1 Korintusu 11 - Ma Jou ai Demo-demo o Totobelohoka

¹ Ho ngini kiani nimaaduru hoka ngohioli, abe imaketero hoka ngohioli tomaaduru hoka o Kristusu.

O Ngo-ngofeka manga pea ma dadamunu

² De, ahi gogianongoru, naa ngohi tinihigiriiri nginika angamoi ka ihikaika ngini nihihohininga ngohi de ahi dodotoko nginika nianiiki itiai.

³ Masara naga ma dodotoko moi ngohi toigo la ngini duru nihioriki. Abe o nau-nauru homoi-homoi nanga haeke, gea o Kristusu, de o ngo-ngofeka homoi-homoi manga haeke manga rokata, de o Kristusu ai haeke gea Ma Jou o Baba.

⁴ Ho nako o nauru womatengo naga womaniata Ma Jouiye eko o hingahu ma demo Ma Jouoka de aino naga wahingahu o nyawaika, de masara ai pea watamunuku, gea wihimaleke to una ai haekika abe wihimaleke o Kristusika.

⁵ Masara nako o ngofeka momatengo de naga momaniata Ma Jouiye eko mahingahu o nyawaika o hingahu ma demo Ma Jouoka de aino, gea imakohowono. Momatengo gea kiani naga ami dadamunu ami peaka. De nako ami pea ko matamunua, gea muna duru mihimaleke to muna ami haekika, de gea ami rokatika. Abe nako ko iwa ami dadamunu, gea o himaleke ma dodunguu ma amoko de duru imaketero hoka ona o ngo-ngofeka yomatobafukunu manga badanga abe ona gea manga pea aborongkoka.

⁶ Ho nako muna ko moigoua ami pea matamunu, koaho ami tadauru magutioka dika. Masara mangale ma titi o ngofeka momatengoani abe ami tadauru agutioka eko aborongkoka de gea o himaleke ma dodunguu, ho koaho nia ngo-ngofeka o garejaka ufa yomaguti masara manga pea atamunuku dika abe ma oraha yomaniata eko yahingahu o nyawaika o hingahu ma demo Ma Jouoka de aino.

⁷ Masara nako o nauru hokogenangua. Nako o nauru, ufa ai pea watamunu mangale ma nauru Ma Jou witulaada hoka Unangoli ai rupa, ho ma nauru gea una abe wohiboa o horomati Ma Jouika. Masara ma ngofekali, muna gea mohiboa o horomati ma naurika.

⁸ De abe ma dodihiraka de ma nauru ko o ngofekakaua de aino woboa, ma masara ma ngofeka, muna moboa ma nauroka de aino.

⁹ De naa ma nauru Ma Jou ko witulaadaua la womidodiawo ma ngofekaika, ma masara ma ngofeka igoungu Ma Jou womitulaada la muna ka idadi midodiawo ma naurika.

¹⁰ Ho gea ho kiani ma ngofeka ami pea matamunu la momahitunguu abe ami hininga momahitipokouku ma naurika, angamoi Ma Jou ai momalaekata naga ka ihikaika inawuni-wuningi.

¹¹ De masara ngaro ma titi nanga pea ma dadamunu gea de igoungu ngone o naurohi nanga horomati hatoli ilamoko, ma ufa hataoko ihowono Ma Jou ai hininga. Angamoi nako nanga wowango nanga Baluhoka, o nauroo de o ngofekaoo kiani yomaketehoromati de ko idadiua yomahiketehitipokouku. Abe ko idadiua ona o ngo-ngofeka yomaketehoromati ka ona de ona dika de ko inalegaikaua ngone o nau-naurino, de imaketero hokogea ko idadiua ngone o nau-nauru ka ngone de ngone dika homaketehoromati de ko halegaikaua o ngo-ngofekaika. Hokogenangua, masara kiani ngone mata-mataika homaketehoromati.

¹² Abe igoungu ma dodihiraka Ma Jou womitulaada o ngofeka o naurino. Masara de gea ipaha de ngone o nau-nauru mata-mata homakokiboa o ngofekaino. De ngaro o kia dika naga, masara duru ma dodihiraka Ma Jouoka de aino iboa mata-mata.

¹³ Ho ma titi naa ena ngini ma hirete ka idadi niatailako la nihioriki hokokia itaana de hokokia ko itaanua. Ho tinileha, sarakia, nako o ngofeka momaniata Ma Jouiye de ko iwa ami pea ma dadamunu, mode gea ngini niaetongo itiai?

¹⁴ Abeika ti ngini ma hirete nia hiningaka. Mode ngini ko nihiorikua abe nako o nauru de ai tadauru ma guru-gurutu, gea ko iwihimalekua ma titi ai tadauru gea? Gea iwihimaleke unangika!

¹⁵ Masara nako o ngofekali de ami tadauru ma guru-gurutu, gea imifetongo muna mohailoa. Abe ami tadauru ma guru-gurutu gea imihidoaka munangika la naga ami pea ma dadamunu.

¹⁶ Ho hokogea dika ahi dodotoko nginika ma titi o ngo-ngofeka manga pea ma dadamunu. De nako naga nginioka o nyawa ato yokadatoro ma titi naa ena, iya, gea ngohi tinihingahu dika angamoi hokogea dika mia biaha nenangoka. De ngaro Ma Jou ai garejaka utuoli, ma, ona mata-mata ka imaketero dika manga hininga abe hoka ngohioli ahi hininga. Abe ngoneoka duru ko iwa abe yahigunoa o ngo-ngofeka la yomaniata Ma Jouiye de ko yatamunua manga pea.

Nanga Baluhu idodutu ai hiketero

¹⁷ De naa o huhuloko moioli tinihuloko nginika, masara naa ena duru ko tinihigiriiriua ngini. Angamoi ma oraha ngini nimatoomuino la niato ma rorahai niamake, de masara gea nimahiketehikangela dika.

¹⁸ Abe ihira naga tinigihene hokokia ngini nimatoomuino. Naga ihihingahu ngohino ato bari ma oraha nimatoomuino o gareja moi de o doomu muruono naga nginioka de nimaketeloliliara. De nako ngohi, gea ma hohutulu ka idadi tongaku ma hingahu ngohino gea.

¹⁹ Angamoi nako ti ngini nia hininga tataoko, ngini niato bote kiani naga yaregu nginioka la hiadono ka idadi o nyawa yahioriki onagona nginioka nia hiningaka igoungu yataana abe Ma Jou ai mau onangika. Abe nako ko iniregua, done sarakia o nyawa inihioriki to onagona manga hininga ka yataana de Ma Jou ai mau de onagona ko yataanua?

²⁰ De ngaro abe ma oraha ngini nimatoomuino la nimakokutuono niolomo de gea ipahaika de niato nidiai nanga Baluhu idodutu ai hiketero la nimahohininga, abe gea nanga Baluhu womahiketero de o roti de o angguru. Masara gea ngini nimatoomuino de ko nimahohiningaua ma titi nanga Baluhu, masara gea ngade-ngade hoka nimareguoli genangoka.

²¹ Abe naga ihihingahu ngohino ato bari ngini nimaketejai-jai niolomo de ko nimaketedamaaua. De niolomo ibootino de bari ngini utu ka inihafinohi de masara ngini utu hiadono inidaluku de o angguru ma gohaka ma teongo gea.

²² Nia datoro gea ma titi o kia? Mode ko iwa ti ngini homoi-homoi nia tau la genangoka niolomo de niokere? Eko bote ngini niato Ma Jou ai gareja nihimaleke? Bote ngini nioigo la o huha ma nyawa nginioka niahimaleke mangale to ona manga inomo ikuranga? Ho done hokokiahi totemo nginika? Sarakia, itiai ngohi tinihigiriiri ma titi naa ena? Koua! Duru ko tinihigiriiriua ngini naa.

²³ Ho naa tinihihohininga abe ma titi nanga Baluhu idodutu ai demo gea abe koaho hokokia ai hohininga haniiki. Abe ai dodotoko naa nengokadau wohihidoaka ngohino, de ma oraha naa duru ka imaketero dika ai dodotoko ma demo tinihidoakoli nginikali. Abe hokonaa ai dodotoko. Ma dihira ma futu gea abe nanga Baluhu idodutu o Yesusu iwihidoaka ai musuika, ka ma futu gea dika Una de iwinii-niiki ona yomakokutuono yolomo. De gea o Yesusu o roti waleino.

²⁴ De waleino ibooto de wohitarimakaseokahi Ma Jouiye. Wohitarimakase ibooto de o roti gea wakokabelaka de wahikokidoaka iwinii-niikika de wotemo onangika wato, “Abe ma roti gea tinihidoakika, gea ena hoka to Ngohi ahi roehe. De ahi roehe tomahidoaka la idadi ma utumu nginika. De naa tinihibehehongo la ngini ka ihikaika nidiai imaketero hokonaangoli abe todiai la gea nihihohininga Ngohi.”

²⁵ De gea yolomo ibootino de ahao waleinoli o angguru ma gohaka ma teongoli o mangko moi de genangoo wohitarimakaseokahi Ma Jouiye. Wohitarimakase ibooto de ahao wotemo onangika wato, “O angguru ma gohaka ma teongo naa tohiketero hoka to Ngohi ahi awunu, abe gea ahi awunu kiani iuihuku la genangino Ma Jou ka idadi winihibehehongo nginika de o behehongo ma hungioli. Ho abe ma mangkoino ngini niaokere de togahoko la ma oraha niaokere ma getongo de nihihohininga Ngohi.” Hokogea o Yesusu ai demo iwinii-niikika ma futu gea.

²⁶ De abe ngini ma roti naa niaolomo de ma mangkoino naa niaokere, gea nidiai ma getongo de genangino ngini niahingahu o nyawaika ma titi nanga Baluhu idodutu ai hohonenge. De hokogea nidiai ka hiadono daku de waukuoli woboa. Hokogea nanga Baluhu ai dodotoko ngoneino.

²⁷ Ho mangale ma titi ai dodotoko gea, nako nginioka onagona dika manga hininga de manga datoro ko itiaiua ma oraha ma roti naa yaolomo eko ma mangkoino naa yaokere, ona gea yahowonoka nanga Baluhu ai badangika de ai awunika.

²⁸ De gea ma titi ho kiani ngini ma roti ko niolomuahi de ma mangkoino ko niokeruahi de kiani nimatailakokahi ngini homoi-homoi.

²⁹ Angamoi nako hiadono ngini nia hininga de nia datoro ko itiaiua abe ma oraha ma roti niaolomo eko ma mangkoino niaokere, gea inihitaana ko iwa nia horomati nanga Baluhu idodutu ai badangika. De nako hiadono hokogea de ka nidiai, gea imaketero hoka ti ngini nia hohowono Ma Jouoka de aino niaolomo de niaokere nia badangino.

³⁰ De duru gea ena ma titi hiadono nginioka naga niwoe-woe iniboleoka de inigogama, de hiadono nginioka naga yamuruono naga yohihangoka.

³¹ Masara nako ngone ma hirete ka ihikaika homatailako la hiadono nanga dorou hatingakoka, gea de ahao borotaua de Ma Jou wonahohowono.

³² Masara nako hiadono kiani Ma Jou wonahohowono abe wonadotoko ngoneino, gea wonadotoko de wonaduhunu la wato wonahigilioli ma totiaiino. De hokogea Ma Jou wonadotoko la ahao ngone o hohowono ko hamakeua abe imaketero hoka o dunia ma nyawali manga hohowono ahao yamake.

³³ Ho, ahi gogianongoru, ahao ma getongo ma oraha abe ngini nimatoomuino la o Kristusu ai badanga de ai awunu ma hiketero nimahihohininga, de gea kiani nimaketedamaa hiadono ngini mata-mata ningodumokahi. De nako hiadono nikokiboaka, gea de ahao ka idadi nimulaenge.

³⁴ De nako naga utu nginioka duru yahafini, gea ho koaho ona yolomokahi to ona ma hirete manga tauoka. De ahao onangoo ka idadi yoboaino la nimatoomuino hoka o badanga moi. De nako hokogea ngini nianiiki ahi demo, gea ma oraha nimatoomuino de o hohowono ko niamakeokaua abe hoka ma dihira ngini utu nia hohowono niamake. De nagahi ma titi utuoli tato tinidotoko, masara gea toboaka nginino de ahao tohiaturu.