1 Korintusu 1 - Ma Jou ai Demo-demo o Totobelohoka

O Paulusu ai demo ihira-hira o Korintusu ma garejaika

^1-2 Ahi gogianongoru o Yesusu Kristusoka abe o Korintusu ma kotaka nimanoa. Ngohi naa o Paulusu, abe Ma Jou wohiahokoka ngohi la todadi o hidingoto ma nyawa abe tahingahu-ngahu o nyawaika ma titi o Yesusu Kristusu nanga Koano abe Ma Jou wonahibehehongoka. De o Sosetenese, nanga gianongoru o Yesusoka, una naga de de ngohi. De o hurata naa mihidingoto abe ngini Ma Jou ai garejaika abe o Korintusu ma kotaka nigogere. Abe ngini Ma Jou winitingakoka o Yesusu Kristusino de winihidadioka to Una ai debi-debini ma nyawa. De ka nginiua dika abe nidadioka to Una ai nyawa, masara naga o nyawa utu ko manga ngoe abe ngaro o kia-kiaka dika yogogere, ma onangoo yofeto-fetongo nanga Baluhu o Yesusu Kristusu ai romanga abe ma oraha yomaniata Unangiye. De onangoo gea yodadioka to nanga Baluhu ai nyawa idodutu abe imaketero hoka ngoneoli hodadioka. Ho mangale ma titi nginioo igoungu nidadioka Ma Jou ai nyawa, ho naa tinihurata ngini o Korintusu ma kotaika.

³ Ho ngini mata-mata tinigahoko Ma Jou nanga Baba de o Yesusu Kristusu nanga Baluhiye la ai owa de ai hininga ma miriidi winihidoaka nginika.

O Paulusu ai tarimakase ma demo

⁴ Ngohi duru ma ngoe totarimakase Ma Jouiye ma titi ngini, angamoi to Una ai owa winihidoakoka nginika o Yesusu Kristusoka.

⁵ Abe mangale ma titi ngini naga o Yesusoka ho hiadono Una duru winihiowa de to Una ai owa mata-mata. Abe ai owa gea hoka nia hiakunu Una winihiakunoka la ka idadi nia hingahu ma demo o nyawaika duru itaana de Ma Jou ai hininga, eko nako nia hiakunu moioli abe ma titi nia hininga ma tobahioriki la hiadono nihioriki mata-mata abe iboa Ma Jou o Womahino, masara gea mata-mata Unangoka dika de aino winihiakunu.

⁶ De gea to Una ai owa mata-mata inihitaana ngini abe o Kristusu ai Abari ma Rorahai igoungu iwango nginioka.

⁷ De angamoi Una ai owa mata-mata winihidoakoka, ho moioo de ko iwa abe ai owa ikuranga nginioka ma oraha naa. De naa ngini duru de nia magaweoka niwingano-nganono de niwidodamaa nanga Baluhu idodutu o Yesusu Kristusu, abe Una ahao woboali de womahimatoko.

⁸ De Una gea ahao winihiputurungu ngini nia ngongakuoka ma oraha naa de ka hiadono ma bahaika. Abe gea winihiputurungu la ahao ma oraha ma baha adonoka de duru ko iwa moi de initae de inihohowono nginika. De ma baha gea ma wange nanga Baluhu o Yesusu Kristusu woboali.

⁹ De duru hohioriki abe ma oraha gea de ko iwaka nanga howono angamoi hokogea Ma Jou wonahibehehongoka ma dihirainohi, de gea ahao idadi angamoi hohioriki Ma Jou Una gea watobagou-goungu. De Ma Jou, duru Una gea abe winiahoko ngini la nimaketerimoi ngini de to Una ai Ngofaka, o Yesusu Kristusu nanga Baluhu idodutu. Ho ngohi duru totarimakase Unangiye ma titi to Una ai owa mata-mata gea abe winihidoakoka nginika.

O Korintusu ma garejaka naga yoregu

¹⁰ Ahi gogianongoru, naa moi tinihibehehongo de to nanga Baluhu o Yesusu Kristusu ai romanga tapake abe tinihibehehongo la ngini mata-mata nimaketehiningamoi de ibootohi nimaketeliliara nia doomu ma goronaka. Abe tinihibehehongo la ti ngini mata-mata nia hininga de nia putuhu duru ka moi dika.

¹¹ Hokogea togahoko angamoi naga o ngo Koloe ami ria-dodotino abe ihihingahu ngohino ma titi ngini. De ona gea ato bari naga o ribuutu nginioka.

¹² Abe ahi demo ma titi hokonaa. Nginioka naga utu yotemo ato, “Ngohi o Paulusu tiniiki,” de utuoli yotemo ato, “Ngohi tiniiki o Apoloso,” de nagali utu ato, “Ngohi tiniiki o Peturusu,” de masara utuoli ato, “Ngohi o Kristusu tiniiki.”

¹³ De naa tinileha nginika, mode o Kristusu gea iwireguoka? Eko mode ngohi o Paulusu ihihidapakuika o gota isosalioaika la ngini niamake ma utumu? Eko sarakia, mode ma oraha ngini iniohiki de ngohi o Paulusu ahi romanga yapake? Koua, hokogenangua, e?

¹⁴ De gea ngohi totarimakase Ma Jouiye abe ko ngohiua tiniohiki ngini, bowahu o Kiripusu de o Gayusu dika, ona dika taohiki.

¹⁵ Angamoi nako nengokadau de tiniohiki ngini, done ngini ka idadi nimahingahu niato, “Ngomi naa imiohiki de o Paulusu ai romanga yapake.”

¹⁶ Masara igoungu naga o Setefanusu de ai tau, onangoo taohiki. Masara o nyawa utuoli abe taohiki, ngohi tato marai ko iwaka. Ka ona dika ngohi taohiki.

¹⁷ De gea tosanangi abe ko ngohiua tiniohiki ngini, angamoi o Kristusu wohihidingoto ngohi la wato o Abari ma Rorahai tahingahu-ngahu, de ko ma titiua wohihidingoto la o nyawa taohi-ohiki la tato ona gea yodadioka to ngohi ahi nyawa. Hokogenangua abe wohihidingotino. De abe o Abari ma Rorahai tahingahu-ngahu, gea ufa ngone o nyawaino ma sosawaro ma demo tapake. Angamoi nako ena gea tapake, ahao o Kristusu ai gota isosalioaino ma abari ma buturungu ko tapakeua, de gea imaketero hoka ma buturungu gea taumoka ho hiadono ko iwa ma utumu ahi hingahu ma demoino.

Ma Jou ai sosawaro de ai buturungu o nyawa yataoko ko itiaiua

¹⁸ De gea kiani to Una ai buturungino dika tapake abe o nyawaika tahingahu-ngahu ai gota isosalioaino ma abari gea. Angamoi igoungu naga o nyawa utu abe ka ihikitingakohi Ma Jouino, de ona gea o Kristusu ai abari yafikiri ato ibodo de ko iwa ma utumu genangino. Masara ngoneoli abe hingaku-ngakuoka, ngone ko hafikirua hato ibodo, masara ngone hato ma abari gea de ma buturungoka, de ma buturungu gea Ma Jouoka de aino.

¹⁹ De gea ahi demo igoungu angamoi ka imakiniiki de to Ma Jouoli ai demo. Abe ma dihira naga itulihukuoka Ma Jou ai Demo-demo naa, abe Ma Jou wotemo wato, “O sosawaro ma nyawa manga sosawaro ahao tohibinaaha, de abe o sosawaro ma nyawa ahao ngohi todiai la ona ko ihiorikokaua.” Hokogea itemo Ma Jou ai Demo-demoka.

²⁰ De naa tinileha, o sosawaro ma nyawa ona mode Ma Jou wadafongo ma titi manga sosawaroino? Koua! Eko ona yotobadotoko o Musa ai Paretaino, onangoo mode ka idadi yomaduhunu hiadono yohapongo dakuiye? Eko ngaro ona abe o nyawa utu yahiromanga onangika ato, “Ona ma gou-goungu yotobalingiri,” ona yotobalingiri gea mode yamake o wowango Ma Jouoka ma titi manga lilingirino? Duru ko yamakeua! Ona gea mata-mata ko yamakeua o wowango ma ngango mangale ma titi ona yomahinganono manga sosawaroika dika, de masara o dunia naa ma sosawaro Ma Jou wodiai la idadioka ibodo.

²¹ Angamoi abeika Ma Jou ai sosawaro. Ngone o duniaka ma nyawa naa ngaro nanga sosawaro hapake, ma, ko himakeua Ma Jou de Una ko hihiorikua. De hokogea ma dihirainohi wohiaturu Ma Jou la wato ufa ngone o nyawa himake ma titi to ngone dika ma hirete nanga sosawaroino. Hokogenangua, masara Ma Jou wonahimatoko ai sosawaro ngoneino abe gea Una wapake o Kristusu ai gota isosalioaino ma abari la wonaduhunu ngone onagona dika hongaku genangika. Ho ngone o nyawa duru hoigo homahinganono ka ngone ma hireteino dika de gea hohiromanga hato hososawaro, masara nako Ma Jou, hokogenangua. Abe Una wato nako hiadono homahinganono o Kristusu ai karajaangika abe wodiaioka ai gotaka, gea de ahao wonahiromanga wato hososawaro. De igoungu naga o nyawa manga ngoe abe yafikiri ato ai gota ma abari gea ibodo.

²² Abe hoka o Yahudi ma nyawa, ona ka aoluku o Kristusu ai gota ma abari gea de hiadono o heheranga yogahoko. Angamoi ona ato iti amakeohi o heheranga Ma Jouoka de aino la ihitaana o Kristusu ai abari, gea de ahao ka idadi yongaku ai abari gea. De nagali o Yunani ma nyawa de ona utu abe ko o Yahudi ma nyawaua, ona gea aoluku o Kristusu ai gota ma abari angamoi gea ona yaetongo ato ma abari gea ko isawaroua, de hiadono ona gea o dodotoko utuoli alingiri abe gea ona yaetongo ato isawaro la ka idadi yongaku genangika.

²³ Masara ngone naa hokogenangua. Ngone hahingahu o nyawaika hato o Kristusu iwihidapakuika o gota isosalioaika. De o gota ma abari gea idadi o Yahudi ma nyawa yowoe-woeika manga dudumungu manga hiningaka hiadono ko yongakua o Abari ma Rorahaiika, abe ma titi manga hiningaka de ka yoluku yogila-gila. De onangoli ko o Yahudi ma nyawaua, ona gea nanga dodotoko ka yafikiri ato ibodo.

²⁴ Masara ngone abe Ma Jou wonaahokoka Unangino, ngone utu o Yahudi ma nyawaino de utuoli ko o Yahudi ma nyawaua. Masara ngaro o kiaino ma nyawa, ma ngone naa hotemo ma titi o Yesusu Kristusu hato Ma Jou wonahimatoko to Una ai buturungu de ai sosawaro o Kristusino dika.

²⁵ Ho igoungu naga o nyawa utu yoihene o Kristusu ai gota isosalioaino ma abari gea de ihiromanga ato ibodo eko ihiromanga ato ko iputurungua ma abari gea. Masara abeika, ngaro o nyawa utu yotemo ato Ma Jou ai abari gea ibodo, ma nako Ma Jou ai abari gea de o nyawa manga sosawaro, ka Ma Jou ai abariohi isawaro. Eko ngaro o nyawa utu yotemo ato Ma Jou ai abari gea ko iputurungua, masara nako ai abari gea hohidotelega de o nyawa manga buturungu, ka to Ma Jou ai abariohi iputurungu.

²⁶ Ahi gogianongoru, abe ma titi o sosawaro de o bodo, abeika ngini ma hirete nia wowango abe ma dihira ma oraha de Ma Jou winiahoko ngini Unangino. Mode Una winiiriki ma titi ngini duru nisosawaro? Eko mode ngini nia gogere naga ikokurutiye o poparetaka? Masara hokogenangua, e? Nginioka ko niwoeua abe o duniaka naa inietongo ngini ato nisosawaro. De marai ko niwoeua abe ma dihira ngini niahipareta o nyawa manga ngoeika. De ma dihira ko niwoeua abe nia fam nigogere o popareta yokokurutiye manga tauoka.

²⁷ Masara Ma Jou ai hininga la winiiriki ngini! Angamoi Ma Jou wonairiki ngone abe o dunia inahiromanga ato ngone hobodo, de gea wonapake ngone la ai ngirikino gea de wahimaleke o sosawaro ma nyawaika. De Una wonairiki ngone abe o dunia inaetongo ato ko iwa nanga kuaha de ahao ona abe de manga kuahaka wahimaleke ngoneino.

²⁸ De wonairiki Ma Jou ngone abe o dunia ato duru hotipokouku de ko kia-kiaua nanga gogere. De abe ngone naa o dunia inadohata ngoneino, duru ngone naa mata-mata Ma Jou wonairiki la ai ngirikino gea de onangoli wahikala de wahitipokouku ona gea abe o dunia yaetongo ato yolamoko eko ato yokurutiye.

²⁹ De hokogea wodiai angamoi wato done o nyawa womatengoino naga de ka idadi woboa Ma Jouino de womahingahu wato bote Ma Jou wiirikoka ma titi to una dika ma hirete ai sosawaroino eko ai hiakunu eko ai gogere.

³⁰ Masara igoungu ngini naa niamakeoka nia gogere ma gurutiye, angamoi Ma Jou Una ma hirete winigoraka ngini la nia gogere naga o Yesusu Kristusoka. Abe ma titi Ma Jou ai hidee wato wihidadi o Yesusu Kristusu to ngone nanga ngekomo la Una ka idadi wonaduhunu nanga howo-howonino. De nako Una gea, ngone ka idadi hihiromanga hato Una gea Ma Jou ai sosawaro, angamoi Ma Jou ai sosawaro mata-mataika imanoa o Kristusoka. De gea Ma Jou ai sosawaro la o Yesusu Kristusino Ma Jou wonaetongo ngone hototiai Ma Jou ai himangoka, de duru Una gea ma titi ho hiadono ngone wonahidadi Ma Jou ai debi-debini ma nyawa, de nagali abe o Yesusu Kristusu, Una gea wonabangu ngone naa la wonahiluasa nanga howonino. Ho duru ma titi o Yesusoka dika hiadono nia gogere gea ikurutiye Unangoka.

³¹ Ho, duru itaana Ma Jou ai Demo-demo ma dihira, abe ihitulihukuoka ato, “Ufa o nyawa yomahigiriiri ona ma hirete, masara ona gea koaho iwihigiriiri nanga Baluhu idodutuika dika ma titi to Una ai datorino.”