ROMANKVDVNG 2 - ANU LUGOD N. T. (BSI)

Ru:ncpvnckc Kcba:ba:nam

¹ Cdcmpidag nolum mcma:yc, C:i taniya, no sc:kovcidaggom, cdvlo no sc:koiycm kcbangcm ba:doji; kapila:nc bvm kcbangcm ba:dodcm no avycm avyc aima:nc cmna lukesuto, kapila:nc, kcbang ba:nckvdv:dc, cdc agerv:dcm ila dung.

² Ngolu kindagjc Ru:ncpvnckc kcba:ba:namdc cdc sc:kobulu cdcmpc agercmgerdagji oddarbulu pvnga:dag.

³ No mcngkvdagnci c:i taniya, jc cdcmpinc agerkvdv:dcm cdvlo cdcbulu idoji ckvdaggom no avdc idoji, no Ru:ncpvnckc kcba: ba:namdokkc dugsila:ycnci?

⁴ Cdcmanggom no mc:ya-mc:sala mcngka:la ka:donci Bvk cddvkojc ayang-abodcm odokkc mentumsula du:namdcm? No kinma:nci jc Ru:ncpvnckc ayang-abodc nom asin mc:dvrra mc:latsudokupc mc:modag cmna?

⁵ Cmpige:la nok turnc odokkc mentumsula du:la:ma:nc asindokki no aglvngcm mckumsudung avyc avkc lcgangc aglvng longcdokkcpc cdvlo Ru:ncpvnckc dormoki ba:nam kcba:dcm ba:yckuji.

⁶ Kapila:nc Bv tani: appvngcm Bvk ager gerkamdcmpc bipcnammcm biyc:

⁷ ainc agercm mentumsula du:namki gerla amingvnamcm odokkc mcnggcnammcm odokkc sima:pc du:namcm manckvdv:dcm, Bv turyarla turnamcm biyc;

⁸ cmpige:la cdc sc:kobulu birudi:dagnc odokkc arodcm lukamdcmpc tadma:nc, cmpige:la aima:nc agerdcm lukamdcmpc taddagnc, odo aglvngclang aglv:la ager gernamc lenyc.

⁹ Sc:kobv aisi:ma:nc agercm gerdagji appv: tani:yc aglvngcmnang dcmkosunam pa:yc, Jiwukvdv:dc panga:po:yc odokkc Girik kvdv:dcsin,

¹⁰ cmpige:la amin gvnamc mcnggcnammc odokkc mc:po mcnganc appvngkcpc iycpc sc:ko ainc agercm gerdagji, Jiwu kvdv:dc panga:po:danna odokkc Girikkvdv:dc:sin.

¹¹ Kapila:nc Ru:ncpvncbv akonongcm aipc mc:namcm lcngkanmang.

¹² Lujvglurodc kama:pc cdc sc:kobulu pa:bcm itonc lujvglurodc kamangv:pc yogpakycku, odokkc sc:kobulu lujvg luro du:dodcm pa:bcm itonc lujvglurodokki kcbangcm ba:yc.

¹³ Kapcnc cdc lujvglurodcm tadncdc:mang Ru:ncpvnckc kcra:lo sc:kobv dormokadagji, cmpige:la lujvglurodcm tadla ager gerncdcmc arodag cmna ludag.

¹⁴ Cdvlo Ru:ncmc kinma:nc tani:kvdv:dc sckkc lujvg lurodc kama:ji cmmumpci okodcm lujvglurodc madagji idagmvlo, cdc cddv:bulu bulukkcpc lujvglurro, bulukkc lujvglurro kamangcigomsin.

¹⁵ Bulu ka:to jc lujvg lurodc okodcm madagaji buluk asinkvdv:do adtak, buluk mc:namsagnamcsin lukancm lubidag odokkc buluk luker luyermvnsunam mc:namkvdv:dc aimang cmna lugcdag cdcmanggom bulum mc:yinsuyc odo longcdo,

¹⁶ ngok tadponc agomdcmpc, Ru:ncpvncbv tani:lok lc:sinam kvdv:dcm kcbangcm Kristo Jisukkokki ba:dag.

Jiwu Kv:dv:dc:lang Lujvglurodc

¹⁷ Cmpige:la nolu av avyc Jiwu cmna lusumvlo odokkc lujvglurodo kcgc:suyc odokkc nok Ru:ncmc ajon jonnamdcm bottapakpc lusuyc odokkc bv mcngkamdcm kindo odokkc;

¹⁸ odokkc aipakpc aidagji cdcm aidag cmna tolvgyc, lcga:dc nolum lujvglurodo luyirtag,

¹⁹ odokkc nolu miglunc kvdv:dok gvkanboncrung cmna mc:sudomvlo, sc:kobulu kcmolo du:ji bulukkcpc pvangcmvlo,

²⁰ aima:nc ager gernckvdv:dcm aipc geryirkunnc, ko:kangkvdv:dok poyirnc, lujvg lurodcm kinnamclang arodc du:pumsula–

²¹ nolu cmpcmvlo sc:kobulu ammem poyirdonc, nolu avycm luyirsuma:ycnci? Nolu cdvlo dopso:namdok birudi:pc lutadcm lubido, nolu dopso:donci?

²² Nolu sc:kobulu akonc aima:nc agercm geryoka cmna luycnc, no ami nc:ngcm la:bidonci? No sc:kobulu airu:pc ui moimang kvdv:dcm tayumdonc, nolu kumko okum kvdv:dcm rodkutdonci?

²³ Nolu sc:kobulu lujvglurodo bottapc mansudonc, no lujvglurodcm tadma:pc Ru:ncpvncmc mcnggcma:pc idonci?

²⁴ Kapila:nc, cdcm adla lc:namdcmpc, “Ru:ncpvnckc amindcm lugc gcto nolukkokki Ru:ncpvncmc angu tani:kvdv:dok ara:lo.”

²⁵ Gadpuknamdc aroru:pc arc kadag no lujvglurodok lukamdcmpc taddu:mvlo; ckvdaggom nolu lujvglurodcm tadka:ma:mvlo nok gadpuknamdc gadpukma:namcmpc idag.

²⁶ Cdcmpila, tani: ako bvm gadpukma:namdc lujvg lurodok lukamkvdv:dcm lukamdcmpc taddo, bv gadpukma:namdcm gadpuknammc cmna kvma:yclang?

²⁷ Cmpcmvlo cdc sc:kobulu amvr-amopc gadpukma:namcji ckvdaggom lujvglurodcm taddagji nolum aimang cmna luke:yc nolu sc:kobulukkc adla lc:nam lujvgko du:ji odokkc gadpugc dung odokkc lujvglurodcm tadma:ji.

²⁸ Kapcnc bv ncrkvg Jiwumang sc:kobv ru:yidok Jiwuycji, cdcmanggom aropc gadpukmang ru:yidoklang amvr-amodok gadpuknamdc.

²⁹ Bv Jiwuyc sc:kobv arang arangbokkcji, odokkc aroru:pc gadpuknamdc asin ara:bok agomcmvn, yalodokkc odokkc lukam lukamardcmpcmang. Bvk lubondc tani:kvdv:dokkcmang cmpige:la Ru:ncpvnckolokkc.