1 Kokoano 20 - Ma Jou ai Demo-demo o Totobelohoka

O koano o Bene-Hadada wato waparangi o Samaria ma kotaika

¹ De o wange moiuku o koano o Bene-Hadada abe una wohikoano o Arama ma tonakoka to una ai tentara wakokitoomuino. Ho gea yomatoomuino de nagali abe yoboa iwiduhunu o Arama ma kota-kotaino manga kokoano yamoruange de yahinooto. De ma kokoano gea naga de to ona manga kuda de manga parangi ma gogoroba kohangoe. De o Bene-Hadada de ai tentara mata-mata ona yokokisobo yoiki o Isiraele ma nyawa manga tonakika la ato o Samaria ma kotaika yaparangi de manga buturungu.

² De o Bene-Hadada gea ai hidingoto ma nyawa yamuruono naga wahuloko la ai demo yadofanga o Ahabika abe wahikoano o Isiraele ma tonakoka. De wahingahu onangika wato, “Kiani hokonaa abe ahi demo niadofanga o Ahabika, niato,

³ ‘Ngohi o Bene-Hadada tonihingahu ngona, o Ahabika, abe to ngona ani haaka mata-mata, de to ngona ani gurasi ma dutu mata-mata idadioka to ngohi. De abe to ngona ngoni feka-fekata ka onangohi yorahai de to ngonaoo abe ani ngofa-ngofaka ka onangohi yorahai, ma oraha naa onangoo mata-mata yodadioka to ngohi.’ Hokogea ahi hingahu abe kiani niadofanga o Ahabika.”

⁴ Ho o Bene-Hadada ai hidingoto ma nyawa gea yoiki de ai hingahu yadofanga o Ahabika. De o Ahaba ai bobaluhu hokonaa, wato, “Ahi baluhu, tosanangi dika to ngona ani hingahu ngohino. Ho mata-mata abe naga ahi tauoka de ngohioo ma oraha naa ena gea mata-mata idadioka to ngona.” De o Ahaba ai demo o Bene-Hadada ai hidingoto ma nyawa ka de yoihenoka de yolio iwihingahu manga koano o Bene-Hadadika.

⁵ De ko itedekanua o Bene-Hadada ai hidingoto ma nyawa yoboali o Ahabika de iwihingahu, ato, “Hokonaa mia koano o Bene-Hadada ai demo moioli ngonaika, ‘Ngohi o Bene-Hadada nengokadauino de tonihulokoka ngona o Ahabika abe kiani nohihidoaka ngohino ani haaka, de ani gurasi, de ngoni feka-fekata, de ani ngofa-ngofaka.

⁶ Masara itebini nako adonoka ma takoro hokonaa de ahi popareta ma nyawa yoboa ngonaika. De ona yoboa ma titi duru yatailako ani tau ma amokika. De to ngona ani popareta ma nyawa to onangoo manga tau yatailako homoi-homoiika de o kia dika yamake de ma ijaka gea ena idadioka to ngohi mata-mata ho enangoo ona yakokile.’ Hokogea o Ahaba, gea to ngomi mia koano ai hingahu ngonaika.” De o Ahaba woihenoka ho o Bene-Hadada ai hidingoto ma nyawa yosoboka.

⁷ De ahao o Ahaba wabehehongo o Isiraele ma nyawa manga hihira mata-mataika la yomataiti yokokiboa yomatoomuino unangoka. Ho ona gea yoboaka de waade-ade onangika ma titi o Bene-Hadada ai hingahu unangika, wato, “Abeika, hokokia o Bene-Hadada gea woigo la ngone wonahikangelaholi! To una ai ribuutu ma gogahoko ihira ngohi tohimoteke abe ngaro ai gogahoko gea kiani tihidoaka dika ngohi feka-fekata, de ahi ngofa-ngofaka, de ahi haaka de ahi gurasi unangika. Masara naa moioli ai gogahoko ho sarakia ti ngini nia hininga?” Hokogea o Ahaba womagahoko manga hininga ma duduhunu unangino.

⁸ De ona iwipaluhu unangika ato, “Mia koano, ufa nohigihene ai gogahoko ma dorou gea!” Hokogea dika to ona manga hininga itagi.

⁹ Ho o Ahaba wihingahu o Bene-Hadada ai hidingoto ma nyawaika, wato, “Ngini niwihingahu ahi baluhu o Bene-Hadadika hokonaa, niato, o Ahaba ai hingahu ma demo hokonaa ngonaika, ‘Ngohi tohimoteke ani gogahoko ma amoko ihira, masara nako ani hingahu itoturuino naa, gea ko idadiua gea ena tohimotekoli. Gea dika aika ngohi o Ahaba ahi demo ngonaika.’”

¹⁰ De o Ahaba ai demo gea o Bene-Hadada woihenoka de ai hingahu moioli wohidingoto o Ahabika, wato, “Marai naa ani bodito adonoka! Ngohi de ahi tentara mingodumu miboa ani kota o Samaria de duru minihiofioka ka hiadono ngaro ma hou o kafo dika ma enangoo duru ma hohutulokahi! De ka hiadono ma oraha milio de ngaro ahi tentara homoi-homoiika, ona yakokile o bokoto amomoi ani kota ma kafo masara ko yomakewedonua angamoi hokogea minihibinaaha hiadono ani kota ko iwaka. De naa ngohi togahoko ahi jou-jouika la ena ihiboa ngohino o kokangela ma amoko de utuohi itorou idiai ngohino abe nako ngohi ko todiaiua abe naa tonihingahuoka.” Hokogea o Bene-Hadada de ai behehongo ma dorou womahikoboto.

¹¹ De o Ahaba, o Isiraele ma nyawa manga koano, una wipaluhu o Bene-Hadadika de ai hitiari ma demo, wato, “O tentara abe ka womahidiaiohi la ahao o nyawa waparangi de tanu ufa una wohitihira de ai lolaku ma higiriiri la womagorakiye. Masara nako o tentara wolakuoka hiadono wolioka o parangi ma lolakuino de ai parangi ma dadatoko ma baju wahuputu ibootoka de ahao itaana una womahigiriiri.” Hokogea o Ahaba ai babaluhu ma demo o Bene-Hadadika.

¹² De o Ahaba ai babaluhu gea imahiadono o Bene-Hadadika ma oraha una gea de o kokoano yowoe ona naga manga tentara ma dodogumu ma ngioka. Abe genangoka naga manga tau o ngoerino kohangoe de ma oraha gea ona duru ihirame-rame de o daluku manga tau homoi-homoiika. Ka de o Bene-Hadada woihene o Ahaba ai hitiari ma demo gea de duru de ai ngamo wopoaka wahuloko ai tentara manga hohidimonika wato, “Ngini o tentara nimahidiaioka niparangi!” Ho ona duru mata-mata yomataiti la ato yangika o Samaria ma kotaika.

O Ahaba wolaku ma oraha yomaketeparangi de o Bene-Hadada

¹³ De doka o Samaria ma kotaka naga Ma Jou ai uru ma dodofanga woboa o Ahabino de wihingahu unangika, wato, “Hokonaa abe Ma Jou o Yawe ai hingahu ngonaika, wato, ‘Ahaba, ngaro ufa nohawana. Ngona igoungu, ahao namake ani musu manga tentara manga doomu ma amokika abe ona duru ko manga ngoe de duru de manga buturungoka. Masara ngaro ufa namodongo onangika, angamoi duru o wange naa dika de ona mata-mata tahidoaka ani giamika. Hokogea Ngohi, Ma Jou o Yawe todiai la tinihimatoko ahi kuaha nginika de ngaro onangikaoo. Abe bootino tonihidoaka o lolaku ma amoko la ka de idadi de ngona duru nohioriki Ngohi, Ma o Yawe dika todiai abe o lolaku gea.’” Hokogea Ma Jou wihiputurungu o Ahabika.

¹⁴ Masara o Ahaba wileha Ma Jou ai uru ma dodofangika, wato, “Ho onagona Ma Jou wapake la tamake o lolaku hokogea?” De Ma Jou ai uru ma dodofanga wopaluhu, wato, “Hokonaa Ma Jou o Yawe wonihihohininga, wato, ‘Ani kapo-kapongika naga manga tentara homoi-homoiika de manga hidimonoka. De gea ona abe Ma Jou wapake la o lolaku wonihidoaka.’” De o Ahaba wilehali, wato, “Ho onagona yohira yoparangi, ahi musu eko ngohi?” De Ma Jou ai uru ma dodofanga wato, “Ngona!”

¹⁵ Ho Ma Jou ai demo gea o Ahaba wohigihene de una wahokino ai kapo-kapongo manga tentara mata-mata abe homoi-homoiika naga manga hidimono. De ona iwihikokihingounu ho naga manga tentara ma doomu yaratuhu hinooto de moruange de hinooto abe yoboa la yotoomuino. De naga o Ahaba ai tentara utu yasana tumidi de onangoo wahokino.

^16-17 De ngade-ngade o wange ikorona o Ahaba de ai tentara mata-mata gea yoiki manga dumutu o Bene-Hadada ai tentara manga dodogomu ma ngiika. De o Ahaba ai tentara ai kapo-kapongino homoi-homoiika naga manga hidimono womatengo de manga hihira yamuruono naga. De abe manga hohidimono gea ona yohira manga dodagioka la yahihira-hira o Ahaba ai tentara ma doomu ma amokika. De ma oraha o Ahaba de ai tentara yosobo de doka o Bene-Hadada ai tentara manga dodogumu ma ngioka ona yorame-rame dika. De ona duru yowoe-woe angamoi naga abe iwiduhunu o Bene-Hadada o kokoano yamoruange de yahinooto o tonaka utuino de o koano homoi-homoi naga manga tentara. Ho ona mata-mataika ka ihirame-rameohi manga daluku hiadono manga tau o ngoerino homoi-homoiika ma goronaka de yomulaenge yadaluku. Masara manga gogoana o tentara yamuruono naga abe kanganoinohi o Bene-Hadada wahuloko yogoana manga dodogumu ma ngi ma poretoka. De ma oraha o Isiraele ma nyawa manga tentara yoboa de o Bene-Hadada ai gogoana yamake yoboaino de yomataiti yomapopaata manga koanoika de iwihingahu ato, “Mia koano, naga o tentara yoboaino o Samaria ma kotaino!”

¹⁸ De o Bene-Hadada wahingahu ai tentara ma dimo-dimonika wato, “O Isiraele ma nyawa manga tentara naa yoboaino masara ngaro ufa niatoma, ka niakokitaokino dika, de ngaro ona naa yoboa la homakadame eko yoboa yoparangi ma ka niataoko dika.” Hokogea o Bene-Hadada ai sade ma demo.

¹⁹ De ma oraha o Bene-Hadada ka wotemohi hokogea masara o Ahaba ai kapo-kapongo ma tentara ma dodoomuino yokokiboakau de manga hohidimono yahihira-hira ho naa ona yadonoka o Bene-Hadada ai tentara ma ngioka.

²⁰ De o Isiraele manga tentara ma nau-nauru yomahiboridengo-dengo yomakadono de yatoma o Arama ma tentara homoi-homoiika. Hokogea yaparangi de itodokanino de o Arama ma nyawa manga tentara mata-mataika yakapusakoka ho yoara. De o Isiraele ma nyawa manga tentara yakiniiki yatoma masara naga utu ko yowoeua abe o kudauku yobarene. De abe ona yobarene o kudauku ona ka hiadono ko yadaenuahi manga musu yatoma de ona yogila-gila yoarohi. De manga koano o Bene-Hadada unangoo womadaene woara.

²¹ Ma, ngaro hokogea o Arama ma tentara utu yoaroka, masara utu naga duru ko manga ngoe yohonenge ka hiadono manga kuda de manga parangi ma gogoroba enangoo kohangoe ihibinaaha.

²² De Ma Jou ai uru ma dodofanga gea wihingahu o Ahabika, wato, “Ufa nafikiri ka naa dika de nolakuoka de o parangi nenanga ibooto. O Arama ma nyawa manga koano una ahao winihideeoli ho o taongo moiohi nanga himangoka abe nako ma oraha o maata ipahaka de adonoka o hiwaroli abe o tonakino iwango ma hungioli de ma oraha gea ona ahao yoboali iniparangioli.”

O Bene-Hadada wohigalioli o Isiraele ma nyawa waparangi

²³ Ka de o Arama ma nyawa yahikalaka de ahao o Bene-Hadada ai tentara manga hidimono yamuruono naga iwitutumu de yomahingahu manga hininga unangika, ato, “Mia koano, mihioriki abe o Isiraele ma nyawa naa ma duruika yolaku de gea angamoi homaketeparangi to ona manga tonakoka abe iloku-loku ma ngoe de gea ma titi ngomi mikala. De gea angamoi o Isiraele ma nyawa manga popangao to ena ma kuaha duru ilamoko o loku-lokuoka. Ho ngone kiani haparangi o tonaka ma dolaka abe genangoka maraioka to ona manga popangao ko iwa ma kuaha. Ho iti homaketeparangi o tonaka ma dolaka de duru ngone ka idadi hahikala o Isiraele ma nyawa gea.

²⁴ Masara mia koano kiani ngonaoo naa nahiaturu la gea o kokoano yamoruange de yahinooto ibootohi yahihira manga tentara ma dodoomu. De gea ngona kiani o kokoano gea naturuuru de o tentara ma hidimono abe duru onangohi yososawaro yoparangi la yahihira o tentara ma dodoomu gea.”

²⁵ De manga higaro ma demo o Bene-Hadadika ihigila-gila yato, “De kiani ona abe o tentara yohonengoka kiani naga manga duruuru de o tentara manga ngoe abe imaketero hoka ona abe yohonengoka. De o kuda de o goroba parangioo abe ona ihibinaahaka enangoo kiani naturuuru mata-mataika de ma hungioli la nanga tentara manga ngoe duru mata-mataika imaketero hoka ma dihirainoli. De ahao o Isiraele ma nyawa gea nako haparangi o tonaka ma dolaka de ko iwa moi abe nanga hininga hinooto ho ngone duru honganono holaku.” Hokogea manga hininga iwihingahu o Bene-Hadadika de manga higaro ma demo mata-mata wodafongo de womulaenge wohiaturu abe ona gea iwihigaroka la una womahidiai.

²⁶ De igoungu, adonoka ma oraha o hiwaroli abe o tonakino iwango ma hungioli, de una o Arama ma nyawa manga koano o Bene-Hadada gea, ai tentara ma hungi watoomuinoli de ona yosobo yoiki yaparangi o Isiraele ma nyawa. Masara ma oraha naa de ona yoiki o tonaka ma dolaika abe ihiromanga o Afeke ma dola.

²⁷ De o Isiraele ma nyawa manga tentara onangoo yomahidiai yoiki o Afeke ma dolaika angamoi o Arama ma nyawa nagau genangoka de ona yomahidiaioka yoparangi. De o Isiraele ma nyawa yahiaturu ona abe ahao yahidailako manga inomo de manga perelu abe o kia dika naga. De ona yadotokoka la hokokia ihioriki yaino-yaika abe manga tentara yaleleani. De ahao yoiki genangika o Afekika abe yomahidiai yomaketeparangi de manga musu o Arama ma tonakino. Masara nako o nyawa yahidotelega de ona manga ngoe imaketero hoka o kabingi ma duduono ma hohumuduru hinooto dika angamoi o Arama ma nyawa manga tentara duru ko manga ngoe ka hiadono o tonaka ma dola gea yatamunoka.

²⁸ De Ma Jou ai uru ma dodofanga una woboa o Isiraele ma nyawa manga koanoika de wihingahu unangika, wato, “Ahaba, hokonaa Ma Jou o Yawe wonihingahu, wato, ‘O Arama ma nyawa ona manga demoino yangaku ona ato bari Ngohi Ma Jou o Yawe to Ngohi ahi kuaha ilaku ka o loku-loku ma tonakoka dika. Hokogea manga ngongaku ho Ngohi tiniduhunu la ngini ka o Isiraele ma nyawa ahao niahikala o tentara duru ko manga ngoe gea. Hokogea Ngohi tiniduhunu la ngini duru nihioriki abe ti ngini nia Jou gea Ngohi, Ma Jou o Yawe, abe ahi kuaha adaene mata-mataika.’” Hokogea Ma Jou ai hingahu o Ahabika.

²⁹ De o Bene-Hadada ai tentara de o Ahaba ai tentara gea manga wange tumidino yomagoo-gogere dika manga dodogumu ma ngioka ona ka yomarihimangino dika de ko yomaketeparangiuahi. Ho manga wange ma tumidoka gea de ona ahao yomulaenge yomaketeparangi, de ma wange gea dika o Isiraele ma nyawa yakunu yatoma abe o Arama ma nyawa manga tentara abe yalou-lou yasana o ratuhu moi.

³⁰ De utu manga tentara yoara ho yowohama o Afeke ma kotaika la yomadatoko o kota ma goronaka abe o kota ma dadaduhu ma poretoka. Masara o kota ma dadaduhu ahao yadoturabaha onanguku ho naga yasana monaoko de tumidi abe yohonenge genangoka. Masara manga koano o Bene-Hadada ko wohonengua angamoi una womagogono o ngi moioka abe o kota o Afeke ma goronaka abe duru o nyawa ko ihiorikua.

³¹ De o Bene-Hadada ai popareta ma hohidimono iwihingahu ato, “Mia baluhu, ngomi miihenoka abe nako o Isiraele ma nyawa manga kokoano ona manga dora ma hiokoo duru itagi o nyawaika. Ho abeika ngone homahitipokouku de hokonaa homahitunguu homoi-homoi ngone homahingoerino de o karongo de hapake o tali moi abe hagaleino de hateruiye daku nanga peaka. Nako hokogea homahitunguu nanga toduba de done o Ahaba wonamake de ai hiokoo itagi ngoneino hiadono ngona wonihigunoa la ngonaoo nowango.” Hokogea manga higaro ma demo manga koano o Bene-Hadadika.

³² Ho ona o Arama manga poparetaino yomahingoerino de o karongo de naga manga tali abe yateruiye daku nanga peaka de yoiki o Isiraele ma nyawa manga koano o Ahabika. De gea duru to ona manga koano iwigahoko o Ahabika, ato, “Mia koano, ani gilaongo o Bene-Hadada una duru de ai toduba womagahoko, wato, ‘Ngohi duru tomagahoko la nohihigunoa ngohi ka towangohi.’” De manga demo gea woihene de duru o Ahaba woheranga de wotemo wato, “Done una ka wowangohi? Una gea ahi ria-dodoto adaene!”

³³ De o Bene-Hadada ai popareta ma nyawa ka de yoihene o Ahaba ai demo gea de manga nganganono naga ho duru itaiti yopaluhu, ato, “Igoungu, mia baluhu, ani ria-dodoto una nagahi doka!” De ahao o Ahaba o Isiraele ma nyawa manga koano wahibehehongo, wato, “Nako gea niloiki de niwile de niwiaoino!” Ho ona ahao yoboali de o Bene-Hadada una naga onangoka. De o Ahaba naga ai parangi ma gorobaka de una duru de ai hininga ma hohailoa dika wiahoko, wato, “Ahi ria-dodoto, naino nodoaiye ahi gorobaino naa.”

³⁴ De o Bene-Hadada wodoaiye de yomakoketemo de una wihingahu o Ahabika, wato, “Ahi gianongoru, ngohi tomahidiaioka tohigilio ani kuahaika o kota-kota mata-mataika abe ma dihira ahi baba wiora ani babaino. De utuohi tonihibehehongo, ka idadi to ngona ani nyawa abe to ona manga biaha yotobafuku-fukunu o kiahonanga o paharoka, ka idadi yoboa ahi kota o Damasikino. De ona ahao ka idadi to ngomi mia paharoka yomahiaturu manga ngi homoi-homoiika abe genangoka ka idadi manga kiahonanga yofuku-fukunu. Abe ma dihira to ngohi ahi babali hokogea wohiaturu la to una ai nyawa yotobafuku-fukunu o kiahonanga to ngona ani kota o Samaria ma goronaka.” Ka de gea woihene de o Ahaba wato, “Irahai ani demo gea, abe ani behehongo ka hokogea de ngohi ka idadi tonihiluasa ani boditoino.” Ho ahao ona yahinooto yomahiketehibehehongo abe yomakadameoka o Isiraele ma nyawa de o Arama ma nyawa. De gea ngaro o Bene-Hadada wokalaka o parangioka masara ai bodito ko iwidaenokaua.

Ma Jou ai uru ma dodofanga wihingahu o Ahabika abe unangoo Ma Jou ahao wihohowono

³⁵ De ma oraha gea Ma Jou o Yawe ai uru ma dodofanga manga doomu ma goronaino naga womatengo abe wihingahu ai dodiawoika wato, “Ngona itaiti nohihipoha de ani dae ahi peauku!” Masara o nauru gea woluku hokogea wipoha Ma Jou ai uru ma dodofangika.

³⁶ De ahao Ma Jou ai uru ma dodofanga gea wihingahu unangika wato, “Ka de nosobo nanga ngioka naa de noboditoka angamoi ngona noluku Ma Jou o Yawe ai behehongo naniiki ngonaika ho o boki o singa ma amoko ahao iningino hiadono de inigoli hiadono nohonenge.” De igoungu, hokogea idadi, abe genangoka de o nyawa gea wosobo manga doomuino de naga o boki o singa iwibaata de iwitoma.

³⁷ De ahao Ma Jou ai uru ma dodofanga gea wihuloko o naurika womatengoli de ai demo imakadaene, wato, “Ngona itaiti nohihipoha de ani dae ahi peauku!” Ho una gea wihipoha de ai dae hoka womagahokoka ho Ma Jou ai uru ma dodofanga gea wihinabo ai peaka.

³⁸ De una ai nabo gea wapakitino ka hiadono ai lako enangoo wohidapakitoka de ahao o ngekomo ma datekoka widamaa o Ahaba woboaino la ka idadi witemo unangika.

³⁹ De bootino o koano woboa de witilakuru de Ma Jou ai uru ma dodofanga gea wiahoko o koanoika, wato, “Ahi baluhu, ngohioo naga o parangi ma goronaka de naga o tentara woboa wohihitagongo de o nauru abe iwitaokino o parangioka. De una wohihitiari ngohino wato, ‘O nyawa nenanga duru nigoana e? Abe nako una ahao woara de ngona ahao duru nokangela ani howono abe ngona ahao ma hirete ai howono nituruuru hiadono ngona nohonenge eko ngona kiani nofangu de o haaka ise-senge abe o kilo moruange ma dubuho.’

⁴⁰ Hokogea wohihitagongo masara ngohi naga ahi karajaanga ka hiadono ngohi ko tihiorikua de una woaroka.” Hokogea Ma Jou ai uru ma dodofanga wiade-ade o Ahabika de ma koano gea wipaluhu, wato, “Ho gea to ngona ani howono, ho ngona ma hirete nomahohowonoka.”

⁴¹ Hokogea o koano wotemo ibooto de Ma Jou ai uru ma dodofanga gea ai papakiti wahohe ai lakoino, de ka de wahohe de o koano wihioriki abe una gea womatengo Ma Jou ai uru ma dodofanga manga doomu ma goronaino.

⁴² De Ma Jou ai uru ma dodofanga gea wihingahu o Ahabika, wato, “Hokonaa Ma Jou o Yawe ai demo ngonaika, ‘Ahi hiketero ma ade-ade kanganoika ma titi gea abe ngona ahao inidaene. Ngona o koano ko nohihingounua ahi demoika abe o nauru gea, abe kanganoika nimakoketemo, una gea ka nihigunoa la ka wowangohi. De hokogea ngona ani hininga nodiai ngaro Ngohi tato kiani nihibinaaha, ho mangale ma titi ngona ko nohihigihenua hokogea ho nihiluasoka dika ho ngona ma hirete nituruuru la ngona nohonenge. De to ngona ani kokawaaha ahao ona yohonenge de to una ai kokawaaha ko yohonengua.’” Hokogea Ma Jou ai hohowono ma demo o Ahabika.

⁴³ Ho o Isiraele ma nyawa manga koano, o Ahaba wolio ai kota o Samariaika duru wongamo de ai himanga itafukuoka.