1 Korintusu 13 - Ma Jou ai Demo-demo o Totobelohoka

¹ Ahi gogianongoru, naa tinihingahu tato ngaro mata-mataika ma ka o dorahi duru ikurutiye. Abeika naa ngohi tomahiketero. Nako ngohi Ma Jou wohihiakunu la hiadono ka takunu totemo-temo o demo mata-mata, abe ngaro o nyawa onagona dika manga demo eko ngaro hiadono o malaekata manga demo, ma ngohi ka tadadi totemo-temo de manga demo mata-mataika gea. Ma ngaro hokogea ahi hiakunu, masara ahi dora o nyawaika ko iwa, gea ahi demo duga-duga hoka o damunu ma gigoro eko ma gogereenge ma ilingi dika, abe ko iwa ma titi.

² De ngaro ngohi ihilufungu de to Una ai kuaha hiadono ka idadi tahingahu o nyawaika Ma Jou ai hingahu ma demo, eko ngaro Ma Jou ai dogogono mata-mata ngohi tohiorikoka, de ngaro hiadono o tobahioriki mata-mata nagau ngohioka, ma nako o dora ko iwa ngohioka, gea ahi hiakunu mata-mata duru parahaja dika. Eko nako ngohi duru de ahi ngongakuoka hiadono o loku moi tahuloko enangika de ma loku gea imaturuuru o ngi moiikali. Ma nako ngohioka o dora ko iwa, ngaro ahi ngongaku hokogea ma amoko, ma, ngohi naa ko kia-kiaua.

³ De ngaro ngohi ahi kiahonanga ka ma moi tahidotodoakoka o nyawaika la tato manga perelu tahidailako. Eko nako hiadono ngohi ahi badanga tomahidoaka o nyawaika la ihitufuku ka hiadono ihihohonenge, de ngaro hokogea ma ngohi ko tiporetua ahi Baluhu. Masara ngohi tato ngaro hokokia dika ahi hiakunu eko ahi hidoaka, ma duru ko iwa ahi utumu Ma Jouoka de aino nako o dora ko iwa ngohioka.

⁴ De naa ngohi tinihitararono nginika o dora ma hofoko o nyawa manga wowangoka. Abe nako o nyawa de manga doraka, ona ngaro o kangela yaohana ma ka yomatongohono de manga hininga ma rahai. De ona gea yaabole-bole o nyawa utuika mangale ma titi o dora naga onangoka. De mangale ona de manga doraka ho hiadono o nyawaika ko yataleanua, de ko yomahigiriiriua, de ko yomasadeua.

⁵ De ona gea manga datoroka ko itoroua, de ona manga hininga ko to onangua dika manga perelu yongano-nganono, masara ona yoigo o nyawa utu manga perelu yaduhunu. De ona abe de manga doraka ko itaitua yongamo, de nako o nyawa yahowono onangika, gea ka yanoaika dika de hiadono ko yohohiningakaua manga howono gea.

⁶ De nako ma dorou naga, gea ona ko yosanangiua enangika, ma ka idadi ona duru yodogarago ma gou-goungika dika.

⁷ De abe o nyawa de manga doraka, ona ngaro hokokia dika o nyawa yahikangela onangika ma, ko yomahibalahua. Abe ngaro moi hokokia dika ma manga ngongaku nagahi, de ka yomahinganonohi Ma Jouika, de manga dongohono ko ihihangua ngaro hokokia dika naga iboa. Hokogea o dora ma hofoko.

⁸ O dora gea duru ko iwa ma batingi ka hiado-adonika. Masara abe ma hiakunu hange naa, hokogenangua, angamoi gea mata-mata de ma batingoka. Abe hoka o nyawa manga hiakunu la yalufungu de to Una ai kuaha hiadono ka idadi yahingahu o nyawa utuika Ma Jou ai hingahu ma demo. Abe ma hiakunu gea ahao naga ma batingi. De naga o nyawa utuoli de manga hiakunoka la ka yosawaro yotemo-temo o nyawa manga demo ngaro ma demo gea ko yomadotokuahi, masara enangoo de ma batingoka abe ika-ika de ahao itogumoka ma hiakunu gea. De nagali utu abe naga manga hiakunu la Ma Jou wahidoaka o tobahioriki onangika la hiadono ona gea ka idadi Ma Jou ai hininga yahitararono itiai o nyawaika. Masara enangoo naga de ma batingoka ho ahao kiani itogumu ma hiakunu gea.

⁹ De ngone o nyawa nanga tobahioriki gea ka ma dobikohi dika, de ngaro Ma Jou ai demo abe ka wobawilika wonahingahu nanga hiningaino la ahao ngoneoli hohidemo o nyawaika, ma, enangoo ka ma dobiki dika hohidemo.

¹⁰ Masara ahao ka de ma oraha Ma Jou wonahingodumoka abe ma titi ai tobahioriki wonahidogo ngoneino hiadono duru ingodu-ngodumoka nanga hininga ma tobahioriki, gea de ahao ma hiakunu gea ko iwaka ngoneoka angamoi gea de ko hopereluokaua ka hiado-adonika.

¹¹ Abeika tomahiketero hokonaa. Nengokadau ngohi ka o ngofakohi, de ma oraha gea totemo-temo hoka o ngofaka, de doka ahi hiningaka itemo hoka o ngofaka yotemo, de ngaro ngohi ahi hininga ma dodagi ma, enangoo hoka o ngofaka dika, angamoi gea ngohi ka o ngofakohi. Masara ka de ngohi tobaluhoka de o ngofaka ma hininga mata-mata gea tanoaka. Ho gea imaketero de ngone ma oraha naa naga. Abe Ma Jou ai gou-goungu ka ma dobiki dika ngone hataoko, angamoi nanga hininga ko apouahi genangika adono.

¹² Abe ma oraha naa nanga hiningaka ikurangohi itararono hataoko to Una ai hininga, gea ngade-ngade imaketero hoka ngone holegaika o kahinaaika, masara ma kahinaa hoka ikafoka de ko ingodumua hamake nanga gurumini. Hokogenangoo de ma oraha naa abe ngone hamake Ma Jou ai hininga ma ko ingodumuahi. Masara ahao ma oraha gea ko hokogenangokaua. Angamoi genangoka de ahao duru himake itararono Ma Jou, abe gea imaketero hoka homarihimanga ngone de Una, de duru ko iwaka abe ikuranga itararono ngoneino. Ho ma oraha naa naga ahi tobahioriki igoungu ka ma dobikohi dika, masara genangoka de ahao ahi tobahioriki duru ingodumoka, abe imaketero hoka Ma Jou ai tobahioriki ngohino duru ingodu-ngodumoka. De mangale ma titi ahi tobahioriki ahao gea de duru ingodumoka, ho ma hiakunu gea ko topereluokaua.

¹³ Ho o ngongaku de o nganganono de o dora, ka ena gea hange dika itongohono ka hiado-adonika, de nako ma hangeino gea, ka o dorahi duru ikurutiye.