1 Korintusu 14 - Ma Jou ai Demo-demo o Totobelohoka

Hohidotelega o hiakunu hinooto gea

¹ Ho ngini kiani duru nimaribuutu la hiadono o dora inihipareta nia wowangoka, angamoi ka o dorahi duru ikurutiye. De naa abe ma titi ma hiakunu abe iboa Ma Jouoka de aino, ngohi tato irahai ngini niohafini la ahao niamake ma hiakunu gea, masara hongoli ma hiakunu moi gea abe inilufungu de to Una ai kuaha la hiadono Una ka wobawilika winihingahu nginika ai hingahu ma demo abe woigo wato ngini ahao niadofanga nia gogianongoru utuikali ai hingahu ma demo gea. Ma hiakunu moi gea duru toigo la ngini niohafini enangika la ahao niamake.

² Masara abe naa ma hiakunu moioli, ma hiakunu naa ikuranga tinihigaro la genangika niohafini la ahao niamake. Abe nako naga yomatengoani de manga hiakunu moioli gea abe ka yakunu yotemo-temo de o demo moioli. Abe gea ena ma demo yapake la iwihigiriiri Unangika, masara o nyawa ko idadiua yataoko ma titi genangino. Ho gea ona yotemo, ma manga gogianongoru ko yataokua ma titi manga demoino, ho ka Ma Jou dika wohioriki. De gea igoungu ona yapake Ma Jou o Womaha ai kuaha la ka idadi o dogogono ihidemo, masara o nyawa ko moiua la ka idadi yataoko ma titi genangino.

³ De masara nako yomatengoli yapake manga hiakunu abe yalufungu de ai kuaha hiadono ka idadi yahingahu o nyawa utuika Ma Jou ai hingahu ma demo, gea de ahao ona yaduhunu manga gogianongoruika manga ngongaku. Abe mangale ma titi manga hiakunu gea yapake la ka idadi yahiputurungu de yahilaru onangika manga gogianongoruika.

⁴ Masara onagona dika yotemo-temo de o demo moioli gea abe ma titi o nyawa ko yataokua, gea ona yomahiputurungu ka ona ma hirete dika. Masara onagona dika Ma Jou ai hingahu ma demo yodafongo abe ma titi yalufungu de to Una ai kuaha la ai demo gea ka idadi yadofanga manga gogianongoruika, gea ona yahiputurungu Ma Jou ai garejaika.

⁵ De ngohi tanu toigo la ngini mata-mata ka niakunu nitemo-temo de o demo abe o nyawa ko idadiua ma titi yataoko la ena gea ma demo ka idadi niwihigiriiri Unangika de ena gea. Masara utuohi ngohi toigo la nako ngini mata-mata ka niakunu inikokilufungu de ai kuaha la ka idadi Ma Jou ai hingahu ma demo niahingahu nia gogianongoruika. Abe nako ma hiakunu hinooto naa ena hohidotelega, ka moiohi abe duru inaduhunu Ma Jou ai garejaika, de gea abe Ma Jou ai hingahu ma demo ka wobawilika wonahingahu nanga hiningaika la gea ka idadi hahingahu nanga gogianongoruika, ka enangohi inaduhunu ngone o garejaka, angamoi gea ai hingahu ma demo ka hakunu hohidemo nanga gogianongoruika. De tohikohowono ma hiakunu gea mangale ma titi ma oraha ona yotemo-temo de o demo moioli gea de ona ko yakunua yaturuuru ma demo gea abe ahao ipaata manga uruino. Ma nako hoka naga o nyawa utu abe ka idadi yaturuuru ma demo gea de hiadono o nyawa o garejaka ma titi yataoko de yaduhunu manga ngongakuoka, gea de ahao ka idadi haetongo hato ma hiakunu hinooto gea hatoli imaketero ma duduhunu hamake genangino. De masara nako ko moiua la ka idadi yaturuuru ma demo, gea de ahao ka ona dika yotemo-temo abe yamake ma utumu genangino. Ho nako yomatengoani abe naga manga hiakunu la yalufungu de Ma Jou ai kuaha de hiadono yodafongo Ma Jou ai hingahu ma demo de ahao onangoli ihidemoli manga gogianongoruika, de gea onangohi yokurutiye. Angamoi to onangohi manga hiakunu ma duduhunu o garejaika hatoli ilamoko.

⁶ De ahi gogianongoru, abeika naa tinileha. Nako ngohi toboa nginino de tapake ahi hiakunu Ma Jou o Womahoka de aino la totemo-temo de o demo moioli gea abe o nyawa ko yataokua ma titi, gea done sarakia ma utumu niamake ngohino? Masara nako toboa de tinidotoko nginika, gea de ahao ma utumu ka niamake ngohino. Abe bote naga o hingahu ma demo moi Ma Jouoka de aino abe ngohi ihilufungu de to Una ai kuaha la wohihimatoko de gea tinidotoko, eko o tobahioriki moi tinihikodoku nginika, eko iti o dodotoko abe inihiputurungu ti ngini nia ngongaku. Gea de ahao ngone mata-mata haborimake ma utumu ahi hiakunino, de gea ka ngohiua dika tamake.

⁷ Abeika tohiketero. Nako o hitar la yokuti eko o arababu yoluiti de ma ilingi ka ihihohomoa dika, done sarakia o nyawa yoihe-ihene ihioriki gea o lagu o kia? Ko idadiua!

⁸ Eko de o guguli. Abeika, nako ma guguli yowuwu de ko itiaiua ma ilingi, ka onagona ahao yomahidiai la yosobo yoparangi? Ko moiua!

⁹ De gea imaketero hoka nginioli. Ti ngini nia demo abe ipaata nia akiroka de aino kiani itararono ma ilingi. Ma nako ko itararonua, gea o nyawa ko idadiua yataoko ma titi genangino, de gea imaketero hoka nitemo-temo nihihohomoa dika.

¹⁰ De igoungu, naga o nyawa manga demo duru ma ngoe o duniaka naa, de o demo naga muruono ko taetongua, masara ma demo amomoi de ma titioka homoi-homoi. O demo ko moiua abe ko iwa ma titi.

¹¹ Masara abeika nako ngohi ko tohiorikua ahi dodiawo ai demo, gea ngohi hoka todadioka o homoa ma nyawa unangika de unangoli hoka o homoa ma nyawahi ngohino. Mimaketeliliara angamoi ko mimaketemangaratiiua mia demo ma titi.

¹² De duru ena gea abe idadi nginioka, abe ngini utu nitemo-temo de ma demo moioli de ngini ko moiua de utu niataoko ma titi. De ngohi tinihioriki abe ngini duru niohafini ma hiakunu abe ka Ma Jou o Womahokahi de aino la niato ahao niamake, de gea irahai. Masara kalioli niohafini ma hiakunika gea abe ka niakunu nitemo-temo de o demo moioli, masara koaho ma hiakunu abe ma garejaika yaduhunu de yahiputurungu, ho koaho ma hiakunu ka genangohi duru niohafini la ahao niamake.

¹³ De onagona dika nginioka naga de nia hiakunoka la nitemo-temo de o demo gea abe o nyawa ko idadiua yataoko ma titi genangino, koaho ngini nimagahoko Ma Jouino la winihidogo ma hiakunu moioli, abe ma hiakunu gea la ka idadi ngini ma hirete nihioriki nia demo moioli gea ma titi de hiadono ka idadi niahitararonoo o demo ma titi gea nia gogianongoruikali.

¹⁴ Abe nako hoka ngohi tomaniata de o demo moioli gea abe o nyawa ko idadiua yataoko, gea to ngohi ahi nyawa dika imaniata masara nako ahi hininga gea ko imakiniikua angamoi ngaro ngohioo ma, ma titi ko tohiorikua ma demo moioli gea.

¹⁵ Ho kiani hokokia todiai? Ngohi igoungu kiani tomaniata de to ngohi ahi nyawa. Masara ngohi tato koaho tomaniata de ahi hiningaoo, la ufa ka to ngohi dika ahi nyawa. De hokogenangoli abe tonyanyi. Nako tonyanyi de tihigiriiri Ma Jouiye, gea igoungu to ngohi ahi nyawa tapake. Masara kiani ahi nyawaoo de ahi hiningaoo tapake, la ufa ka to ngohi ahi nyawa dika tapake.

¹⁶ Angamoi abeika nako ngini nimatoomuino o Gareja ma wangeoka de moi naga nginioka wininiata la nitarimakase Ma Jouiye. Nako nimaniata de nia nyawa dika abe ma demo moioli gea niapake, done sarakia de o nyawa biaha yototoihene genangoka ihioriki abe ma oraha nia demo nihibobaha la onangoo ka idadi yopaluhu ato “Amin”? Angamoi ona duru ko ihiorikua ti ngini nia demo moioli gea.

¹⁷ Ho ngaro bote nia niniata gea Ma Jouika duru irahai masara o nyawa gea ko yamakeua ma utumu nia niniatino de ma duduhunu onangikaoo duru ko iwa. Ho nako nioigo nitemo-temo de o demo moioli gea abe ai hiakunoka de aino, ho koaho ngini nimagahoko Ma Jouino la winihidogo ma hiakunu moioli, abe ma hiakunu gea la ka idadi ngini ma hirete nihioriki nia demo moioli gea ma titi de hiadono ka idadi niahitararonoo o demo ma titi gea nia gogianongoruikali.

¹⁸ De nako ngohi de ngini mata-mata, ma ka ngohiohi duru iwoe tapake ahi hiakunu hiadono ngohi ka idadi totemo-temo de o demo moioli gea, ho ufa niataoko niato ngohi tongelo Ma Jou ai hiakunika gea. Masara tanu ngohi duru totarimakase ahi Jouiye ma titi gea ahi hiakunu.

¹⁹ Ma masara nako o garejaka homatoomuino, gea ka idadi tomangiriki o demo o kia totemo, abe o demo o nyawa yotoihene de ka yakunu yataoko ma titi, ekola ma demo moioli gea abe ko idadiua ma titi yataoko. De naa tinihingahu abe nako ngohi ahao tomangiriki koaho ka ena dika abe o betongo motoa dika tohidemo la ma demo gea abe ahi gogianongoru ka idadi yapoa yataoko ma titi genangino. De ngaro ngohi ka takunu o demo ma betongo duru isana totemo de o demo moioli gea, masara ena gea ka tomatongohono dika la ma demo gea ngohi ngaro ufa de tapake. Angamoi koaho totemo de o demo ma betongo motoa dika la de to ona manga demo tapake la ka idadi ona yataoko ahi dodotoko ma demo onangika.

²⁰ Ahi gogianongoru, naa tinihigaro nginika la doka nia kokihiningaka de kiani niaturuuru nia hininga abe ma titi nia hiakunu naa ena. Abe ma oraha naa naga nia hiningaka hatoli nimaketero hoka o ngofa-ngofakohi manga hininga. De nako o dorouika, gea irahai nako nia hininga imaketero hoka o ngofaka ma gilauohi manga hininga, angamoi ko iwahi manga hafini ma dorouika. Ho gea irahai nako nimaaduru hoka onangoli manga hininga. Masara abe nako ko o dorouua, gea duru toigo tato kiani nia hiningaoo ikokibaluhoka genangika, la gea ka idadi niakunu niataoko itiai ahi dodotoko de ahi hitararono nginika abe ma titi Ma Jou ai hiakunu wonahidoa-doaka ngoneino.

²¹ De abeika Ma Jou ai Demo-demo abe ma dodihiraka ihitulihukuoka. Gea Ma Jou wotemo hokonaa, wato, “Ahao o wange moiuku de Ngohi o homoa ma nyawa manga uru tapake la totemo to Ngohi ahi nyawaika naa, de gea ahi nyawa Ngohi tahitiari onangika de o demo moioli abe o homoa ma nyawa gea manga demo. Masara ngaro hokogea tahitiari ma, ahi nyawa naa ahao ko ihihigihenua Ngohino.” Hokogea itemo Ma Jou ai Demo-demoka.

²² Ho ngaro ma dodihiraino ma Ma Jou ai Demo-demo inahitararono abe ma titi ma hiakunu ena gea abe o demo moioli yakunu yotemo-temo masara o nyawa ko yataokua ma titi. Abe ena gea igoungu o dodunguu moi Ma Jouoka de aino. De ngaro ngini niato bote gea o dodunguu moi abe ka idadi niapake nia doomu ma goronaka, masara tanu hokogenangua ma hidumutu. Abe ma dodunguu gea ma hidumutu ko ngoneinoua abe hingakuoka, masara ma hidumutu onangika abe ko iwihigihenua de ko iwingakuahi Ma Jouika. Masara ma hiakunu moioli naga abe igoungu ma hidumutu ngoneino abe hingaku-ngakuoka. Abe gea ma hiakunu la hiadono ka idadi yomatengoani yalufungu de ai kuaha hiadono Ma Jou wahidoaka onangika ai hingahu ma demo moi, la ahao onangoli yahingahuoli manga gogianongoruika. De enangoo gea igoungu o dodunguu Ma Jouoka de aino, masara ma hidumutu ko onangikaua abe nako ko iwingakuahi Ma Jou. Masara ena gea ma dodunguu abe ka idadi ngone hingaku-ngakuoka hapake nanga doomu ma goronaka.

²³ Ho, abeika, nako o Gareja ma wangeoka de ngini mata-mata nimatoomuinoka de nikokitemo-temo ka ma moi de masara nia demo imaketemomomoi abe nia demo moioli gea, done sarakia? Abe nako naga yamuruono naga yoboa yogareja masara ona ko abiahauahi de o gareja gea, eko naga utuoli o gareja ma nyawa masara ko iwa manga tobahioriki ma titi ma hiakunu gea Ma Jouoka de aino, de ona yowohamino ma garejaino, ona gea ka de yoihene nia demo mata-mata abe imaketemomomoi gea de bote yotemo ato, “Adoo, o nyawa nenangoka mata-mata de duru marai yakokitogohangoka!” Marai hokogea manga demo. De gea itaana abe ma hiakunu gea ho koaho ngaro ufa de hapake nanga doomu ma goronaka.

²⁴ Masara abeika nako ngini mata-mata o garejaka de ma demo moioli gea ko niapakeua. Masara koaho ngini mata-mata niapake ma hiakunu gea abe inilufungu de ai kuaha la Ma Jou ai hingahu ma demo niodafongo Unangoka de ahao ai hingahu ma demo gea nginioli nihidemoli nia gogianongoruikali. Nako hokogea nidiai de naga yowohamino o nyawa ko iwingakuahi Ma Jouika eko o nyawa ma hungi yoboaino nia gareja ma doomuino, gea de ahao o nyawa gea ka idadi yataoko ma titi ti ngini nia demoino de ka yoihene Ma Jou ai hingahu ma demo onangika. De ona abe yokokiboaino manga howono Ma Jouika yahitaana to Una ai hingahu ma demoino.

²⁵ De angamoi to ona manga howono Ma Jou wahimatoko onangika ti ngini nia kokiuruino, ahao ona gea yomamotumuku de iwihigiriiri Ma Jouika, ato, “Duru igoungu Ma Jou naga ti ngini nia hidogoronaka naa.” De hokogea itaana abe ma hiakunu gea itiai ngone hapake nanga doomu ma goronaka.

O hiakunu ma hiaturu o garejaka

²⁶ Ahi gogianongoru, abeika ngohi tohidotoomuino ahi dodotoko ma titi ka ma moi. Abe ngini ma getongo nimatoomuino la niwihigiriiri nanga Baluhu idodutu de ngini homoi-homoi ka idadi nihiboa nia hiakunu ma hofokino moi. Abe nginioka bote yomatengoani ato yonyanyi o higiriiri ma nyanyianga moi, de yomatengoli naga o dodotoko ihiboa, de yomatengoli bote Ma Jou ai hingahu ma demo moi yodafongo abe Una ka wobawilika wahingahu ai demo gea manga hiningaika. De bote yomatengoli nginioka ato yotemo de o demo o fara moioli, de yomatengoli naga abe ma demo gea yatobatao-taoko ma titi la hiadono manga dodiawo manga demo gea ka yakunu yahitararono ngini mata-mataika abe nimatoomuino genangoka. Masara abe mata-mata naa ena, iti ti ngini nia demo mata-mata nitemo la niato inihikokiputurungu de inihikokigaro ngini mata-mata ma totiaiika, angamoi tanu hokogea nia demo ma hidumutu. Hokogea o doomu ma hiaturu.

²⁷ De nako naga nginioka o nyawa ato yotemo de o demo o fara moioli, ka idadi yomatengo eko yahinooto yotemo, ma duga-duga ka yaruange dika. De ufa ona gea yotemo ka ma moiiye. Kiani yomatengo-tengo yotemo. De kiani naga yomatengoli de manga hiakunoka la ma titi ka yataoko manga demoino gea de yakunu yahitararono ngini niwoe-woeika.

²⁸ De masara nako nia doomuoka ko moiua abe ona yapoa ihioriki yataoko ma titi manga demo o fara moioli gea, gea de ahao ko idadiua o nyawa yotemo de o demo o fara moi nia doomuoka. Koaho una gea abe de ai hiakunoka, koaho una wodamaa hiadono ka unangokahi dika, de ahao ka idadi wotemo de o demo o fara moioli gea Ma Jouika.

²⁹ De ma getongo abe nimatoomuino nia doomuoka de ona abe o hingahu ma demo moi yodafongoka Ma Jouino abe ma titi yalufungu de to Una ai kuaha, onangoo ka idadi yahinooto eko yaruange dika ihidemo Ma Jou ai hingahu ma demo gea. De ngini utu kiani nitotoihene de duru niatailako to ona manga demo nako igoungu eko koua.

³⁰ De nako hiadono yomatengo yodotoko manga gogiriaka de ka itodokanino de Ma Jou ka wobawilika wahingahu ai hininga abe naga yomatengoika yogogeruku nia doomuoka, gea de ahao ona yodoto-dotoko manga gogiriaka gea kiani yomatogumohi de yomariidohi de yahigunoa la manga dodiawo inihingahu hokokia dika ahao gea yamake Ma Jou ai hiningaka de aino.

³¹ Angamoi ngini mata-mata abe niamakeoka Ma Jou ai hininga moi de niato niahikodokuoli nia gogianongoruika, gea ngini ka idadi nimahikokaaini la hiadono nia oraha homoi-homoi naga abe nimakokawalimi. Abe ma titi nimatengo niahingahu ibooto de ahao nimatengoli. Koaho hokogea nimahiaturu la hiadono ngini mata-mata nimadotoko manga hingahuino gea de ngini mata-mata ma buturungu de ma lalaru niakokimake manga hingahuino gea.

³² Angamoi onagona dika abe o hingahu ma demo yatobamake Ma Jouoka de aino abe ona yalufungu de ai kuaha de Una wahidoaka manga hiningaika ai hingahu ma demo, ona gea kiani yomatongohono hiadono to ona manga oraha naga de ahao ona ka idadi ihidemo manga gogianongoruika.

³³ Angamoi ko Ma Jou ai mauua la hiadono to Una ai nyawa yomaketeloliliara, masara to Una ai mau la mata-mata itatoro itiai de iriidi. Hokonaa ma hiaturu abe ilaku Ma Jou ai gogareja mata-mataika.

³⁴ Abe nginioka kiani nia ngo-ngofeka yomariidi dika abe ma oraha nimatoomuino o garejaka. Angamoi genangoka duru ko idadiua ona yotemo-temo, ma koaho naga manga hingounu abe imaketero hoka ma pareta inahingahuokau.

³⁵ De nako o garejaka naga nimatoomuino de nia ngo-ngofeka ato yoleha ma titi ma dodotokino gea, kiani yomatongohonohi hiadono nikokilio nia tau homoi-homoiika. Manga tauoka de ahao ka idadi mileha ami rokatika abe ma titi ma dodotoko la gea ka idadi momadotoko genangino. Kiani hokogea nimahiaturu angamoi nako de ma oraha o garejaka nimatoomuino de naga bote momatengoani moleha, gea o himaleke mohiboa ngini mata-mataika.

³⁶ Ho naa ngohi tinihitiari la tato ufa ngini nianiiki ka ti ngini ma hirete nia hininga dika abe ma titi nia garejaka ma hiaturu. Angamoi abeika naa moi tinileha, mode Ma Jou ai Demo-demo imulaenge nginioka de ahao ihikabarihi o ngi-ngi utuikali? Koua! Eko mode ka ngini dika abe niamake to Una ai demo-demo gea? Marai ka nginiua niamake! Mangale ma titi hokogenangua idadi, ho naa ngohi tinihigaro tato ufa ti ngini ma hirete dika nia hininga nianiiki, masara abe nimatoomuino o garejaka de koaho nginioo nianiiki o gareja ma hiaturu abe imaketero hoka nia gogianongoru o gogareja utuokali yaniiki.

³⁷ De nako naga nginioka onagona dika nimahingahu niato Ma Jou ai hingahu ma demo niatobamake Unangoka de aino, ngini kiani nihigihene ngohi ahi demoino naa. De ngaro ngini utuoli abe naga ma hiakunu utu Ma Jou o Womahoka de aino, ma gea kiani nginioo nihimoteke de ahi demo abe naa totulihoka nginika. Angamoi abe totulihoka nginika, gea duru nanga Baluhu idodutu ai behehongo nginika.

³⁸ Masara nginioka onagona dika abe nanga Baluhu ai behehongo gea de ko yamagaweua ho hiadono ko yolegaikaua enangika, onangoli gea ngini ngaro ufa dika de niangaku onangika.

³⁹ Ho, ahi gogianongoru, naa ahi demo nginika tohituli-tulihuku naa mata-mata de tohidotoomuino ka ma moi. Koaho ngini duru nioigo la niamake ma hiakunu Ma Jouoka de aino la ka idadi inilufungu de Ma Jou ai kuaha la hiadono ai hingahu ma demo niahingahu nia gogianongoruika. De abe ona de manga hiakunoka la ka idadi o demo o fara moioli yotemo-temo, ona gea niahigunoa dika la yotemo-temo de ma demoino gea, ma iti abe yaniiki ma hiaturu abe naa tinihidoakoka.

⁴⁰ Masara iti ma oraha ngini nimatoomuino o garejaka de o kia dika mata-mata abe nidiai, gea iti itatoro itiai la hiadono iriidi.