1 Kokoano 19 - Ma Jou ai Demo-demo o Totobelohoka

O Elia woara ka hiadono o Sinai ma lokuika

¹ De o Ahaba womahiadono ai tauika de womiade-ade ngoi fekatika abe mata-mata o Elia wodiaioka o Karamele ma lokuoka ka hiadono ona o Baala yoleleani mata-mata wakokitomaka de o humaranga.

² Ka de o ngo Isebele moihene ma ade-ade gea de ami hidee ma hingahu mohidingoto o Eliaika, mato, “Abe ngona nodiaioka onangika abe yoleleani o Baalika nakokitomaka ho ngohi o ngo Isebele, o koano ngoi fekata, kiani ona tahibalaha. Ho ngohi de ahi koboto ma demo tonihingahu, ‘Itebini adonoka o takoro hokonaa de ngona nohonengokau! Abe nako tokala hiadono hokogenangua idadi ngohi tomagahoko la o popangao gea ngohioo ihitoma ngohi.’” Hokogea o ngo Isebele ami koboto ma demo mohidingoto o Eliaika.

³ Ka de gea o Elia ami demo woihene de duru womimodongo ho womataiti woara done wohonenge! De ihira woiki Bereseba ma kotaika abe naga o Yehuda ma tonakoka de ai gilaongo winoaika genangoka.

⁴ De o Elia ai hawana dika hiadono womatengoka ka hiadono o tonaka ma kakaahaika de wotagi-tagi ko womahiai-ainua o wange moiino ma dekana. De ahao o Elia wogogeruku o gota moi ma timiuku ma romanga o Babarihi. De genangoka womagahoko Ma Jouiye la wohonenge dika, wato, “Ngohi naa tomangaku Ngonaika Ma Jou o Yawe, ngohi naa duru ko tomatongohonokaua. Togahoko la Ngona nohihigunoa la ngohi tohonenge dika angamoi ahi totofora to ona manga wowango ma datoro de to ngohi ka imakadaene dika.” Hokogea o Elia ai daiana ma demo Ma Jouika.

⁵ Hokogea o Elia womaniata ibooto de ahao womaidu ka hiadono iwikiookoka genangoka o Babarihi ma gota ma timiuku. Masara ai giooko ma goronaka de naga Ma Jou o Yawe ai malaekata woboaino de witumomiki de wato, “Ngona naa nomomikiye la nolomohi ani roti!”

⁶ De o Elia womatodokana de womalega arihononga de naga wamake o roti ai datekoka ka ma hau-haukohi o hakaru ma baka-baka ma lokuoka de o boto moi aomanga de o akere! De una wolomo de wokere ibooto de womaiduokali.

⁷ De ahao Ma Jou o Yawe ai malaekata woboali o Eliaino de wiso de wihingahu wato, “Ngona nomomiki de nolomoli angamoi ani dodagi ahao ma kangela ko napoaua.” Hokogea Ma Jou wigoana de wihidailako.

⁸ Ho o Elia womomiki wolomoli de wokeroli. De ai inomo duru iwihiputurungu hiadono wogila-gila wotagi-tagi o wange moruatino de o futu moruatino ma dekanino de una womahiadono Ma Jou ai lokuika abe ihiromanga o Sinai ma loku.

Ma Jou o Yawe witemo o Eliaika

⁹ De o lokuoka gea naga o aruku moi de genangika o Elia wowohama de womaidu o futu gea o aruku ma goronaka. Masara Ma Jou o Yawe wileha o Eliaika, wato, “Elia, ngona nenangoka nododoa?”

¹⁰ De o Elia wopaluhu Unangika, wato, “Ngohi naa duru de ahi hininga ma gahumu tonileleani Ngona, Ma Jou o Yawe, abe ani kuaha mata-mataika. Masara abeika o Isiraele ma nyawa manga behehongo abe Ngona de ona nimahiketehibehehongoka masara, ena gea yawohangoka! De ko yomahuba-hubakaua Ngonaika ka hiadono to Ngona ani huhuba ma ngi mata-mataika yakokikiliangoka. De ani uru ma dodofanga ma nyawa onangoo yakokitoma de o humaranga ho hiadono ka ngohiokahi dika. De abeika naa naga o Isiraele ma nyawa, to Ngona ani nyawa, abe yotemo ato kiani ngohioo ihitoma.” Hokogea o Elia womahingahu ai hininga ma huha Ma Jouika.

¹¹ De Ma Jou o Yawe wopaluhu, wato, “Elia, ngona o arukino naa nohupuoka de nomaokoino o lokuoka naa ahi himangoka!” De o Elia wohupu o arukino de womaokoino hoka Ma Jou wihulokoka. De abeika, o Elia Ma Jou o Yawe witilakuru! De ahao naga o hidaloko duru kohabuturungu italoko ka hiadono o loku ma hakaru ma ago-agomo itoropaha masara Ma Jou o Yawe, Una ko iwiwa o rato ma goronaka gea. De o hidaloko gea ipaha de ahao o dunia ikelu-kelu duru iputurungu masara Ma Jou o Yawe, Una ko iwiwa o dunia ikelu-kelu ma goronaka gea.

¹² De o dunia ikelu-kelu ipaha de ahao naga o uku itoka-tokara o Elia ai himangoka de o Elia womadohuku o aruku ma goronaika masara Ma Jou o Yawe, Una ko iwiwa o uku ma dokara ma goronaka gea. De o uku itoka-tokara ipaha de ahao naga o ilingi duru ma hohutuliye woihene hoka o huhudu ma ilingi ho duru ma hutu ma hutuiye.

¹³ Ka de o Elia woihene o ilingi gea de ai himanga watatoko de ai baju de wohupu o arukino de womahigokoino o aruku ma bionoka. De o Elia ma ilingi woihenoli itemo, ato, “Elia, ngona nododoa noboaino nenangoka?”

¹⁴ De o Elia wopaluhu abe duru imaketero hoka kanganoinoli, wato, “Ngohi naa duru de ahi hininga ma gahumu tonileleani Ngona, Ma Jou o Yawe, abe ani kuaha mata-mataika. Masara abeika o Isiraele ma nyawa manga behehongo abe Ngona de ona nimahiketehibehehongoka masara, ena gea yawohangoka! De ko yomahuba-hubakaua Ngonaika ka hiadono to Ngona ani huhuba ma ngi mata-mataika yakokikiliangoka. De ani uru ma dodofanga ma nyawa onangoo yatotomaka de o humaranga ho hiadono ka ngohiokahi dika. De abeika naa naga o Isiraele ma nyawa, to Ngona ani nyawa abe yotemo ato kiani ngohioo ihitoma.” Hokogea o Elia ai hininga ma huha wohigalioli womahingahu Ma Jou o Yaweika.

¹⁵ De ahao Ma Jou o Yawe wihingahu unangika, wato, “Ngona nolio! Ngona noikoli naniiki ani ngekomo abe nengokadauino la nolio o Isiraele ma tonakika. Ngona genangoka nomahiadono de ahao noiki nogila-gila o Damasiki ma tonaka ma kakaahaika abe hokonaa genangoka tonihikarajaanga. Ngona kiani nitutumu o Hasaele de nihitunguu abe o minya niwihituagi ai mumukuku la unangika nihitunguu abe una gea Ngohi tihidadi o Arama ma nyawa manga koano.

¹⁶ De ahao nagali womatengo kiani nitutumu, abe una gea ai romanga o Yehu, abe to una ai baba o Nimisi, de o Yehuikaoo nihitunguu abe napake de o minya de niwihituagi ai mumukuku. De gea nihitunguu unangika abe Ngohi tihidadi o Isiraele ma nyawa manga koano. De kiani womatengoli ngona kiani nilingiri ahi nyawa, ai romanga o Elisa, abe to una ai baba o Safata, o Abele-Mehola ma nyawa. De o Elisa ka de nitutumu de unangoo nihitunguu unangika abe unangoo o minya niwihituagi ai mumukuku angamoi Ngohi tiirikoka la una wodadi to ngona ani duruuru.

¹⁷ De o Arama ma nyawa manga koano o Hasaele una ahao watoma o Isiraele ma nyawa abe ihimusu Ngohino de ona utu abe yoara ka hiadono o Hasaele ko wadaenua ona gea ahao o Yehu watoma. De ona abe yoara ka hiadono o Yehu ko wadaenua de ahao ani duruuru, o Elisa, una ahao wahou abe ona o Isiraele ma nyawa ihimusu Ngohino.

¹⁸ De naga moioli ahi hingahu ma demo ngonaika, abe nagahi o Isiraele ma nyawa yasana tumidi manga ngoe abe ko ma moiuahi yomahuba o nyawa manga jou o Baalika gea, de ngaro o Baala ma rupa ma enangika ko ma moiuahi yabounu. Ho yasana tumidi gea ona ko yorehenua Ngohino de Ngohi tadatoko o boditoino la ka yowangohi.”

O Elisa iwitingakoka Ma Jou ai karajaangika

¹⁹ Hokogea Ma Jou o Yawe wihibehehongo o Eliaika ho naa adonoka ma oraha woiki wilingiri o Elisaika, abe ai baba o Safata, de una wimake o redi ma amokoka. Una de o nauru yangimoi de yamoi yomaketedodiawo abe o redi ma beha-behaka ihikawalimi. De ona yodiai o alata o gotaino ma romanga o bajaka abe yapake la ma tonaka gea ihikawalimi. De manga alata o bajaka ihidapasioka o hapi o pasanga moiika. De o pasanga moi gea ma hapi ahohinooto abe yatauru ma bajaka de ma dutu una wotagi ma poretoka ai bajaka ma gagao hinooto waso la itagi itiai de ufa ikumuruku. De ona yokarajaanga mata-mataika o nauru yangimoi de yahinooto homoi-homoiika naga manga bajaka de yomatatorika yomakiniiki ihikawalimi o redi ma beha-behaka. De manga karajaanga ma hiaturoka gea o Elisa una duru wototuruino wohikawalimi o tonaka ma beha-behaka. De manga karajaanga ma gogiriaka de o Elisaino o Elia woboa, de to una ai baju duru ikurutuku ai poretoka, gea ena wahuputu de o Elisa ai belekauku wihingeleuku. Hokogea dika o Elia wodiai de wosobo wogila-gila.

²⁰ De o Elisa wohioriki o Elia ai dodunguu ma titi abe wihitunguu unangika ho womapopaata o Elia winiiki de widaene de witemo unangika, wato, “Ahi baluhu, togahoko nohihigunoa la toliohi ahi tauika iti ngohi meme de ahi baba tabounohi de tomahilooa onangika de ahao ka idadi toniniiki tonidodiawo.” Hokogea o Elisa womagahoko. De o Elia wopaluhu wato, “Ka idadi ngona nolio! De gea ngona kiani duru nomafikiri abe tonihitunguuoka ngonaika.” Hokogea o Elia wihibehehongo.

²¹ Ho o Elisa wogilio ai hapi hinootoika de ai hapi gea watoma de ai bajaka gea watobi-tobikuku, ena gea abe wapake la wohikawalimi o tonaka ma beha-behaka, de o bajaka ma gota gea wapake la ai hapi ma roehe wohiharongo. De waharongoka de ahao wahikodoku ai dodiawo yangimoi de yamoiika abe yomakuduhunu o redioka gea ho ona mata-mata yokokiolomo. Ho yolomo ibooto de o Elisa winiiki o Elia la wodadi ai duduhunu.