1 Korintusu 15 - Ma Jou ai Demo-demo o Totobelohoka

O Kristusu ai momomiki ai honengino

¹ De naa, ahi gogianongoru, ngohi tato tinihihohininga ma titi o Abari ma Rorahai abe nengokadau tinihingahuoka nginika. De ma oraha gea ngini o Abari ma Rorahai gea niodafongoka de duru genangika nimahingutukoka de gea hiadono idadi ti ngini nia gogere.

² De o Abari ma Rorahai gea abe ma oraha naa naga iniduhunu nia howo-howonino, iti ngini nimahijojoika genangika abe nengokadau tinihingahuoka. Masara nako hoka nia ngongaku ma hidumutu gea ko itaanua, gea de ahao ko idadiua iniduhunu. Ho abeika nanga ngongaku ma hidumutu hatailakohi.

³ Angamoi nengokadau ngohi tinihikodokuoka nginika ma dodotoko abe ma titi o Yesusu Kristusu. De abe nako ma dodotoko eko ma hingahu mata-mataika, ma ka enangohi ikurutiye. De ma dodotoko gea ma dihira ngohioo tamake imaketero hoka nginioli niamake. De hokonaa ma dodotoko gea, itemo ato, “O Kristusu Una wohonenge ma titi to ngone nanga howono, de ai hohonenge gea idadi imaketero hoka ma dihira Ma Jou ai Demo-demoka ihitulihukuoka.

⁴ De Una wohonengoka de ahao iwilungunu, de ipaha ai wange hange de womomiki ai lungunino, de genangoli idadi hoka ma dihira Ma Jou ai Demo-demoka ihitulihukuoka.

⁵ Womomiki ipaha de Una womahimatoko o Peturusika, de ahao o Peturusu nagali yangimoi de yahinootoka de Una womahimatokoli iwinii-niikika abe yahiromanga yangimoi de yahinooto.”

⁶ Gea ipaha de ahao o Kristusu womahimatoko nanga gogianongoruika abe ona manga ngoe-ngoeikali, abe ona yaratuhu motoa yofoloi manga ngoe yomatoomuino ka ma moi, onangikali gea Una womahimatoko. De nanga gogianongoru gea utu marai yohonengoka, masara hatoli yowoe-woe hiadono o wange naa ona nagahi.

⁷ Gea ipaha de ahao Una o Yakobusikali womahimatoko, de ahao Una womahimatoko o hidingoto ma nyawa mata-mataikali.

^8-9 De duru ma bahaika Una womahimatokoli ngohino naa, abe ngohi ko timakeuahi ma oraha Una naga o dunia ma lokuoka. Ho ngohi de ona abe iwimake ma oraha Una nagahi o dunia ma lokuokahi, ngomi duru mimakohowono. Angamoi ma dihiraino abe ona gea iwiniikoka nanga Baluhika de iwileleani Unangika de ngohi Ma Jou ai nyawaika ka tahikokangelahi. Ho ngohi tato ngaro ufa dika de o nyawa ihiahoko ngohino ato, “Ma Jou ai hidingoto ma nyawa una.” Marai ma romanga gea itaana ahi gogianongoru utu abe iwimake nanga Baluhu ma oraha Una nagahi o dunia ma lokuokahi, masara nako ngohi ko ihihitaanua ngohino. De mangale ma titi ahi datoro ma dihira gea, ngohi tato nako ngohi de ona utu abe iwimake nanga Baluhu de Una wahidingoto ona la ai Abari ma Rorahai yahingahu-ngahu o nyawa utuika, ka ngohiohi duru ko kia-kiaua ihidaene, ho hiadono tomahiromanga tato toheluku. Angamoi ngohi ahi wowango ma dodihirakahi ka tomanoahi de Ma Jou ka wohigoraka la o wowango ma hungioli wohihidoaka ngohino. De gea tomahiketero tato ngohi ngade-ngade imaketero hoka o ngofaka ma gilau womatengoani abe ngoi meme ami pokorokahi de ka iwigoraka masara ai gahe ko adonuahi ho hiadono woheluku. Hokogea tomahiketero ngohi.

¹⁰ Masara ngaro ahi hininga hokogea, ma, Ma Jou duru wohihiowa ngohi naa ho hiadono todadioka Ma Jou ai hidingoto ma nyawa tomatengo. De to Una ai owa ngohino gea ko parahajaua masara duru de ma hofokoka ahi wowangoino, abe ngohi duru tokarajaanga la ai Abari ma Rorahai ihikabarihi o nyawa ko manga ngoe-ngoeika. De ngaro ngomi mata-mata abe imihiromanga Ma Jou ai hidingoto ma nyawa, ma ka ngohiohi tokarajaanga duru ikiria abe ahi tagongika. De masara gea ka ngohiua dika tokarajaanga, ma tanu de Ma Jou ai owa wohipake ngohino la hiadono Una wokarajaanga de ngohi wohipake.

¹¹ Ho ngaro ngohi eko ngaro Ma Jou ai hidingoto ma nyawa utu abe onangoo yoiki yahingahu-ngahu, ma ngomi gea mata-mata mia dumutu ka moi dika. Angamoi to ngomi mia hingahu gea ka imaketero dika, de ma hingahu gea o Abari ma Rorahai abe ngini naa niangakuoka enangika.

Ngone ahao homomiki nanga honengino

¹² Masara abeika nanga kangela naa. Ngomi miahingahu-ngahu abe o Kristusu, Una womomikoka ai lungunino. Masara naga yamuruono naga nginioka abe bari yotemo-temo ato nako hiadono o nyawa yohonengoka de duru ko idadiokaua yomomikoli manga honengino.

¹³ Gea done sarakia? Abe nako igoungu o nyawa ko yomomikua manga honengino, gea bote ma dihira de o Kristusoo Una ko womomikua. Masara abe igoungu Una womomikoka, ho ona gea hahiorikoka abe manga demo ko igoungua.

¹⁴ De nako hoka igoungu o Kristusu ko womomikua, gea to ngomi mia hingahu ka o ngeluku dika de ka parahaja dika. De gea ti ngini nia ngongakuoo duru ka parahaja dika.

¹⁵ De hongoli nako ona gea yagoungu, de gea ngomi naa mitobaelu-eluku dika Ma Jou ai himangoka, angamoi ma ngoeokau miahingahu-ngahu o nyawaika miato Ma Jou wihimomiki o Kristusu. De masara nako yohone-honenge ko yomomikua, gea de ahao bote Ma Jou o Kristusu ko wihimomikua. De gea to ngomi naa mia karajaanga de mia hingahu ma demo ka parahaja dika de hiadono duru miahowono Ma Jou ai himangoka.

¹⁶ Abe nako igoungu ona yohonengoka duru ko idadiua yomomiki, gea o Kristusoo ko womomikua.

¹⁷ De nako Una ko womomikua, gea ti ngini nia ngongakuoo duru ko iwa ma titi, de ngini ka nia howo-howonokahi dika nigogere!

¹⁸ De nagali ona abe iwingakuoka o Kristusika de ahao ika-ika yopahaka. Nako igoungu ona ko yomomikua, gea ona yahihanga ka hiado-adonika. Masara ngone hohioriki abe ona ahao yomomiki manga honengino, ho hohiorikoo abe ona gea ko yahihangua ka hiado-adonika.

¹⁹ Ho nako to ngone nanga nganganono ka ilaku nanga wowangoka naa dika masara nako naa de ko igila-gilakaua nanga himangika, gea hiokoo ngone naa. Abe nako ona yagoungu abe ona yohonengoka ko yomomikokauali, o dunia ma nyawa mata-mataika de ngone abe homangaku hato o Kristusika hingaku, ka ngoneohi duru homahiokoo angamoi gea nanga wowango haumoka.

²⁰ Masara ona gea ko yagoungua, angamoi o Kristusu Una gea duru igoungu womomikoka ai honengino. Ho gea itararonoka abe ona yohonengoka ahao ka idadi manga honengino yomomiki, angamoi o Kristusu Una womomikokau. De Una o Kristusu wodadioka hoka o momomiki ma domoro, abe Una duru wohira womomiki ai honengino de ko wohonengokaua. De nako o gota ma hofoko ma domoro, gea o himatoko moi abe ahao naga utuoli itoturuino ma hofoko ma ngoe-ngoe. De gea imaketero abe hoka o momomiki, abe Una gea o momomiki ma domoro. Abe wodadi o himatoko moi abe ahao naga utuoli yohonenge yowoe-woe yototuruino ahao yomomiki abe imaketero hoka Unangoli womomikoka.

²¹ De imaketero hoka o Adama ai datoro ma dodihiraka inadaene ngone mata-mataika hiadono ka hohonenge, naa o Kristusu ai datoro inahidoaka ngone hingaku-ngakuoka mata-mataika hiadono hamake o momomiki nanga honengino.

²² Abe mangale ma titi nanga gogao o Adamika hiadono ngone mata-mata hohonenge, masara mangale ma titi nanga gogao o Kristusika hiadono ngone hingaku-ngakuoka mata-mata ahao homomiki.

²³ De o momomiki gea naga atatoroka, abe gea ma domoro o Kristusu Una duru wohira womomiki. De ipaha de ma oraha Una woboali de ahao to Una ai nyawa mata-mata ahao yokokimomiki.

²⁴ Gea ipaha de ahao o dunia ma bobaha adonoka. Abe ma oraha gea ahao o Kristusu wohikoano mata-mataika de ai musu mata-mataika Ma Jou duru wohikala, abe ngaro o kia dika abe naga de ma kuahaka, de ngaro o popareta o kia dika, eko ngaro ena abe duru ikurutiye de ma kuahaka, ma, ai musu mata-mataika gea ahao wohikala Ma Jou. Wohikalaka de ahao mata-mataika abe o Kristusu wohikoano, gea to Una ai pareta ma amoko de ahao wihidoaka ai Baba Ma Jouika.

²⁵ Abe kiani o Kristusu wohikoano ka hiadono Ma Jou o Baba wohikala ai musu mata-mataika de wakelenga ai musu gea o Kristusu ai lou ma timiuku la ihitunguu abe duru yokalaka.

²⁶ De ai musu duru ma bahaika gea o hone-honenge, de enangoo ahao kiani wohikala.

²⁷ Angamoi naga ma dihira ihitulihukuoka Ma Jou ai Demo-demoka ato, “Ma Jou wihidoaka mata-mataika o Kristusika la idadi to Una dika ai kuahaka mata-mataika.” De hokogea itemo Ma Jou ai Demo-demoka. Masara abe ma titi mata-mataika wihidoaka, gea itararono ko ma titiua Ma Jouoo womahidoaka o Kristusika. Angamoi igoungu Ma Jou abe wihidoaka mata-mata o Kristusika la wato o Kristusu wahikoano mata-mata gea, masara nako Una ma hirete ko womahidoakua.

²⁸ De ma oraha ahao mata-mataika o Kristusu wahikoano, gea de ahao o Kristusoli woboa de womahidoaka Ma Jou ai himangoka, angamoi Ma Jou abe wihidoakoka mata-mata Unangika. Ho ma bahaika de o Kristusu womahitipokouku Ma Jou ai himangoka ka hiadono Ma Jou o Baba Una duru wahikoano mata-mataika. De ma oraha gea o nyawa ko yohonengokaua, de abe ma dihiraino ona yohone-honengoka ona mata-mata yokokimomikoka. De ahao gea duru itararono abe o Kristusu duru wohikalaka ai musu mata-mataika, abe gea ngaro o hone-honenge ma enangoo duru wohikalaka.

²⁹ De naa ma titi utuoli tinihidoaka nginika la duru nihioriki abe ahao o nyawa yomomiki manga honengino. De naa ngini nihioriki abe naga utu ngoneoka yomaohiki la ato yaturuuru manga dodiawo abe yohonengoka. Ho naa tinileha, nako hokogea manga hininga, gea ko yahitaanua abe ngaro ona ma hirete, ma, ona yonganono o momomikika? Angamoi nako o momomikika ko yomahinganonua, gea de ahao ko iwa ma titi de ma gogohiki gea ona yodiai.

³⁰ De abeika ngomioli naa abe o Abari ma Rorahai miatobahingahu-ngahu. Ngomioka naga ma titi moi dika hiadono ka idadi mia wowango ka ihikaika mimahidoaka, de gea mia nganganono o momomikika. Abe nako ko iwa mia nganganono o momomikika, marai ko hokogenangua midiai.

³¹ De ahi gogianongoru, duru tagou-goungu tomahingahu nginika abe o wange-wangeiye o hone-honenge tohimanga, de gea angamoi o Abari ma Rorahai tohingahu-ngahu. Abe imaketero hoka ahi hininga ma garago naga ma titi ti ngini o Korintusu ma kotaka nia gogao o Yesusu Kristusika. Ho ngaro ahi hininga ma garago abe ma titi ngini naga o Yesusoka, de ngaro ahi hingahu ma demo nginika abe o wange-wangeiye tohimanga o hone-honenge, masara ma hingahu hinootoino gea de duru tagou-goungu mata-mata.

³² Abe hoka nengokadau nenangoka o Efesusu ma kotaka de naga abe ihilawana ngohi hiadono ngade-ngade tobodito. Ho nako ko iwa nanga nganganono abe ahao homomiki, done ma titi o kia hiadono gea tohimanga de hiadono ngade-ngade tohonenge nenangoka? Abe nako hohihononga hohonenge, koaho haniiki o nyawa abe inahigaro ato, “Abeika ngone holomohi de hokerohi la homahisosanangi dika, angamoi boteua itebini de hohonenge.” De hokogea manga higaro ma demo abe ato inahirehene ma dorouika.

³³ Ho naa ngohi tinihitiari tato, “Ngini naa ufa hiadono inihirehene hokogea!” Angamoi naga o demo ma dulu moi inahitiari ato, “Nako hadodiawo onangika manga datoro itorou, ahao to ngoneoo nanga biaha idadioka ma dorou.” Hokogea inahitiari o demo ma dulu gea.

³⁴ Ho naa ngohi tinihitiarioli tato, “Ngini kiani nilioli ma totiaiika de ibootohi niahowono.” Angamoi nagahi nginioka inimuruono naga abe ko iwihiorikuahi abe Ma Jou Una gea ka idadi ai nyawa ahao wahimomiki manga honengino. De gea tinihiree-reeika dika la tato ngini tinihimaleke.

Nanga momomiki ma badanga ma rupa hokokia

³⁵ De masara bote naga o nyawa nginioka yoleha ato, “Done sarakia yohonengoka de yomomiki? De manga badanga ma rupa hokokia ahao yoboali angamoi ena gea ikorofuoka?”

³⁶ Nako yoleha hokogea, ngohi tato gea o bodo ma leleha. Angamoi abeika o gihiihi. Ma gihiihi abe dau ma tonakuku nadatomuku, gea kiani ihonengohi o tonaka ma goronaka ihira de ahao ka idadi iwango. Abe nako ma gihiihi ko ihonengua, gea ko idadiua iwangoiye.

³⁷ De ma gihiihi gea abe nadatomo, bote o pine eko o boteme ma gihiihi, gea ma rupa ko imaketeroua de ma datomo ma rupa abe ahao iwangoiye. Abe ka ma gihiihi dika ena gea abe nadatomo. Ho imaketero hoka ma gihiihi ma rupa abe ma tonakuku imanoa de to ena ma lifunu ma rupa abe iwangoiye gea imakohowonoka, hokogenangoo de nanga badanga, angamoi ngone o nyawa nanga badanga abe hapohuku ma tonakuku, gea ko imaketeroua de nanga momomiki ma badanga abe ahao ma tonakiye imomiki.

³⁸ Masara Ma Jou wahidoaka ma gihiihika gea ma lifunu ma rupa moi abe ma dihira waputuhokau, abe imakiniiki de to Una ai mau. Ho ma gihiihi ma rupa amomoiika wohidoaka to ena ma lifunu de imaketemomomoi mata-mata. Abe o pine ma lifunu ma rupa hokonaa, de o boteme ma lifunu ma rupa hokonaa, o fara moioli.

³⁹ De abeika Ma Jou ai dulaada mata-mata abe de ma roehoka. Enangoo ma imaketemomomoi ma roehe ma rupa. Abe ngone o nyawa to ngone nanga roehe ma rupa moi, de o aewani ma roehe ma rupa moioli, de o totaleo ma roehe enangoo ma rupa o fara moioli, de ngaro o nawoko ma to ena ma roehe ma rupa o fara moi. Ho imakokohowono mata-mata o roehe ma rupa gea.

⁴⁰ De nagali gea abe Ma Jou wakelenga daku ma dihangoka, abe o wange, o mede, de o muru-murumu. Abeika nako ngone hohidotelega ma dararono abe gea daku ma dihangoka mata-mata de gea abe naga nenanguku o duniauku. Nako hokogea hohidotelega, hatoli gea daku ma dihangokahi duru de ma dararonoka de ihohailoa. Ho gea ma dararono de ma hohailoa imakohowono de gea abe naga dau o duniaka naa.

⁴¹ De ngaro o wange ma dararono de o mede ma dararono, ma, enangoo imakohowono. Eko hohidotelega ma mede ma dararono de ma muru-murumu ma dararono, ma enangoo imakohowono. De ngaro o murumu moi hohidotelega de o murumu moioli, ma, ma murumu mata-mata imaketemomomoi to ena ma dararono de ma hohailoaoo.

⁴² De imaketero hoka ma rupa mata-mata gea imakokohowono eko ma dararono de ma hailoa imaketemomomoi, hokogea de o momomiki. Abe to ngone nanga badanga ma oraha naa naga duru imakohowono de duru o fara moi de to ngone nanga badanga abe ahao Ma Jou wonahidoaka ma oraha abe wonahimomiki. Angamoi naa nanga badanga ka ihonenge ka hiadono ikorofu. Masara ahao ma oraha Una wonahimomiki de nanga badanga gea duru ko ihonengokaua ka hiado-adonika.

⁴³ De ma oraha o nyawa manga honenge hapohuku, gea manga honenge haetongo hato ko irahaiokaua. Masara ahao ma oraha wonahimomiki Ma Jou de nanga badanga ma hungioli gea duru ihailoa. De nako ma oraha o nyawa manga honenge halungunu de manga badanga gea duru ilolamaanoka de ko iwaka ma buturungu. Masara ahao ka de Ma Jou wonahimomikoli ngone de nanga buturungu ma oraha gea duru ikokiputurungoka.

⁴⁴ De nako ma oraha hapohuku, gea manga badanga abe ihititi o duniaka dika hapohuku, masara ahao ma oraha gea de nanga badanga abe wonahimomiki, gea ihititi duru Ma Jou o Womahoka. Abe mangale naga ma badanga abe ihititi o duniaka, gea hohiorikoka nagaoo ma badanga abe ihititi Ma Jou o Womahoka.

⁴⁵ De naga ihitulihukuoka Ma Jou ai Demo-demoka itemo ato, “O nyawa duru wohira-hira o Adama, una Ma Jou wihidadi de wihiwango la hiadono wowango o Adama.” De masara o Kristusu, Una gea tihiromanga tato Una o Adama ma duru. De Una gea o nyawa utuika ka idadi wahiwango, ho Una wodadioka o wowango ma ngango ma titi.

⁴⁶ De masara o wowango ma ngango ma titi gea, Una ko wohiraua woboa o duniaino naa. Masara o Adama, una gea wohira o dunia ma lokuoka. Ho una abe ai wowango ihititi o duniaka, una gea wohira, de ahao Una abe o wowango ma ngango ma titi Una gea woturuino de wituruuru wohira-hira gea.

⁴⁷ De una wohira gea, una o dunia ma tonakino Ma Jou wihidadi, ho una duru o dunia ma nyawa. Masara Una abe woturuino, o Kristusu, Una gea o Horogaka de wauku woboa.

⁴⁸ De ngone o nyawa mata-mataika nanga badanga ka imaketero dika hoka to Adama ai badangoli abe o dunia ma tonakino wodadi. De masara ngone onagona dika abe ahao hohapongo daku o Horogaiye, gea ahao to ngone nanga badanga ma oraha gea ka imaketero hoka to Kristusu ai badangoli. Abe Una gea o Horogaka de wauku woboa.

⁴⁹ De imaketero hoka ma dodihirainohi ngone naa homahinoa-noa o dunia ma nyawa ma rupa, masara naga Ma Jou ai hidee wato ahao wonahinoaukuoli ngoneuku de o Horoga ma nyawa manga rupa.

⁵⁰ Ho ahi gogianongoru, naa ngohi tinihingahu moi nginika. To ngone nanga badanga naa abe ma dola nanga roehe de nanga awunu, gea ko idadiua ihapongo daku Ma Jou ai ngi o Horogaiye. Angamoi nanga badanga naa ahao ihonenge de ikorofu, ho ko itiaiua gea ma badanga imakasapuru de daku abe ko ihone-honengua.

⁵¹ Masara abeika, naa o dogogono moi tinihingahu nginika abe hokokia ka idadi hohapongo dakuiye. Abe ngone hingaku-ngakuoka, ko ngone mata-mataikaua hohonenge, masara nako to ngone nanga badanga, gea mata-mataika ahao waturuuru.

⁵² De gea duru itaiti nanga badanga waturuuru, abe imaketero hoka ma oraha nanga lako hatawi ma moi dika de ka aiaho. De gea idadi ahao ma oraha Ma Jou ai guguli awuwu abe gea duru ihibobaha awuwu. Abe ka de ma guguli gea awuwu de abe ona iwingaku-ngakuoka masara ona gea yohonengoka, ona gea yohira Ma Jou wahimomiki manga honengino. De ma oraha gea manga badanga waturuuru de o badanga moioli gea abe ko ihone-honengokaua. De abe ngone ka howangohi, ngoneoo ma nanga badanga Ma Jou waturuuru. Ho ngone mata-mataika hingaku-ngakuoka, ngaro hohonengoka eko ngaro ka howangohi, ma, ngone nanga badanga mata-mataika ahao Ma Jou wakokituruuru ma oraha gea.

⁵³ Angamoi to ngone nanga badanga naa abe ihonenge de ikorofu, gea kiani aturuuru de o badanga moioli abe duru ko idadiua ikorofu de ko ihone-honengokaua ka hiado-adonika.

⁵⁴ De ahao ma oraha nanga badanga mata-mataika waturuuruoka de o badanga ko ihone-honengua gea, ma oraha gea de ahao duru itaanoka Ma Jou ai Demo-demo abe ma dihira ihitulihukuoka. Ai Demo-demo gea itemo ato, “O hone-honenge duru ibinaahaka, abe Ma Jou wohikalaka duru waboo-bootokau.”

⁵⁵ De moioli ai Demo-demoino naga abe hoka o nyawa yahohedu o hone-honengika ato, “Abeika, ngona o hone-honenge, done o kia ho ngona nato nolaku? De done o kiaka ani buturungu la ka idadi nomigoli ngomino hiadono imibiha de ka hiadono mihonenge?” Hokogea itemo Ma Jou ai Demo-demoka de gea duru itaana. Angamoi ahao ma oraha ngone hamakeoka nanga badanga ko ihone-honengokaua gea de duru itaana Ma Jou ai Demo-demoka abe itemo ato o hone-honenge gea duru ibinaahaka.

⁵⁶ Abe igoungu o hone-honenge ma biha gea o howono. De nagali Ma Jou ai Pareta ngoneino abe mangale ma titi ai Pareta gea hiadono hohioriki hokokia ma ngoe hatilakuru ai mau de hahowono Unangika.

⁵⁷ Masara ngaro hokogea, ma ngone ka idadi hotarimakase Ma Jouiye, angamoi Una wohibinaahakau o howonoo de o hone-honengoo la ngone ka ihikaika holaku Unangoka. De gea o howono de o hone-honenge ka idadi wohikala ma titi to ngone nanga Baluhu idodutu o Yesusu Kristusu.

⁵⁸ Ho, ahi gogianongoru abe duru tinidora, mangale ma titi ngone holaku nanga Baluhoka de duru honganono ahao nanga momomiki hamakeoka, gea hiadono naa ngohi tinihigaro. Ngohi tinihigaro tato ngini kiani nimahingutukuku nia ngongakuoka la hiadono genangoka duru ko nilage-lageua. De kiani ka ihikaika nianiiki nanga Baluhu ai karajaanga abe winihitagongoka nginika. Abe ngini nihioriki nia karajaanga gea ko parahajaua angamoi nanga Baluhoka de aino iboa ma karajaanga gea. De nihiorikoo abe nia momomiki ma nganganono, gea o nganganono moi duru ma gou-goungu. Hokogea ahi higaro ma demo nginika.