1 Kokoano 2 - Ma Jou ai Demo-demo o Totobelohoka

O Pasala 2 ko atailakouahi O Dautu ai behehongo ma demo o Saloomoika

¹ De o Dautu ai gahe itigioka, ho wiahokino ai ngofaka o Saloomo de wihibehehongo unangika.

² De gea una witemo wato, “Ngohi naa ahi gahe itigioka tohonenge, abe hokogea inadaene ngone mata-mataika o dunia ma lokuoka. Ho naa tonihibehehongo tato kiani nomahitomoroini dika de ufa nohawana!

³ De ngona kiani nao irahai ma karajaanga abe ani Jou o Yawe wonihitagongoka ngonaika. Ho to Una gea ai pareta ma demo de ai hitiari de ai huhuloko, abe mata-mata gea ihitulihuku o Musa ai Pareta ma demo ma dolaka, kiani naga ani hingounu ai demo mata-mataika gea. De nako gea ngona duru nanii-niiki itiai ahao ani karajaanga de ani hidee mata-mata duru ihofoko de ngona namake ma owa.

⁴ De gea ka ngonaua dika abe namake ma owa genangino. Angamoi ma dihiraino Ma Jou o Yawe wohihibehehongo wato, ‘Nako ani ngofa-ngofakuku ona ihitobaniiki Ngohi de manga hininga ma gahumu de naga manga hingounu ka ihikaika ahi demoino, gea de ahao ka ihikaika naga womatengo ani totoforaukuino wodadi ani duruuru abe una wahikoano o Isiraele ma nyawaika.’ Hokogea Ma Jou ai behehongo ngohino ma dihira, de ngohi naa duru toigo la ai demo gea idadi. Ho gea hiadono ngohi tato kiani ngona duru ka ihikaika naniiki itiai to Una ai Demo-demo.”

⁵ De ahao o Dautu wohigila-gila ai behehongo ma demo o Saloomoika. Una wato, “De nagali ahi demo ngonaika ma titi o Yoaba gea abe una o Seruya ai ngofaka. Abe marai ngona ma hirete ka nohiningahi ma ade-ade ma titi hokokia una gea wodiai itorou ngohino. Gea una ma dihiraino de watoma nanga gogianongoru yahinooto o Isiraele ma tentara ma hohidimonino. Abe o Abanera o Nere ai ngofaka de o Amasa o Yetere ai ngofaka, ona yahinooto gea o Yoaba watoma. De ma oraha gea ngaro ko o parangi ma goronakaua masara ka watoma dika angamoi hokogea to una ai mau. Ho to ona gea manga awunu wohikopoa de gea iwidaene ai goronaka de hiadono ai louuku.

⁶ Ho ngohi tato koaho una ahao wamake ai hohowono ma titi ai datoro gea, masara ngona ka idadi naputuhu ma hohowono hokokia irahai una wamake. Iti ufa nihigunoa la to una ai wowango ikurutu de ko kia-kiaua iwidaene unanguku.”

⁷ “De nagali ahi demo ngonaika ma titi o Gileada ma nyawa o Barasilai ai ngofa-ngofaka. Abe ona gea ma dihiraino de ihiduhunu de ihigoana ma oraha ani riaka o Abasalomo wohikiniiki ngohi wato wohitoma ho ngohi toara. Ho mangale ma titi manga datoro gea ho ngohi tagahoko la ngona nahoko ona gea ani tauino de ka idadi ona de ngona nimakutuono niolomo ani tauoka ka ihikaika.”

⁸ “De naga moiohi ahi demo ngonaika. Ufa hiadono ngona namalaika dika o Simei ai datoro ma dihira ngohino. Abe una gea o Benyamini ai dutuino ma nyawa de o Gera ai ngofaka, de womanoa o Bahurimoka. Ho ma dihiraino abe ma oraha ngohi toara o Mahanaimi ma ngiika de una wohihikoboto ngohino de ai koboto ma demo gea duru itorou. Masara ipahaino de ngohi de una mimakubuhuku o Yorodani ma akeroka, de ma oraha gea ngohi tomahikoboto Ma Jou o Yawe ai himangoka tato ko titomaua ho una ka nagahi.

⁹ Masara ngaro hokogea to ngohi ahi behehongo, gea ko ma titiua abe to una ai datoro gea itiai, angamoi gea duru wahowono. Ho ma oraha naa de una gea tihidoaka ani giama ma hoatika la ngona nahiaturu ai wowango ma baha abe hokokia dika imakataana de to ngona ani hininga. Angamoi ngona naa duru nososawaro ho ka idadi naputuhu koaho hokokia una gea ai hohonenge. Iti nohihibalaha ngohi la to una ai hohonenge hatoli itorou.” Hokogea o Dautu ai behehongo ma demo ai ngofaka o Saloomoika.

¹⁰ De ahao o Dautu wohonenge de iwilungunu o Yerusaleemoka, abe ma kota ma ngioka gea ihiromanga ato o Dautu ai kota, ho genangoka iwipohuku.

¹¹ De una wahikoano o Isiraele ma nyawa ai taongo moruata ma dekana. Abe ma oraha wahikoano onangika de wogogere o Heborono ma kotaka ai taongo tumidi ma dekana de ahao womaturuuru o Yerusaleemikali. De to una ai taongo moruange de hange abe wahikoano genangoka.

¹² Ho una wopahaka de ahao ai ngofaka o Saloomo wituruuru de wodadi manga koano. De ona mata-mata naga manga horomati manga koano ma hungi o Saloomoika hiadono ai kuaha onangika duru ko idomo-domoua.

O Saloomo ai datorino de una wohiputurungu ai popareta ma kuaha

¹³ De ipahaino o wange moiuku de o Adonia abe una o ngo Hagiti ami ngofaka, una gea woiki womitutumu o Saloomo ngomi meme o ngo Baseba. De woboa ami himangino de ahao muna mileha unangika mato, “Ho ngona noboa naangino ma titi ani hininga ma rorahaiino dika eko sarakia?” De una womipaluhu wato, “Iya, nagoungu, ahi hininga ma rorahaiino dika hiadono toboaino.

¹⁴ Angamoi naga moi toigo tomagahoko ngonaika.” De ahao o ngo Baseba motemo mato, “Ho marai o kia naga nomagahoko ngohino?”

¹⁵ De o Adonia una wotemo wato, “Marai ngona nohioriki abe ma dihiraino de tanu ngohi naa todadioka o koano, abe ma oraha gea de nanga gogianongoru o Isiraele ma nyawa mata-mata yoigo la ngohi naa tahikoano onangika. Masara ipahaino de gea duru ihikawalimoka ho hiadono ahi dodoto unangoli iwigoraka la wahikoano onangika. Angamoi marai hokogea Ma Jou o Yawe ai mau de hokogea dika Una wahikaaturu.

¹⁶ Ho naa naga moi dika tomagahoko, de duru toigo la ufa nohioluku masara ka idadi ngona nosanangi nohiduhunu ngohino.” De gea motemo mato, “Ho ani gogahoko o kia naga?”

¹⁷ De una womitemo munangika wato, “Ngohi tomagahoko la ngona noiki nanga koano o Saloomoika de nohihidemo unangika ma titi o ngo Abisaga abe o Sunemoka ma ngofeka gea. Angamoi nako ngona nohihidemo ani ngofaka o Saloomoika de ahao bote una wonihigihene. Abe ngohi toigo la o ngo Abisaga gea tomihidadi ngohi fekata.”

¹⁸ De ai gogahoko gea muna moihene ipaha de ahao mipaluhu mato, “Ka idadi ani demo gea tidofanga unangika.”

¹⁹ De ahao o ngo Baseba muna moiki ami ngofaka o Saloomoika la midofanga o Adonia ai demo unangika. Ho momahiadono ai himangoka de ma koano una naga wogogeruku ai kaderauku. De una womimake ngoi meme moboaino de una womaokoiye de ahao ai pea womaponuku la ai horomati womahimatoko munangika. Gea ipahaino de ahao womagogerukuoli ai kaderauku de wahuloko ai nyawaika la yaoino o kadera moioli la ka idadi ngomi memeoo mogogeruku. Ho o kadera yaoino de yakelenga to ma koano ai nirakoka de ahao muna mogogere ai datekoka gea.

²⁰ De mogogerukuoka de muna motemo mato, “Naga moi dika tomagahoko, de duru toigo la ufa nohioluku masara ka idadi ngona nosanangi nohiduhunu ngohino.” De una womipaluhu wato, “Abeika nomagahoko dika. Angamoi ngona naa ngohi meme, ho done sarakia tonioluku ani demo?”

²¹ Ho muna motemo mato, “Ngohi togahoko la o Suneme ma ngofeka gea o ngo Abisaga nomihidoaka ani riaka o Adoniaika la una womihidadi ngoi fekata.”

²² De gea o Saloomo woihene ami demo de ahao wopaluhu wato, “Ho done sarakia ngona naa nogahoko hokogea ngohino? De ma titi o kia hiadono nihidemo ahi riaka ai mau la o ngo Abisaga tihidoaka dika unangika? Angamoi nako hokoga ani gogahoko, koaho nigahokoo la tihidoaka ahi kadera de ahi kuahaoo unangika la unangoli wodadi o koano! Abe nako nanga hidemo ma nyawa Ma Jouika o Abiatara de nanga tentara ma hidimono o Yoaba, ma dihirainohi de ona yomaketehiningamoioka de ahi riaka gea ho ona yoigo la una dika iwigoraka de wodadi o koano. Ho naa marai ka ngonali nadomoteke onangika.”

²³ De ahao ma koano o Saloomo wotemoli de womahikoboto moi wato, “To ahi riaka ai hininga gea duru itorou! Ho mangale ma titi ai demo gea hiadono ngohi kiani tihohonenge dika. De nako hoka ngohi tawohangika ahi demo de una ko wohonengua, gea tomagahoko la Ma Jou o Yawe wohihohowono de o dodotoko ma dubuho ngohino!

²⁴ Angamoi Ma Jou Una gea abe wohiiriki de wohigoraka ngohi la tituruuru ahi baba o Dautu de togogeruku ai kaderauku. De gea ai datoro imakiniiki de to Una ai demo abe ma dihiraino wonahibehehongoka. Ho gea hiadono ngohi tato o wange naa dika de kiani ahi riaka o Adonia wohonenge!”

²⁵ Hokogea o Saloomo ai koboto ma demo, de wotemo ipahaino de ahao wihuloko ai nyawa o Benaya la una woiki wihohowono o Adonia de o hohonenge. De gea igoungu abe una ka dau de woiki wihohonenge o Adonia.

²⁶ De ipahaino de ma koano witemo o Abiatarika wato, “Ngona ka idadi nolio dika ani tauika o Anato ma kapongoka. Abe ngohi tato duru itaana nako inihohonenge ma titi ani hininga ma dorou gea masara ma oraha naa de tonigumalaika dika ho ko tonihohonenguahi. Angamoi ma dihiraino ngona de ahi baba o Dautu nimakokiniiki de nitobaduhunu unangika ma oraha una ai kokangela ma gogiriaka. De nagali abe ngona de ani dodiawo niagoraka de niao Ma Jou o Yawe ai Peti aika aino. Ho o wange naa marai ko nohonenguahi.”

²⁷ De witemo ipaha de ahao o Saloomo wihiguti o Abiatara ai gogeroka de wauku la ibootohi wilelelani de wodadi Ma Jou o Yawe ai hidemo ma nyawa. De abe iwihigutiuku, gea duru imakiniiki de Ma Jou ai demo moi abe ma dihiraino wotemoka o Silo ma kapongoka. Abe ma dihiraino gea de Ma Jou ai uru ma dodofanga yotemo to Una ai demo abe wato ahao wohibobaha o Eli de ai ngofa-ngofakuku manga leleani la ibootohi yodadi Ma Jou ai hidemo ma nyawa. Ho naa duru igoungu idadi imaketero dika hoka Ma Jou ai demo ma dihiraino gea.

O Yoaba iwihohonenge

²⁸ Ma dihiraino abe ma oraha o Abasalomo wihidee la wihohonenge o Dautu de gea o Yoaba ko wohimotekua. Masara ipahaino abe ma oraha o Adonia unangoli woigo womahidadi manga koano de o Yoaba winiiki to Adonia ai hidee gea. Ho ka de o Yoaba woihenino o abari ma titi o Adonia iwihohonengoka de duru wimodongo o Saloomoika, ho woara Ma Jou o Yawe ai Tauika la womaduhunu. Abe una womahiadono o Tau o Ngoerino gea de wowohama doka ma goronaika de waso ma huhuba ma ngiika ho womahigagao enangika done o nyawa iwidodoa unangika.

²⁹ De ahao o nyawa iwihioriki ai datoro gea de iwihingahu manga koano o Saloomoika. Ho ka de ma koano woihenino ma abari gea de wihidingoto o Benaya genangika la ka idadi wihohonenge o Yoabika.

³⁰ Ho o Benaya womataiti woiki Ma Jou o Yawe ai Tauika gea de witemo o Yoabika wato, “Ani koano wonihuloko ngonaika wato kiani nohupu genangoka de naino ma poretino.” Masara gea o Yoaba wopaluhu wato, “Koua, ngohi naa ko tohupua. Ka idadi naangoka dika tohonenge.” De o Benaya woihene ai demo gea ho winoaikahi de wihigilio ma koanoika la o Yoaba ai demo wihingahu unangika.

³¹ De ma demo gea ma koano woihene ho wopaluhu wato, “Nako to una ai hininga de ai demo hokogea, ka idadi ngona genangoka dika nihohonenge de ahao ai badanga naoika de nohilungunu. Angamoi ma dihiraino ma oraha wileleani ahi baba o Dautika de una ka watoma dika o nyawa manga ngoe abe manga howono ko iwa. Ho gea imaketero hoka ai datoro gea imahora ahi babaika de ngohinoo hiadono to ngomi mia romanga imiwea-weara ma titi ai datoro ma dorou gea. Ho naa ngohi tosanangi dika wohonenge la ibootohi mia romanga wawewedere.

³² De ngohi tigahoko Ma Jouika la Una wihohowono o Yoabika abe duru imakataana de ai datoro ma dihiraino gea. Abe wahohonenge o nauru yahinooto abe nako ona de una de ka onangohi manga hininga de manga datoro itiai Ma Jou ai himangoka. De gea o Yoaba wihohonenge o Nere ai ngofaka o Abanera abe una wodadi o Isiraele manga tentara ma nyawa manga hidimono wokokurutiye. De nagali wihohonenge o Yetere ai ngofaka o Amasa abe una wodadi o Yehuda ma nyawa manga tentara ma hidimono. De abe ma oraha wahohonenge ona yahinooto de gea womatohiki wodiai angamoi ahi baba o Dautu duru ko wihiorikua ma titi o Yoaba ai hidee ma dorou gea.

³³ Ho ngohi togahoko Ma Jou o Yaweika la o Yoaba ai howono gea imanoa unangoka de ai totoforaukuoka dika ngaro ona ko yomaboauahi. De togahokoo la Ma Jou womihiowa dika ngomi mata-mata abe midadi o Dautu ai totoforauku. De ngaro ma koano mata-mata ai totoforaukuino abe ko yomaboauahi masara tonganono la onangoo yamake ma hiowa dika Unangoka de aino.”

³⁴ De o Saloomo wotemo ipahaino de ahao o Benaya wosobo wigilioli o Yoabika de wihohonenge unangika. Wihohonenge ipaha de ahao o Yoaba ai honenge gea yao doka ai tauika o tonaka ma homoaka de genangoka iwilungunu.

³⁵ De ipahaino ahao ma koano wigoraka o Benaya la wituruuru o Yoaba, ho unangoli wodadi manga tentara ma hidimono wokokurutiye. De nako o Abiatara abe una ma dihiraino wodadi manga hidemo ma nyawa Ma Jouiye, unangoo naga ai duruuru. Abe ma koano wigoraka o Sadoko la wituruuru o Abiatara gea.

O Simei iwihohonenge

³⁶ De gea ipaha de ahao o Saloomo wibehehongo o Simei la woboa ai himangino. De una woboaino de ma koano wihuloko unangika wato, “Ngona ka idadi nohigoko ani tau ma hungi o Yerusaleeme ma kota ma goronaka de nomanoa genangoka. Masara ufa hiadono ngona nohupu ma kota ma hoanika. Abe ngaro noigo noiki o kia-kiaika dika masara duru ko idadiua.

³⁷ De nako hiadono ngona nohupuika de natilakuru o Kidono ma akere ma dodagi abe naga duru o Yerusaleeme ma datekoka, gea de ahao ngona kiani inihohonenge. De naa ngohi tonihitiarioka ho nako idadi de gea to ngona ma hirete ani howono inidaene ngonauku.”

³⁸ De o Simei woihene ma koano ai demo gea de wipaluhu wato, “Iya, ahi koano, ani demo irahai. Ho ngohi ka idadi ani demo todafongo de taniiki enangika.” De gea igoungu abe o Simei womanoa ai dekana o Yerusaleeme ma kota ma goronaka.

³⁹ De o taongo hange ipahaikahi de ahao naga o Simei ai gilaongo ma nyawa yahinooto abe yoara unangoka de yaika ato yomahipipidili manga karajaanga ma dubuhoino gea. De ona yahinooto yoara o Gaata manga koanoika abe to una ai romanga o Akisi de una gea o Maaka ai ngofaka. De ona yopahaka de ahao naga o nyawa iwihingahu o Simeiika ato, “Abeika, mia baluhu, masara to ngona ani gilaongo ma nyawa yahinooto gea yoara o Gaata ma kotaika.”

⁴⁰ Ho ka de o Simei woihene ma hingahu gea de womahiburahiye wohinoauku ma gogogere ai keledai ma poretuku de ahao una wofareniye de wosobo. De una womataiti woiki o Gaata to Akisi ai kotaika gea la walingiri. Walingiri ona gea hiadono wamake de ahao o Simei watuda ona yahinooto de wahigilio to una ai tauika o Yerusaleemoka.

⁴¹ Masara ahao naga o nyawa abe iwihioriki ma titi ai dodagi gea ho ona iwikalaki o Saloomoika ato o Simei wohupu ma kotaka de waika de ipaha wolioinoli.

⁴² De ma koano woihene manga demo gea de ahao wibehehongoli o Simei la woboa ai himangino. De ahao yomarihimanga de ma koano witemo unangika wato, “Marai ngona naa ka nohiningahi abe ma dihiraino tonihuloko la nomahibehehongo Ma Jou o Yawe ai himangoka, de gea ngona nato ko nohupua ma kotaino naa. De nagali ahi demo ngonaika abe tato, ‘Nako hiadono ngona nohupuika de notagi-tagi ma homoaika, gea de ahao ngona kiani inihohonenge.’ Hokogea ahi behehongo ma demo ngonaika. De gea ngona nodafongo ahi demo nato, ‘Iya, ani demo irahai. Ho ngohi ka idadi ani demo todafongo de taniiki enangika.’

⁴³ Masara naa done sarakia ma titi hiadono ani behehongo ma demo gea nawohangika dika? Angamoi gea nomahibehehongo duru Ma Jou o Yawe ai himangoka, masara naa ko iwaka ani hingounu ahi demoino!

⁴⁴ De ma koano wohigila-gila ai demo o Simeiika wato, “Ngona naa ka nohiningahi ani datoro ma dorou ma ngoe gea abe ma dihiraino ngona nodiai ahi baba o Dautika. Ho naa tonganono la Ma Jou o Yawe wonihibalaha ngonaika abe imakataana de to ngona ani dorou gea.

⁴⁵ Masara nako ngohi naa ma koano, tomagahoko la Ma Jou wohihiowa dika ngohino. De ngaro ahi baba ai totoforauku utuoli masara tagahoko Ma Jouika la Una ahao wahikaaturu hiadono ka ihikaika naga womatengo onangino abe yodadi o Isiraele ma nyawa manga koano.”

⁴⁶ De o Saloomo wohibobaha ai demo gea de ahao wihuloko o Benayaika la una wiao o Simei ma hoanika de wihohonenge genangoka. De o Benaya wihingounu ai koano ho idadi hokogea. De gea o Saloomo ai kokawaaha mata-mata naga manga horomati ma amoko manga koanoika hiadono ai kuaha onangika duru ko idomo-domoua.