1 Kokoano 18 - Ma Jou ai Demo-demo o Totobelohoka

O Elia womahimatoko o Obaajika abe una ma koano o Ahaba ai duduhunu

¹ De naa ma dekanoka o Elia ai hingahu abe wato o awana de o gagini ko iwahi ka hiadono una ma hirete wohibehehongoli. Abe o hiwara ikiriaka hiadono ngade-ngade o taongo hangeino ma dekana. Ho o taongo ma hangeoka de ahao Ma Jou o Yawe wihibehehongoli o Eliaika wato, “Ngohi toigo la ngona noiki ma koano o Ahabika de ahao duru ai himangoka nihingahu abe naa ma oraha adonoka Ngohi Ma Jou abe ahao tapuraraha o awana o tonakoka naa.” Hokogea o Elia Ma Jou o Yawe wihidingoto la ai hingahu gea wadofanga o Ahabika.

² Ho o Elia wosobo wato witutumu o Ahabika la womahimatoko unangika. De ma oraha gea o hafini duru kohagiria o Samaria ma tonakoka mangale ma titi o hiwara o taongo hangeino ma dekana.

³ De ma titi o hafini gea o Ahaba wiahokino ai duduhunu womatengo ai romanga o Obaaja. De o Obaaja gea ai tagongo la o karajaanga mata-mata wohiatu-aturu abe naga o Ahaba ai tauoka. Masara nako o Obaaja una duru wingaku wagou-goungu Ma Jou o Yaweika.

⁴ Abe una ma dihira duru waduhunu abe Ma Jou ai uru ma dodofanga yaratuhu moi ma oraha o koano ngoi fekata, o ngo Isebele, muna duru momagawe matoma Ma Jou o Yawe ai uru ma dodofanga manga ngoe. Masara o Obaaja, una waduhunu Ma Jou o Yawe ai uru ma dodofanga gea la wato ufa o ngo Isebele gea makokitoma hiadono mamataka. Ho o Obaaja waduhunu ona Ma Jou o Yawe ai uru ma dodofangika abe yaratuhu moi wao o loku-lokuika de ahao ona wagogono o aruku hinootoika. Ho naga o regu moi yamoritoa wagogono o aruku moioka, de o aruku naga moiokali onangoo wagogono naga yamoritoa genangoka. De o Obaaja Ma Jou ai uru ma dodofanga mata-mataika gea wahidailako manga inomo de manga akere.

⁵ Ho una o Obaaja gea abe ma oraha naa o Ahaba wiahokino de wihikarajaanga wato, “O hiwara naa nanga aewani o dofo duru ikangela de ma inomo. Ho abeika, ngona o Obaaja de ngohi homakiniiki la hosobo holingiri nanga aewani ma inomo done ihonenge, de hotailako nanga tonaka mata-mataika. Kiani ngone hoiki holingiri o ruruubu o akere ma dola-dolaika de o kiaka abe ma dihiraino o akere ipooteke o hakaruino eko naga ibubungiye dau o tonakino. Ngone kiani hamake o ruruubu iwedono la genangoka ka idadi nanga kuda de nanga keledai hohiolomo la ngaro ufa de nanga kuda de nanga keledai ihonenge. Iya, iti ufa hiadono kiani hatoma nanga aewani ngaro ka moi dika ma, ngohi ko toigoua tatoma.”

⁶ Hokogea o Ahaba ai hininga ho ona yahinooto yosobo. De ahao o Ahaba wotailako manga tonaka ma hononga, de o Obaaja una woiki manga tonaka ma honongali la mata-mataika ona yotailako yomarihonongaino de abe ma koano ai tonakoka gea.

⁷ De ma oraha o Obaaja wotagi-tagi wotailako ma tonaka gea de yomakamake de o Elia. De o Obaaja una wihioriki o Elia ho womaponuku ai himangoka de wotemo unangika wato, “Ahi baluhu o Elia, igoungu naa ngona?”

⁸ De o Elia wipaluhu unangika wato, “Iya, igoungu ngohi naa, de ngohi togahoko ngona noiki ani koano o Ahabika nihingahu la nato, ‘Koano, o Elia naga.’”

⁹ De o Obaaja wipaluhu o Eliaika de womademo wato, “Ahi baluhu, ngohi naa ani gilaongo, ho o kia ahi howono hiadono ngona nohihidingoto ahi honengika ma oraha naa?

¹⁰ Tanu o Ahaba ahao wohihohonenge nako hokogea tihingahu unangika. De naa tapake Ma Jou o Yawe ai romanga abe Una igoungu wowango-wango, de Una to ngonaoo ani Jou de to Una ai romanga tapake la duru itaana abe ahi hingahu ngohi naa tagou-goungu. De naa tonihingahu abe ma dekanoka ahi koano o Ahaba duru wonilingiri ngona, ahi baluhu, de ka hiadono ko iwa ma tonaka abe genangika ko wonilingirua, de ngaro ka hiadono o nyawa utu manga tonaka, abe genangika ko wonilingirua. De o kiaka dika o nyawa abe ato ngona ko iniwa genangoka, de ahao ona gea o Ahaba watae wato marai ona gea inigogono ho onangika waribuutu hiadono ato yomagahoko o koboto abe nako igoungu ngona naga genangoka. Hokogea o Ahaba wodiai o nyawa mata-mataika angamoi o nyawa iwihingahu ato ngona ko iniwa manga tonakoka.

¹¹ Masara naa ngona nomahimatoko de nohihuloko la ngohi toiki o Ahabika tihingahu de tato, ‘Naga o Elia naangoka.’

¹² Masara ngaro hokogea tihingahu ma sarakia nako de ahao una woboaino wonitailako de ngona ko iniwa naangoka! Abe ngona Ma Jou ai nyawa de done ngohi tosobo de ahao Ma Jou o Yawe ai Womaha woniao o kiaika nako ngohi toninoaika naangoka. Nako ngohi toikoka tihingahu o Ahabika ngona naga masara ka de uku de ko wonimakeua tanu ahao wohitoma ngohi naa. De ma oraha ngohi ka o goduuruohi de ka hiadono ma oraha naa ma, ngohi naga ahi horomati de ma modongoka Ma Jou o Yaweika, ho done o kia ahi howono ka hiadono ngona nohihuloko tihingahu o Ahabika hokogea?

¹³ Mode ngona ahi baluhu ko nohihiorikuahi abe ma oraha o ngo Isebele matoma Ma Jou o Yawe ai uru ma dodofanga manga ngoe de gea ngohi abe manga ngoe tagogono o aruku hinootoika? Ho naga yamoritoa o aruku moioka de o aruku moiokali naga ona yamoritoa. De ngohi tahiolomo de tahiokere abe Ma Jou o Yawe gea ai uru ma dodofanga.

¹⁴ Ho ahi baluhu, ka de ngona nohihuloko ngohino abe kiani tihingahu o Ahabika, ‘O Elia naga nenangoka,’ de ahao nako woboa wonitutumu de ngona ko iniwa, adoo! Gea hoka ahi honenge tomangotaka! De angamoi una gea duru tihioriki abe ahao wohihohonenge ngohi!” Hokogea o Obaaja womademo o Eliaika.

¹⁵ De o Elia wihingahu unangika wato, “Iya, nagoungu Ma Jou o Yawe wowango-wango, de gea Una tileleani ngohi ho Una ka ihikaika wohimake. Ho naa ngohioo tagou-goungu totemo tato duru o wange naa dika de ngohi ma hirete tomahimatoko o Ahabika.”

O Elia de ona yotobaleleani o pangao o Baalika, ona yomarihimanga o Karamele ma lokuoka

¹⁶ Hokogea o Elia ai demo ho o Obaaja woiki o Ahabika de wihingahu unangika abe ma titi o Elia wimakeoka de una ka nagahi genangoka. Ho o Ahaba woiki genangika la ka idadi yomarihimanga de o Elia.

¹⁷ De ka de o Ahaba wimake o Elia de wihitodokanika unangika witemo wato, “Abeika ngona, o Tobahikangela, ho naa de nomahimatoko abe ngona duru nahikangelaka o Isiraele ma nyawa!”

¹⁸ De o Elia wipaluhu o koanoika gea wato, “Duru gea ko ngohiua tahikangela abe o Isiraele ma nyawa! Masara abe to ngona ani baba de to una ai dutu, gea ngini abe niahikangelaka o Isiraele ma nyawa. Ngini naa Ma Jou ai behehongo niaolukuoka de o Isiraele ma nyawa niahirehenoka ti ngini nia popangaoika, abe nimatoomuika de o Baala ma romangika gea.

¹⁹ Ho ngohi naa toboa tato, ngona kiani nahoko o Isiraele ma nyawa mata-mataika la yomatoomuino de ahao yoboa ihibuhukino daku o Karamele ma lokuoka. De ona yotobaleleani nia pangao o Baala abe yaratuhu iata de yamoritoa gea, kiani onangoo yongodumu nakokiao o Karamele ma lokuino. De nia pangao o ngo Asera, de ona abe yotobaleleani manga pangao gea yaratuhu iata biaha ona yolo-olomo ngoni fekata o ngo Isebele ami tauoka, gea onangoo nakokiaoino ma oraha nikokidoa o Karamele ma loku ma tubuino.” Hokogea o Elia wihibehehongo o Ahabika.

²⁰ Ho o Ahaba wolio ai tauika de wahidingoto o nyawa la ona yahingahu o Isiraele ma nyawa mata-mataika hoka o Elia wihibehehongoka. Ho ahao abe ma oraha yadonoka ona yomakutuono de ona abe yotobahuba-huba o pangao o Baalika de ona mata-mata yomakiniiki yodoa o Karamele ma lokuiye de ahao yomatoomuino o Karamele ma loku ma tubuoka.

²¹ Ka de yomatoomuinoka de ahao o Elia wakokihimanga de wataere onangika wato, “O Isiraele ma nyawa, hokokia ma dekanohi nia hininga hinootohi abe ma moi ma moi niato niwiniiki Ma Jou o Yawe de ma moi ma moi nihikokasapuru nimahuba o pangaoika. Ho ngini kiani nimaputuhu nimahuba-huba onagonaika! Nako Ma Jou o Yawe gea Una igoungu ti ngini nia Jou, kiani niwiniiki ka Una dika. Masara nako niato o Baala gea ti ngini nia jou, gea ena dika nianiiki.” Hokogea o Elia ai demo. Masara o Isiraele ma nyawa abe yomatoomuino genangoka duru yomarii-riidoka dika.

²² De o Elia wotemohi onangika wato, “Abeika, ka ngohiokahi dika naga abe Ma Jou o Yawe ai uru ma dodofangino ho ngohi ka tomatengo dika nenangoka masara nia popangao o Baala de o ngo Asera nioleleani gea iniratuhu iata de inimoritoa nenangoka.

²³ Ho naa ngini nialeino o hapi ma nauru hinooto, moi to ona de moi idadi to ngohi. De ahao ona niahigunoa ona abe yotobahuba-huba o Baalika gea la yairiki moi ma hapino gea la ena yomahihuba o huhuba iharo-harongo o Baalika. Kiani yairikino ma hapi gea de ahao yatoma de yatetoro de yateruiye manga huhuba ma ngi ma lokuoka abe daku o hidaulu ma gota ma lokuoka. Masara, gea ufa hiadono ona gea yatufuku. De ngohi tohidiai o huhuba ma hapi moioli de gea enangoo duru imaketero abe hoka to onangoli manga huhuba. De abeika ngohioo ahao o huhuba ma ngi ma lokuiye o hapi abe tatetoroka ngohi tateruiye abe daku o gota ma lokuoka de ngohioo ma, ko ngohiua abe tatufuku.

²⁴ De ahao ngini abe o Baala nioleleani ahao ngini nimagahoko o uku ti ngini nia jouika la ena ma hirete nia huhuba iharo-harongo yatufuku. De gea ngohioo ahao tomagahoko Ma Jou o Yaweika o uku la ahi huhuba iharo-harongo watufuku. Hokogea ngone ahao mata-mata hamake de nanga lako abe nako Ma Jou o Yawe eko nia jou o Baala abe nanga gogahoko yapaluhu de o uku. Hokogea kiani hodiai la de ahao hamake nako Ma Jou eko o Baala abe yapaluhu de o uku. De nako Ma Jou dika wakunu wopaluhu de o uku gea Una Ma Jou dika nanga Jou ma gou-goungu.” De o Isiraele ma nyawa mata-mata abe yomatoomuino genangoka ka ma moi o Elia iwipaluhu, ato, “Ani demo gea duru irahai!”

²⁵ Ho o Elia wahibehehongo ona mata-mata abe yotobahuba-huba o Baalika gea wato, “Ngini nihira nimangiriki o hapi hinootoino naa moi abe nioigo idadi nia huhuba iharo-harongo. De nidiaiohi la gea nia hapi nimahihuba, angamoi ngini nia ngoe. Ho ngini niahoko nia pangaoika de ahao ena dika atufuku nia huhuba gea masara, iti ufa hiadono ngini ma hirete niatufuku.”

²⁶ Ho ona yotobahuba-huba manga pangao o Baala yaleino o hapi ma nauru abe idadi to ona manga huhuba de ihidiaioka. De ahao ona de manga ilingi ilamoko yahoko manga pangao o Baalika gea. Ona yomulaenge yahoko o ngorumino ka hiadono o wange ikorona yomapoa-poaka ato, “O Baala, nomipaluhu ngomino la o uku nohidingoto!” Masara o ilingi o Baalino ko iwa, de ko kia-kiaua manga pangao gea idiai, abe ona yotobahuba-huba manga demo moioo de ko iwa o Baala yapaluhu. De ona duru yohola abe ihigilolitino o huhuba ma ngi gea abe kanganoinohi yodiaioka.

²⁷ Ho adonoka o wange ikorona de ahao o Elia womulaenge wamia-mia onangika wato, “Ngini kiani nia jou ena gea niahoko niamo-amokiye bote nia jou gea ka imaiduohi! Eko bote ena gea iloiki imahupuohi, eko naga moi o Baala kiani duru imafikirohi ho ko inigihenuahi! Eko nia jou gea ma karajaanga utu naga o wange naa! Abe ngohi tato bote ngini niato o Baala gea igoungu enangoo ma jou ho ena tanu naga e?”

²⁸ Hokogea o Elia ai mia-mia ma demo ka hiadono ona yotobahuba-huba o Baalika duru manga magawe idogo hiadono duru yopoa-poaka yahoko enangika. De ona duru de manga buturungu yomagahoko o Baalika ka hiadono yomaluiti manga badangoka. De manga humaranga de manga kuama abe hoka manga hirahi yodiai ka hiadono yomahiramohoka manga awunu.

²⁹ De o wange ikorona ipaha de duru yopoa-poakohi ka hiadono o bimaowa abe adonoka ma oraha gea o Isiraele ma nyawa yomahuba Ma Jouiye. Masara ko kia-kiauahi idadi de ko moiua yapaluhu de manga pangao ko ma iwa abe yalegaika o nau-nauru gea abe ka yomagaho-gahokohi o Baalika gea.

³⁰ De ahao o Elia wahibehehongo o Isiraele ma nyawa mata-mataika wato, “Kiani niaino nimahitigino ngohino.” Hokogea wotemo de ona yoboaino unangino de ahao una wodiaiohi Ma Jou ai huhuba ma ngi abe moi nagau ma dekana genangoka masara ma oraha naa irusakoka.

³¹ Ho o Elia waleino o hakaru ngimoi de hinooto la wohitunguu de o Isiraele ma nyawa manga dutu yangimoi de yahinooto abe yomaboa o Yakubino. O Yakubu una gea abe ma dihira Ma Jou witemoka wato, “Ani romanga taturuuruoka ho naa tonihiromangoli o Isiraele.”

³² Ho o Elia wapake ma hakaru gea de wodiai o huhuba iharo-harongo ma ngi abe wodingakoka Ma Jou o Yawe ai romangika. De ahao o huhuba ma ngi gea wobaitoka la ma baiti gea wohigilolitoka Ma Jou o Yawe ai huhuba ma ngi. Ma baiti gea ma lukuku abe wafaiti ka idadi o gandumu ma bibiti o supa ma amoko ngimoi de motoa nako yakopoa ma baituku de ahao aomanga ma baiti gea. Hokogea o baiti ma duduga ma gurutuku.

³³ Ho o huhuba ma ngi de ma baiti abe ihigilolitino gea wodiai ibooto de ahao o Elia o huhuba ma gota wafafoino o huhuba ma ngi ma lokuoka. O gota wafafo ibooto de ahao o hapi abe watetoroka de watobi-tobikuku ena mata-mata wateruiye daku o gota ma lokuoka. De naga o boto ma gahumu iata gea ena watumutu de wahuloko o nyawaika wato, “Abeika o boto ma gahumu iata gea, o boto gea kiani mata-mata niakokiomanga de o akere de ahao niogopoa o huhubauku de ma gotauku nenanga.” Hokogea o Elia wahuloko yodiai.

³⁴ Ho ka de gea yodiai ibooto, de wahulokoli o akere yaleino wato, “Naa ngini nihigalioli niatuagi abe imaketero hoka kangano.” Ho yaleinoli o akere o boto iatoli abe ahao yakopoa o huhubauku gea. De ahao o Elia wahulokoli onangika wato, “De naa ngini kiani nidiaioli duru imaketero hoka kangano ho ka hiadono ma hangeino niogopoa o huhubauku naa.”

³⁵ Hokogea o Elia ai huhuloko ho ma moioli yodiai de ma akere yogopoa ihahuru dau ma baituku abe ihigilolitino ai huhuba ma ngi ka hiadono ma baiti gea aomangoka de o akere.

³⁶ De gea adonoka ma oraha abe o wange-wangeiye o bobimaowaka de o Isiraele ma nyawa yomahuba Ma Jou o Yaweiye. Ho o Elia yomarihimanga de o Isiraele ma nyawa de ona gea una waniata wato, “Ngona Ma Jou o Yawe, o Abarahaama ai Jou, de o Isaka ai Jou, de o Isiraele ai Jou, de naa togahoko Ngona nomahimatoko o nyawa mata-mataika nenangoka la ona mata-mata inihioriki abe Ngona naa o Isiraele ma nyawa manga Jou. De Ngona nahimatoko onangika abe ngohi naa igoungu to Ngona ani gilaongo de mata-mata naa abe todiaioka, ma titi gea ngohi taniiki to Ngona ani behehongo ngohino.

³⁷ De ngohi naa, Ma Jou o Yawe, duru tomagahoko la Ngona nohipaluhu ngohino la ka idadi o nyawa nenangoka ona mata-mata duru inihioriki abe Ngona Ma Jou o Yawe de Ngona dika Ma Jou ma gou-goungu. De nahimatoko onangikaoo abe o wange naa adonoka ma oraha Ngona manga hininga homoi-homoiika naturuuru la nahigilio Ngonaika.” Hokogea o Elia ai niniata ma demo manga himangoka.

³⁸ De ahao ka itodokanino Ma Jou o Yawe ai uku wohiguti o Elia ai huhubauku gea kohahauku de yatufuku ma huhuba gea mata-mata. Ho o hapi ma roehe abe yomahihuba, de o huhuba ma gota, de ma hakaru, de hiadono naga ma tonakoo abe naga o huhuba ma ngi ma timiuku, gea ena mata-mata ka ma moi youkuoka ka hiadono duru itinoka. De Ma Jou ai uku ma dokara yoguti o akere ma baituku hiadono yodudungoka.

³⁹ Ka de gea o Isiraele ma nyawa mata-mata yamakeoka de gea yomamotumuku de ona ka ma moiiye de yopoa-poaka ato, “Ma Jou o Yawe, abe ka Una dika Ma Jou, Ma Jou o Yawe, Una gea Ma Jou!” Hokogea manga boa-boaka ma demo abe yomahitaana manga hininga yaturuuru Ma Jouika.

⁴⁰ De ahao o Elia wahuloko onangika wato, “Ngini itaiti niataoko ona yotobahuba-huba o Baalika gea kiani niataoko ona mata-mata! Ufa ka hiadono moi naga de yoara!” Ho ona abe yotobahuba-huba o Baalika mata-mata yakokitaokoka de ahao o Elia wahulokoli la ona gea yakokiao dau o Kisono ma akeruku. De ahao genangoka yakokitoma ona yotobahuba-huba o Baalika gea ka hiadono yamataka abe ko moiokaua abe manga doomuino ko yohonengua.

⁴¹ De ahao o Elia witemo o Ahabika, wato, “Irahai ngona noikohi nolomo de nokere angamoi naga o awana duru ma koroongo kohagiria.” Hokogea o Elia wihingahu o koanoika.

⁴² Ho o Ahaba woiki la wolomo de wokere, masara o Elia wodoali o Karamele ma lokuiye de watilabukuku o tonakuku de womaponuku ka hiadono ai himanga ai buku hinooto ma hidogoronaka de womaniata.

⁴³ De naga o Elia ai gilaongo abe winiiki de ahao o Elia wihibehehongo unangika wato, “De naa ngona noiki la ka idadi nolega dai o gahioko natailako nako naga o lobi.” Ho ai gilaongo woiki wolega de ahao wigilio o Eliaika de wihingahu unangika wato, “Ko kia-kiaua tamake dai o dihangoka.” Hokogea wopaluhu de o Elia wihuloko la woikoli daioko de wolega. Ho ma moioli woiki masara ko iwa o lobi wamake. Hokogea o Elia wihuloko ai gilaongika ma tumidi.

⁴⁴ De ahao ma tumidoka wigilio o Eliaino de wihingahu, wato, “De ahao naa de tamake o lobi moi duru ma eteteke abe ma rupa hoka o nyawa manga giama dika ma amoko de daukiye idoa o gahi ma lokuino.” Ka de wihingahu hokogea de o Elia wihulokoli wato, “Ho naa kiani nouti nihingahu o Ahabika de hokonaa ahi hingahu unangika nadofanga, nato, ‘Ahi koano, jai-jai dika de o awana iboaka ho ngona kiani duru nomataiti ani kuda ihikokipasi ani gorobaika de nosobo nolio done inihidatatoko de o awana koharikimi de done ka hiadono ko idadiua nomahiadono ani tauika.’” Hokogea o Elia wihuloko de ai gilaongo ka wosoboka.

⁴⁵ Ka de una woiki de imulaenge ma lobi abe daku ma dihangoka imatoomu ma ngoe ma hengo-hengo. De naga o hidaloko enangoo idogo-dogo iputurungu italoko de imakiniiki de o awana hiadono duru koharikimi ma oraha o Ahaba wosobo woiki o Yisereele ma kotaika.

⁴⁶ De ma oraha o Ahaba wosobo de o Elia womahiadonoka unanguku. De duru ka itodokanino de Ma Jou o Yawe o Elia wilufungoka de ai buturungu. Ka de hokogea idadi de una ai baju ma guru-gurutuku wotupukuriye de ai baju ma barene ai ban ma goronauku wonoa. De unangoo wosobo womapopaata o Ahaba ai goroba ma himangoka wihihira-hira ka hiadono yomahiadonoka o Yisereele ma kotaika.