1 Kokoano 17 - Ma Jou ai Demo-demo o Totobelohoka

Ma Jou ai uru ma dodofanga o Elia ai Ade-ade

¹ De ma oraha o Ahaba o Isiraele ma nyawa wahikoano, naga Ma Jou o Yawe ai uru ma dodofanga womatengo ai romanga o Elia. De o Elia gea o Tisebe ma nyawa de ai kapongo o Tisebe gea naga o Isiraele ma tonaka ma honongaka abe ihiromanga o Gileada. De o Elia witutumu manga koano o Ahaba, de womahingahu unangika wato, “Ngohi naa o Elia abe tileleani Ma Jou o Yawe de Una wohihidoaka ngohino ai hingahu ngonaika. De angamoi Ma Jou o Yawe, Una o Isiraele ma nyawa manga Jou, de Una igoungu wowango-wango ho abe ngohi ai hingahu tadofanga ngonaika enangoo naa duru ma gou-goungu. Ho hokonaa ahi hingahu ma gou-goungu ngona o koanoika. Ahao o taongo muruono naga nanga himangoka, ko iwaka ma awana ka hiadono ngohi o Elia tohibehehongo Ma Jouika la o awana wohiboali. Ho ngaro o awana eko o gagini ma enangoo ko iwahi ka hiadono ngohi ma oraha togahokoli o awana iboa.” Hokogea o Elia wihingahu manga koano o Ahabika.

² De gea wihingahu ibooto de ahao Ma Jou o Yawe wihibehehongo o Eliaika wato,

³ “Ho naa ngona nosobo nenangoka de noiki o wange ma hiwariha de nomagogono o Keriiti ma akere ma datekoka, abe ena o Yorodani ma akere ma jaga doka o wange ma hiwariha ma honongaka.

⁴ De ngona ahao nogogere genangoka la ka idadi nokere o Keriiti ma ngairino de Ngohi tahuloko o totaleo o wogonika la ena ihiboaino ani inomo inidotaka.” Hokogea Ma Jou ai behehongo o Eliaika.

⁵ Ho Ma Jou o Yawe ai behehongo gea o Elia wihingounu ho woiki o Keriiti ma akerika abe ena o Yorodani ma akere ma ngairi ma jaga doka o wange ma hiwariha ma honongaka de genangoka womahidodogumu o Elia.

⁶ De ahao o wange-wangeiye naga o wogono muruono naga iboa o Eliaino o ngorumino de o bimaowaka abe naa iwidotakino o roti de o roehe. De o Elia wokere o Keriiti ma ngairino gea.

O Ngofeka o bao o Sarafata ma kotaka o Elia mihiolomo

⁷ Masara ka de uku de o Keriiti ma ngairi gea ena iowahoka ho ko iwaka ma akere, ma titi ko iawanuahi ma tonakoka gea.

⁸ De ahao Ma Jou o Yawe wihingahu o Eliaika wato,

⁹ “Naa tonihibehehongoli la ngona nosoboka nenangoka de noiki o Sarafata ma kotaika abe o Sidono ma tonakoka de nomahidodogumu genangoka. Abe naga momatengo o ngofeka mofao abe genangoka mogogere abe ngohi tomihibehehongoka munangika la de ahao ani inomo muna monihidailako ngonaika.” Hokogea Ma Jou wihihira-hira o Elia.

¹⁰ Ho o Elia wosobo woiki o Sarafata ma kotaika gea. De ka de womahiadono o kota gea ma ngoranika de naga genangoka momatengo mofao de naga ami gota matoomuino abe ena gea o gota ma jaga duru ma hohumuduru. De o Elia womiahoko wato, “Hobata, ka idadi nohile de ani boto o akere ngaro ma hutulu dika la ngohi ka idadi tokere?”

¹¹ De muna gea mosobo mato mile ai akere gea, de o Elia womagahokoli munangika wato, “De hobata, nako ka idadi, iti ani roti ma belaka enangoo nohigaoino.”

¹² De unangika mipaluhu de ami huha mato, “Marai ngonaoo nomahijou Ma Jou o Yaweika abe Una igoungu wowango-wango de to Una ai romanga tapake tohitunguu ngohi duru tagou-goungu tonihingahu la ka idadi nohioriki to ngohi ahi demo naa enangoo igoungu. Abe nako ngohioka ko iwa ahi roti, ngaro ngohioka nagahi o tarigu ma hohutulokahi abe tagogono o boto ma etetekoka. De ahi saitunu ma minya, abe ena gea tapake todiai o roti, enangoo ka ma hohutulokahi abe ka o boto ma dobikokahi dika. De ngohi o gota tomadoomuino naa la ngohi ka de tolio ka idadi ngohi de ahi ngofaka tomihihakai mia inomo ma hou la ngomi miolomo ma baha de ahao ka idadi mihonenge ma titi o hafini.”

¹³ De o Elia wotemoli munangika wato, “Hobata, ngaro ufae dika de nohawana de o hafini masara nolio de nodiai dika abe hoka nohideeoka. Masara ihira nohidiai ahi roti moi ma eteteke abe ani tarigu de ani saitunu ma minyaino, de ahi roti gea nohihidoaka ngohino de ahao nodiaioli ti ngini nia inomo la ka idadi nginioo niaolomo.

¹⁴ De angamoi hokonaa o Isiraele ma nyawa manga Jou, Ma Jou o Yawe, ai behehongo ngonaika, wato, ‘Abe naga ani tarigu nagogonika ani boto ma goronaka ena gea ko imataua de ani saitunu ma minya enangoo ko imataua ka hiadono ma oraha gea Ma Jou o Yawe o awana wapuraraholi nanga tonakoka naa.’ Hokogea Ma Jou ai behehongo ngonaika.”

¹⁵ Ka de muna moihene o Elia ai demo gea de ma bao gea molio de modiai duru imaketero hoka o Elia womihibehehongoka munangika. Ho o wange-wangeiye naga manga inomo la o Elia de ami ngofaka de muna ka idadi yaolomo.

¹⁶ De gea angamoi ami tarigu ma botoka gea ko imataua de ami saitunu ma minya ma botoka enangoo ko imataua duru imaketero abe hoka Ma Jou o Yawe ai behehongo onangika abe wihiakunu ai uru ma dodofanga o Eliaika la womihingahu munangika.

¹⁷ De ona yahange yogogere ma bao ami tauoka de o wange moiuku to muna ami ngofaka wopanyake de una ka idogo-dogo ai panyake ka hiadono duru wokangela de ma bahauku ai ngomaha itoaka abe ngoi meme mitotirino.

¹⁸ De muna duru mohuha ho mileha o Eliaika de ami huha ma demo, mato, “Abeika ngona naa Ma Jou ai uru ma dodofanga ho done hokonaa abe ngona noboaino la nohihidumutu abe ngohi ahi howono de hiadono nato ahi ngofaka naa nihohonenge, eko sarakia?” Hokogea ngoi meme motemo.

¹⁹ De o Elia womipaluhu dika de ai dora ma hiokoo, wato, “Hobata, ani ngofaka gea togahoko la nohihidoaka ngohino.” Hokogea o Elia wotemo de ahao ami ngofaka wigoraka ami giamino de naa unangoli witotiri de wiao daku o Elia ai kamariye, abe naga ma tau ma lape hinootoka. De ahao ai kamaroka gea de ami ngofaka gea o Elia wiiduiha ai koioka la wibitikangiye.

²⁰ De o Elia duru de ai huha ma demo wileha Ma Jou o Yaweika, wato, “Ahi Jou, Ngona Ma Jou o Yawe nohiboa o kokangela o tonaka ma amokika, masara done munangoo nomihihuha de o kangela duru ma dubuho abe hokonaa? Ngohi tomadioniki o ngo Baoika naa de done sarakia Ngona nohiboa o hone-honenge ami ngofakika nenanga de duru nomihikangela?”

²¹ De ahao ma hangeino o Elia widomotumuku o ngofaka ai lokuoka de duru Ma Jou o Yaweika wigahoko, wato, “Ahi Jou, Ngona naa Ma Jou o Yawe, de ngohi tigahoko Ngonaika la nihiwangoli o ngofaka naa!” Hokogea ma hangeou o Elia wodiai ai gogahokino.

²² De Ma Jou o Yawe o Elia wigihene de o ngofaka gea ai womaha ilio unangika ho hiadono wowangokali.

²³ De o Elia wigoraka witotiri wihiguti o tau ma goronauku de wihigilio ngoi meme ami giamika. De una wato, “Abeika hobata, ani ngofaka naa ka wowangokali!”

²⁴ Hokogea wotemo de muna mihingahu o Eliaika, mato, “Naa duru tonihioriki abe ngona igoungu Ma Jou ai nyawa abe Una wonipake. De tohioriki ani hingahu duru Ma Jou o Yaweoka de aino ho duru igou-goungu ani demo.” Hokogea Ma Jou wihitaana munangika abe o Elia gea Ma Jou ai uru ma dodofanga.