1 Kokoano 22 - Ma Jou ai Demo-demo o Totobelohoka

O koano o Ahaba wohonenge

¹ O taongo hangeino ma dekana de o parangi duru ko iwaka abe o Isiraele ma nyawa de o Arama ma nyawa yomaketeparangi.

² De o taongo ma hangeoka o Yosafata womulaenge wahikoano o Isiraele ma nyawa daku o Yehuda ma tonakoka de una woiki womarekata o Ahabika abe wahikoano o Isiraele ma nyawa abe dau o Isiraele ma tonakoka.

³ De o wange muruono o Yosafata wogogere o Ahaba ai tauoka ho o wange moiuku o Ahaba de ai popareta ma nyawa yatoomuino yomakoketemo de o Yosafata unangoo naga manga doomuoka. De o Ahaba wotemo onangika, wato, “Abeika nanga kota o Ramoto-Gileada abe ma dihira o Arama ma nyawa yale de yapareta ka hiadono ma oraha naa ngaro ona inahibehehongo ihigilio to ngone nanga kuahaino. Masara yoeluku angamoi naa duru ma dekanino hokogea inahibehehongo masara o Ramoto-Gileada ma kota ona ka yaparetahi. De ngone homarii-riidoka dika, abe ko moiua hodiai la haribuutu onangika hiadono nanga kota gea ihigilio ngoneino e? Abeika, hokogea ma dihiraino manga koano wonahibehehongoka de manga behehongo ko ihingodumua!”

⁴ De ahao o Ahaba womaleloro o Yosafatika wihimangika de wileha, wato, “Sarakia, mode ngona nohiduhunu ka idadi la haparangi o Arama ma nyawa o Ramoto-Gileada ma kotaka?” De o Yosafata wipaluhu o Ahabika, wato, “Ngaro ufa dika de noleha angamoi ngona de ngohi o ria-dodoto ho tosanangi toniduhunu. De imaketero dika abe to ngohi ahi tentara gea hoka to ngona ani tentara, de to ngohi ahi kuda haetongo imaketero hoka to ngona ani kuda. Ho tododamaa dika ngone hosobo la ani kota gea hohigilio ngonaino!”

22:5-28 ko atailakouahi

⁵ De ahao o Yosafata wohidogo ai demoika wato, “Masara koaho ko holageuahi de ihira ngone holingirohi Ma Jou o Yawe ai hininga sarakia.”

⁶ Ho o Ahaba wahokino o uru ma dodofanga yaratuhu iata de waleha onangika wato, “Koaho irahai hoiki haparangi o Ramoto-Gileada ma kotaika eko ngaro ufa dika?” De ona yopaluhu ato, “Ngini niaparangi dika onangika! Angamoi Una Wokokurutiye ahao wahidoaka ma kota gea ani giamika.”

⁷ Masara o Yosafata ka wolehahi wato, “Sarakia, ko moiua Ma Jou o Yawe ai uru ma dodofanga naangoka la ka idadi hileha unangikaoo?”

⁸ De gea o Ahaba wipaluhu unangika wato, “Igoungu naga womatengokahi abe tanu ka idadi hileha unangika la hohioriki Ma Jou o Yawe ai hininga. Masara ngohi duru tiemono unangika gea, angamoi ka ihikaika ai demoino de una wato ahao duru ko iwa ma owa tamake masara ka o kangela de o bodito dika ahao ngohi tamake. De una gea ai romanga o Mika abe o Yimala ai ngofaka.” De o Yosafata woihene ai demo gea de witaere wato, “Marai ani demo gea ko itaanua. Abe koaho o koano manga demo hokogenangua.”

⁹ De o Ahaba wibehehongo ai duduhunu womatengo, ho woboaino de ahao ma koano wihuloko unangika wato, “Nomataiti noiki nileino o Mika abe o Yimala ai ngofaka.”

¹⁰ De ma oraha gea ma koano yahinooto gea yoborigogeruku manga kadera homoi-homoioka abe naga o gandumu ma rorero ma ngioka. De ma rorero ma ngi gea imahitigino de o Samaria ma kota ma ngorana. De ma koano yahinooto gea naga de manga baju duru ma rorahaioka. De manga uru ma dodofanga onangoo naga manga himangoka de yahingahu-ngahu abe bari o kia ahao idadi.

¹¹ De ahao naga o Sedekia abe o Kenaana ai ngofaka, una manga uru ma dodofanga womatengo. De una wotutuku moi o behino abe ma rupa hoka o hapi ma tataduku. Gea wodiai ibooto de ahao wotemo wato, “Hokonaa Ma Jou o Yawe ai demo, Una wato, ‘Naa ma tataduku ahao niapake la genangino de niahipata o Arama ma nyawa gea hiadono yakokibinaahaka.’”

¹² De ma uru ma dodofanga gea mata-mata manga demo ka moi dika, abe yahigaro ato, “Ka idadi niaparangi dika o Ramoto-Gileada ma kotaika angamoi ahao nilaku. Abe Ma Jou o Yawe ahao wahidoaka ona gea to ngona ani giamika, mia koano.”

¹³ De womatengo gea abe kangano o Ahaba wihuloko la woiki wile o Mika, una womahiadono o Mikaika de witemo unangika wato, “Abeika notoihene ahi demoino, angamoi ma uru ma dodofanga utu, ona mata-mata manga demo ka moi abe ato ma koano ai hidee ahao de ma hasiloka. Ho to ngonaoo ani demo kiani imakadaene dika de to onangoli, abe kiani nihingahu nanga koanoika nato ahao wamake ma hasili irahai dika.”

¹⁴ Masara gea o Mika wopaluhu wato, “Naa duru tagou-goungu tonihingahu abe duru imaketero hoka Ma Jou o Yawe igoungu wowango, to ngohi ahi demo nenangoo duru ma gou-goungu. Abe ma oraha ngohi de nanga koano mimaketemo de tihingahu unangika ma demo o kia dika abe Ma Jou o Yawe wohihuloko la tohidemo ma koanoika. De abe ma demo ma homoa duru ko totemoua ngohi.”

¹⁵ De ipaha ma oraha woboaino de yomarihimanga de ma koano de ma koano wileha unangika wato, “Mika, sarakia, koaho irahai hoiki haparangi o Ramoto-Gileada ma kotaika eko ngaro ufa dika?” De o Mika wipaluhu wato, “Ka idadi niaparangi dika o Ramoto-Gileada ma kotaika angamoi ahao nilaku. Abe Ma Jou o Yawe ahao wahidoaka ona gea to ngona ani giamika, mia koano.”

¹⁶ De ma demo gea woihene de o Ahaba witaere o Mikaika wato, “Marai naa ma moioli kiani tonihitiari la duru nohibehehongo ngohino hiadono ani demo ma gou-goungu dika nohihingahu. Abe naa tonihuloko la nomahikoboto de nifetongo Ma Jou o Yawe ai romanga la genangino de ahao ka idadi tonihioriki abe ani demo ma gou-goungu dika ngohino.”

¹⁷ De gea o Mika waniiki ma koano ai huhuloko ma demo, ho ipaha de wihingahu ma gou-goungu ma koanoika. Abe una wato, “Hokonaa abe Ma Jou wohihimatoko ngohino. Ngohi tamake o Isiraele ma nyawa mata-mata yomahikabarihoka o loku-lokuoka abe hoka o domba ma ngoe de ko iwa ma gogoana. De ahao Ma Jou o Yawe wotemo wato, ‘To ena ma baluhu ko iwiwa, ho koaho ikokilio dika la ko kia-kiaua idadi enangika.’”

¹⁸ De ahao o Ahaba witemo o Yosafatika wato, “Gea! Hoka kangano totemoka, una gea ai demoino de duru ko ma iwa abe wato ma rorahai tamake. Ka o kangela de o bodito dika wohihingahu wato ahao ngohi taohana!”

¹⁹ De gea o Mika wohigila-gila ai demo wato, “Mangale ma titi gea ho abeika nitotoihene Ma Jou o Yawe ai demo naa. Ngohi timake Ma Jou o Yawe wogogeruku ai kaderaka, de nagali genangoka ona abe o Horoga ma dodoomuoka de yomaokoino ai aridatekoka.

²⁰ De Ma Jou o Yawe wotemo wato, ‘Onagona ahao ka idadi o Ahaba ai buku ale-leloro hiadono una waparangi o Ramoto-Gileada ma kotaika la ka idadi wohonenge genangoka?’ De naga utu manga doomuino abe manga demo hokonaa de hokonaa.

²¹ De ahao naga o womaha womatengo onangino abe woaguru ho womaokoino Ma Jou o Yawe ai himangoka. De una wotemo wato, ‘Ngohi ahao ka idadi o Ahaba ai buku tale-leloro.’ De Ma Jou o Yawe wileha unangika wato, ‘Ho ani hidee nieluku sarakia?’

²² Una wipaluhu wato, ‘Ngohi toiki de tohiaturu la o Ahaba ai uru ma dodofanga mata-mata ka yoelu-eluku dika.’ De gea Ma Jou o Yawe wohimoteke ho wato, ‘Noiki de ai buku nale-leloro dika, de ipaha ahao ani hidee gea de ma hasiloka.’”

²³ De o Mika ka wotemohi wato, “Hokogea abe Ma Jou wohihimatoko ngohino. De naa igoungu itararonoka abe Ma Jou o Yawe wohiaturu la to ngona ani uru ma dodofanga mata-mata yokokieluku ngonaika. Angamoi Ma Jou o Yawe waputuhoka wato to ngona ani wowango ma baha itigioka.”

²⁴ De gea ahao o Sedekia womahitigi o Mikaika de ka wipoka ai himangika. De una duru witaere unangika wato, “Ho naa bote ngona nato Ma Jou o Womaha wohinoa ngohi la ka idadi wotemo ngonaikali e?”

²⁵ De o Mika wipaluhu de ai demo ma doto unangika wato, “Gea ma babaluhu ahao nataoko itiai abe ma oraha ani kangela naohana, ho noara nomagogono o tau ma gogoronaka.”

²⁶ De ahao ma koano o Ahaba wahuloko ai nyawa la iwitaoko dika o Mika gea. Una wato, “Niwiaoika de niwihidoaka o kota ma gubernuuru o Amonika de ahi ngofaka o Yoasika.

²⁷ De kiani niadofanga ahi huhuloko ma demo naa, niato, ‘Una naa niwihingohama o bui ma tau ma goronaika, de niwihidoaka ka o roti de o akere dika. Ka gea dika ai inomo niwihidoaka ka hiadono ngohi tolioino abe o parangioka de taino ahi tauino.’ Hokogea niahuloko onangika.”

²⁸ Masara o Mika ka wotemoli wato, “Nako hoka ngona o parangioka de nolio de ko kia-kiaua idadi ngonaika, gea ma titi Ma Jou o Yawe ko wotemoua to ngohi ahi uruino!” De ahao ka wodogoli wato, “Ngini mata-mata koaho niongano-nganono ahi demoino naa de ufa niawohanga!”

²⁹ Ho o Isiraele manga koano o Ahaba de o Yehuda manga koano o Yosafata ahao manga tentara yatoomuino la yahihira-hira o Ramoto-Gileada ma kotaika.

³⁰ De yomahidiai yosobo yaparangi de o Ahaba wahiaturu wato, “Ngohi naa ko tapakeua o koano ma baju masara ngona o Yosafata kiani o koano ma baju napake o parangi ma goronaka. Ngohi o pakeanga biaha dika tapake o parangi ma goronaka la ko moiua o nyawa ihihioriki.” Hokogea o Ahaba ai hidee la womadatoko o boditoino. De ahao yosobo yoiki o Arama ma nyawa gea yaparangi.

³¹ De doka o Arama ma koano, abe ma oraha onangoo yomahidiai yoparangi, una wahingahu ona yotobaao-ao o parangi ma goroba, wato, “Ngini inimoruange de inihinooto masara nia dumutu ka womatengoika dika de una o Ahaba abe o Isiraele manga koano kiani niwihohonenge.”

³² Hokogea manga koano ai huhuloko onangika abe yotobaao-ao o gogoroba ma parangioka. Ho ka de ona iwimake o Yosafata ai gorobaka de iwihioriki una o koano angamoi wapake o koano ma pakeanga ho yomakoboaka de yomahikagaro ato, “Abeika, gea una o Isiraele manga koano!” Masara o Yosafata wamake ona iwidoara de unangoo waboaka womahingahu, wato, “Ngohi naa ko o Ahabua.”

³³ Ho ka de ona o Aramino ma tentara iwihioriki abe una ko o Isiraele manga koanoua de yomatogumu ho ko iwidoarokaua.

³⁴ Masara naga womatengo o Arama ma tentara wotoimi o Isiraele ma nyawa manga tentara ma doomuika ko iwa ai dumutu ho wohidutugaika wotoimi la wato iti abe yadubuku. De ai hihiipi iwidaene o Ahabika duru ai alu ma dadatoko ma baju ma dabioko abe ka idadi ihapongo ai badangika. De o Ahaba wihuloko unangika abe ai goroba wao-ao de duru ai gururihi ma demo, wato, “Nomataiti nohihihupu nenangino! O hihiipi ihidaenoka ho duru ihibiha!”

³⁵ Masara o Isiraele ma nyawa de o Arama ma nyawa duru yomaketeparangi de manga buturungu o ngorumino ka hiadono o bobimaowaka de o Ahaba ai goroba ko yomadaenua yohupu yoara. Masara o Ahaba iwitagaiye hiadono ko worubaua ai goroba ma goronauku de ai awunu iuihi ai goroba ma dodokouku. De o wange ngade-ngade adono itumunu de o Ahaba wohonenge.

³⁶ Ka de o wange igila-gila itumunu de ai tentara yomulaenge yomakoboaka ato, “Holio dika, nanga koano wohonengoka ho o parangi naa ibootoka.”

³⁷ Ho manga koano wohonengoka ho ai honenge yao o Samaria ma kotaika de iwilungunu genangoka.

³⁸ De o Ahaba ai goroba yaihoro o akere ma taaga ma datekoka o Samaria ma kota ma poretoka abe genangoka o ngo-ngofeka abe yomatobafuku-fukunu manga badanga yomaohiki. De ma oraha gea naga o kaho muruono naga iboaino de o Ahaba ai awunu yaale-aleme. Ho gea idadi duru imaketero abe hoka ma dihirainoka Ma Jou o Yawe wohibehehongoka.

³⁹ De mata-mata utu abe o Ahaba wodiai ma oraha o Isiraele ma nyawa wahikoano naga ma ade-ade. De ai ade-ade abe ma titi o koano ma tau abe wodiai de wohibilere de o aewani o gaja ma hihipatino, de ma ade-ade ma titi abe o kota-kota abe wohigoko, ena gea mata-mata ihitulihukuoka o buku moioka ma romanga, “O Kokoano abe Ihikoano o Isiraele ma Tonakoka manga Ade-ade.”

⁴⁰ De ma oraha o Ahaba wohonenge de una iwilungunu ai totofora manga lungunu ma ngi-ngi ma goronaka. De ahao ai ngofaka o Ahasia wodadi ai duruuru ho unangoli wahikoano o Isiraele ma nyawa.

O koano o Yosafata ai ade-ade abe wohikoano o Yehuda ma tonakoka

⁴¹ O Yosafata, abe ai baba o Asa, una gea wahikoano o Isiraele ma nyawa abe daku yogogere o Yehuda ma tonakoka imaniiki ma oraha abe o Ahaba wohikoano dau o Isiraele ma tonakoka. Abe o Yosafata wodadi o koano ma oraha o Ahaba wohikoano ngade-ngade ai taongo iatino ma dekanino.

⁴² De o Yosafata ai ngumuru adonoka ai taongo moruange de motoa ma oraha wodadi o koano de ai nyawa wahikoano ai taongo monaoko de motoa ma dekanino o Yerusaleeme ma kotaka. To una ngoi meme o ngo Asuba abe ami baba o Silihi.

⁴³ De o Yosafata una o koano irahai abe ai wowango ma datoro hoka to una ai babali o Asa ai datoro. Abe una wodiai iwihisanangi Ma Jou o Yawe ai himangoka.

⁴⁴ Masara ngaro ai dekana wohikoano ma ko wamataua wohibinaaha o popangao ma huhuba ma ngi abe naga o tonaka itoporoniye ma tubu-tubuoka o Yehuda ma tonakoka. De ai nyawa manga huhuba ka yahihubahi o popangao ma huhuba ma ngi-ngioka gea de genangoka yotobatufuku o manyanyi manga popangaoika.

⁴⁵ De o Yosafata wahikadame de o Isiraele ma nyawa manga koano o Ahaba.

⁴⁶ De mata-mata utu abe wodiai o Yosafata ma oraha wohikoano abe hokokia wohidagi ai kuaha ai kokawaahaika de hokokia ai nyawa wahihira-hira o parangioka, ma ade-ade abe ma titi mata-mata gea ihitulihukuoka o buku moioka ma romanga, “O Kokoano abe Ihikoano o Yehuda ma Tonakoka manga Ade-ade.”

⁴⁷ Abe ma dihiraino ma oraha o Yosafata ai baba o Asa wohikoanohi de o Asa wakiniiki o nyawa manga ngoe abe yomahidadidorou o jou-jou ma homoa ma huhuba ma ngi-ngioka. Masara o Asa ko wakiditokua o nyawa gea ho ona utu nagahi o Yehuda ma tonakoka. Ho naa ai ngofaka o Yosafata una ka idadi wakiditoko wakiniiki ona gea abe manga howono duru itorou hiadono ona duru ko yaiwaka o Yehuda ma tonakoka.

⁴⁸ De ma oraha gea doka o Edomo ma tonakoka de ko iwa manga koano, masara naga womatengo abe iwiahoko manga gubernuuru abe wahipareta onangoka.

⁴⁹ De ma oraha o Yosafata wohikoano de una wahuloko ai nyawa la yodiai o kapa ma ago-agomo ma ngoeika. Abe ma koano ai hininga la to una ai nyawa ka idadi yotagi-tagi yohidete o gahioka hiadono o Ofiri ma tonakika de genangoka yamake o gurasi de gea yao unangino. Masara ngaro yodiai ibooto ai kapa gea ma ko yomahiadonikaua o Ofiri ma tonakika angamoi o Esiono Geberokahi de ma kapa gea ikokirusakoka.

⁵⁰ De ipahaino de o Isiraele manga koano o Ahasia una wihigaro o Yosafatika wato, “Marai irahai nako to ngohi ahi nyawa utu tahidingoto ngonaika la ona de to ngonali ani nyawa ka idadi yomakuduhunu yohidete o kapa done o kangela yaohana.” Masara o Ahasia ai demo gea ko wodosanangiua enangika ho ma duduhunu gea o Yosafata ka waoluku dika.

⁵¹ De ma oraha o Yosafata wohonenge de unangoo iwilungunu o Dautu ai totofora manga lungunu ma ngi-ngioka o Dautu ai kota ma goronaka. De ahao to unangoli ai ngofaka o Yorama wodadi ai duruuru, abe unangoli ahao wohikoano o Yehuda ma tonakoka.

O koano o Ahasia ai ade-ade ma dobiki

⁵² De ma oraha o Ahaba wohonengoka de ai ngofaka o Ahasia wituruuru ai baba ho unangoli womulaenge wahikoano o Samaria ma kotaka. De ma oraha gea dau o Isiraele ma tonakoka o Yosafata wahikoano o Yehuda ma nyawa ngade-ngade o taongo ngimoi de tumidi ma dekanino. De o Ahasia una gea wohikoano o taongo hinooto dika ma dekana.

⁵³ De una wodiai abe duru itotorou Ma Jou o Yawe ai himangoka angamoi una waniiki ai baba o Ahaba de ngoi meme o ngo Isebele manga biaha abe duru yomahijou o pangao o Baalika. De manga koano ma dihira o Yerobeama una o koano abe ai kokawaaha duru wahigaro ma dorouika hiadono o Isiraele ma nyawa duru yahowono Ma Jouika de naa duru hokogenangoli o Ahasia wodiai.

⁵⁴ Abe o Ahasia una woleleani o pangao o Baala ho enangika womahuba-huba. Masara tanu o Isiraele ma nyawa kiani yomahijou Ma Jou o Yaweika abe kiani ka Una dika to ona manga Jou. Ho Ma Jou o Yawe womalega o Ahasia ai datoro ma dorouika de gea duru ai ngamo ifae unangika angamoi wodiai ma dorou mata-mata abe hoka ai babali, o Ahaba wodiai.