1 Kokoano 21 - Ma Jou ai Demo-demo o Totobelohoka

O koano o Ahaba woigo o Naboto ai angguru ma redi womale

¹ De o Ahaba ai koano ma tau naga moioli o Yisereele ma kotaka, de ai tau ma datekoka naga o angguru ma redi abe ma dutu o Yisereele ma nyawa ai romanga o Naboto.

² De o wange moiuku o Ahaba woiki witutumu o Nabotika de wihingahu unangika, wato, “Ngohi tonitutumu ngona ma titi toigo ngohi tomaija ani angguru ma redi de angamoi duru imakadateke ahi tauino ho duru toigo la idadi ahi gauku ma redi. De ani redi gea ngohi ka idadi taturuuru abe de o tonaka utuohi irahai eko nako ngona noigo ka idadi tofangu de o tiwi.” Hokogea o Ahaba wihingahu o Nabotika.

³ Masara o Naboto wopaluhu, wato, “Tomahilooa ahi koano, masara Ma Jou o Yawe ko wohihigunoaua hiadono ahi tonaka gea tonihidoaka ngonaika! De Una hokogea angamoi o tonaka gea to ngohi ahi oara abe ahi totoforaka de aino ka hiadono naa ngohi tamake.” Hokogea o Naboto woluku ai redi wafukunu.

⁴ Ho o Ahaba wolio duru de ai ngamo de duru ai himanga itafukuoka angamoi o Naboto hokogea ai babaluhu ma demo. De womaiduiha ai koioka de ai kamara ma dadaduhika wohimangika de woluku wolomo.

⁵ De ngoi fekata o ngo Isebele mitutumu de mileha unangika, mato, “Ani huha o wani o kia ma titi? Marai duru de ani hininga ma huhaka abe hiadono noluku ani inomo naolomo.”

⁶ De ami rokata womipaluhu womihingahu wato, “Ngohi naa duru ahi huha ihititi o Nabotoka abe una gea nanga datekoka! De ngaro ngohi o koano de tato ai angguru ma redi tomaija eko abe tato ka idadi taturuuru masara una woluku ho duru tongamo.” Hokogea o Ahaba woboi ai redi.

⁷ De muna mopaluhu mato, “Ho, sarakia, ngona ko o Isiraele ma nyawa manga koanoua? Nomomikiye, de noiki nolomo, de ngaro ufa nopusingi ma titi o tonaka gea. Ngohi naa ka idadi tonihidoaka o Naboto ai angguru ma redi gea. Ho ibootoka ngona nongamo.” Hokogea o ngo Isebele mitaere ami rokatika.

⁸ De to muna ami hidee naga ho ihira o hurata muruono naga motulihi de mapake ami rokata ai romanga de ahao mohitataulika de o lilingi de ahao ma guihi gea mohitunguu de o koano ai kuaha ma dodunguu de o hurata gea mohidingoto o Naboto ai kota ma hohidimonika de o kokawaaha manga hihira utuika.

⁹ De ami hurata ma titi abe o kota ma kawaaha kiani manga hihira yatoomuino, de itemo ato, “Ngohi naa nia koano tinihibehehongo la o kota ma kokawaaha niatoomuino la yomaniata de ufa yolomo la manga hininga ma dumutu ka manga niniatika dika. De kiani o Naboto niwihigogere o gogogeruku abe ka enangohi duru ihitunguu o horomati ilamoko unangika.

¹⁰ De ngini o kota ma dimo-dimono kiani o nauru nialingiri yatobahowo-howono yahinooto abe ko yopusingua yodiai itorou, de ona yahinooto gea niahewa. De niahikarajaanga la o doomu ma goronaka de ona yomaokoino de duru iwitae o Nabotika de yoade-ade abe yoihene una widoana Ma Jouika. De abe ngohioo, nia koano, o Naboto wohidoana o nyawa manga himangoka. De ngini o kota ma dimo-dimono ahao kiani niwiao o Naboto ma hoanika de genangoka ngini o doomuoka ka hiadono niwihakaru ka hiadono una wohonenge.” Hokogea o ngo Isebele ami ngeluku ma hurata ma hingahu abe motulihi mapake o koano ai kuaha.

¹¹ Ho o kota ma hohidimono de o kokawaaha manga hihira-hira yakokiniiki abe o hurata ma behehongo abe o ngo Isebele motulihi.

¹² De o kota ma kokawaaha yomatoomuino la yomaniata de yahitiari la ufa yolomo la manga hininga ma dumutu ka manga niniatika dika. De o Naboto iwihigogere ma kuruhiiuku abe ka enangohi ihitunguuoka de ma horomati unangika ho genangoka o Naboto wogogeruku.

¹³ De ahao ona yotobadiai o demo ma dorou yahinooto gea abe yahewaka, ona yogogeruku la yomarihimanga de o Naboto. De ona iwitae ho iwihiade-ade o nyawa mata-mata manga himangoka ato iwimake abe Ma Jou widoana de ai koanoo ma, widoana. Ho ona o doomuoka gea o Naboto iwiao iwiliara iwihihupuoka o kota ma poretika de genangoka iwihakaru ka hiadono wohonenge.

¹⁴ De o kota ma dimo-dimono manga hidingoto womatengo woiki manga hingahu wadofanga o ngo Isebelika, ato, “O Naboto iwihohowono de o hakaru hiadono wohonengoka.” Hokogea dika manga hingahu ma gurutu munangika.

¹⁵ Ka de o ngo Isebele moihene o abari gea abe o Naboto iwihakaru hiadono wohonengoka de moiki mihingahu o Ahabika, mato, “Ahi rokata, nomomikoka! Naa adonoka ngona o angguru ma redi gea ka idadi nomale dika abe o Naboto gea woluku wofukunu ngonaika. Angamoi ko wowangokaua abe una wohonengoka!”

¹⁶ Hokogea woihene de o Ahaba wosoboka woiki o angguru ma redika gea la ka idadi ma tonaka gea womahitounangoka.

¹⁷ Masara Ma Jou o Yawe wimake abe gea mata-mata idadi de wihibehehongo o Eliaika abe Ma Jou ai uru ma dodofanga, wato,

¹⁸ “Elia, ngona daukuku noiki nitutumu o Ahaba abe wohikoano o Samaria ma tonakoka. Una ahao nimake o Naboto ai angguru ma redioka o Yisereele ma kota ma goronaka abe ma oraha naa ma redi gea womahitounangoka.

¹⁹ De hokonaa ngona kiani nadofanga ahi hingahu o Ahabika, nato, ‘Ma Jou o Yawe naga ai hingahu ngonaika wato, “Sarakia ngona, o Naboto gea nitomaka de ko iniwedonua hiadono ngona noigo ai tonakoo niora? De angamoi igoungu hokogea ngona nodiai, ho ngonaoo ahao nohonenge o kota ma dadaduhu ma poretoka de hokogea ahao idadi imaketero abe hoka o kaho ma ngoe iboa o Naboto ai awunu yaale-aleme, hokogea to ngonaoo ahao ani awunu de o kaho iboa de yaale-aleme.”’” Hokogea Ma Jou ai hingahu abe kiani o Elia wadofanga o Ahabika.

²⁰ Ho ka de o Elia gea o Ahaba witutumu o Naboto ai redioka de o Ahaba wibanarata o Eliaika, wato, “Ho ngona! Abeika ahi musu wohilingiri de wohimakeoka!” De o Elia wipaluhu, wato, “Nagoungu, tonimakeoka de ngohi toboa angamoi ngona nomafukunoka o howo-howonika abe duru itorou Ma Jou o Yawe ai himangoka.”

²¹ De o Elia wihiree-reeika, wato, “De Ma Jou o Yawe ahao wohiboa o hibinaaha ngonaika hiadono ngona nohonenge. De ona ani tauoka ngaro ani ngofaka o nauru idodutu eko o nau-nauru abe nomaijaino masara ko moiua abe Ma Jou ai hibinaaha ma hohowono ko yadaenua onangika. Ho o nau-nauru ko moiokaua yogogere ani tauoka o Isiraele ma tonakoka.

²² Abe imaketero hoka Ma Jou wahikokibinaaha ma koano o Yerobeama de o nau-nauru ai tauoka mata-mataika. De imakadaene hoka ma koano o Baesali de o nau-nauru ai tauoka mata-mataika, duru hokogenangoli abe ngona de ona ani tauoka Ma Jou winihikokibinaaha. De hokogea winihibinaaha angamoi ngona duru nodiai itorou abe o Isiraele ma nyawa nahirehene o howo-howonika hiadono Ma Jou ai ngamo duru ifae ngonaika. Hokogea Ma Jou ai hingahu ngona o Ahabika.”

²³ “De Ma Jou o Yawe wohihingahuoo abe to ngona ngoni fekata, munangoo mohonenge itorou hiadono o kota o Yisereele ma kaho ikokiboa to muna ami honenge yaolomo o kota ma dadaduhu ma datekoka.

²⁴ De ngaro ona ani tauoka yohonenge o kota ma goronaka masara onangoo manga honenge o kaho yaolomo. De abe ona yohonenge o kota ma hoanoka de ahao iboaino o totaleo abe manga honenge yaolomo.” Hokogea o Elia wihingahu o Ahabika.

²⁵ De nako o Ahaba ai wowango ma datoro ihikohowono de o nyawa utu, ka unangohi abe duru womafukunoka o howo-howonika abe duru ai datoro itorou Ma Jou o Yawe ai himangoka de angamoi ngoi fekata o ngo Isebele mihigaro o howonika.

²⁶ De o Ahaba duru womahitaanoka kiani ai hohowono duru itubuho angamoi ai dula-dulaka duru ma dorou o popangaoika abe womahuba-huba imaketero hoka o Amori ma nyawa abe ma dihira yogogere o Isiraele ma tonakoka gea. De ona abe ma dihira gea Ma Jou waduhuokahi ma tonakino gea de ahao to Una ai nyawali wahingohama manga tonakika gea.

²⁷ De ka de o Ahaba woihene Ma Jou o Yawe ai hingahu gea, de duru wohuhaholi hiadono ai pakeanga ai badangoka wakakihi de womahinoa o pakeanga ma kokekekere o karongino. De gea ko wolomua de ngaro womaidu ma ka wapakeohi ma pakeanga gea dika. De una waino waika de ai hininga ma dubuho wohigogururihi.

²⁸ De ahao Ma Jou o Yawe ai hingahu moioli wihidoaka o Eliaika,

²⁹ de wotemo, wato, “Elia, sarakia, ngona nimakeoka o Ahaba abe una duru wagou-goungu womahitipokouku ahi himangoka de womatoduba? De mangale ma titi hokogea abe una womatoduba hiadono ahi hohowono to una ai tauika ko tohidagiuahi abe ma oraha una ka wowangohi. Masara una wohonengoka de ai ngofa-ngofaka ka yowangohi de ahao ahi hohowono ahao tohidagi onangikali. Ngohi ahao ma oraha gea ai ngofa-ngofakuku de ai dano-danonguku duru tahikokihibinaaha.” Hokogea Ma Jou ai demo o Eliaika.