1 Kokoano 15 - Ma Jou ai Demo-demo o Totobelohoka

O Abiama wahikoano o Isiraele ma nyawa abe yogogere o Yehuda ma tonakoka

¹ De o Abiama una womulaenge wohikoano daku o Yehuda ma tonakoka ma oraha o koano dau ma honongaka o Isiraele ma tonakoka, o Yerobeama abe ai baba o Nebata, una ai nyawa wahikoano ngade-ngade ai taongo ngimoi de tufange ma dekanino.

² De o Abiama gea una wohikoano o Yerusaleeme ma kotaka ai taongo hange dika. De to una ngoi meme o ngo Maaka abe ami baba o Abisalomo.

³ De o Abiama gea, una o koano abe ai datoro imaketero hoka ai babali ho unangoo ai howono imakadaene hoka o Rehabeamoli. De o Abiama to una ai hininga duru imakohowono de ai kuwewete o Dautu ai hininga abe una ma dihira gea duru ai hininga imakiniiki de Ma Jou ai mau.

⁴ Masara Ma Jou o Yawe ko wawohangua ai behehongo o Dautika ngaro o Abiama gea ai datoro duru imakohowono de o Dautoli ai datoro. Masara ma titi o Dautu womahijou itiai Ma Jou o Yaweika hiadono to una ai totoforauku Ma Jou wahigunoa la onangoo yahikoano ai nyawaika. De Ma Jou wihidoaka o Abiamika ai ngofaka o nauru womatengo ai romanga o Asa abe wihidadi ai baba ai duruuru la unangoli wahikoano o Yerusaleeme ma kotaka. De Ma Jou o Yawe ai kota o Yerusaleeme wohiputurungu hiadono ko moiua yamoroini o Asa iwiruwae ma oraha wohikoano ma kotaka gea.

⁵ De hokogea Ma Jou wohiaturu angamoi o Dautu ai wowangoka wodiai abe duru wihisanangi Ma Jou o Yawe de una wotobahingounu Ma Jou o Yawe ai behehongika ka hiadono ai wowango ma bahaika. Masara naga moi o Dautu wodiai abe duru ko wihisanangiua Ma Jouika de gea ma titi ai howono o Uriaika, o Hete ma nyawa gea.

⁶ De o parangi gea abe imulaenge ma oraha o Rehabeama de o Yerobeama yomaketeparangi ka igila-gila dika ma oraha o Abiama wohikoano ka hiadono unangoo wohonenge.

⁷ De mata-mata utu abe o Abiama wodiai gea ihitulihukuoka o buku moioka ma romanga, “O Kokoano abe Ihikoano o Yehuda ma Tonakoka Manga Ade-ade.” De o Abiama gea de o Yerobeama onangoo ka ihikaika yomaketeparangi.

⁸ De ma oraha o Abiama wohonenge de unangoo iwilungunu o Dautu de ai totofora manga lungunu ma ngioka o Dautu ai kota ma goronaka. De ahao to unangoli ai ngofaka o Asa abe Ma Jou wihidoaka la wodadi ai duruuru, una ahao wahikoano ona o Yehuda ma tonakoka.

O Asa wahikoano o Isiraele ma nyawa abe yogogere o Yehuda ma tonakoka

⁹ O Asa gea womulaenge wohikoano o Yehuda ma tonakoka abe ma oraha o Yerobeama ai dekanoka wohikoano dau o Isiraele ma tonakoka. Abe o Yerobeama gea ngade-ngade ai taongo monaoko ibooto wahikoano ai nyawa dau o Isiraele ma tonakoka de ahao o Asa womulaenge wohikoano o Yehuda ma tonakoka.

¹⁰ De o Asa gea una ai nyawa wahikoano ai taongo moruata de moi ma dekanino. De to una ngoi be ami romanga o ngo Maaka abe muna o Abisalomo ngoi ora.

¹¹ De o Asa ai wowangoka unangoo abe ai datorino Ma Jou o Yawe wihisanangi hoka to una ai tofora o Dautu.

¹² Una wahihihanga o popangao mata-mata abe ma dihiraino ai totofora yodiai. De wahihihanga o nau-nauru abe manga badanga yomatobafuku-fukunu o pangao ma tauoka la ato hokogea yomahuba manga pangaoika, ona mata-mata wahihupu ai tonakino ka hiadono ona duru ko idadiokaua yolio manga tonakika.

¹³ De ngoi be o ngo Maaka, munangoo mohigoko o pangao ma liate abe ihiromanga o ngo Asitorete ami liate. De ena gea duru ma dorou abe yahimaleke o nyawa abe manga datoro itiai. De o ngo Maaka gea ami gogere o koano ai tauoka duru de ma horomatioka de o nyawa imigorakiye ma titi muna o koano ngoi be. Masara o Asa ngoi be ami pangao gea watolanga de ahao watufuku o Kidono ma dolaka de muna womihiguti ami gogerino.

¹⁴ De ngaro o popangao ko wamataua wohibinaaha ai tonakoka abe muruono nagahi masara o Asa duru ko worehenua winiiki Ma Jou o Yawe ai hininga ka hiadono ai wowango ma bahaika.

¹⁵ De o gurasi ma dutu de o haaka ma dutu de ma kiahonanga mata-mata abe ma dihiraino una de ai baba iwidingakoka Ma Jouika ena gea mata-mata wohingohama Ma Jou o Yawe ai Tau ma goronaika.

¹⁶ De ka ihikaika o Asa o Yehuda ma tonakoka de o Baesa abe wohikoano dau o Isiraele ma tonakoka ona yomaketeparangi.

¹⁷ De ma moiuku o Baesa de ai tentara yangohama o Yehuda ma nyawa manga tonakino de genangoka naga o Yehuda ma nyawa manga kota ma romanga o Rama abe itigi manga tonaka ma batingika. De manga kota o Rama gea o Baesa wahikala ho unangoli wahipareta o Yehuda ma nyawa abe yogogere o Rama ma kotaka gea. De o Baesa una ahao o Rama ma kota gea wadaduhu yakiloliti de ma dadaduhu de ena gea ka ihikaika wohiputurungu la ko idadiua o nyawa yowohama eko yohupu o Yehuda ma tonakino abe genangoka o Asa wohikoano.

¹⁸ De o Asa womahibalaha hokonaa, una wale o haaka de o gurasi ma hou abe nagahi Ma Jou o Yawe ai Tau ma goronaka de utu wale o gurasi de o haaka o koano ai tauino de ena mata-mata wapake la o duduhunu wamake o Arama ma tonakino. Abe to una ai duduhunu ma nyawa yamuruono naga wairiki de wahidingoto de ma gurasi de ma haaka gea yao o Arama ma kota ma ayoika o Damasiki. De genangoka ona kiani iwitutumu ma koano o Bene-Hadada abe ai baba o Tabarimo de ai ete o Arama ma nyawa manga koano ma dihira abe ai romanga o Hesiono. De hokonaa o Asa ai hingahu abe kiani yadofanga o Bene-Hadadika.

¹⁹ “Ngohi o Asa abe de ahi horomati o Bene-Hadadika tonihihohininga abe ma dihira to ngona ani baba o Tabarimo de ahi ete o Saloomo duru yomaketedodiawo. De ona o kokoano yahinooto gea yomahiketehibehehongo la yomakuduhunu nako naga manga musu yahikangela. De naa ngohi tomahingahu abe ngohi duru toigo la ngoneoo homahiketehibehehongo homakuduhunu imaketero hoka onangoli ma dihira. Masara ngohi tohioriki ngona de ahi musu ma koano o Baesa ngini ma dihirainohi nimahiketehibehehongoka la nimakuduhunu. Ho ngohi ahi hidingoto ma nyawa naa inihidoaka ahi horomati ma hadia ngonaika o haaka ma dutu de o gurasi ma dutu. De ahi hadia naa imakiniiki de ahi behehongo ngonaika abe de ma titi ngohi toigo la nia behehongo nohihihanga abe ngona de o koano o Baesa nimahiketehibehehongoka. Hokogea ngohi togahoko la ngona nohihihangoka nia behehongo gea la o Baesa ai tentara ahao ngone hahihupu to ngohi ahi tonakino. Hokogea ngohi o Asa ahi behehongo ngonaika.”

²⁰ De o Bene-Hadada wosanangi o Asa ai behehongika ho to una ai tentara wahuloko yaparangi o Isiraele ma nyawaika. De ona yaparangi o Isiraele ma nyawa manga kota-kotaika hiadono yahikala manga kota iata abe o Iyono ma kota, o Daana ma kota, de o Abe-Bete-Maaka ma kota, de o Kineroto ma kota. Ho naa o kota iata gea de manga tonaka mata-mata imanoa o Bene-Hadada ai giamoka de o Nafatali ma nyawa to onangoo manga tonaka ma gahumu enangoo ai kuahaka imanoa naa.

²¹ De ma oraha gea o Isiraele ma nyawa manga koano o Baesa de ai tentara yogogere o Rama ma kotaka abe naga o Yehuda ma tonaka ma batingoka. De ma kota gea ka ihikaika ihiputurungu la ka idadi yapake de yahikangela o Yehuda ma nyawa. Masara ipahaino de ahao o Baesa woihene ma abari abe o Bene-hadada widodiawo o Asaika hiadono waparangi o Isiraele ma nyawa manga kota iata gea de hiadono wahikalaka. Ho naa idadioka o Baesa ai kota iata naa naga o Bene-Hadada ai kuahaka. Ho ka de woihene o abari gea de o Baesa wanoaika ai hidee la o Rama ma kota o Yehuda ma tonakoka wahipareta ho manga karajaanga abe o Rama ma kota ma dadaduhu ihiputurungu enangoo wanoaika de ai tentara wahuloko la yolio manga tonakika. De ahao una womanoa dika o Tirisa ma kotaka.

²² Ka de hokogea idadi de o Asa naga ai demo o huhuloko abe wohidagi o Yehuda ma tonaka mata-mataika. De kiani o Asa ai kokawaaha mata-mataika ai huhuloko gea ihingounu abe manga koano wahuloko onangika. Abe kiani ona yokokiloiki o Rama ma kotaika de o hakaru kohangoe de o balaka abe o Baesa wapake la manga kota ma dadaduhu wohiputurungu ena gea kiani yakokigoraka. De ahao o dadaduhu ma kiahonanga mata-mata gea yao o Benyamini ma dutu ma tonakika abe o kota o Gebaika de o kota moioli o Misapika. De ahao o Asa wapake ma hakaru de ma balaka gea la o kota hinooto gea wohidaduhu de o dadaduhu iputurungu.

²³ De mata-mata utu abe o Asa wodiai ma oraha o Yehuda ma tonaka wohikoano ai taongo moruata de moi ma dekanino gea naga ma ade-ade. De ai ade-ade gea ihitulihukuoka o buku moioka ma romanga, “O Kokoano abe Ihikoano o Yehuda ma Tonakoka manga Ade-ade.” De o Asa ma oraha iwiperekioka de wokangela de o panyake abe iwidaene ai louika.

²⁴ De ma oraha o Asa wohonenge de unangoo iwilungunu o Dautu de ai totofora manga lungunu ma ngioka o Dautu ai kota ma goronaka. De ahao o Asa ai ngofaka o Yosafata wituruuru ho unangoli wodadi o Yehuda ma kokawaaha manga koano. De hokonaa ma ade-ade ma titi o kokoano dau o Isiraele ma tonakoka abe hokokia o Baesa gea wodadi manga koano. O Yerobeama gea duru ihira Ma Jou wihidadi o Isiraele ma nyawa manga koano masara una ahao duru wotobalawana Ma Jouika. De ma oraha o Yerobeama wohonengoka ai ngofaka o Nadaba wodadi manga koano. Masara o Nadaba ai datoro hoka ai babali de ai kokawaaha wahikoano itorou. De o Nadaba wohikoano ko itedekanua de o Baesa witoma de wituruuru ho unangoli wodadi o Isiraele ma nyawa manga koano ma oraha o Asa wahikoano daku o Yehuda ma tonakoka.

O Hitararono ma hidogo O Nadaba wodadi o koano o Isiraele ma tonakoka

²⁵ De dau o Isiraele ma tonakoka naga o koano ma hungi ai romanga o Nadaba abe ai baba o Yerobeama. De o Nadaba wodadi ai baba ai duruuru ma oraha o Asa wohikoano ngade-ngade ai taongo hinooto ma dekana daku o Yehuda ma tonakoka. De o Nadaba wohikoano ka o taongo hinooto dika ma dekana o Isiraele ma tonakoka.

²⁶ Masara o Nadaba gea duru wodiai itorou Ma Jou o Yawe ai himangoka abe waniiki dika to una ai baba ai wowango ma datoro ho unangoo womahuba-huba o popangaoika. De ai howono gea imaketero hoka ai babali, o Yerobeama, abe ma dihira una wahihira-hira o Isiraele ma nyawa ka hiadono to onangoo manga biaha yomahuba o popangaoika de manga howono ma ngoe Ma Jouika.

²⁷ De ma moiuku o Isiraele ma nyawa manga koano o Nadaba de ai tentara yaparangi duru kohagiria o Filistina ma nyawaika abe to ona manga kota o Gibetono duru yoigo yahikala onangika. De ahao naga o Isiraele ma nyawa womatengo abe una womahidutu o Isakara ma dutuika, de ai romanga o Baesa abe ai baba o Ahia. De o Baesa gea wihidee o Nadabika hiadono witoma o Gibetono ma kotaka o Filistina ma tonakoka.

²⁸ De o Baesa o Nadaba wihohonenge ma oraha o Asa o Yehuda ma tonakoka wahikoano ngade-ngade ai taongo hange ma dekanino. De naa o Baesali wodadi o koano o Isiraele ma tonakoka.

²⁹ De o Baesa una o Nadaba witomaka de ahao duru womataiti o Yerobeama ai ngofa-ngofaka de ai dano-danonguku ona mata-mataika wakokitomaka hiadono ko moiokaua. De hokogea idadi de duru ihingodumu Ma Jou ai behehongo abe ma dihira Ma Jou o Yawe wihingahu ai uru ma dodofanga o Ahiaika abe una o Silo ma nyawa.

³⁰ De hokogea ai behehongo ma hingahu idadi angamoi o Isiraele ma nyawa manga Jou, abe Ma Jou o Yawe, duru wingamo o Yerobeamika ma titi to una ai howono kohangoe abe wodiai Ma Jou ai himangoka. Abe ma titi wahowono Ma Jouika abe o Isiraele ma nyawa duru wahirehene o dorouika hiadono onangoo yahowono ilamoko Unangika.

³¹ De mata-mata utu abe o Nadaba wodiai ma oraha o Isiraele ma tonaka wohikoano naga ma ade-ade. De ai ade-ade gea ihitulihukuoka o buku moioka ma romanga, “O Kokoano abe Ihikoano o Isiraele ma Tonakoka manga Ade-ade.”

O Baesa wohikoano o Isiraele ma tonakoka

³² De o Baesa wahikoano o Isiraele ma nyawa abe yogogere o Isiraele ma tonakoka abe daukuku idateke. De o Asa wahikoano o Isiraele ma nyawa abe yogogere o Isiraele ma tonaka abe dakuiye idateke de ihiromanga o Yehuda ma tonaka. De o koano yahinooto gea duru yomaketeparangi ka ihikaika ka hiadono ma baha ihikoano.

³³ Abe ma oraha o Asa wohikoano ai taongo hinooto ifoloioka o Yehuda ma tonakoka de o Baesa una womulaenge wohikoano dau o Isiraele ma tonakoka. De o Baesa una wogogere o Tirisa ma kotaka de o Isiraele ma nyawa wahikoano o taongo monaoko de iata ma dekanino.

³⁴ Masara o Baesa unangoo wodiai abe itotorou Ma Jou o Yawe ai himangoka abe waniiki ma datoro hoka o koano ma dihira o Yerobeamoli. Abe o Baesa unangoo womahuba-huba o popangaoika de o Isiraele ma nyawa wahihira-hira la ona ka yogila-gila dika de manga biaha abe yomahuba o popangaoika ho manga howono ma ngoe Ma Jouika.