ihititi.

Ma Jou o Womaha ai sosawaro o nyawa abe ko iwingakua gea ko yataokua

⁶ Masara ahi demo gea ufa niataoko ihowono, de ufa ngini niafikiri ngomi duru ko miapake-pakeua o sosawaro. Angamoi ngomi abe o Abari ma Rorahai mihingahu-ngahu, ngomi igoungu o sosawaro ma demo miadoto-dotoko onangika abe yobaluhoka nanga ngongakuoka. Masara mia sosawaro ma demo gea ko o dunia ma sosawaroinoua, de ngaro o dunia naa ma popareta ma sosawaro, genangoo ma ko miapakeua, angamoi done o kiaka ma utumu hamake nako to ona manga sosawaroino hapake? Angamoi ma popareta gea ko yotedekanua de ko yaiwaka.

⁷ Masara ma sosawaro abe ngomi naa mitemo-temo, abe ma titi o Yesusu Ma Jou wihidadi la nanga howonino wonaduhunu, ena gea Ma Jou ai sosawaro ma dogogono abe ka ma dodihirainohi wagogonohi. Duru ma dodihiraka abe ko kia-kiauahi wotulaada Ma Jou de to Una ai sosawaro naa wohideeokau ho ma oraha naa naga de ka idadi wonahidoaka ngoneino nanga utumu kohaamoko.

⁸ De to Una ai sosawaro gea o dunia naa ma popareta moioo de ko iwa abe yataoko ma titi genangino. Angamoi nako ma dihira o duniaka naa ma popareta yataoko itiai Ma Jou ai sosawaro gea, gea de ahao tanu ko iwihohonengua o Horoga ma Baluhu o gota isosalioainoka.

⁹ Masara ona gea ko yataokua ai sosawaro, ho duru igoungu ma demo-demo abe ma dihira itulihuku, ato, “Naga Ma Jou ai sosawaro abe o nyawa de manga lako ko ma moiuahi yamake, de naga abe o nyawa de manga ngauku ko ma moiuahi yoihene, de nagaoo abe o nyawa manga hininga ko ma moiuahi la yataoko ma titi genangino, masara Ma Jou ai sosawaro gea wahidiai la waduhunu onagona dika abe iwidora Unangika.”

¹⁰ De ngaro ai sosawaro gea hatoli ihuha o nyawa yataoko, masara ngomino naa Ma Jou womihimatokoka ai sosawaro gea Ma Jou o Womahino. De gea ka wakunu wodiai angamoi Ma Jou o Womaha mata-mata watailako de wohioriki. De ngaro Ma Jou ai dogogono abe wagogono o nyawaino, ma genangoo mata-mata Ma Jou o Womaha wohioriki.

¹¹ Abeika naa tohiketero. Nako womatengo wafiki-fikiri doka ai hiningaka dika, o nyawa utu ko iwihiorikua to una ai hininga ma dola hokokia. To una ma hirete ai nyawa dika womahioriki o kia naga ai hiningaka, angamoi ai nyawa gea imanoa ai badangoka. De gea imaketero de Ma Jou, angamoi ka Ma Jou o Womaha dika ka idadi wohioriki Ma Jou ai hininga ma dola, abe ona yahinooto gea duru hoimoi. Ho Ma Jou o Womaha, Una gea abe ka idadi wonahimatoko ngoneino to Ma Jou ai hininga.

¹² De ngomi abe mihingahu-ngahu o Abari ma Rorahai, ngomi naa ko womihidoakua o dunia naa ma hininga, masara Ma Jou o Womaha dika, Una gea womihidoaka ngomino la ngomi ka idadi mihioriki de miataoko ma demo gea mata-mata abe iti ka Ma Jou womihidoakoka ngomino.

¹³ De gea ma demo abe ngomi miahingahu-ngahu o nyawaika. De abe ma oraha ngomi miahingahu-ngahu de miapake o demo-demo abe ko mimadotokinoua o nyawa manga sosawaroino. Masara ma demo-demo miapake, gea ma demo-demo Ma Jou o Womaha womidotoko ngomino. Ho abe ma oraha ma gou-goungu Ma Jouino miahitararono de ngomi ka idadi miapake ma demo-demo gea abe womihidoakino ngomino.

¹⁴ Masara onagona dika abe ko iwingakua Ma Jouika, ona gea ko yodafongua ma dodotoko gea Ma Jou o Womahino angamoi gea ena yafikiri ato ibodo. De hongoli ona gea ko idadiua yataoko ma titi genangino, angamoi Ma Jou o Womaha ko iwiwa onangoka.

^15-16 De hokogenangoo de to ngone nanga hininga, abe ona gea ko idadiua yataoko nanga hininga ma dola hokokia angamoi Ma Jou o Womaha wonahihira-hira ngone. Abe nako o nyawa ko iwingakua Ma Jouika de done sarakia ona inatailako de inahioriki ngone abe nanga hininga Ma Jou o Womaha wonahihira-hira? Duru ko yadadiua! Ho ona gea ngaro Ma Jou ai hininga eko ngaro to ngone nanga hininga, ma gea ona ko yakunua yataoko. De gea hohioriki igoungu ma titi Ma Jou ai Demo-demoino naga moi abe itemo ato, “Mode onagona de ihioriki to nanga Baluhu idodutu ai hininga la ka idadi iwidotoko Unangika? Ko moiua!” Hokogea ma dihiraino itulihukuoka Ma Jou ai Demo-demoino. De gea ma demo ihidumutu onangika abe Ma Jou o Womaha ko iwiwa onangoka. Masara ngoneoli onagona dika abe Ma Jou o Womaha wonahihira-hira, ngone naa nanga hininga de to Ma Jou ai hininga imakiniiki, angamoi to Kristusu ai hininga igoungu nagau ngoneoka. De genangino ma titi hiadono ngone naa ka hakunu mata-mata hatailako de hohioriki naa ena itiai, de naa ena abe itorou.