1 Korintusu 12 - Ma Jou ai Demo-demo o Totobelohoka

Ma hitararono ma hidogo abe ma titi Ma Jou ai hiakunu moi Nanga hiakunu Ma Jouino imaketemomomoi

¹ De, ahi gogianongoru, naa marai ma titi moioli topaluhu abe nengokadau ngini nihileha ngohino. Abe nia leleha gea ma titi o nyawa manga hiakunu abe ko o nyawakaua de aino iboa, ma titi ena gea ngohi duru toigo la ngini nihioriki itiai.

² Ho ngini ka niohiningahi nengokadau abe ma oraha ngini ko niwingakuahi Ma Jouika. Ma oraha gea ngini inihirehene o popangaoika abe ko iwango-wangoua masara imouoka dika de gea nimahuba enangika, de gea hoka inituda-tuda dika aika aino de gea ma ngoe niahowono.

³ Masara ma oraha naa de ngaro ufa o toka-tokata inibudiohi nginika, angamoi naa ahi demoino de ngohi tinihingahu abe hokokia ka idadi niatailako o nyawa manga demo la nihioriki gea manga demo Ma Jouoka de aino iboa eko gea o toka-tokatoka. Ho naa tinihitiari ma titi abe o nyawa utu yomaaduru dika abe hoka yalufungoka de hiadono ihidemo o hingahu ma demo moi ato bari Ma Jouoka de aino iboa. Ho ma oraha nimatoomuino o gareja moi de nako hiadono naga o nyawa utu nginioka abe yalufungoka de ahao o hingahu ma demo moi ihidemoiye nginika, gea kiani niataili o nyawa gea manga demo la nihioriki o demo o kia Ma Jou o Womahoka de aino de o demo o kia ko Unangokaua de aino. Ho naa tinihingahu tato nako Ma Jou o Womaha wotemo o nyawaino, gea ona ko yotemoua ato, “O Yesusu Una iwihikobotoka.” Abe nako hokogea yotemo, marai ona gea yahitaanoka abe yabarenikaka. Ho ona gea ufa niahigihene onangika done o toka-tokata inibudioli abe hoka ma dihira inibudioka nginika. Masara nako o nyawa yalufungoka de hiadono ona yahingahu ato, “O Yesusu Una gea nanga Baluhu idodutu,” gea manga demo yahitaana onangikali abe Ma Jou o Womaha naga wotemo manga uruino. Hokogea ngini ka idadi niataili o nyawa manga demo la nihioriki gea Ma Jou o Womaha wotemo onangino eko moioli abe ona yabarenika.

⁴ De abe Ma Jou ai garejaka, naga to Una ai hiakunu ma ngoe de gea mata-mata imaketemomomoi, masara gea mata-mata ma lifunu ka moioka dika de aino iboa, abe ma lifunu gea Ma Jou o Womaha.

⁵ De imaketero hokogenangoo to ngone nanga leleani Ma Jouika ma ngoe ma imaketemomomoi, masara nanga Baluhu ka womatengo dika hileleani.

⁶ De nanga karajaangoo hokogea, abe nanga karajaanga homoi-homoi imaketemomomoi, masara Ma Jou ka womatengo dika abe wonahikarajaanga ho ngone mata-mata de nanga borikarajaangoka gea.

⁷ De Ma Jou o Womaha womahimatoko to Una ai kuaha ngone homoi-homoiino nanga wowangoka. Abe naga to Una ai hiakunu wonahidoaka ngone homoi-homoiino la ma hiakunu gea idadi ngone mata-mata nanga utumu.

⁸ De ai hiakunu irupa-rupa wonahidoaka ngoneino. Abe naga yomatengoika Ma Jou o Womaha wahidoaka onangika o sosawaro ma hiakunu la ona gea ka idadi ihidemo Ma Jou ai sosawaro ma demo manga gogianongoruika. De yomatengoikali Una wahidoaka o tobahioriki la ona ka idadi Ma Jou ai hininga yahitararono itiai o nyawaika.

⁹ De o nyawa utuikali naga utu Ma Jou o Womaha wahidoaka o ngongaku ma hiakunu la nako o nyawa mata-mata masara ka onangohi manga ngongaku iputurungu Ma Jouika. De nagali utu Una gea wahidoaka la ka yakunu yahitogumu o nyawa manga popanyakeino.

¹⁰ De utuoli Una gea wahidoaka la ka yakunu o heheranga yodiai. De nagali Ma Jou o Womaha wahiakunu nanga gogianongoru utu la yalufungu de ai kuaha hiadono ka idadi yahingahu o nyawaika Ma Jou ai hingahu ma demo. De nagali Una wahidoaka ma hiakunu la ona utu ka idadi ihioriki o kiaka Ma Jou o Womahoka de aino iboa de o kiaka iboa o toka-tokatoka de aino. De nagali o nyawa utuokali de ona Ma Jou o Womaha wahiakunu la ka idadi naga de manga sosawaroka yotemo de o nyawa utu manga demo ngaro ma demo gea ko yomadotokuahi. De nagali ma hiakunu wahidoaka utuikali la nako hiadono yoihene o nyawa utu manga demo de ka idadi ihioriki ma titi ma demoino gea, de ka idadi yaturuuru to ona manga demoika la manga dodiawo ka idadi ihioriki ma titi.

¹¹ Ho abeika o hiakunu irupa-rupa, masara Ma Jou o Womaha ka womatengo dika wahikokodoku ai hidoaka gea mata-mata o nyawa homoi-homoiika. De Una ma hirete womaputuhu wato, “Ahi hiakunu naa tihidoaka unangika naa, de ahi hiakunu moioli kiani naa munangika tomihidoaka.” Hokogea Una ma hirete womaputuhu abe hokokia wonahikokodoku ai hidoaka de ai hiakunu gea ngone hingaku-ngaku homoi-homoiika.

Ma titi o kia hiadono Ma Jou wonahidoaka ai hiakunu gea?

¹² Abeika tonahiketero. Ngone o nyawa nanga badanga ka moi dika, masara to ena ma kiahonanga duru kohangoe. De ngaro ma badanga ma kiahonanga kohangoe, masara gea o badanga moi dika. De gea duru imaketero hoka ngoneoli abe hingaku-ngakuoka. Abe ngone naa naga nanga ngoe, de gea ngone homoi-homoi to Kristusu ai badanga ma kiahonangino homoi-homoi.

¹³ Abe ngone utu o Yahudi ma nyawa, de ngone utuoli ko o Yahudi ma nyawaua. De ngone utu o gogilaongo, de ngone utuoli ko o gogilaongua ma nyawa. De masara ngaro ngone o nyawa o kia dika, ma, ngone mata-mata Ma Jou o Womaha dika wonakokiohiki hiadono ngone hodadi o badanga moi. De Ma Jou o Womaha gea abe wonaohiki ngone mata-mata, Una gea ka womatengo dika. De Una gea ngone homoi-homoi hikokimakeoka abe Una hikokidafongoka nanga wowangoka.

¹⁴ De abe ahi hiketero naa, nako o nyawa manga badanga, gea ma kiahonanga ko moiua dika, masara to ena ma kiahonanga duru kohangoe.

¹⁵ Ho nako ma badanga ma kiahonanga ka akunu itemo-temo, gea marai ahao ma badanga ma lou ikurubungu itemo ato, “Ngohi naa ko ma giamua, ho gea bote ngohi ko o badangua ma kiahonanga.” Masara ngaro hokogea ma lou itemo, masara gea ma lou nagahi ma badangoka, de duru igoungu gea o badanga ma kiahonangohi.

¹⁶ De bote ma badanga ma ngauku ikurubungu ato, “Ou, ngohi naa ko ma lakoua, ho gea ngohi ko o badangua ma kiahonanga, de.” Masara ngaro ma ngauku ma demo hokogea masara ena ko idadiua imakitingaka la ibootohi ma badanga ma kiahonanga. Nagahi. Ho ngoneoo o Kristusu ai badangoka ngaro ufa de hokurubungu ma titi to ngone homoi-homoi nanga hiakunu eko nanga leleani Ma Jouika abe Una wonahitagongino ngone homoi-homoiino.

¹⁷ De naa moi tonaleha. Nako ma badanga ma gahumu, ma ka ma ngauku dika naga, done sarakia de ka yaame? Eko nako ma badanga ma gahumu, ma ka ma lako dika naga, gea done sarakia ena iihene?

¹⁸ Masara hokogenangua Ma Jou nanga badanga wohiaturu. Abe Una ma badanga ma kiahonanga homoi-homoi waleino de wakelenga genangoka abe duru itaana de to Una ai mau.

¹⁹ Masara nako naga o badanga moi abe ma kiahonanga ka moi dika mata-mata, gea bote duru o fara moi ena gea, e? Nako hokogea, ko hohiromangua gea o badanga, eko sarakia? Ho ngoneoo o Kristusu ai badangoka ko itiaiua nako ngone ko nanga ngoe masara nanga hiakunu ka moi dika, angamoi gea nanga badanga ko ingodumua. Masara abe ma titi ngone o Kristusu ai badangoka, ngone Ma Jou wonahikaaturu la hongodumu, abe ma titi ngone homoi-homoi nanga hiakunu imaketemomomoi la ka idadi homakokuduhunu nanga karajaangoka.

²⁰ Ho naa igoungu naga o badanga ma kiahonanga ma ngoe, masara ma badanga ka moi dika.

²¹ De ma badanga ma kiahonanga nako ka idadi itemo, ma o badanga ma lako ko itiaiua itemo ma giamika ato, “Ngohi naa ka yaowa. Ngaro ufa de ngona nohiduhunu.” Eko ngaro o badanga ma pea ma ko itiaiua imahingahu ma louika ato, “Ngohi naa ka yaowa, ho ngaro ufa de ngona nohihidagi ngohi.” De gea tonahiketero de ngone abe o garejaka. Abe ngaro ngone hodadioka o gareja ma hihira, ma ko itiaiua hahitipokouku nanga gogianongoru utu abe ona gea manga gogere o garejaka ko ikurutiyeua de ngone hato ona gea ko kia-kiaua.

²² Nako hokogea ko itiaiua, angamoi o badanga ma kiahonanga utu abe to ena ma buturungu ngone haetongo hato ikuranga, duru ena gea kiani naga ma badangoka la ma badanga ma karajaanga ka apoa idiai.

²³ De ma badanga ma kiahonanga abe ngone hato to ena ma hailoa ikuranga, gea hohidodiai la hohinoauku de ma rorahai la to ena ma hohailoa naga. De imaketero hokogea nanga badanga ma kiahonanga abe ngone hato ufa hiadono o nyawa utu yamake, genangoo duru hohidodiai la hohinoauku gea de ma hohailoa dika la hiadono enangoo naga de ma hohailoa.

²⁴ Masara nanga badanga ma kiahonanga utuoli abe ma hohailoa nagau, gea ngaro ufa dika de hohitatoko. Ho ngone ka idadi hamake hokokia Ma Jou wohiaturu nanga badanga ma kiahonanga. Abe Una wohiaturu la ma kiahonanga abe ma horomati ikuranga, genangika wohidogoika de o horomati la hiadono ma kiahonanga mata-mataika de ma horomatioka. De hokogenangoo o Kristusu ai badangoka abe Ma Jou wonahikaaturu ngone ai gareja ma goronaka la moioo de ko iwa abe nanga horomati eko nanga hohailoa ko iwa Ma Jou ai himangoka. Ho ngone mata-mataika naga de nanga horomatioka Unangoka.

²⁵ De nanga badanga ma kiahonanga hokogea wohikaaturu Ma Jou la ufa nanga badangoka homaketeloliliara, ma masara o rimoi dika imanoa nanga badangoka, hiadono nanga badanga ma kiahonanga ma perelu mata-mataika homahiketehidodailako.

²⁶ De nako hiadono ma kiahonanga moi ma odiri yamao, gea ma kiahonanga mata-mataika yamao ma odiri gea. Eko nako hiadono ma kiahonanga moi de ma horomati yamake, gea ma kiahonanga mata-mataika yogogarago. Ho gea ho koaho ngoneoo homaketerimoioka la nanga hininga ma dumutu ka moi dika.

²⁷ De naa ngohi ma moioli tohiketero de tinihingahu nginika abe ngone o garejaka tonahiromanga tato ngone naa o Kristusu ai badanga, de ngone homoi-homoi to Una ai badanga ma kiahonanga homoi-homoiika.

²⁸ De abe nanga garejaka naa Ma Jou wonahidoaka o nyawa abe manga hiakunu irupa-rupa. Abe ona utu wahidingo-dingoto la o Abari ma Rorahai yatobahingahu-ngahu o nyawaika, to onangohi manga hiakunu duru ikurutiye. De ahao nagali Una wonahidoaka o garejaka ona abe yatobalufungu de Ma Jou ai kuaha la hiadono Una ka wobawilika wahingahu onangika ai hingahu ma demo abe woigo wato ona ahao yadofanga manga gogianongoru utuikali ai hingahu ma demo gea. De ona gea manga hiakunu ngade-ngade imaketero ma gurutiye abe hoka ona yatobahingahu-ngahuoli. De ahao nagali Ma Jou wonahidoaka ona yotobadotoko Ma Jou ai Demo-demoino, de genangoo ma hiakunu hatoli ikurutiye, masara ko adonua ma gurutiye abe hoka ma hiakunu hinooto gea. De ahao nagali Ma Jou wonahidoaka ona abe ka yakunu o heheranga yodiai, de ahao ona abe ka yakunu o nyawa yahitogumu manga popanyakeino, de ahao ona abe yakunu o nyawa yaduhunu, de ahao ona ka yakunu o nyawa utu yahiaturu la yomarimoi yokarajaanga, de ahao ona abe ka yakunu o nyawa utu manga demo yosawaro yotemo. Ho nanga garejaka naa de Ma Jou wonahidoaka de wonahiaturu ngone mata-mata ma titi to Una ai hiakunu ngone homoi-homoiika.

²⁹ Masara naa tonaleha. Sarakia, ngone o garejaka naa de ngone mata-mata o Abari ma Rorahai hatobahingahu-ngahu o nyawa utuika? Koua, ko ngone mata-mataua hokogea hakunu. Eko ngone mata-mata hatobalufungu de Ma Jou ai kuaha hiadono ka idadi hatobahingahu o nyawaika to Una ai hingahu ma demo? Koua, ngone utu ko hakunua. Eko ngone mata-mata hotobadotoko? Koua. Eko sarakia, ngone mata-mata hakunu o heheranga hodiai? Koua.

³⁰ Eko bote ngone mata-mata ngaro o nyawa yopopanyakeuku ma ka hakunu hahitogumu manga popanyakeino? Koua, hokogenangua. Sarakia, ngone mata-mata hakunu o nyawa utu manga demo de hososawaro hotemo-temo ma demo gea? Koua. Eko nako o nyawa utu manga demo hoihenino de bote ngone ka hakunu hohioriki ma titi genangino? Ko hakunua. Abe to ngone nanga hiakunu Ma Jouino imaketemomomoi.

³¹ Ho ngini kiani nioigo de niohafini la ahao niamake ma hiakunu abe hatoli ma hohailoa de abe ikurutiye. Masara ngaro ufa de ngini niohafini ma hiakunu gea abe hatoli itipokouku. De masara naa ngohi tinihimatoko nginika o wowango ma ngekomo moi abe nako ma ngekomo mata-mata, ka nenangohi ihohailoa.