1 Kokoano 1 - Ma Jou ai Demo-demo o Totobelohoka

O Pasala 1 ko atailakouahi O Dautu iwiperekioka

¹ De ipahaino de o Dautu duru iwiperekioka ho ka ihikaika wamao iwimaata. De ngaro iwitamunu de o ngoere ma biri-birini masara gea parahaja dika angamoi ai badangoka ka iwimaa-maatohi.

² Ho ona abe duru iwidodiawo ma koanoika la iwitobaduhunu ona gea iwitemo unangika ato, “Koaho irahai ngomi mimilingiri momatengo o moholehe abe ka idadi monitobaleleani ngona mia koanoika. De munangoo ka idadi momaidu ani datekoka la ufa inimaata.”

³ Ho gea igoungu abe ona duru yolingiri o Isiraele ma tonaka ma amokika la ka idadi imimake o moholehe momatengo abe duru mohailoa. De ma bahauku imiiriki o Suneme ma nyawa momatengo ami romanga o ngo Abisaga. De muna gea imiao manga koanoika.

⁴ De o ngo Abisaga muna duru morahai de mitobaleleani ma koano o Dautu ai perelu o wange-wangeiye. Masara muna de ma koano ona duru ko yomakitigiua.

O Dautu ai ngofaka o Adonia wohitaili wituruuru ai baba

^5-6 De naga o Dautu ai ngofaka womatengo ai romanga o Adonia de una gea ngomi meme o ngo Hagiti. Abe una ai riaka o Abasalomo widatekuku, masara ai riaka gea wopahaka. De o Adonia una duru worahai, de ai baba o Dautu duru ikuranga widotoko unangika. Ho ai datoro o kia dika wodiai masara ko iwa ma hohowono ai babaka de aino, ka wihigunoaika dika wodiai. De abe ma oraha o Dautu iwiperekioka gea de o Adonia woigo wituruuru ai baba la unangoli wodadi manga koano. Ho una watoomuino o kuda de o parangi ma goroba ma ngoe, de nagali ai nyawa yamoritoa abe wahuloko la ona iwitobagoana.

⁷ De ahao o Adonia yomakoketemo de o Abiatara manga hidemo ma nyawa womatengo de o Yoaba manga tentara ma hidimono abe to una ngoi meme o ngo Seruya. De yomakoketemo ibooto de ona yahinooto yosanangi de o Adonia ai hidee ho yoigo iwiduhunu.

⁸ Masara naga o nyawa utuoli abe ko yoigoua la o Adonia wituruuru ai baba. Abe o Sadoko manga hidemo ma nyawa, de Ma Jou ai uru ma dodofanga o Natana, de o Benaya abe una o Yoyada ai ngofaka ona ko yosanangiua de o Adonia ai hidee gea. De ngaro o Simei de o Rei de ona abe iwitobagoa-goana manga koano o Dautu, onangoo mata-mata ko iwidomotekua de o Adonia ai hininga gea la womahidadi manga koano.

^9-10 De ma oraha gea o Adonia ai hidee wato irahai una womahihuba o aewani Ma Jou o Yaweika de genangino marai ka idadi o nyawa iwigoraka la wodadi o koano. Ho o Adonia una wahoko ai ria-dodoto abe o Dautu ai ngofa-ngofaku utuoli de o Yehuda ma nyawa abe yokokurutiye ma tonakoka gea la onangoo naga ma oraha womahihuba o aewani gea, de ona mata-mata yoboa de iwiniiki unangika. Masara nako ai dodoto o Saloomo de Ma Jou ai uru ma dodofanga o Natana de o Benaya de ona abe iwitobagoa-goana o Dautu, ona gea o Adonia ko wahokua. Ho waleino o domba de o hapi, de naga utu ma hapino gea abe duru de ma hakioka angamoi o nyawa yatofo hiadono ma haki ilamoko. De ma aewani gea wao o hakaru moiika ma romanga o Sohelete abe itigi-tigino de o jobuubu moi ma romanga o Rogele. De genangoka o Adonia womahihuba ma aewani Ma Jouika.

¹¹ De ahao o Natana woihenino ma titi o Adonia ai datoro gea ho una woiki o Saloomo ngoi meme o ngo Basebaika. De una womihingahu wato, “Marai ngona ko noihenuahi ma abari abe o ngo Hagiti ami ngofaka o Adonia, una gea womagoraka wato wodadi nanga koano. Masara ai datoro gea womatohiki wodiai ho nanga baluhu o Dautu ngaro una ma hirete masara ko wohiorikuahi.

¹² Ho naa marai ngohi ka idadi tonihidoaka ma ngekomo la ufa ngona de ani ngofaka o Saloomo ufa initoma nginika.

¹³ De hokonaa tonidotoko ma ngekomo abe koaho ngona naniiki. Irahai ngona noiki ani rokata nanga koano o Dautika de nileha unangika nato, ‘Ma dihiraino naga ani behehongo ma demo abe nohihibehehongo ngohino nato ahi ngofaka o Saloomo ahao wonituruuru de wodadi o koano de wogogere to ngona ani kaderauku. Sarakia, gea ani behehongo ma demo ko nawohanguahi? De nako ani demo gea igoungu, done sarakia hiadono ma oraha naa de o Adonia womagoraka wato unangoli wonituruuru de wodadi o koano?’ Hokogea ngona kiani nileha ani rokatika.

¹⁴ De ma oraha ngini nimakoketemo nia gogiriakahi de ahao ngohi toboa tinitutumu de gea ka idadi tihingahu nanga koanoika abe to ngona ani demo gea duru igou-goungu.” Hokogea o Natana womidotoko o ngo Basebaika.

¹⁵ De womidotoko ipaha de ahao muna moiki de mowohama ami rokata ai kamara ma goronaika. De naga genangoka o ngo Abisaga mileleani o Dautu ai pereluika angamoi una duru iwiperekioka.

¹⁶ De o ngo Baseba muna momamotumuku ai himangoka. De ahao o Dautu womileha munangika wato, “Iya, ngohi fekata. Marai ani perelu o kia naga?”

¹⁷ De muna mipaluhu de ami demo imakiniiki de abe o Natana kangano womidotokoka. Ho muna mato, “Ahi baluhu, ma dihiraino de naga ani behehongo ma demo moi abe gea nohihibehehongo ani Jou o Yawe ai himangoka. De ani demo ma goronaka gea de ngona nato ahao nanga ngofaka o Saloomo una wonituruuru la wodadi o koano de wogogeruku to ngona ani kaderauku.

¹⁸ Masara naa abeika ani ngofaka womatengoli o Adonia una gea womahidadi ani duruuru ho wodadioka o koano, masara hiokoo ngona naa bote ko noihenuahi ma abari gea!

¹⁹ Abe una womahihubaka Ma Jouika o aewani ma ngoe, abe naga o domba de o hapi, de utu ma hapino gea duru yatofo irahai ho de ma hakioka. De ma oraha gea womahihuba de wahoko o Yoaba de o Abiatara de ani ngofa-ngofaka o nauru utu mata-mata, masara nako nanga ngofaka ani duduhunu o Saloomo, una gea ko wiahokua.

²⁰ Ho ma oraha naa marai o Isiraele ma nyawa mata-mata inidodamaa la ngona nomaputuhu ani ngofaka onaguna wonituruuru de wodadi o koano.

²¹ Ho ngohi tato irahai tomataiti tonihingahu ngona ahi koanoika abe hokokia idadioka. Angamoi nako hoka ko iwa ani putuhu de ani baha adonoka, done ahao ka de nopaha de ngohi de nanga ngofaka o Saloomo imitaokino de ka imihohonenge ngomi.”

²² De duru ma oraha gea abe muna de ami rokata ma koano ka yomakoketemohi de o Natana woboaino.

²³ De ma koano ai duduhunu ona iwihingahu ato, “Mia koano, naga woboaka Ma Jou ai dodofanga o Natana.” De ahao o Natana woboa de womamotumuku ma koano ai himangoka.

²⁴ De ahao una wileha o Dautika wato, “Ahi baluhu, naga moi kiani tonileha. Sarakia, abe ma titi ani ngofaka o Adonia, una gea ngona niirikoka la wonituruuru de wodadi o koano eko koua?

²⁵ De gea tonileha angamoi ahao kangano una woiki de womahihuba o aewani ma ngoe. Abe naga o domba de o hapi, de utu ma hapino gea duru yatofo irahai ho de ma hakioka. De gea womahihuba de wahoko o tentara manga hohidimono de o Abiatara o hidemo ma nyawa gea, de ani ngofa-ngofaka o nauru utu mata-mata. Ho ma oraha naa naga de ona mata-mata yodiai o ngolo-ngolomo de yomakutuono yolomo o Adonia gea ai himangoka, de hiadono ona iwihinere-nere ato, ‘Ngaro mia koano ma hungi o Adonia ai wowango duru ikurutu!’

²⁶ Masara una gea marai ko womiahokua ngohi naa de o Sadoko de o Benaya, de ngaro ani ngofaka o Saloomo, una duru ko womiahokua ngomi naa.

²⁷ Ho gea ma titi hiadono kiani tonileha, marai ma datoro gea imakiniiki de to ngona ahi koano ani pareta eko koua? Abe nako hokogea ani putuhu ma titi ani duruuru, done sarakia ma titi hiadono ngomi utu ani duduhunu ko nomihingahua ngomino?” Hokogea o Natana ai demo o Dautika.

O Dautu wigoraka ai ngofaka o Saloomo la wituruuru

²⁸ Ka de o Dautu woihene o Natana ai demo gea de wahuloko ai nyawaika wato, “Ngini nimiahokino o ngo Baseba la muna moboali ahi himangino naa!” Ho ona imiahoko de muna moboa de momaokoino ai himangoka.

²⁹ Moboaka de una womitemo munangika wato, “Ngohi naa tonihingahu moi de ahi demoino gea duru tagou-goungu ho tomahikoboto moi Ma Jou o Yawe ai himangoka. Abe Una gea ma ngoeoka wohiduhunu ahi boditoino la ufa ma dorou ihidaene.

³⁰ Ho naa tonihibehehongoli ngonaika tato ko tawohangua ahi behehongo ma demo abe ma dihiraino totemoka. Abe duru tagou-goungu ma titi ani ngofaka o Saloomo una ahao wohituruuru ngohi naa de wodadi o koano de wogogere ahi kaderaka.”

³¹ De o Dautu wotemo ibooto de ngoi fekata o ngo Baseba momamotumuku ai himangoka de ahao motemo mato, “Ahi baluhu de ahi koano, ngohi tonganono la ka ihikaika to ngona ani wowango naga de ma owaka duru ma hohailoa!”

³² De ahao o Dautu wahuloko ai nyawaika wato, “Ngini niabehehongo o Sadoko o hidemo ma nyawa Ma Jouika gea de o Benaya o Yoyada ai ngofaka de o Natana Ma Jou ai uru ma dodofanga la ona yokokiboa ahi himangino naa.” De ipaha ona yaruange yoboaka.

³³ Yoboaka ai himangoka de una wahuloko wato, “Ngini niatoomuino ahi nyawa yamuruono naga la nimakutuono niloiki ahi ngofaka o Saloomoika. De ahao nidiai la una wogogeruku to ngohi ahi keledai ma poretuku. De gea ngini mata-mata ka idadi niwihihira-hira ma jobuubuika abe naga o Gihonoka.

³⁴ De nimahiadono genangoka de ahao ngini inihinooto o Sadoko de o Natana ngini kiani niwihitunguu o Saloomo abe niwihituagi ai peauku de o minya. De nia datorino gea de niahingahu o nyawaika abe o Saloomo una gea wodadioka o Isiraele ma nyawa manga koano. De gea kiani o nyawa utu yowuwu ma guguli de ahao ngini mata-mata nipoa-poaka niato, ‘Ngaro o Saloomo wonahikoano duru ai dekana de ai wowango duru de ma owaka!’ Hokogea nia datoro kiani nidiai genangoka.

³⁵ De gea ipahaino de ahao ngini mata-mata ka idadi nimakokutuono nidoaiyeoli naa o Yerusaleemiye. De o Saloomo ka idadi woboaino la wogogeruku ahi kaderauku naa, angamoi ngohi naa tomaputuhoka tato una gea abe wohituruuru de wodadi o Isiraele de o Yehuda ma nyawa mata-mata manga koano.”

³⁶ De o Dautu wotemo ibooto de ahao o Benaya una wotemo wato, “Ngomi naa mia hininga duru imakomoteke de to ngonali ani hininga mia koano! Ho duru mionganono abe ani Jou o Yawe wahikaaturu mata-mata la idadi duru imaketero hoka ani demo gea.

³⁷ De hongoli ngomi mionganono la Ma Jou o Yawe ka idadi Una ka ihikaika winiiki de widuhunu o Saloomo abe imaketero hoka naa ma dekanino de Una woniniiki de woniduhunu ngonaika mia koano! De ngaro abe ma oraha ngona nomihikoano ngomi de ani popareta duru irahai, masara mionganono marai ahao to ani ngofaka o Saloomo to una ai popareta gea ka idadi yatilakuru to ngona ho hiadono ka to unangohi ai romanga duru ikurutiye ngomioka!”

³⁸ Ho ona gea duru yaniiki manga koano ai demo onangika. Abe o Sadoko de o Natana de o Benaya, de nagali ona iwitobagoa-goana ma koano abe o Kereta ma nyawaino de o Pelete ma nyawaino, ona mata-mata yohupu de yokokiloiki o Saloomoika. De iwiadono unangika de iwihigaro la o Saloomo wofarenuku ai baba ai keledai ma poretuku. De wofarenuku ibooto de ahao ona iwihihira-hira o Gihonika gea.

³⁹ De genangoka manga hidemo ma nyawa Ma Jouika o Sadoko una woiki wowohama Ma Jou ai Tau o Ngoerino de wale o domba ma tataduku abe ma dola o saitunu ma minya. De ahao ma minya gea wihituagi o Saloomo ai peauku la wihitunguu abe una gea wodadi manga koano. De ahao ma guguli yawuwu de o nyawa mata-mata genangoka yopoa-poaka ato, “Ngaro o Saloomo wonahikoano duru ai dekana de ai wowango duru de ma owaka!”

⁴⁰ De ipahaino de o Saloomo una gea wolio daku o Yerusaleemiye, de ma nyawa iwihidoduruino mata-mata. De utu onangino yowuu-wuwu manga sulingi la ona mata-mata ka idadi iwihinere-nere manga koano ma hungi. De manga hagaaga ma oraha gea duru ilamokiye hiadono ma tonaka genangoka duru itodara.

⁴¹ De doka o Adonia de ai nyawa manga ngolo-ngolomoka de ona ngade-ngade yolomo ibooto de gea yoihene ma guguli ma ilingi de o nyawa manga hagaaga. De ahao o Yoaba woihene gea ho woleha wato, “Done ma titi o kia hiadono naga o nyawa manga hagaaga daku ma kotaka gea?”

⁴² De una wotemo ai gogiriakahi de naga o Yonatana abe o Abiatara ai ngofaka una woboaino onangino. De o Adonia wimake ho wiahoko la womahitigino wato, “Ngona nowohamino dika, angamoi to ngona ani gogere ikurutiye ho tonganono naga ngonaka o abari ma rorahai abe ka idadi nomihingahu ngomino.”

⁴³ Masara o Yonatana una wopaluhu wato, “Marai ahi demo ko inihisanangiua! Angamoi naa kiani tonihingahu abe nanga baluhu o Dautu una wigorakoka ai ngofaka o Saloomo ho wihidadi o koano.

⁴⁴ Abe ma koano wahidingoto ai nyawa o Sadoko de o Natana de o Benaya de ona iwitobagoa-goana ma koano la iwile o Saloomo. De ona iwitemo unangika la ka idadi wofarene ai baba ma koano ai keledai ma poretuku.

⁴⁵ De ahao o Gihonoka de o Sadoko de o Natana ona iwihituagi de o minya la iwihitunguu una gea wodadioka manga koano. De gea ipaha de ona yosobo yodoa daku ma kotaiye, de o nyawa mata-mata duru yogogarago de iwihinere-nere ma titi manga koano ma hungi gea. Ho marai gea ena ma titi hiadono ngini niihene o nyawa manga hagaaga gea.

⁴⁶ De hongoli o Saloomo una wogogerukuoka o koano ma kaderauku.

⁴⁷ De o Dautu ai nyawa abe manga gogere ikokurutiye ona yoboa unangino de naga manga sosanangi ma demo unangika abe yotemo ato, ‘Mia koano o Dautu, ngomi wiwigahoko Ma Jouika la ani ngofaka o Saloomo wamake ma rorahai dika. Abe mionganono nako to ngona ani romanga de to una masara ahao ka to unangohi ai romanga ikurutiye o nyawa-nyawaka!’ De ma oraha ma koano o Dautu ai nyawa iwitemo hokogea de ma koano naga ai ngingiduoka de gea una ai pea womaponuku de wihigiriiri Ma Jouika.

⁴⁸ Abe una wato, ‘Duru itiai ngone mata-mata hihigiriiri ngone o Isiraele ma nyawa nanga Jou o Yawe. Angamoi o wange naa wohihigunoa ngohi la ka idadi timake ahi ngofaka wodadi ahi duruuru de wogogere ahi kaderauku.’” Hokogea o Yonatana ai hingahu ma demo abe wihingahu o Adoniaika.

⁴⁹ De o Adonia ai dodiawo abe naga unangoka ma oraha yoihene ma hingahu ma demo gea de duru yokokihawanoka ho ona mata-mata yomahikabarihoka.

⁵⁰ De o Adonia una duru wimodongo o Saloomoika ho ka dau de womasikaa de wosobo woiki Ma Jou ai Tauika de genangoka womahijojoika o huhuba ma ngi ma tatadukika la wato genangino womadatoko ai boditoino.

⁵¹ De ipahaino naga o nyawa abe iwihingahu o Saloomoika ato, “Abeika, marai ani riaka o Adonia duru wonimodongo ngonaika, angamoi ma oraha naa una naga o huhuba ma ngioka de womahijojoika to ena ma tatadukika. De gea una duru womagahoko la naga ani behehongo ma demo unangika. Abe una wato, ‘Ngohi toigo la ma koano o Saloomo womahikoboto wato ko wohitomaua ngohi naa. De nako hokogea wohihibehehongo de ahao ngohi ka idadi tomapipidili ma huhuba ma ngi naa ma tatadukino.’”

⁵² De o Saloomo woihene ai demo gea abe iwidofanga unangika de ahao wotemo wato, “Nako hoka o Adonia gea ai datoro irahai dika de naga ai horomati ngohino ahao ngohi duru ko kia-kiaua todiai unangika. Masara nako hiadono una wohilawana ngohino de ahao kiani iwihohonenge.”

⁵³ De o Saloomo wotemo ipahaino de ahao wahidingoto ai nyawa yamuruono naga o huhuba ma ngiika la iwile o Adonia gea de iwiao ma koano ai himangino. Ho una woboa de womamotumuku ma koano o Saloomo ai himangoka. De ahao ma koano witemo unangika wato, “Ngona ka idadi nolio dika ani tauika.”