1 Korintusu 16 - Ma Jou ai Demo-demo o Totobelohoka

O dora ma hidoaka kiani yatoomuinokau

¹ De naa ma titi moioli topaluhu abe nengokadau ngini nihileha ngohino. Abe hokokia ngini koaho o dora ma hidoaka niatoomu la nia duduhunu gea nihidingoto nia gogianongoruika o Yesusoka abe yohu-huha de abe yogogere o Yerusaleeme ma kotaka. Hokonaa tinihibehehongo nginika. Ka idadi nianiiki dika imaketero hoka onangoli o Galatia ma gogarejaka yodiai.

² Abe hokonaa nidiai. O Gareja ma wange ma getongo de kiani ngini homoi-homoi nia tiwi o hidoku moi niatingakika de nihidoaka o garejaika. De ma hidoku moi gea ka idadi imakiniiki de gea abe ngini homoi-homoi niamakeoka Ma Jouoka de aino abe o wange tumidi ipopaha gea. Abe nako ilamoko niamake, gea ka idadi nia hidoku hatoli ilamokoli abe nihidoaka. Masara abe nako ma hohutulu dika niamake, gea de ahao hatoli ihutulu abe niahidoaka. De hokogea tinihibehehongo la tato ufa hiadono ngohi tomahiadonoka nginino de ahao kiani ma duduhunu gea niatoomu. Koaho ngohi ko toboauahi de gea nimahidiaioka.

³ De irahai nako ko toboauahi de ngini niairikoka ti ngini nia nauru yamuruono naga abe niangaku onangika la ona ahao nia duduhunu abe niatoomuinoka, gea ona yao o Yerusaleeme ma kotaika. De ahao ma oraha tomahiadonoka nginino de ngohi ka idadi o hingaku ma hura-hurata totulihi la ona yomagao-gao. De gea nako hiadono o nyawa onagona dika yaleha-leha ma titi ma duduhunu gea, de ahao manga hurata ka idadi yahimatoko o nyawaika gea.

⁴ De nako ngohioo kiani toiki, de ahao ngohi de ona mimakiniiki miloiki o Yerusaleemika.

O Paulusu ai dodagi ma hidee

⁵ Ngohi naga ahi hidee la ihira toikohi o Makedonia ma tonakika de nanga gogianongoru ma tonakoka gea ngaro tokapakiti manga kapo-kapongika ma kiani tatutumohi. Ona tatutumu ipaha de ahao togila-gila la tinitutumu ngini genangoka o Korintusu ma kotaka.

⁶ De marai nginioka tomanoa hatoli ko ahi dekana, abe marai o mede muruono nanga himangoka ngone hato ma oraha o maata, marai o mede gea ka nginiokahi dika tomanoahi. De ahao ma oraha nginioka de tosobo, ngaro o kiaika dika ahao totowongi, masara ma oraha gea ngini ka idadi nihiduhunu la ahi dodagi ma bilaono de ahi hidiai utu ingodumu.

⁷ De ahi dodagi tohiaturu hokonaa angamoi ngohi ko toigoua ahi oraha ka jai-jai dika nginioka, masara toigo la hatoli ahi dekana tomanoa nginioka, iti nanga Baluhu wohigunoa hokogea.

⁸ Masara ma oraha naa naga ngohi ahi hidee la o Efesusu ma kotakahi naa tomanoahi hiadono o Pentakosta ma wange ipahaka de ahao tosobo.

⁹ De ngohi tato tomagoo-gogerohi nenangoka mangale ma titi naga o nyawa ko manga ngoe o kotaka naa abe yoigo yoihene ahi dodotokino. De nagaoo ma dodotoko ma hofoko tamakeoka o nyawa manga wowangoka. Masara nagali o nyawa utuoli manga ngoe abe ihilawana ngohino, ho ko tadadiuahi tosobo angamoi tato nenangoka nanga gogianongoru taduhunohi de ahao.

¹⁰ De nako ma oraha o Timotiusu womahiadono nginino, ngohi tinihibehehongo la ngini niwiao irahai la ufa hiadono naga ma titi nginioka de una ai hawana ipuda. Angamoi unangoo wagorakoka Ma Jou ai karajaanga abe imaketero hoka ngohioli tokarajaanga.

¹¹ Ho ufa hiadono naga nginioka abe niwingelo unangika. Masara tanu kiani ngini niwiduhunu la ka idadi ai dodagi wohigila-gila de ai sanangi dika. Angamoi una ahao wogila-gilali ngohino, de ngohi nenangoka tadamaa una de nanga gogianongoru utu abe yomakiniiki yoiki nenangino.

¹² De naa abe ma titi nanga gianongoru o Apoloso, ngohi duru tihigaro la tato una waniiki nanga gogianongoru utu la ka idadi una woboa nginika de winitutumu. Masara to una ai hininga wato ko woikuahi ma oraha naa. Ma ika-ika de ahao una woboa winitutumu, iti abe ma oraha itaana.

¹³ De naa ngohi tinihigaro ngini mata-mataika la nimaakokigoana. De kiani nimahiputurungu nia ngongakuoka la ufa nikelu-kelu. De kiani ngini ninauru la hiadono nia domoroini naga.

¹⁴ Masara ngaro o kia dika ngini nidiai, ma iti gea nidiai o hininga de ma doraka.

¹⁵ De ahi gogianongoru, ngini niahioriki o Setefanusu abe ona o tau moi, ona gea duru yohira o Akaya ma propinsioka abe iwingaku nanga Baluhika. De niahiorikoo abe ona ma dihirainohi de duru yaleleani Ma Jou ai nyawaika.

¹⁶ Ho mangale ma titi gea hiadono tinihigaro tato ngini kiani niahingounu onangika gea. De ka onangua dika niahingounu, masara ngaro onagona dika naga abe onangoo duru yokarajaanga de iwileleani Ma Jouika hoka o Setefanusoli, ma, onangoo gea kiani niahingounu onangika.

¹⁷ De naa ngohi duru togarago ma titi ti ngini nia dodiawo yaruange gea abe nginioka de yoboa ngohino, abe ona gea o Setefanusu, de o Forotunatu, de o Akaiko. Ngohi togarago angamoi ngaro ngini ko iniwa ngohioka, ma ona yaruange gea naga yoboa ihitutumoka de ihiduhunoka ngohino hiadono ngohi tato ona yodadioka hoka ti ngini nia duruuru ngohino.

¹⁸ Abe ona yaruange gea yoboa de ngohi ihilaru ahi hiningaka abe imaketero hoka nginiokaoo ma dihira ti ngini nia hininga ona yalaruoka. Ho ngaro ona gea eko ngaro onagona dika abe manga hininga hoka yaruangeoli gea, ma onangika kiani ngini niahidoaka nia hayanga de nia horomati onangika.

O Paulusu ai tabea ma demo

¹⁹ De naa marai nanga gogianongoru o Yesusoka ko manga ngoe manga tabea ihidingoto nginika. Abe ona o gareja yanii-niiki o Asia ma propinsioka naa, ona ihidingoto manga tabea nginika o Korintusu ma garejaika. De o Akila de ngoi fekata o ngo Pirisikila de ona nanga gogianongoru utu mata-mata abe o Gareja ma wange ma getongo de yomatoomuino o Akila ai tauoka, ona mata-mata manga tabea ilamoko nanga Baluhoka ihidingoto nginika.

²⁰ De nanga gogianongoru mata-mata nenangoka o Efesusoka, onangoo ma manga tabea ihidingoto nginika. De ngini o Korintusoka, ma oraha nimatoomuino de ka idadi nimakobounu angamoi hokogea nia biaha nimahikamatoko ti ngini nia tabea o Kristusoka.

²¹ De naa ngohi ahi hurata tohibobaha de to ngohi ma hirete ahi giama. Abe hiadono ma oraha naa ahi gianongoru wohitulihuku ahi demo abe woihene to ngohi ahi uruino la idadioka ahi hurata nginika, masara naa de ahao ahi hurata tohibobaha de to ngohi ma hirete ahi giama. Ngohi o Paulusu.

²² Onagona dika ko iwidoraua nanga Baluhu idodutu o Yesusu Kristusu, ahao ona gea kiani Ma Jou wahikoboto de gea yamake manga hohowono ka hiado-adonika. Nanga Baluhu, duru tonihafini la Ngona nomataiti noboa!

²³ De naa tinigahoko ngini la nanga Baluhu idodutu o Yesusu ai owa winihikodoku nginika.

²⁴ De naa ngohioo ahi dora ngini mata-mataika tohidingoto, abe ngone o badanga moi o Yesusu Kristusoka.