1 Kokoano 12 - Ma Jou ai Demo-demo o Totobelohoka

O Saloomo ai ngofaka o Rehabeama wodadi o Isiraele ma nyawa manga koano de wahikangela onangika

¹ De o Rehabeama woiki o Sikeme ma kotaika abe genangoka o Isiraele ma nyawa mata-mata yomatoomuinokau genangoka la iwihitunguu ma gou-goungu iwihidadi manga koano.

² De o Yerobeama, abe ai baba o Nebata, una ma dihiraino o Saloomo wato witoma ho una woara o Mesiiri ma tonakika. Ho naa una woihene ma abari abe o Koano o Saloomo wohonengoka de wolio o Isiraele ma tonakika ho ma oraha naa una ko ai gurutikaua de o Isiraele ma nyawa manga doomu gea.

³ De o Isiraele ma nyawa manga hidimono ona iwibehehongo o Yerobeama woboa onangino la ka idadi yomakiniiki iwitutumu o Rehabeamika gea. Ho naa o Yerobeama de o nau-nauru abe yahihira o Isiraele ma nyawa mata-mataika yomatoomuino de yoiki iwitutumu o Rehabeama la yomakoketemo de una.

⁴ De ona iwitemo o Rehabeamika ato, “Ani baba womihipareta de ma dubuho ho ngomi naa mikokiboa mimagahoko ngonaika de mia horomati. Ho naa miboa ma titi ani baba ai karajaanga ma hiaturu de o pajaka ma bobangu, abe kiani ngomi mifangu hiadono miamao itubuhoholi. Ho ngomi naa miboa de mia horomati mimagahoko ngonaika la nohiuwini mia karajaanga de mia pajaka ma bobangu abe kiani mifangu ngonaika la ufa ka ihikaika itubuhoholi. Abe ka de hokogea ngona nomihibehehongo nohiuwini mia gina gea de ahao ngomi mia igoka de aino misanangi midadi ani kokawaaha.” Hokogea yomagahoko manga koano ma hungika.

⁵ De o Rehabeama wapaluhu onangika wato, “Ngini nidamaa dika o wange hangeino de ahao ahi bobaluhu nginika niihene.” Ka de hokogea yoihene de yosobo.

⁶ De ahao o Rehabeama woiki yapoperekika abe ma dihira iwiduhunu ai baba o Saloomo de ai hiaturu ma putuhu de wahingahu abe o kokawaaha manga hohidimono manga gogahoko de waleha onangika, wato, “Ho nako ngini, sarakia niato ngohi kiani tapaluhu onangika?”

⁷ De to ona manga bobaluhu unangika hokonaa, ato, “Nako ngona ani nyawa nahiaturu de ma owa, de nahimatoko onangika ani dora ma hiokoo, de ngona duru noigo la nahisanangi, ahao ona duru yosanangi yodadi to ngona ani kokawaaha manga igoka de aino de ko inilawanua.” Hokogea manga sosawaroka de aino manga demo o Rehabeamika.

⁸ Masara o Rehabeama manga sosawaro ma demo gea ko wodafongua ho woiki o nau-naurika abe yomahikumuru moi de una, ho ona manga etetekinohi de duru yomahikoriki. De onangika gea walehali de o hingahu de o leleha imakadaene abe kangano wapake. De hokogea wolingiri to onangoo manga hininga angamoi ona naa wahidadioka la iwiduhunu de ai hiaturu ma putuhu.

⁹ Ho naa waleha onangika wato, “Nako ngini sarakia niato ngohi kiani tapaluhu onangika abe duru yoigo tahiuwini manga dubuho irupa-rupa abe ahi baba wahitubuhoka?”

¹⁰ De ona o goo-goduuru gea ka iwihitipokouku o Rehabeama ai baba de manga demo o Rehabeamika, ato, “Hokonaa kiani nahingahu ona yotobakurubungika, nato, ‘Nako ahi baba to una ai buturungu imaketero hoka to ngohi ahi hagaraara ma ngofaka dika ma buturungu. Ho nako niato to una ai hiaturu nginika de ma dubuhoka abeika abe ahao niamake abe hokokia to ngohi ahi hiaturu ma dubuho!

¹¹ Una igoungu ahi baba winihipareta de o ribuutuoka de aino masara to ngohi ahi pareta nginika utuohi de ma buturungoka! Una wapake o boboha la niwihingounu masara nako nialawana ahi hiaturu ma dubuhoika, ngohi ahao tapake abe de ma biha hoka o waitota ma biha nginika! Ho niamao utuohi ma odiri nako ngohino nihilawana.’” Hokogea o Rehabeama ai duduhunu o goo-goduuru gea manga hidaere ma demo manga koanoika.

¹² Ho o wange hange ipaha de o Yerobeama de o Isiraele ma nyawa mata-mata genangoka yomatoomuinoli o Rehabeamika hoka una wahingahuokau la yokokiihene ai putuhu ma bobaluhu abe manga gogahokika.

¹³ Masara o Rehabeama ko wagihenua abe manga gogahoko de ai demo duru ko iwa ma horomati onangika de angamoi woluku o nauru yapoperekika manga sosawaro ma demo unangika.

¹⁴ De waniiki ai duduhunu manga hininga dika abe o goo-goduuru gea. Ho to ona manga demo wohigilio ma oraha wapaluhu o Yerobeamika de o Isiraele ma nyawa mata-mataika, wato, “Igoungu, ahi baba winihipareta de o ribuutu de aino masara to ngohi ahi pareta nginika utuohi de ma buturungoka! Una wapake o boboha la niwihingounu masara nako nialawana to ngohi ahi hiaturu ma dubuho, ngohi ahao tapake abe imaketero hoka o waitota ma biha nginika! Ho ngini niamao utuohi ma odiri nako ngohino nihilawana.” Hokogea o Rehabeama ai demo ai kokawaahaika.

¹⁵ Ho itararono manga koano ma hungi ko wopusingua abe ai kokawaaha manga behehongo unangika. De hokonaa idadi angamoi Ma Jou ai mau onangika hokogea. Abe naa idadioka duru imaketero hoka ma dihira Ma Jou o Yawe ai demo abe wihidoaka ai uru ma dodofanga o Ahiaika. De ma demo gea o Ahia wihingahuoka o Yerobeamika.

O Isiraele ma nyawa yaregu hinooto hiadono de manga regu homoi-homoiika naga manga koano

¹⁶ Ho ka de o Isiraele ma nyawa gea iwihioriki manga koano ma hungi naa manga gogahoko duru woluku wohigihene de ona iwiboa-boaka de manga ngamo, ato, “Nako o Dautu de ai ngofa-ngofakuku ibootohi inahikoanohi! Ngone ko iwa nanga utumu o Isai ai ngofakino! Abeika nanga gogianongoru holio dika nanga kapo-kapongika. De nako ngini o Dautu ai tauino marai kiani nimahidodiai ona nia tauoka niagoana!” Ho o Isiraele ma nyawa genangoka yokokilio manga tau homoi-homoiika.

¹⁷ Masara o Rehabeama gea ka waparetahi ona abe yogogere o kota-kotaka abe naga o Yehuda ma tonakoka.

¹⁸ De o Rehabeama gea wiahokino ai duduhunu o Adonirama abe wahiaturu ona mata-mataika abe yotobakarajaanga o koano ai karajaanga. De o Adonirama gea wihidingoto o Isiraele ma nyawaika la wahiriidi ka hiadono ona ko iwilawanokaua manga koanoika. Masara ka de hokogea woboa wahimanga de ona iwihakaru hiadono wohonenge. Ho ma oraha ma abari gea imahiadono o Rehabeamino una nagahi o Sikeme ma kotaka de una duru wamodongo onangika de womataiti wobaata ai gorobaiye de woara o Yerusaleeme ma kotaika.

¹⁹ De o Isiraele ma nyawa manga dutu mata-mata abe manga tonaka dau o Yerusaleeme ma kota ma honongauku ona duru yoluku o Dautu ai danongo de ai totofora imahikauku yahikoano onangika. De hokogea to ona manga hininga ka hiadono o wange naa abe manga ade-ade nenanga ihitulihuku.

²⁰ Abe ka de o Isiraele ma nyawa mata-mata yoihene ma abari abe o Yerobeama woboaka o Isiraele ma tonakino de yomatoomuino de iwibehehongo la waniiki manga doomu. De una woboa manga doomuino de ahao o Isiraele ma nyawa iwihidadi manga koano. Ho ona o Isiraele ma nyawa manga dutu o Yehuda dika abe ka yoigohi yomahikoano o Saloomo ai ngofaka o Rehabeamika.

O koano o Rehabeama ai hidee wiparangi o Yerobeamika

²¹ De naa o Rehabeama wohioriki abe to una ai kokawaaha ngade-ngade mata-mata iwioluku ho una wato ahao wahikokigilio la ona yomahikoano ka unangika dika, abe una o Saloomo ai ngofaka abe kiani unangoli ai baba wituruuru. Ho o Sikeme ma kotaka de waino woboa hiadono wolio o Yerusaleemika. De genangoka ahao o Yehuda ma nyawa ma dutuino watoomu ma nau-nauru mata-mata de onangoo abe o Benyamini ma dutuino abe naga genangoka. De ahao ona mata-mataino wairiki o nau-nauru abe duru yososawaro yoparangi. De ona yotobaparangi abe wairikoka, abe manga ngoe ona mata-mata yasana o ratuhu moi de yasana moritufange.

²² Masara Ma Jou witemo ai uru ma dodofangika abe ai romanga o Semaya, wato,

²³ “Naga ahi demo o Rehabeamika abe ai baba o Saloomo wituruuru abe ma dihiraino wohikoano o Yehuda ma tonakoka. De ahi demo naa ko o Rehabeamikaua dika masara nagali ma dumutu o Yehuda ma nyawaika, de o Benyamini ma nyawa mata-mataika, de ona utuikaoo abe naga o Yehuda ma tonakoka yogogere.

²⁴ De hokonaa ahi hingahu ma demo abe ngona kiani nadofanga onangika, ‘Ngohi Ma Jou o Yawe de Ngohi tinihuloko nginika, duru ko idadiua niaparangi nia gogianongoruika abe o Isiraele ma nyawaika. Ngini kiani nikokilio homoi-homoi nia tauika angamoi abe naa ma duru idadioka abe o Yerobeama nia gogianongoru manga ngoe wahikoano gea ma titi Ngohioka de aino. Abe idadioka gea imakiniiki duru imaketero de to Ngohi ti ngini nia Jou ahi hiaturu ho gea ma titi hiadono ko idadiua niaparangi nia gogianongoruika.’” Ho ka de o Semaya wahingahu Ma Jou o Yawe ai demo onangika hokogea de ona iwihingounu. Ona yokokilio abe duru imaketero hoka Ma Jou o Yawe wahibehehongoka onangika.

O Yerobeama ko waniikokaua Ma Jou o Yawe ai behehongo

²⁵ De ahao o Yerobeama woiki o Sikeme ma kotaika abe naga o loku-lokuoka o Efaraimi ma nyawa manga tonakoka. De ma kota gea duru wohiputurungu de manga dadatoko hoka o kota ma dadaduhu. De genangoka wogogere ko itedekanua de ahao wogila-gilali o Penuele ma kotaikali de enangoo ma wohiputurungu hokogea.

²⁶ De hokonaa o Yerobeama ai hininga womafikiri, wato, “Nako ngohi ko tomahidodiaiua done o Isiraele ma nyawa ahao yomaturuuruoli yomahikoano o Dautu ai ngofa-ngofakuku.

²⁷ Abe nako o nyawa naa ka ihikaika yoiki daku o Yerusaleemika la manga huhuba yomahihuba Ma Jou o Yawe ai Tauoka, de ika-ika ahao manga hininga ilio o Rehabeamika abe wahikoanohi o Yerusaleemoka. De ka de yomahikoano o Rehabeamika de ahao ona ihitoma ngohi.” Hokogea o Yerobeama ai hininga ma hawana.

²⁸ Ho o Yerobeama wolingiri o hiowa ma demo ona yososawaroino, abe una wairikoka la iwiduhunu, de ahao o Yerobeama womaputuhu la una wodiai o popangao abe ma rupa o hapi ma ngofaka hinooto o gurasi ma dutuino. O hapi ma ngofaka hinooto gea wodiai ibooto de ahao ena gea wahimatoko ai kokawaahaika wato, “Ngini o Isiraele ma nyawa mata-mata kiani nitotoihene, naa ena abe ma dihiraino inihihupu o Mesiiri ma tonakino. De abeika ti ngini nia kangela ilamoko nako ka ihikaika kiani niloiki ma gurutika daku o Yerusaleemiye la nimahuba genangoka. Ho irahai to ngone nanga tonakoka dika nimahuba-huba enangika naa abe ma dihiraino inaduhunu.” Hokogea wahigaro ai kokawaahaika.

²⁹ Ho o hapi ma ngofaka abe o gurasino moi wateruiye to ena ma ngioka o Betele ma kotaka abe itigi manga tonaka ma dobikiye. De ahao ma dodiawo imakadaene ma rupa wateruiye to ena ma ngioka abe manga tonaka ma dobikuku o Daana ma kotaka.

³⁰ De o Isiraele ma nyawa yaniiki abe o Yerobeama wahigaroka ho utu yoiki dau o Daana ma kotauku la yomahuba genangoka, de utuoli yoiki daku o Beteliye. Masara ka de hokogea yodiai de ona duru yahowono ma amoko Ma Jouika.

³¹ De o Yerobeama wodiai o huhuba ma tau ma ngoe o kiaka naga o tonaka itoporoniye abe o nyawa biaha yomahuba-huba o popangaoika genangoka. De naga o nyawa abe wahidadi manga hidemo abe yoleleani manga popangaoika. De ngaro ma dihira Ma Jou wahibehehongo wato abe manga hidemo kiani o Lewi ma nyawaino masara o Yerobeama wairiki manga hidemo abe ona ko o Lewi ma nyawainoua.

O Pasala 12:32-33 ko atailakouahi

³² De nagali o rame-rame moi abe o Yerobeama wodiai o Betele ma kotaka abe hatoli imakiniiki de ma rame-rame abe yodiai o Yehuda ma tonakoka. De ma rame-rame gea wakelenga ma wange la ai kokawaaha ihirame-rame ma mede tufangeuku de ma wange ngimoi de motoaka. Ho ma wangeoka gea de una waoino o huhuba ma ngoe o Betelino ma huhuba ma ngiino gea abe ma rupa hoka o hapi ma ngofaka. De ai huhuba waoino de ahao o Yerobeama womahihuba gea ma ngioka. De unangoo wagoraka o hidemo ma nyawa manga ngoe la yoborileleani o huhuba ma tau homoi-homoioka abe una wodiai o tonaka itoporoniyeoka gea.

Ma Jou ai uru ma dodofanga wato o Yerobeama ai huhuba ma ngi iharo-harongo ahao Ma Jou wohibinaaha

³³ Ho ma oraha adonoka ma mede tufangeuku de ma wange ngimoi de motoaka, abe ma wange gea o Yerobeama ka una dika ma hirete wakelenga ma gahe la idadi o Isiraele ma nyawa manga rame-rame ma wange. De ma wangeoka gea o Yerobeama una ma hirete wohira waoino ai huhuba o Betelino abe ma huhuba ma ngiino una wodiaioka naa ma duru.