HEBREOS 1 - New Testament in Mixtec Coatzospan

Kakaꞌan Xúva ko kuēnta iña Iꞌxá ña

¹ Ntuvi tsikán ne, dōó kiꞌin ito kākaꞌan Xúva ko ni ñata kō. Dōó kiꞌin nuū í kakaꞌan ñá kuenta iña ñá kaꞌan náa ña.

² Ntá tsi ntuvi sāꞌá ne, kakaꞌan ñá kuenta iña Iꞌxá ña. Tsí kuenta iña Iꞌxá ña de váꞌa ña ñuxiví san ne, xéꞌe ñā é kūvi é un ntɨꞌɨ īña Iꞌxá ña dɨ.

³ Kūtuni ko tsi dóo kaxiꞌí nuu kaꞌnu Xuva kō dá kīni o tsi dóo kaxiꞌí nuu kaꞌnu Iꞌxá ña, tsí dadɨɨ kueꞌen tsí ña ni Xuva kō. Kade kúꞌvē ña é un ntɨꞌɨ̄ é īó ni tūꞌún ña e dóo ntii īní i san. Dā kúvi nakate ña kuétsi kō ne, nákutuví ña diñɨ kuaꞌa Xuva kō, ña e dóo kaꞌnu san, e dukún kān.

Xéꞌe Xuva kō é dií ka kaꞌnu Iꞌxá ña é un ntɨɨ́ ntɨ̄ɨ́ ánjē san

⁴ Iꞌxá Xuva kō ne, xéꞌe Xuva kō é dií ka kaꞌnu ña e ánjē sán ne, xéꞌe Xuva kō é dií ka kaꞌnu tsiñu vií ña é un ntɨɨ́ ntɨ̄ɨ́ ánjē san.

⁵ Tsi nté uun ánjē san ña ni káꞌān Xúva ko ni ñā: Dɨvīn ne, Iꞌxá ko; vevii xéꞌe u é kūtuni ñaꞌa tsí Iꞌxá ko o; ntē ña ní kaꞌan niꞌi ña nté uun ánjē san: Xuꞌu kúvi ú uva ō né, dɨvīn ne, iꞌxá ko kúvin.

⁶ Ntá tsi dá xee niꞌi ña Iꞌxá mii ña ñūxiví a ne, kakaꞌan ña: Un ntɨɨ́ ntɨ̄ɨ́ ánjē kó ne, na kunuu inī ñá Ihxá ko, kaꞌan Xúva kō.

⁷ Kuenta iña ánjē sán ne, kakaꞌan túꞌun Xuva kō: Kade Xuva kō é kōo ánje ñā vata kaa tatsín san, vata kaa ñuꞌu é kaīꞌxi ntáa ña ntáde tsiñu iña ña, kaꞌan.

⁸ Ntá tsi kuenta iña Iꞌxá ña ne, kakaꞌan ña: Kadan kûꞌvén ntii dañu ntuvi, Xuvā ko. Váꞌā kueꞌen koo kadan kúꞌvēn.

⁹ Dōo kakuinima o nuu i é vāꞌá san ne, ña ntío kueꞌen o nuu i é kīni kaa san. Dukuān né, Xuva ko, Xuva mii ō ne, é nakaxnúu ña o e dií ka naxnuu dínī ñá nima o é ūn ntɨɨ́ ntɨ̄ɨ́ taꞌan o, kaꞌan ña.

¹⁰ Kakaꞌan xtúku túꞌun Xuva kō: Dɨvīn, Tóꞌō, nté dīꞌna den kûꞌvén ñuxiví san ne, mii ntāꞌa o den váꞌan e dukún kān dɨ.

¹¹ Xée ntūvi é ntɨ̄ꞌɨ nuu i tsíkān, ntá tsi dɨvīn né, kutūvín ntii dañu ntūvi. Un ntɨɨ́ ntɨ̄ɨ́ nuu i tsikán ne, kuata vatā ó kakuata dōo.

¹² Nakaꞌnun váta kaa duꞌnu. Nadaman vatā ó kanadama o dōo ko. Ntá tsi dɨvīn ne, ñá kānadaman kueꞌen tsin. Ntuvi iña ó ne, ña ntɨ́ꞌɨ kuēꞌen tsi, kaꞌan Xúva ko ni Iꞌxā ña.

¹³ Nté uun ánjē ña ni káꞌan Xuva ko ni ñā: Kutūvín diñɨ kuaꞌa ko é kadā kûꞌven da nté kūvi vií u nī ña ntaínchuꞌvi o. Ñá te kuan ō ni káꞌan ña nī ánjē san.

¹⁴ Tsí da xōó ka ánjē sán ne, ña ntáde tsiñu iña Xuva ko. Tsí kataxnuu Xuva kō ánjē san é xntii ña ñāꞌa san, ña é nīꞌi i é vāꞌa é nakáku Xuva kō.