TITUS 1 - ANU LUGOD N. T. (BSI)

¹ Poulbv, ager gerya:nckon Ru:ncpvnckc odokkc Jisu Kristokc mclvgla ager gerncko, Ru:ncpvnckc balennamkvdv:dok mc:jvgdcm mc:barmopc buluk arodok kinnamdcm okodc dormo kanamki lckopc imvndagji,

² lo:dv-longkvpc turnamdok mc:tindcm okodcm Ru:ncpvncbv,

³ sc:kobv cdvlosin lume:ycm luma:nc dv:tagkvdv:dok dv:tak po:pcbong pesubitoji odokkc lenpcnam ayirardo Bvk agomdo lcngkansuto lutad inamdokki okodokki ngom Ru:ncpvnckc lulvgkki ngoluk Motuncdc lugablvgtoji.

⁴ Tituskolo:pc, ngok awodc lo:dcm mc:jvgnamlo: Ayangc odokkc mcnganc Ru:ncpvnc cdc Abudokkc odokkc Kristo Jisubv ngoluk Morturnckolokkc.

Kreti:do Tituskc Ager

⁵ Cdcmpila:na ngo nom Kreti:do lc:tonc, jc no aimodokupc okodc aimangaji, odokkc tawon appv:do kapc ngo luyirlvgtoji nom abv:ncm agercm tolvgdopc, jodi tani: akonc aima:pc lunam kama:ji,

⁶ nc:ng akko:lok milbongcnc, odokkc bvk ommang kvdv:dc mc:jvgamdagji odokkc aisi:ma:nc ager gergo:nc cmna lujcmnammangcdcmanggom agomasv tadma:ncpc incmang.

⁷ Kapcnc dormo ager gergcnclok gergurnc Ru:ncpvnckc okum kanggabya:ncpc ipc, aima:nc agom lugong kapa:ru:ma:yc; bv ngowong cmna mc:suru:pa:ma:yc cdcmanggom apong tv:la tvngvrsunnc cdcmanggom kvnggv:pc pamvnsugo:la cdcmanggom arc pa:pc cmna mc:bo ka:boncpc ima:pc,

⁸ cmpige:la mibobolv:nc, arrom aipc mc:namc, bvk avyc avkc ru:tumpc isula, lc:si-lc:romkama:pc, angunnc, odokkc avycm mentumsula du:la:ncpc;

⁹ bv aroru:nc agomdcm kapc poyirkanc cdcmpc gagtvla du:pa:ru:yc odomvlojen bv airu:nc astrong agomdcm luyirbila:ycpc odokkc cdc sc:kobulu cdcm lumeyc cmna luyotla luka:mvnsudagji.

¹⁰ Kapcnc bojcrungko agom lunam tadma:nc dung, arvsu:ma:pc lunnc odokkc yadgo:nc, anguru:pc cdc gadpuknc kvdv:dc;

¹¹ bulum aso:pc du:moru:pa:yc; bulu crang appvngcm aglvng sangapmola:yam aima:pc ncrkvg arc pa:nam lcgangc poyirgo:la:yam okodcm bulukkc poyirpcnam sotto kama:ji.

¹² Bulukkolok avkc akonc, buluk avkc lungor agom lunckonc, ludag, “Kreti amikvdv:dc lo:dcm lume:lunnc, aima:nc simvnc, lo:bagnc dorv-donyoncbulu.”

¹³ Sc lukan lubinamsc arro. Cdcmpidag bulum kvnggv:pc torpc ge:langka, jc bulu mc:jvglo aroru:pc mc:jvgycpc,

¹⁴ Jiwukvdv:dok leke do:yvng kvdv:dok agom tadnamdcmyam cdcmmanggom tani:kvdv:dok lulvgkvdv:dcm sc:kobulu arodcm lupakdagji.

¹⁵ Angunncdokkcpc appvngci angundag, cmpige:la aima:ncdokkcpc odokkc mc:jvgma:ncdokkcpc okodc:sinci angunmang, buluk asinrungkvdv:dci odokkc mcngcsagcmc:namkvdv:dci mcngkcrcp-mc:mcrcpdag.

¹⁶ Bulu Ru:ncpvncmc kindag cmna lukansudag, cmpige:la bulu bvm buluk agerkvdv:dokki lupaksudag; bulum kvnggv:pc tayumpcnamc, agom lukam tadma:nc, atv ainc agerlokkcpcsin aima:nc.