1 Kokoano 14 - Ma Jou ai Demo-demo o Totobelohoka

O Pasala 14:1-8, 17-18, 21-28 ko atailakouahi O Yerobeama o koano ma dorou o Isiraele ma tonakoka

¹ De ipahauku naga ma oraha abe ma koano o Yerobeama ai ngofaka wopanyakeuku. De ai ngofaka gea ai romanga o Abia.

² Ho o Yerobeama womihuloko ngoi fekatika wato, “Ngona kiani nomahinoauku de o ngofeka momatengoli ami pakeanga de nomaturuuru ani rupa la ufa o nyawa inihioriki abe ngona to ngohi ngohi fekata. Nomaturuuruohi de ahao noiki o Silo ma kotaika la ka idadi nitutumu Ma Jou ai uru ma dodofanga o Ahia ai tauoka. Abe una gea ma dihiraino de wohihingahu wato ngohi ahao todadi o koano nanga tonakoka naa.

³ De ma oraha nitutumu de kiani niao o roti ngimoi de o kue de o boto moi abe ma dola o ofungu ma gula la gea mata-mata nihidoaka unangika. De ahao nileha unangika ma titi nanga ngofaka naa abe wopanyakeuku, de bote una ka idadi wonihingahu hokokia ahao idadi unangika.”

⁴ Ho una womihuloko ibooto de ngoi fekata gea duru mihingounu ai demoika ho moiki o Silo ma kotaika de mitutumu o Ahiaika. De o Ahia una gea iwiperekioka de ko womahiorikokaua.

⁵ De muna ko momahiadonuahi unangika de Ma Jou o Yawe wihingahuoka wato, “Abeika ko itedekanokaua de ma koano o Yerobeama ngoi fekata moboaino ani tauino la monitutumu. De muna monitutumu angamoi to ona manga ngofaka doka una wopanyakeuku de ona yoigo ihioriki hokokia ahao idadi unangika. De ma oraha moboaino de ami rupa imakohowono angamoi momadokangelukino la ufa o nyawa imihioriki. Ho ma oraha monitutumu de kiani nadofanga munangika to Ngohi dika ahi demo abe tonihingahu.”

⁶ De ipaha muna momahiadono ai tauika de o Ahia ka idadi woihene ami lou ma ilingi ma oraha momahitigino ho womiahoko wato, “O Yerobeama ngoi fekata, ngona ka idadi naino nowohaminohi! De naa tonileha, done adodoa ho ngona nomadokangelukino hoka o nyawa biaha dika? Masara ngohi naa Ma Jou wohihulokoka wato kiani tadofanga ngonaika o hininga ma huha ma abari.

⁷ Ho ngona noliohi dika de nihingahu ahi demo naa ani rokata o Yerobeamika nato, ‘Ngohi naa ngini o Isiraele ma nyawa nia Jou o Yawe, de igoungu Ngohi naa abe tonigoraka de tonihidadi ahi nyawa manga koano.

⁸ Abe ma dihiraino gea de o koano ma kuaha tagoraka o Dautu ai tauoka de aino de gea tonihidoakoli ngonaika la ngona naturuuru de nodadi o Isiraele manga koano. Masara ngona naa de ahi huhuloko o Dautu ngini duru ko nimakadaenua ma titi nia hininga de nia hingounu. Angamoi una gea ma dihiraino de watobaniiki ahi pareta ma demo, de to una ai hininga ma gahumu itagi Ngohino ho ai datoro imakiniiki de ahi hininga ma mau. O koano o Yerobeama naga ai ngofaka womatengo ai romanga o Abia abe ka ai etetekinohi duru ai ngofaka gea wopanyake. De ma moiuku o Yerobeama womihuloko o Abia ngoi memeika wato kiani moiki Ma Jou ai uru ma dodofangika abe ai romanga o Ahia. Masara ma oraha o koano ngoi fekata moiki o Ahiaika de una wato manga ngofaka ko idadiua wotogumu ai panyakeino. De gea angamoi Ma Jou o Yawe womaputuhoka abe kiani wihohowono o Yerobeamika gea. De Ma Jou ai hohowono ma demo gea wihidoaka ai uru ma dodofanga o Ahiaika. Ho naa o Yerobeama ngoi fekata moboa o Ahiaino de una wadofanga munangika Ma Jou ai hohowono ma demo gea. De ma oraha molio de ahao Ma Jou ai hohowono ma hingahu gea muna kiani madafongoli ami rokatika.

O Hitararono ma hidogo

⁹ Ho Ma Jou o Yawe ai hohowono ma demo abe adaene o Yerobeamika wihidoakokau ai uru ma dodofangika. De wihuloko unangika la womihingahu o Yerobeama ngoi fekatika hokonaa, “Ma Jou ai demo ani rokatika abe ahao kiani ngona nadofanga unangika hokonaa. Ma Jou wotemo, wato, ‘Ngohi Ma Jou tonilega-lega ngona o Yerobeamika, de nako ngona de ona mata-mata abe yohira yahikoano ahi nyawa masara, ka ngonahi ani wowangoka nodiai itorou ilamokoholi. Ngona nomadiai to ngona ani popangao duru kohangoe de ani popangao utu o pahitaaka napake la ka idadi nodiai o gurasino de enangino abe ma dogowini hoka o behi. Hokogea o popangao utuohi iwoe ngona nodiai ho duru nahowono Ngohino de ahi ngamo duru ifae ani howonika. De abeika ngona nomaputuhu la Ngohi Ma Jou ka nohiporetika dika.

¹⁰ De angamoi ngona notobadiai hokogea Ngohi Ma Jou ahao tohiboa o hibinaaha kohaamoko to ngona o Yerobeama ani tauika. Ho ani ngofa-ngofaka o nau-nauru hiadono ani dano-danonguku ka imahikauku tahohonenge ree-ree. De todiai ani tauika imaketero hoka womatengo abe wohitebini ai tau ma loa abe ipeseke de o hapi ma ioko. Una wagoraka ma ioko gea de waumo eko watufuku ka hiadono ko iwaka. Hokogea Ngohi todiai la tohitebini o Isiraele ma tonakoka. Ho o nau-nauru abe naga manga gogao ani tauika ngaro ani ngofaka idodutu eko ona o huhuloko abe naijaino, masara ona o nauru mata-mataika abe naga o Isiraele ma tonakoka ka de manga gahe homoi-homoiika adonoka de Ngohi tahohonenge.

¹¹ De ona mata-mata abe nahiromanga to ngona ani nyawa de yohonenge o kota ma goronaka ahao manga honenge o kaho yakokiolomo, de abe yohonenge ma hoanoka, to ona manga honenge ahao o totaleo yaolomo. De nenanga ahao idadi angamoi Ngohi Ma Jou o Yawe o wange naa tohibehehongoka.’” Hokogea Ma Jou ai hohowono ma behehongo o Yerobeamika.

¹² De ahao o uru ma dodofanga o Ahia gea womitemo o Yerobeama ngoi fekatika abe naa yomarihimanga, wato, “Masara nako ngona naa nolio dika! De ka de nowohama ani kotaika de ani ngofaka o Abia ai womaha ka itoaka ho wohonenge.

¹³ De o Isiraele ma nyawa mata-mataika ahao duru yohuha de iwigari de ona ahao iwilungunu. De ka una dika o Yerobeama ai ngofa-ngofaka o nau-nauru de imahikauku abe ai honenge adaene iwilungunu. De mangale ma titi Ma Jou o Yawe, o Isiraele ma nyawa manga Jou, wato, ‘Masara ka o Abia dika o Yerobeama ai tauoka abe yolape-lapeuku, de ai wowangoka Ngohi tamake ai datoroka abe ihihisanangi Ngohi.’” Hokogea o Ahia womihingahu o Yerobeama ngoi fekatika.

¹⁴ De ahao Ma Jou o Yawe ai uru ma dodofanga o Ahia gea ai hingahu wohigila-gila wato, “De Ma Jou o Yawe Una ahao naga womatengoli abe wiiriki de wihidadi o Isiraele ma nyawa manga koano. De o koano gea una ahao wahibinaaha ona mata-mata abe duru yadaene o Yerobeama ai tau ma nyawa idodutu. Duru o wange naa de Una Ma Jou womulaenge wodiai abe hoka wohibehehongoka. Ho ko itedekanokaua de mata-mata idadioka imaketero abe hoka ngohi, Ma Jou ai uru ma dodofanga, tonihingahuoka naa.

¹⁵ De igoungu Ma Jou o Yawe ahao o Isiraele ma nyawa wahipoha de ai hohowono hiadono o Isiraele ma nyawa manga buturungu ikelu-kelu. Ngohi tohiketero abe ona yodadi imaketero hoka o bongo-bongo abe iwango o taagaka abe ena gea ikelu-kelu ma oraha yawuwu o hidaloko. De nako o bongo-bongo gea ena o hidaloko adaene ko iwa ma buturungu la ka idadi irikotiye imaokoino. De imaketero hokogea o Isiraele ma nyawa manga buturungu ahao naga ma oraha abe enangoo ko iwaka. De ngaro ma dihira manga tonaka ma owa nenanga wahidoaka manga totoforaika de naga manga tonaka ma ngoe o Efaraata ma akere doka ma honongaka masara Ma Jou wohihihanga manga buturungu. De mata-mataika gea Ma Jou o Yawe wodiai onangika la manga buturungu ahao ko iwaka mangale ai ngamo duru ifae manga howonika ma titi o popangao yodiai de yomahuba-huba enangika abe hoka o ngo Asitorete ma liate ma ngoe yomahuba-huba enangika.

¹⁶ De hokogea Ma Jou ai nyawa, abe o Isiraele ma nyawa, wahidoaka ona o hohowonika ma titi o Yerobeama ai howono. Abe manga koano wahigaro de waribuutu o Isiraele ma nyawaika la onangoo duru yaniiki ai howono ma datoro.” Hokogea Ma Jou o Yawe ai hohowono ma hingahu o Yerobeamika de to una ai kokawaahaika mangale ma titi manga howono.

¹⁷ De o Yerobeama ngoi fekata motoihene ipaha o Ahia gea ai demoino de ahao muna molio ami kota o Tirisaika. De abe duru ma oraha muna mowohama ami tau ma goronaika de igoungu ami ngofaka ai ngomaha itoaka.

¹⁸ Ho o Isiraele ma nyawa ko manga ngoe yomatoomuino de iwilungunu ma koano ai ngofaka gea de duru iwigari-gari. De gea mata-mata idadi duru imaketero hoka Ma Jou o Yawe wohibehehongoka ai uru ma dodofanga o Ahia ai demoino. De ma oraha o Yerobeama wahikoano o Isiraele ma nyawa manga dutu ngimoi de naga manga hou abe o Saloomo ai ngofaka o Rehabeama wahikoano o Isiraele ma tonaka ma hononga idateke dakuiye. O tonaka gea ma dihiraino idadi o Isiraele ma nyawa manga dutu hinooto manga tonaka abe to Yehuda de to Simeono manga tonaka, masara naa manga tonaka ihikahumu de ihiromanga o Yehuda ma tonaka. De dau ma honongauku o Isiraele ma nyawa manga dutu yangimoi manga tonaka enangoo ihikahumoli ho idadi moi de ihiromanga o Isiraele ma tonaka. De o Yerobeama wahikoano manga tonaka ma hononga idateke daukuku gea. Hokogea o Isiraele ma nyawa yaregu hinooto. De ngaro ona mata-mataika o gogianongoru abe yomahidutu o Yakubika masara de ahao ona yodadi imaketero hoka yomakumusu. De manga koano o Yerobeama de o Rehabeama manga gogao ihira yomakadame masara ahao o Rehabeama de to una ai tentara de o Yerobeama de to una ai tentara yomulaenge yomaketeparangi ngaro ona mata-mata o Isiraele ma nyawa.

O Hitararono ma hidogo

¹⁹ De ma oraha o Yerobeama wahikoano o Isiraele ma nyawa de naga ma ngoe abe ma titi hokokia ai hiaturu ai kokawaahaika de hokokia una de ai tentara yaparangi o nyawa utuika. De ai ade-ade mata-mata gea ihitulihukuoka o buku moioka ma romanga, “O Kokoano abe Ihikoano o Isiraele ma Tonakoka Manga Ade-ade.”

²⁰ De o Yerobeama wohikoano ai taongo monaoko de hinooto ma dekanino de ahao wohonenge. De o Yerobeama ai ngofaka o Nadaba wituruuru ai baba ho ahao unangoli wahikoano o Isiraele ma nyawa.

O Rehabeama wahikoano o Yehuda ma tonakoka

²¹ De ma oraha gea daku o Yehuda ma tonakoka naga o Saloomo ai ngofaka o Rehabeama abe wahikoano o Yehuda ma nyawaika. De to una ngoi meme muna o Amono ma nyawa de ami romanga o ngo Naama. De una gea ai ngumuru ai taongo moruata de moi ma oraha wodadi o koano, de wahikoano ai taongo ngimoi de tumidi ma dekana o Yerusaleemoka. Abe ngaro o Isiraele ma dutu ngimoi de hinooto manga tonaka mata-mataino masara Ma Jou o Yawe wairiki ma kota gea la idadi to Una ai ngi.

²² De abe ma oraha o Rehabeama wahikoano o Yehuda ma nyawa de ona gea yodiai duru itorou Ma Jou ai himangoka. Abe nako hahidotelega to ona manga totofora manga howono de to ona gea manga howo-howono de ka onangohi manga datoro duru iwihihuha Ma Jou ai hininga hiadono ai ngamo ihidafaeiye.

²³ Abe ona gea yodiai o huhuba ma ngi ma ngoeika abe genangoka yomahuba-huba o jou-jou ma homoaika. De manga huhuba ma ngi-ngi gea yodiai o loku-lokuoka de o gota ma ago-agomo ma timiuku, abe utu yomahuba o hakaruoka de utuoli yomahuba manga pangao o ngo Asera ma liateoka.

²⁴ De ma oraha gea nagali o nyawa abe yomahidadidorou ma huhuba ma ngi-ngioka gea, de manga howono duru itorou gea imaketero dika hoka o homoa ma nyawa manga howono abe ma dihiraino yomanoa ma tonakoka gea. Abe Ma Jou wakiniiki o homoa ma nyawa gea manga tonakoka de yaika la to Unangoli ai nyawa ka idadi yomanoa genangoka, masara naa onangoo manga howono ka imakadaene dika de ma nyawa gea.

²⁵ De abe ma oraha o Rehabeama wohikoano ngade-ngade ai taongo motoa ma dekanino de o Mesiiri ma nyawa manga koano o Sisaka una de ai tentara yoboa o Yehuda ma tonakino de yaparangi o Yerusaleeme ma kotaika.

²⁶ De o Sisaka gea wangika hiadono wongohama Ma Jou o Yawe ai Tau de wale ma kiahonanga abe duru de ma ijaka. De hokogenangoo wodiai o koano o Rehabeama ai tau ma goronaka abe womale ma kiahonanga mata-mata abe duru ma hali-hali ka hiadono o parangi ma dadatoko abe o Saloomo wodiai o gurasino enangoo waleoka.

²⁷ Ho ahao o Rehabeama o parangi ma dadatoko gea waturuuru de o parangi ma dadatoko abe yodutuku o tabaagaino abe ihikasapuru de o hori. De manga dadatoko gea wahidoaka o gogoana ma nau-naurika abe yogoana o koano ai tau ma ngoranoka.

²⁸ De ma oraha ma getongo abe o koano woiki Ma Jou o Yawe ai Tauika de o gogoana gea iwiniiki de manga dadatokoka abe ma oraha wotagi. De ma oraha wolio onangoo iwiniiki de ahao manga parangi ma dadatoko gea ihigilio o gogoana manga ngioka o koano ai tau ma goronaka.

²⁹ De nagali o Rehabeama ai datoro utuoli ma ngoe abe una wodiai ma oraha wahikoano ai nyawaika. De ma ade-ade gea ihitulihukuoka o buku moioka ma romanga, “O Kokoano abe Ihikoano o Yehuda ma Tonakoka Manga Ade-ade.”

³⁰ De naga o parangi ma ade-ade ma ngoe angamoi o Rehabeama de o Yerobeama ka ihikaika yomaketeparangi.

³¹ De ipaha o Rehabeama wohonenge de iwilungunu ai totofora manga lungunu ma ngioka abe o Dautu ai kota ma goronaka. De ahao o Rehabeama ai ngofaka o Abiama wodadi ai baba ai duruuru ho unangoli wahikoano ona abe manga gogere daku o Yehuda ma tonakoka. De o Rehabeama gea ngoi meme o ngo Naama de muna o homoaino ma nyawa abe o Amono ma nyawa manga tonakino.