1 Kokoano 11 - Ma Jou ai Demo-demo o Totobelohoka

O Saloomo wahowono Ma Jouika ma titi ngoi fekata manga ngoe

¹ De ma oraha o Saloomo wahikoano o Isiraele ma nyawaika de una wamake ngoi feka-fekata abe duru manga ngoe o homoa ma nyawaino. De muna abe o homoaino mohira abe modadi ngoi fekata gea o Mesiiri ma nyawa manga koano ngoi ora. De ahao ngoi fekata utuoli womamake o Moaba ma nyawaino, de o Amono ma nyawaino, de o Edomo ma nyawaino, de o Sidono ma nyawaino, de o Hete ma nyawaino.

² Masara ona mata-mata abe ma dihiraino Ma Jou o Yawe wahibehehongoka o Isiraele ma nyawaika wato, “Ngini o Isiraele ma nyawa ko tinihigunoaua abe nimahiketehimoloka de o homoaino ma nyawa de onangoo ko idadiua yomale manga fekata eko manga rokata ngini o Isiraele ma nyawaino. Hokogea Ngohi ko tinihigunoaua ngini nidiai angamoi duru tagoungu ona ahao inihirehene hiadono nia hininga adaene manga popangaoika.” Masara ngaro hokogea Ma Jou wahibehehongo, ma, o Saloomo duru ai hininga yadaene o homoaino ma ngo-ngofekaika hiadono woilaka manga ngoeika.

³ De to una ngoi feka-fekata utu womamake o kokoano utuino abe manga ora-ora iwihidoaka o Saloomoika. Ho ika-ika de o ngo-ngofeka abe yaetongo ngoi feka-fekata manga ngoe yaratuhu tumidi. De naga o ngo-ngofeka utuohi yaratuhu hange abe wahidadi ai hijai-jai ngoi fekata. De igoungu gea o Saloomo ngoi feka-fekata abe ai hininga ihirehene Ma Jou o Yaweino.

⁴ De ipahaino abe ma oraha o Saloomo iwiperekioka de ngoi feka-fekata wahigihene onangika hiadono ai hininga ihirehene manga popangaoika ho hiadono ai hininga ma dumutu ko iahumokaua to una ai Jouika, abe Ma Jou o Yaweika. Ho ai hininga ko imakadaenua abe hoka ai baba o Dautu ai hininga angamoi to una ai hininga ma dumutu duru ka Ma Jou o Yaweika dika.

⁵ Masara naa o Saloomo womahuba o pangao o ngo Asitoretika abe o Sidono ma nyawa manga jou. De naga utuohi o Saloomo wodiai abe duru itorou ka hiadono womahuba o Molokika abe ena gea o Amono ma nyawa manga jou abe o nyawa kiani duru yaemono enangika.

⁶ Hokogea o Saloomo duru wodiai itorou Ma Jou o Yawe ai himangoka. Abe to una ai hininga ihirehene manga popangaoika hiadono Ma Jou o Yawe ai mau ko waniikokaua hoka ai babali o Dautu ai hininga. Abe ai baba o Dautu duru winiiki Ma Jou o Yaweika dika.

O Pasala 11:7-25 ko atailakouahi

⁷ De hongoli o Saloomo wahuloko ai nyawa la yodiai o huhuba ma ngi hinooto o lokuoka abe imanoa o Yerusaleeme ma datekoka o wange ma hiwaroka. De gea naga ma huhuba ma ngi moi yodiai la genangoka ka idadi o nyawa yomahuba o Moaba manga jou ma homoaika ma romanga o Kamoso. De abe ma ngi moioli gea yodiai la ka idadi o nyawa yomahuba o Amono manga jou ma homoa o Molokika, abe o Moloko ena gea duru itotorou.

⁸ De naga o huhuba ma ngi utuohi ma ngoe abe o Saloomo wodiai la ka idadi ngoi fekata ko manga ngoe gea homoi-homoi yomahuba-huba manga jou amomoiika. Ho ma ngi-ngioka gea ona yatobatufu-tufuku o manyanyi de nagali manga huhuba utuoli abe yomahihuba manga jou-jouika.

^9-10 De ma dihiraino Ma Jou o Yawe womahimatoko o Saloomoika ma hinooto ibooto de wihitiari wato ufa hiadono una worehene de womahuba o jou ma homoaika. Masara ipahaino de igoungu una womahirehene ma homoaika de ko winiikokaua o Isiraeloka manga Jou, ho mangale ma titi gea de Una duru wingamo o Saloomoika.

¹¹ De angamoi ko iwaka ai hingounu ho Ma Jou witemo unangika wato, “Ngona naa ko naniikokaua ahi behehongo ma demo masara ka ihikaika ani hininga itagi ma homoaika. Ho mangale ma titi gea hiadono Ngohi ahao tagoraka ani kuaha ngonaka de aino de gea tihidoakoli ani duduhunu womatengoika.

¹² Masara gea ko tagorakuahi ma oraha naa. Angamoi Ngohi ka tohiningahi ahi demo ani baba o Dautika, ho abe ma oraha ngona ka nowangohi de ko tagorakuahi ani kuaha. Masara abe ngona nopahaka de ani ngofaka unangoli wonituruuru wokoano de ahao tagoraka ai kuaha unangino la ibootohi una wahikoano ai nyawa mata-mataika.

¹³ Masara gea ai kuaha ko mata-mataua tagoraka unangino. Abe tihigunoa la wahikoano nia dutu moiokahi dika, de nia dutu utuoli mata-mata ahao o nauru womatengoli wahikoano onangika. De hokogea ahao tahiaturu angamoi ka tohiningahi ahi kota o Yerusaleeme abe tomadingakoka de ahi nyawa o Dautu unangoo ka tihiningahi.” Hokogea Ma Jou ai dodaere ma demo o Saloomoika.

Ma Jou wokarajaanga o nyawaka la yodadi o Saloomo ai musu

¹⁴ De ipahaino de naga o Edomo ma nyawa womatengo ai romanga o Hadada. Abe una gea o Edomo manga koano ma dihiraino ai toforauku womatengo. De Ma Jou o Yawe wokarajaanga o Hadada gea ai hiningaka la wihidadi o Saloomo ai musu womatengo.

¹⁵ De hokonaa o Hadada ai wowango ma ade-ade. Ma dihiraino abe ma oraha o Dautu nagahi de o Isiraele ma nyawa de o Edomo ma nyawa yomaketeparangi hiadono o Isiraele ma nyawa yahikala o Edomo ma nyawaika. Ho yomaketeparangi ibooto de o Isiraele manga tentara ma hidimono o Yoaba una ko woliouahi o Isiraele ma tonakika masara womanoahi o Edomoka la ka idadi o Isiraele ma tentara yohone-honengoka yakokilungunu.

¹⁶ De gea o Yoaba de ai tentara ma nyawa yomanoahi o Edomo ma tonakoka manga mede butaangaino, de ma oraha gea una wakokitoma o Edomo ma nauru mata-mataika.

¹⁷ Masara o Hadada de to una ai baba ai nyawa yamuruono naga ko yatomaua angamoi ona ka idadi yoara ma homoaika. De ma oraha gea o Hadada ka o ngofakohi, de ona gea yoara o Mesiiri ma tonakika.

¹⁸ Abe o Edomo ma tonakoka yosobo de ihira yoiki o Midiana ma tonakika de ahao yogila-gila o Parana ma tonaka ma kakaahaika. De genangoka naga o Parana ma nyawa yamuruono naga yomahidogo onangika de ahao ona gea mata-mata yosobo yotagi-tagi de yomahiadono o Mesiiri ma tonakika. Yomahiadonoka de ahao o Mesiiri manga koano wasanangi onangika ho wahidoaka o tonaka de o tau de o inomo onangika.

¹⁹ De ipahainoli de o Mesiiri ma koano gea duru wisanangi o Hadadika hiadono wihidoaka unangika ngoi fekata ngomi dodoto la womiilaka de muna. De ma koano ngoi fekata gea ami romanga o ngo Tapenese.

²⁰ Ho o ngo Tapenese ngomi dodoto gea ipahaino de muna momagerewoto de o Hadada ona yamake manga ngofaka o nauru. De ona iwihiromanga unangika o Genubata, de manga ngofaka gea ngoi ayo o ngo Tapenese mipaliara o koano ai tauoka. Abe una wolamoko ai ama ma koano ai tauoka, ho ma koano ai ngofaka ma nauru ma dutu yodadi hoka ai ria-dodoto de una womanoa manga hidogoronaka. Hokogea o Hadada de to una ai tau manga ade-ade.

²¹ Ho ipahaino de o Hadada woihene ma abari ma titi o Dautu de ai tentara ma hidimono o Yoaba ona yahinooto yohonengoka. De woihene ipaha de woiki witutumu ai opo o Mesiiri ma koanoika. De o Hadada witemo unangika wato, “Ngohi tomagahoko tato o Mesiiroka naa de tosobo la ka idadi tolio ahi tonakika.”

²² Masara ai opo ma koano wipaluhu wato, “Ma titi o kia hiadono ani hiningaka nato nosobo? Done naga ani kuranga naangoka ho nato nolio ani tonakika?” De o Hadada witemoli wato, “Koua, duru ko iwa ahi kuranga. Masara ka ngohi dika ahi mau la tolio ahi tonakika.” Ho ma koano wihigunoa ho wosobo wolio o Edomika, de ipahaino una de o Saloomo yomaketeliliara de yomakalawana.

²³ De nagali o homoa ma nyawa womatengoli abe Ma Jou wokarajaanga ai hiningaka la wodadi o Saloomo ai musu, de to una ai romanga o Resono. O Resono una gea o Eliada ai ngofaka, de ma dihiraino de o Resono witobaniiki o Soba manga koano o Hadadesere. Masara ipahaino de una womaputuhu wato winoaika ma koano gea ho woara ma homoaika. De ahao naga o nauru yamuruono naga abe yomahidogo o Resonika la una ka idadi wahihira-hira. De ona gea ka ihikaika yabaataika de yatobaora-ora o nyawa manga kiahonanga.

²⁴ De ma dihiraino gea de o Dautu de o Hadadesere ona yomaketeparangi hiadono o Dautu wahikala onangika. De o Hadadesere wokalaka de ahao o Resono de ai nyawa yoara o Siria ma kota ma mayoika abe ma romanga o Damasiki. De genangoka ahao o Resono unangoli iwigoraka la wodadi o Siria manga koano.

²⁵ Ho abe ma oraha o Saloomo wahikoano o Isiraele ma nyawaika de o Resono wodadi o Siria manga koano de o Resono ka ihikaika walawana de wahikokangela onangika angamoi duru wadohata o Isiraele ma nyawaika. De gea ai hininga de ai datoro duru imaketero hoka o Hadada unangoli ai datoro abe watobalawana o Isiraele ma nyawaika.

O Yerobeama o Isiraele ma nyawa utu wahikoano angamoi o Saloomo worehenoka Ma Jouino

²⁶ De naga o nyawa utu abe iwilawana o Saloomoika de womatengo abe unangoo iwilawana ai romanga o Yerobeama abe ai baba o Nebata, o Efaraimi ma dutuino de una womaboa o Sereda ma kapongoka. De o Yerobeama ngoi meme mofao abe ami rokata o Nebata wohonengoka de muna gea ami romanga o ngo Serua. De ma dihira o Saloomo gea wihidadi o Yerobeama ai duduhunu abe duru wingaku unangika.

²⁷ De hokonaa o Yerobeama ai ade-ade abe hokokia wodadi o Saloomo ai duduhunu masara de ahao una duru wilawana ai koanoika. O Saloomo woigo ai baba o Dautu ai kota wopaliara irahai de ma moiuku o Yusupu ai totoforauku manga ngoe wahikarajaanga la o Yerusaleeme ma kota ma dadaduhu ihidiai. Abe ma ngi moi ma dadaduhu ko imariadoninoua de kiani yopohuku abe o dadaduhu ma lifunu ma timiuku de o tonaka la iputurungu.

²⁸ De o Yerobeama gea, una o goduuru de duru iwimagawe wokarajaanga de ai hiakunu la ai karajaanga wao itiai. De o Saloomo wimake abe o Yerobeama ka idadi o karajaanga ma tagongo ma amokika wale. Ho o Yerobeama gea wigorakiye abe wihikuaha de wihitagongo unangika la wahiaturu o nyawa abe yotobakarajaanga genangoka. De abe o Saloomo wahikarajaanga gea o nau-nauru o Manase ma nyawaino de o Efaraimi ma nyawaino abe ona mata-mata o Yusupu ai totoforauku.

²⁹ De o wange moiuku abe ma oraha o Yerobeama ai tagongo waso de una wohupu o Yerusaleeme ma kotaino de wotagi waniiki o ngekomo ma hoanika. De ai dodagi gea ma goronaka naga womatengo woboaino Ma Jou ai uru ma dodofanga ai romanga o Ahia abe una o Silo ma kotaino. De ona yomakamake o ngekomoka abe duru o tonaka ma gupaka de o nyawa utu genangoka ko yaiwa. De o Ahia gea womahinoauku de o baju ma hungi abe ena gea ma guru-gurutuku.

³⁰ De o Ahia ai baju ma hungi gea wahuputu de wapelaka hiadono idadi o belaka ngimoi de hinooto.

³¹ De ahao wihuloko o Yerobeamika wato, “Ngona nomale ahi baju ma belaka ngimoi angamoi naa ma dodunguu Ma Jou o Yaweino. Una wohihingahu ngohino wato, ‘Abeika, Ngohi Ma Jou taputuhoka abe ko itedekanokaua de ahao o Saloomo de ona ai tauoka ko tahigunoakaua yahikoano o Isiraele ma nyawa mata-mataika. Abe Ngohi ahao manga dutu yangimoi de yahinooto taregu, abe yomahidutu o Isiraele ai ngofaka yangimoi de yahinootoika. De ma oraha abe ona ahao Ngohi taregu de o dutu ngimoi Ngohi tonihidoaka ngona o Yerobeamika la ngonali nahikoano onangika.

³² Masara mangale ma titi to Ngohi ahi horomati ahi gilaongo o Dautika de ai kota o Yerusaleemika hiadono o Saloomo tihigunoa la o Isiraele ma nyawa manga dutuino moi ka idadi wahikoanohi onangika.

³³ De hokonaa Ngohi todiai angamoi una wohiporetikaka de womahuba-huba o Sidono ma nyawa manga jouika o Asitoretika, de o Moaba ma nyawa manga jou o Kamoso, de o Amono ma nyawa manga jou o Moloko. De gea o Saloomo womahitaana ko waniikokaua to Ngohi ahi mau, de wodiai abe ko itiaiua to Ngohi ahi himangoka de ko wohingounokaua ahi behehongika de ahi paretaika hoka to una ai baba o Dautu abe una waniiki itiai ahi behehongo de ahi paretaika.’”

³⁴ Hokogea Ma Jou ai hininga ka hiadono Una wotemo wato, “‘Ngaro o Saloomo wahowono ma ngoeika masara, Ngohi ka tihigunoahi ahi nyawa wahikoano ka hiadono wohonenge. Hokogea todiai angamoi duru tihininga ahi gilaongo o Dautu abe una tiirikoka de mata-mata duru waniiki itiai ahi behehongo de ahi pareta. Ngohi ko tagorakua ahi nyawa o Saloomo ai kuahaino angamoi una o Dautu ai ngofaka ho una ka idadi ona mata-mataika wahikoano ka hiadono ai wowango ma bahaika.

³⁵ Masara ma oraha o Saloomo ai ngofaka wituruuru abe unangoli ahao wodadi ahi nyawa manga koano de ma oraha gea Ngohi taregu ahi nyawa de o dutu ngimoi Ngohi tonihidoaka ngona o Yerobeamika la ngonali nahikoano ona gea.

³⁶ De o Isiraele ma nyawa manga dutu moi tanoaika o Saloomo ai ngofakoka la o Isiraele ma nyawa ma dobiki ka idadiohi wahikoano. Hokogea todiai la ahi gilaongo o Dautu ka ihikaika naga ai totoforauku abe wohikoano o Yerusaleeme ma kota ma goronaka angamoi o Yerusaleeme ma kota abe gea ena tairikoka la to Ngohi ahi romanga o nyawa yagorakiye genangoka.

³⁷ De ngona, o Yerobeama, Ngohi Ma Jou tonihidadi o Isiraele ma nyawa manga koano de ngaro naga o nyawa o tonaka utuino abe onangoo ka idadi nahipareta iti abe to ngona ani mau adaene onangika gea.

³⁸ De nako ngona duru nohihigihene, abe mata-mata tonihibehehongo ngonaika, de ahi hininga naniiki itiai ahi himangoka hiadono ahi behehongo de ahi pareta mata-mata naniiki itiai de Ngohi duru tonisanangi. De nako ngona hokogea nomaaduru abe imaketero hoka ahi gilaongo o Dautu wohileleani, de Ngohi ahao tonihibehehongo abe to ngona ani totoforaukuoo ka ihikaika initoturuuru imahikauku de ahi nyawa o Isiraele ma nyawa yahikoano. Hokogea ma dihira tihibehehongo o Dautika hiadono to una naga ai toforauku abe ka ihikaika ahi nyawa wahikoano.

³⁹ Masara mangale ma titi o Saloomo ai howono ho hiadono Ngohi ahao tahohowono o Dautu ai totoforauku masara manga hohowono gea ko itagiua ka hiado-adonika.’” Hokogea Ma Jou ai behehongo abe ai uru ma dodofanga ai romanga o Ahia wadofanga o Yerobeamika abe duru o ngekomo ma hoanoka.

⁴⁰ Ka de o Saloomo wohioriki abe o Ahia hokogea wihingahu o Yerobeamika de duru widohata unangika hiadono wihideeoka la witoma. Masara o Yerobeama una woara o Mesiiri ma tonakika de womagahoko o Firaunu o Sisakika la wihigunoa wogogere ai tonakoka. Ho o Yerobeama wogogere o Mesiiri ma tonakoka ka hiadono o Saloomo wohonenge de ahao womoroini wolio o Isiraele ma tonakika.

O Saloomo wohonenge

⁴¹ De naga utuohi iwoe abe ma titi mata-mata o Saloomo wodiai de ma titi ai sosawaro de ena mata-mata ihitulihuku o bukuoka abe ma romanga, “Mata-mata o Saloomo wodiai ma Ade-ade ma Buku.”

⁴² De o Saloomo wogogere o Yerusaleeme ma kotaka ai taongo moruata ma dekana abe hokogea ma dekana wahikoano o Isiraele ma nyawa mata-mataika.

⁴³ De ma oraha o Saloomo wohonenge ho iwilungunu ai baba o Dautu ai kotaka. De ahao o Saloomo ai ngofaka o Rehabeama ai baba wituruuru ho unangoli wodadi o Isiraele ma nyawa manga koano.