1 Kokoano 4 - Ma Jou ai Demo-demo o Totobelohoka

O Pasala 4 ko atailakouahi O Saloomo de ai kokawaaha manga wowango duru de ma owaka

²⁰ De ma oraha gea de o Yehuda ma nyawa de o Isiraele ma nyawa ona mata-mata duru yodogo-dogo manga ngoe hiadono ko yapoaua yaetongo. Abe manga ngoe gea yomaketero hoka o dowongi ma mui ma ngoe o gahi ma ngigorino. De ngaro manga inomo de manga ngokere masara gea duru yakokiwedono ho manga wowangoka de yososanangi dika.

^21-25 Abe ona manga tau homoi-homoioka naga manga angguru ma redi de manga gogilioro ma gota la yamake ma hofoko genangino. De abe ma oraha o Saloomo wahikoano onangika, ngaro yogogere daku o Bereseba ma kotaka o Yehuda ma tonaka ma dobikoka de ngaro ka hiadono onangoo abe o Daana ma kotaka dau o Isiraele ma tonaka ma dobikuku masara ai kokawaaha mata-mata yowango yososanangi dika. De hokogea dika manga wowango irorahai ka hiadono manga koano o Saloomo wohonenguku. De gea o Saloomo wahikoano o tonaka duru ma amokika de o dutu ma nyawa manga ngoe de manga hohidimono homoi-homoi yomahikoano unangika. Abe ai tonaka ma batingi daukuku gea o Tifasa ma kota o Efaraata ma akere ma datekoka de ka hiadono daku o Gasa ma kota abe imakitigino de o Mesiiri ma tonaka ma batingiye, de ngaro o Filistina ma nyawa manga tonaka masara enangoo wahikoano mata-mataika. De ona mata-mata iwihidoaka hoka o pajaka ma tiwi o Saloomoika la idadi manga horomati ma dodunguu unangika. De hongoli o homoa ma nyawa abe yogogere ai tonaka ma date-datekoka ona gea mata-mata de o Saloomo yomakao irahai de o dame. De ma oraha gea o nyawa iwihidoaka o inomo duru kohaamoko o Saloomoika la yahikawedono una de ai tau de ona mata-mata abe iwitobaleleani unangika. Abe ona gea manga inomo abe o wange moioka dika yatobaolomo gea hokonaa ma gegetongo. O tarigu biaha o litere o sana ngimoi de o tarigu ma alu-aluhu o litere o sana motoa, de o hapi biaha ma gahumu monaoko de o hapi abe duru ikutufuru ma gahumu ngimoi. De nagali yaolomo o domba ma gahumu o ratuhu moi de o luadana irupa-rupa ma ngoe de o totaleo ma ngoe. De hokogea manga inomo abe o wange homoi-homoi yatobaolomo.

²⁶ De nagali o Saloomo ai kuda ma gahumu o sana ngimoi de hinooto abe ai tentara manga goroba parangi yotobaao-ao, de to ena ma ngi o tauoka naga ma ngi o sana iata.

²⁷ De o Saloomo ai tonakoka naga ma tonaka ma dobiki ngimoi de hinooto, de ma dobiki homoi-homoi gea naga de manga gubernuuroka. Ho o gubernuuru yangimoi de yahinooto gea yomakawalimi yahidoaka o inomo o Saloomo de ai nyawaika la yahikawedono to ona manga perelu o wange-wangeiye. Abe gea o gubernuuru womatengo ai tagongo o mede moioka de ahao o mede ma himangoka de idadi womatengoli ai tagongo, de hokogea yomakawalimi ka ihikaika la ko iwa o Saloomo de ai nyawa manga kuranga.

²⁸ De gea ko ma titiua o Saloomo ai nyawa dika manga perelu kiani ma gogubernuuru yahikawedono masara nagali to una ai kuda mata-mata ma perelu. Ho ka ihikaika yaoino o gandumu ma roehe de o rurubu ma amoko la idadi ma kuda ma inomo.

O Saloomo ai sosawaro de ai tobahioriki

²⁹ De Ma Jou wihidoaka o sosawaro de o tobahioriki o Saloomoika abe duru o fara moi hiadono o nyawa ko yaboaikaua genangika.

³⁰ Abe ngaro o soo-sosawaro ma nyawa o wange ma hiwaroka de onangoo abe yogogere o Mesiiri ma tonakoka masara ka to Saloomohi ai sosawaro duru ikurutiye.

³¹ De igoungu ma oraha gea naga o sosawaro ma nyawa manga ngoe abe manga romanga duru ikurutiye o nyawa manga hima-himangoka, abe hoka o Esarahi ma nyawa womatengo ai romanga o Etana, de nagali o Maholo ai ngofaka yaruange abe manga romanga o Hemana de o Kakolo de o Darada. De ngaro hohidotelega to ona gea manga sosawaro de to Saloomo masara ka to unangohi duru ilaku-laku.

³² De hongoli una wohitulihuku ai sosawaro ma demo o sana hange de ai nyanyianga ma demo o sana moi ifoloi.

³³ De to una ai tobahioriki duru o fara moi hiadono una wakunu wahitararono de wadotoko o nyawaika ma titi o gota de o datomo irupa-rupa ma ngoe. Abe ngaro o gota duru ikokurutiye gea abe iwangoiye o Libanono ma tonakoka ka hiadono o datomo duru ma hohumuduru o hisopo abe ka idadi iwango o dadaduhu ma doongaka masara ka idadi wahingahu ma titi gea mata-mata. De ai sosawaro ma titi o aewani de o totaleo de o nawoko mata-mata, enangoo duru ilamoko ho ka idadi ai tobahioriki gea wahikodoku o nyawaika.

³⁴ De o tonaka utu homoi-homoi manga koano yokokiihene ma titi o Saloomo ai sosawaro gea ho yahidingoto manga nyawa unangika la ka idadi yototoihene to una ai dodotoko ma demoika abe duru isosawaro gea.