1 Kokoano 3 - Ma Jou ai Demo-demo o Totobelohoka

O Pasala 3 ko atailakouahi O Saloomo womagahoko o sosawaro

¹ De ipahaino de naga ma oraha abe o Saloomo de o Mesiiri manga koano abe iwiahoko o Firaunu, ona yahinooto yomahiketehibehehongo. De manga behehongo gea ma titi la ko idadiua o Isiraele ma nyawa de o Mesiiri ma nyawa yomaketeparangi masara kiani yomakuduhunu nako ahao naga manga musu. De manga behehongo ma hiaturu moi naga abe o Saloomo womile o Mesiiri manga koano ngoi ora de womihidadi to una ngoi fekata momatengo. Ho yoilaka de ahao womiao ai tauino abe naga o Yerusaleeme ma kota ma honongaka abe ihiromanga ato, “O Dautu ai kota abe yahigilolitino de o dadaduhu.” De genangoka muna momanoa ka hiadono ma oraha abe o nyawa ihigoko ibooto o Saloomo ai tau de Ma Jou o Yawe ai Tau de ma dadaduhu ma gurutiye abe ihigilolitino o Yerusaleeme ma kota ma amokika.

² De ma oraha gea ko ma moiuahi ihigoko Ma Jou o Yawe ai Tau abe iwidingaka Unangika, ho o nyawa ka ihikaika yodoa o loku-lokuiye la genangoka yomahihuba manga huhuba Ma Jouiye.

³ De o Saloomo una witobanii-niiki Ma Jouika abe ka ihikaika waniiki ai baba o Dautu ai hitiari de ai demo abe ma dihiraino ai baba widotoko unangika. Masara naga moi dika ai datoro abe ko itiaiua, de gea o Saloomo ka ihikaika wodoaiye o loku-lokuiye gea la womahihuba ai huhuba Ma Jouiye.

⁴ De nako o huhuba ma ngi o loku-lokuoka mata-mata masara naga moi abe ka enangohi ikokurutiye o nyawa manga hiningaka, de gea o Gibeono ma kotaka. Ho o wange moiuku de ma koano o Saloomo woiki o Gibeonika de wodoaiye ma huhuba ma ngiiye gea la womahuba genangoka. De una wao o aewani o dutu o sana moi de gea womahihuba iharo-harongo Ma Jou o Yaweika genangoka.

⁵ De ahao ma futuku gea de o Saloomo ai giooko ma gogiriaka de Ma Jou womahimatoko unangika ai buluhara ma goronaka. De gea Ma Jou wotemo unangika wato, “Ngona ka idadi nomagahoko moi Ngohino de gea Ngohi tosanangi dika tonihidoaka ngonaika.”

^6-7 De ahao o Saloomo wipaluhu wato, “Marai ma dihiraino de ahi baba o Dautu ka ihikaika wonileleani Ngonaika abe naga ai hingounu de ai hininga ma rorahai ani himangoka. De mangale ma titi ai hininga gea hiadono Ngona ahi Jou o Yawe duru nihiowa unangika ho ma utumu ma ngoe wamake. De hiadono o wange naa masara ka nihiowahi de ani dora angamoi nohikaaturu la ngohi to una ai ngofaka ka idadi tituruuru de todadi o koano. Masara ngohi naa hatoli ka o goohi abe ma titi ahi sosawaro ka ikurangohi.

⁸ De ngohi tonileleani Ngonaika abe todadi ani nyawa abe duru de manga ijaka ani himangoka to ona manga koano, masara ona gea duru ko manga ngoe hiadono ko takunua taetongo ona mata-mataika.

⁹ Ho mangale ma titi ahi tagongo duru ikurutiye gea onangoka hiadono ngohi tomagahoko o sosawaro Ngonaka de aino. Abe ma oraha kiani taputuhu manga kadatoro de duru toperelu ani sosawaro la ka idadi tohioriki onagona manga demo imakataana de ma totiai de to onagona manga hininga ko itaanua. Angamoi nako hoka to ngohi dika ahi hininga done sarakia tapoa tahipareta irahai to Ngona ani nyawa ko manga ngoe naa?”

¹⁰ De Ma Jou o Yawe ma oraha woihene o Saloomo ai gogahoko ma demo gea de wisanangi unangika.

¹¹ De Una wotemo o Saloomoika wato, “Duru irahai ani demo gea abe nomagahoko o sosawaro la ka idadi naputuhu itiai ma oraha naurusu o Isiraele ma nyawa manga kadatoro. De Ngohi tosanangi abe ngona ko nomagahokua o kiahonanga ma ngoe de ko nomagahokua la ani musu tahibalaha onangika.

¹² Ho mangale ma titi ani gogahoko gea irahai ho ka idadi tohimoteke enangika. Abe Ngohi tonihidoaka ngonaika o sosawaro de o tobahioriki ma amoko hiadono ngaro onagona dika ma dodihirainohi de onagona dika abe nanga himangika masara duru ko yaiwa abe manga hininga imaketero hoka to ngonali ani hininga!

¹³ De ka genangua dika tonihidoaka, masara ahao tonihidogoli ngonaika o kaya ma amoko de o nyawa manga horomati ma amoko! Ho ngaro o koano onagona dika o dunia ma amokika masara ko moiua yomakadaene hoka ngonali. De ani hiowa gea tonihidoaka de ahao duru itongohono, abe ngaro hiadono ani wowango ma baha masara gea mata-mata ka nagahi ngonaka!

¹⁴ De naa Ngohi tonihibehehongo ngonaika tato nako nohinii-niiki to Ngohi ahi hininga de ahi demo-demo abe imaketero hoka ani baba o Dautu unangoli wohiniiki, gea ahao tonihidoaka la ani wowango ikurutu o duniaka naa.”

¹⁵ De gea Ma Jou o Yawe wotemo ibooto de ahao o Saloomo womamaoino de wohioriki abe Ma Jou witemo unangika ai buluhara ma goronaka. Ho una wolio o Yerusaleeme ma kotaiye de wale o huhuba ma ngoe. De ma huhuba gea wao Ma Jou ai Petika de gea ma himangoka womaokoino de womahihuba ai huhuba gea. Abe utu ma huhuba iharo-harongo de utuoli ai dame ma huhuba. De gea ipaha de ahao una wahokino ai nyawa mata-mata abe iwileleani unangika de wodiadi o ngolo-ngolomo ma amoko la ona mata-mata yomakutuono yolomo.

O Saloomo ai sosawaro wapake la ai putuhu duru itaana

¹⁶ De ipaha o wange moiuku de naga o ngofeka yahinooto abe manga badanga yomatobafukunu de ona yokadatoro ma titi manga ngofaka. Ho ona gea yoboa ma koano o Saloomo ai himangino la ato una wotoihene manga demoino de ahao waputuhu onagona manga demo itaana.

¹⁷ De gea o ngofeka momatengo momahingahu mato, “Ahi baluhu de ahi koano, ngomi imihinooto naa mimahitau moi, de ipaha nengokadauino de ngohi tomagerewoto de tamake ahi ngofaka o nauru. De ma oraha tomagerewoto de munangoo gea naga o tau ma goronaka.

¹⁸ De ahao o futu hange ipahainoli de munangoo momagerewoto de mamake ami ngofaka o nauru. De mia tau ma goronaka gea de ka ngomi imihinooto dika, duru ko iwa o nyawa utu yomanoa ngomioka.

¹⁹ Masara de ahao idadi o futu moioka abe muna gea ami giooko ma goronaka de momalumomiki de mitapalu ami ngofaka ma gilauuku, ho una wohonenge ma titi ko idadiokaua wowomaha.

²⁰ De gea ngohi de ahi ngofaka ngomioo naga ahi ngingiduoka de duru ihikiooko. Ho o futu ma goronaka gea de muna momomikino de mitohiki to ngohi naa ahi ngofaka ahi datekoka de w/aino. De gea mikelenga to muna ami ngofaka wohone-honenge gea ahi datekoka la wodadi ahi ngofaka ma duruuru.

²¹ De ahao ma dawangeino ngohi tomamaoino tato tihuhu ahi ngofaka masara abeika, ma ngofaka gea wohonengoka! Masara ipahaino ahao ma oraha abe hatoli yotewedanga de ka idadi duru titailako ma ngofaka gea de ka idadi duru tihioriki abe una ko to ngohiua, gea to muna ami ngofaka!”

²² De duru ma oraha gea de ma ngofeka momatengoli mohitoaka ami dodiawo ami demo ho munangoli motemo mato, “Koua! To ngohi ahi ngofaka una ka wowangohi masara to ngona wohonengoka!” De ahao muna mohira-hira motemoli mato, “Duru hokogenangua! Angamoi gea to ngona abe wohonengoka, de to ngohi naa abe wowango-wango!” Ho hokogea ona yahinooto yomaketeribuutu o koano ai himangoka.

²³ De o Saloomo wotoihene manga demoino de ahao una watemo onangika wato, “Abeika ti ngini nia kadatoro ma demo. Abe ngona nohira-hira nato, ‘Ahi ngofaka ka wowangohi masara to ngona wohonengoka.’ De ani dodiawo gea ami demo ka imakadaene dika abe muna mato, ‘Koua, gea to ngona ani ngofaka wohonengoka masara to ngohi naa ka wowangohi.’”

²⁴ De ahao ma koano wahuloko ai nyawaika la o humaranga moi yaoino de iwihidoaka unangika, ho gea yaleohi de yakelenga ai himangoka.

²⁵ De ahao o Saloomo wotemo wato, “Abeika ma ngofaka wowango-wango naa hitoaka hinooto de ahao ai dobiki moi hohidoaka momatengoika de ai dobiki moioli hohidoaka ami dodiawoika!”

²⁶ De ma koano ai demo gea moihene de ma ngofaka wowango-wango ngomi meme ma gou-goungu ami dora ma hiokoo imihipareta ami hiningaka. Ho muna momataiti mopoaka de ami ilingi ma amokiye mato, “Ahi koano, ko idadiua! Ufa hiadono niwihohonenge ma ngofaka naa. Koaho niwihidoaka munangika dika done wohonenge.” Masara ma ngofeka momatengoli gea mato, “Koua! Koaho niwitobiki dika la ngaro ngohi masara ko timakeua de ngaro munangoo gea masara ko mimakeua ma ngofaka naa!”

²⁷ De o Saloomo wotoihene manga demo homoi-homoi gea de ahao wahuloko ai nyawaika wato, “Ko idadiua hitobiki ma ngofaka ma gilau naa. Masara ka idadi hihidoaka munangika abe mohira-hira motemo, angamoi duru tohioriki muna gea ngoi meme ma gou-goungu!”

²⁸ De ipahaino de o Isiraele ma nyawa mata-mata yomaketeade-ade ma titi manga koano ai putuhu abe duru isosawaro gea ma oraha waurusu de watailako ona yahinooto manga kadatoro. De ona mata-mata duru iwihioriki abe Ma Jou wihiowa manga koanoika de o sosawaro abe duru o fara moi ho yokokiheranga hiadono manga horomati ma amoko iwihidoaka o Saloomoika.