1 Kokoano 10 - Ma Jou ai Demo-demo o Totobelohoka

O Pasala 10 ko atailakouahi O ngo koano o Siebaino moboa la o Saloomo mirekata

¹ De naga momatengo o koano abe o Sieba ma nyawa manga tonakoka mahikoano de muna moihene o Saloomo ai ade-ade abe duru o nyawa yahiheranga de itagi o tonaka mata-mataika ai ade-ade. De ma oraha muna gea moihene o Saloomo ai ade-ade de muna momaputuhu mato kiani mitutumu. Ho muna ahao moboa o Yerusaleeme ma kotaino de muna mato o Saloomo mitaili de ami leleha ma ngoe abe duru ihuha o nyawa yapaluhu.

² De ami nyawa duru ko manga ngoe iminiiki ami dodagioka de naga manga unta ma ngoe abe to ena ma gina o rampa-rampa, de o gurasi ma dutu kohaamoko, de o hakaru kohangoe ma hohailoa abe o fara ma ngoe naga ma leto-letongo ena gea abe duru ihali ma ija. De o ngo koano gea de o Saloomo ma oraha yomarihimanga de mihingahu unangika abe naga ami hininga momahidiaioka ami leleha unangika.

³ De o Saloomo ami leleha mata-mata wapaluhu de ko iwa moi abe ko wataanua angamoi wososawaro womihitararono de ma titi o kia dika abe genangika ami leleha.

⁴ De gea o ngo koano o Siebaino ka de mamake o Saloomo ai sosawaro de hokokia ma rorahai ai koano ma tau abe womadiai, de muna duru moheranga.

⁵ De mamakeoo manga inomo ma hidiai o Saloomo ai mejaka, de ai popareta ma nyawaika manga gogogere ma ngi-ngi de manga seragama homoi-homoiika duru ma rorahai, de mamake abe ai leleani ma nyawa manga karajaanga duru itiai, abe hoka ona manga tagongo o Saloomo ai ngokere iwihitobahidoaka unangika. De muna naga miniiki o Saloomo ma oraha wahihuba ai huhuba iharo-harongo Ma Jou o Yawe ai Tauoka. Ho mata-mataika gea o ngo koano o Siebaino duru moherangaholi ka hiadono ami hiningaka ngade-ngade ililifangoka.

⁶ De muna mihidaere o Saloomoika mato, “Ma dihira ani ade-ade toihenoka to ngohi ahi tonakoka abe ma titi ani karajaanga ma hasili de ani sosawaro de duru igoungu ma ade-ade gea mata-mata abe naa ngohi tamakeoka.

⁷ Masara tomangaku ma dihira ngohi ko tongakuahi o nyawaino ma abari ma titi ngona, ma ka de ngohi toboaino de ahi lako hinooto tamake de duru igoungu mata-mata. Abeika ngaro ani sosawaro de ani karajaanga ma hasili ma hononga dika de o nyawa ko yangodumuahi yoade-ade. Utuohi to ngona natilakurika ma rorahai abe ona ihihingahu ngohino.

⁸ De abeika ani duduhunu manga ngoe de ona gea abe initobaleleani ani tauoka, abe ona duru youtumu de yamake ma hiowa ma amoko angamoi ona o wange-wangeiye naga ngonaka de ka ihikaika yoihene ani sosawaro ma demo.

⁹ De Ma Jou o Yawe, abe to ngona ani Jou, Una duru wonisanangi ngonaika de wonihigogere o koano ma kaderaka la ngona wonipake ai nyawa nahipareta. De angamoi Ma Jou duru ka ihikaika wadora o Isiraele ma nyawaika hiadono Una wahiaturu de wonihidadi to ona manga koano la ngona nahikoano de o totiai de abe naurusu enangoo duru itiai.” Hokogea o ngo koano o Siebaino ami horomati de ami higiriiri ma demo o Saloomoika.

¹⁰ De ahao muna ami hadia mihidoaka o Saloomoika duru ilamoko abe o gurasi ma dutu o kilo o sana iata ifoloi ma dubuho. De ami hidoaka utu o rampa-rampa naga o fara ma ngoe abe utu ma bounu duru ma rorahai abe genangino o manyanyi o nyawa yodiai. De nagaoo o hakaru kohangoe ma hohailoa abe o fara ma ngoe naga duru ileto-letongo mata-mata. De abe ma titi ami hadia ma rampa-rampa ko ma moiuahi ona o Isiraele ma nyawa yamake manga tonakoka abe ena gea irorahai imakadaene abe hoka ena gea o ngo koano o Siebaino mihidoaka unangika.

¹¹ De ma dihiraino abe ma oraha Ma Jou o Yawe ai Tau ko ihigokuahi de ma koano o Hurama ai huhuloko ma nyawa manga kapa ahidete. De manga kapa gea yapake la Ma Jou ai Tau ma hidiai ma kiahonanga ona ihibarene de yaoino o Ofiri ma tonakoka de aino, de gea yaoino o gurasi ma dutu. De utuoli abe yaoino o hakaru ma leto-letongo de o gota duru ma rorahai.

¹² De o Saloomo una ahao ma gota gea wapake ma oraha wohigoko to una ai tau de Ma Jou o Yawe ai Tau. De ma gota gea utu wapake la yodiai o totabua biaha de o totabua ma amoko abe ma tali kohangoeoko de adingakoka o musikika. De ngaro ma oraha gea ka hiadono ma oraha naa naga masara ko ma moiuahi o nyawa yamake o gota ma rorahai hokogea ma amoko.

¹³ De naa ma oraha o ngo koano o Siebaino naga o Saloomo ai tauoka de o kia dika momagahoko una womihidoaka. De nagali to una ai hadia utuoli abe una dika ai hininga wato womihidoaka munangika. De ipaha muna de ami kokawaaha yokokilio to ona manga tonakika.

O Saloomo ai kaya ma ade-ade

¹⁴ De o tao-taongiye o Saloomo wamake o gurasi ma dutu hiadono ma biaha o kilo o sana monaoko de hange o gurasi ma dubuho abe wamake o taongo amomoiino.

¹⁵ De utuohi o Saloomo ai utumu ka ihikaika wamake abe naga ona yotobafuku-fukunu de ona ihiketehituruuru manga kiahonanga kiani manga utumino ma hidoku moi iwihidoaka unangika. De nagali o Arabino manga kokoano homoi-homoiika de o tonaka manga gubernuuru homoi-homoiika onangoo mata-mata o tao-taongiye naga manga hidoaka o gurasi yoboa iwidotaka o Saloomoika.

¹⁶ De nagali abe o Saloomo wodiai o parangi ma dadatoko o ratuhu hinooto ma ago-agomo abe yodutuku o gurasino ho amomoi ma dadatoko gea yapake o gurasi ngade-ngade o kilo tumidi ma dubuho.

¹⁷ De yodutukoli o gurasino ma rupa o parangi ma dadatoko ma hohumuduru ma gahumu o ratuhu hange abe homoi-homoiika yapake o gurasi ngade-ngade o kilo hange ma dubuho. De o dadatoko mata-mata gea wadide o koano ai tau moi ma goronaka abe ihiromanga o Libanono ma fongana ma tau.

¹⁸ De ahao o koano womadiai ai kadera duru ma amoko abe yobilere de o aewani o gaja ma hihipatino de ahao ihilape ma poretino de o gurasi ma dutu.

^19-20 De ai kadera gea naga o ngute ma dodoko butaangaiye de daku ma bareniye naga ai kadera. De ma nguteoka gea naga yodiai ma gahumu ngimoi de hinooto abe ma rupa o boki o singa. Abe o kadera ma ngute ma dodoko amomoiiye arihonongaka naga o singa ma rupa moi imaokoino. De abe o kadera arihonongaka naga ai giama ma dederu, de nagali ma kadera ma ngongake abe daku ma barenoka ma hohutulu ifululu. De nagali imaokoino o kadera arihonongaka ma rupa o boki o singa. Ho ngaro o dunia ma amokika ko iwa o kadera utu ma rahai hoka o Saloomo ai kadera ma hohailoa.

²¹ De o Saloomo ai mangko mata-mataika yodiai o gurasino de to una ai dodai mata-mata abe yapake o koano ai tau ma goronaka ma romanga o Libanono ma fongana ma tau, enangoo yokokidiai o gurasino. Masara ai tauoka gea de ko iwa ma kiahonanga abe yodiai o haakaino, angamoi ngaro o haaka biaha ihali masara ma oraha o Saloomo de o nyawa yaetongo ato gea ngade-ngade ko iwa ma ija angamoi iwoeholi ma tonakoka gea.

²² De o Saloomo naga ai kapa yahidete o duduono moi abe homoi-homoiika naga o nau-nauru yatobaao de ai kapa gea imakokiniiki de o Huramoli ai kapa o duduono moi. De ona yohidete ihidulu-dulu moduku o nuu-nuuhika la yomaketeturuuru o kiahonanga, de o taongo hange ma moi yolio o Isiraele ma tonakino. De manga kiahonanga ihibare-barene ma hali-hali dika, abe o gurasi, o haaka, o gaja ma hihipata, o mia ma amoko abe yotobapaliara, de o totaleo duru ma rorahai abe ona yokaya-kaya dika yotobapaliara abe ma ija kohahali, de ena gea mata-mata idadi o Saloomo ai kiahonanga.

²³ Ho o Saloomo ka ihikaika ai kaya de ai sosawaro ka idogo-dogo hiadono ngaro o dunia ma amokika ko iwa o koano utu abe manga kaya eko manga sosawaro imakadaene hoka to unangoli.

²⁴ De o nyawa o tonaka mata-mataino yoboa iwitutumu la ka idadi youtumu ai sosawaro ma demoino abe ai sosawaro gea Ma Jou wihiakunu unangika.

²⁵ Ho o tao-taongiye ka ihikaika naga o nyawa ko manga ngoe yoboaino la iwitutumu o Saloomoika. De ngaro onagona dika naga yoboa iwitutumu ma kiani de manga hadia abe yoigo iwihidoaka unangika. Ho manga hidoaka naga o haaka, de o gurasi, de o pakeanga duru ma rorahai, de o minya abe ma bounu ma rorahai, de o rampa-rampa, de o kuda, de o keledai, ho gea ena mata-mata naga abe iwihihadia o Saloomoika.

²⁶ De o Saloomo ka ihikaika womahidogo ai kuda de ai goroba parangi hiadono duru kohangoe. Abe nako ai kuda mata-mata ma ngoe gea o sana ngimoi de hinooto. De ai goroba parangi naga o sana moi de o ratuhu iata. Ho naga ai tonakoka o kota utu abe genangoka homoi-homoi yapaliara ai kuda de nagali ai goroba ma ngi-ngi ma kotaka gea. De o Yerusaleeme ma kotakaoo naga ai kuda de ai goroba parangi ma ngi-ngi.

²⁷ De ma oraha o Saloomo wohikoano naga o haaka o Yerusaleeme ma kotaka duru kohangoe hiadono ngade-ngade hoka o hakaru dika ma ngoe ho ko iwa ma ija ngaro o dunia ma amokika o haaka ma biaha to ena ma ija ihali. De o semara ma gota abe ma dihiraino duru ihali ma ija masara ma oraha o Saloomo enangoo kohangoe o Yerusaleeme ma kotaka hiadono yapake imaketero hoka o gota biaha abe iwango o Yehuda ma tonaka ma dola-dolaka.

^28-29 De abe o Saloomo ai kuda de ai goroba parangi gea una wahidingoto ai nyawa o Mesiiri de o Kilikia ma tonakika la ona ka idadi yahiketehituruuru de yomaijaino abe imakiniiki de ma koano ai mau. Abe o kuda ma gahumu moi gea ma ija o haaka ise-senge o ratuhu moi de moritoa, de o goroba parangi moi gea ma ija o haaka ise-senge o ratuhu butaanga. De o Saloomo ai nyawa gea ka idadi ma moi ma moi yao o kuda de o goroba parangi utu o Hete ma nyawa manga kokoanoika de o Siria manga kokoanoika de gea yafukunu onangika.